Dəniz yataqlarında yeni

quyuların qazmasına start verilib

Bu gün ölkə iqtisadiyyatının inkişafında müstəsna rolu olan Azərbaycan Respublikası Dövlət Neft Şirkəti (ARDNŞ) respublikanın quru və dəniz yataqlarında qazma işlərini yüksək səviyyədə davam etdirir.

ARDNŞ-in qazma sahəsi üzrə ixtisaslaşmış ən böyük struktur bölmələrindən biri olan “Kompleks Qazma İşləri” Tresti şirkətə məxsus 25-ə yaxın yataqda beynəlxalq standartların tələblərinə uyğun olaraq yeni texniki vasitələr və texnologiyadan istifadə etməklə, ətraf mühitə ziyan vurmadan, işçilərin sağlamlığını qoruyan tam təhlükəsiz əmək şəraitində, yüksək səviyyədə istehsalat və inzibati nizam-intizam qaydalarına riayət edilməklə sifarişçinin tapşırıqlarını vaxtında və keyfiyyətlə həyata keçirməklə, axtarış-kəşfiyyat və istismar qazma işlərini aparır. Qazma işləri Abşeron neftli-qazlı rayonlarında, dəniz akvatoriyası üzrə Bakı və Abşeron arxipelaqında və s. yataqlarda həyata keçirilir. Sifarişçilər tərəfindən təqdim olunmuş məlumatlara əsasən, respublikada neft-qaz hasilatının sabit saxlanılması üçün istismar qazması işlərinin və yeni yataqların aşkar edilməsi üçün axtarış-kəşfiyyat qazma işlərinin yerinə yetirilməsi məqsədi ilə trest ARDNŞ-in strukturuna daxil olan və böyük elmi potensiala malik olan idarələrlə sıx əməkdaşlıq edir.

Qazmaçılar ötən ay olduğu kimi, bu aya da uğurla başlayıblar. “Kompleks Qazma İşləri” Trestinin müdiri, təcrübəli mütəxəssis İsgəndər Şirəlinin rəhbərliyi ilə həyata keçirilən qazma işləri nəticəsində mədənçilərə yeni quyular təhvil verilib. Belə ki, “Neft Daşları” yatağındakı 1887 saylı Stasionar Dəniz Özülündən 1908 nömrəli quyu əsaslı təmirdən sonra istismara verilib. Quyu IX horizontdan fontan üsulu ilə sutkalıq 25 ton neft hasilatı ilə istismara daxil edilib. Quyuda istismar işləri “Neft Daşları” NQÇİ tərəfindən həyata keçirilir.

İyul ayında həmçinin trest üzrə daha bir quyuda qazma işləri başa çatdırılıb. “Neft Daşları” yatağında yerləşən 2521 nömrəli meydançadan layihə dərinliyi 1490 metr, layihə horizontu QaLD3 olan 2526 nömrəli maili istiqamətləndirilmiş istismar quyusudur. Quyunun gözlənilən hasilatı gündəlik 10 tondur. Hazırda quyuda mənimsəmə işləri davam etdirilir. “Qaradağ” yatağındakı 476 nömrəli quyu da bu ay təmirdən sonra istismara verilib. Məhsuldar Qatın VII horizontunda 3379-3331 metr intervalda süzgəci açılmış quyuya sutkada 275000 kubmetr qaz vurulur ki, həmin qazdan da payız-qış mövsümündə istifadə olunacaq. Quyuda istismar işləri Qaz Anbarları İstismarı İdarəsi tərəfindən həyata keçirilir.

Qeyd edək ki, 2014-cü ilin iyun ayı ərzində Azərbaycan Respublikası Dövlət Neft Şirkəti (Müştərək Müəssisələr və Əməliyyat Şirkətləri istisna olmaqla) 9908 metr qazma işi həyata keçirib. Bu sahədə görülmüş işlərin 9875 metri istismara, qalanı isə kəşfiyyata aid olub. 2014-cü ilin yanvar-iyun aylarında ARDNŞ üzrə (Müştərək Müəssisələr və Əməliyyat Şirkətləri istisna olmaqla) 72130 metr qazma işi görülüb ki, bunun da 70502 metri istismara, 1628 metri isə kəşfiyyata aid olub.

Bütün bunlarla yanaşı, 2014-cü ilin iyul ayı ərzində “Kompleks Qazma İşləri” Tresti 2 quyuda qazma işlərinə start verib. Belə ki, “Neft Daşları” yatağında yerləşən 2585 nömrəli meydançadan layihə dərinliyi 2500 metr, layihə horizontu QÜQ olan 2592 nömrəli maili istiqamətləndirilmiş istismar quyusunda qazmaya başlanılıb. Həmçinin Pirallahı adası yatağında yerləşən 1140 nömrəli meydançasından layihə dərinliyi 900 metr, layihə horizontu QA olan 1138 nömrəli maili istiqamətləndirilmiş istismar quyusunda qazmaya başlanılıb.

Nail Rəhimzadə

İki sahil.- 2014.- 12 iyul.- S.19.