Azərbaycanın təcrübəsi öyrənilir

“The Business Year” nəşrinə müsahibəsində ölkə iqtisadiyyatı, daxili və xarici siyasətimizlə bağlı açıqlama verən dövlət başçısı bildirir ki, gələcək planlarımız daha böyük, çoxşaxəli və qlobal əhəmiyyətlidir

Şərqi Avropada, Cənubi Qafqaz və MDB-də iqtisadi sahədəki liderliyini qoruyan müasir Azərbaycan təhlükəsizlik, sabitlik və firavanlıq məkanına çevrilmişdir. Son illərdə baş verən müsbət dəyişikliklər regionun sosial-iqtisadi inkişafına da təsirsiz ötüşməmişdir. Bütün bunlar sabitliyin qorunub saxlanmasında, həyat tərzinin yaxşılaşmasında maraqlı olan ölkə əhalisinin əhval-ruhiyyəsini daha da yüksəldir.

Son on ildə ölkəmiz böyük tərəqqi yolu keçmiş siyasi, iqtisadi, demokratiya, diplomatiya sahəsində mühüm dəyişikliklər baş vermişdir ki, sadaladığımız nailiyyətlər Prezident İlham Əliyevin davam etdirdiyi islahatlar proqramının uğurla həyata keçirilməsi sayəsində mümkün olmuşdur. İqtisadi sahədə qazandığımız liderlik Azərbaycanın beynəlxalq aləmdə mövqelərinin möhkəmlənməsinə şərait yaratmışdır. Bu gün ölkəmizi nəinki tanıyırlar, onunla hesablaşırlar, çünki Azərbaycan beynəlxalq sabitliyin möhkəmlənməsi, tərəfdaşlarımızın enerji təhlükəsizliyinin təmin edilməsi, beynəlxalq koordinatlar sistemində mühüm rol oynayan Cənubi Qafqaz regionunun inteqrasiya potensialının inkişafı üçün başlıca fiqurlardandır.

Sivilizasiyalararası dialoq məkanı kimi nüfuz qazanan tolerant ölkəmizə artan marağın təməlində də daim əsas tutulan dinamik inkişaf, ölkə əhalisinin sosial müdafiəsinin etibarlı təminatına yönəlmiş xalq-iqtidar birliyi, insan amilinə diqqət, vətəndaş- məmur münasibətlərinin ədalət prinsipinə əsaslanması kimi şərtlər dayanır.

“The Business Year” nəşrinə verdiyi müsahibəsində inkişafımızın təməl prinsiplərindən söz açan Prezident İlham Əliyev Azərbaycanın iqtisadi potensialının azad iqtisadiyyat üzərində qurulması ilə əldə olunan nailiyyətlərdən söz açmış, iqtisadi və siyasi islahatların paralel tətbiqinin səmərəsini çox illik təcrübədə özünü doğrultmasını inkişafımızın Azərbaycan modelinin uğuru adlandırmışdır. Dünya təcrübəsindən də bəllidir ki, demokratik inkişafı olmayan ölkələrdə iqtisadiyyatın tərəqqisi bir tərəfli olmaqla istənilən nəticəni verməyəcəkdir. Azərbaycanın qısa müddətdə dünya birliyində belə uğur qazanmasının əsas səbəbi vətəndaşların dövlətin daxili və xarici siyasətini dəstəkləməsi, iqtidarla birlik və həmrəylik nümayiş etdirməsidir.

Müsahibədə qeyd olunduğu kimi, ötən il Azərbaycanda keçirilən prezident seçkilərində cənab İlham Əliyevin qazandığı qələbəni şərtləndirən amillər isə yetərincədir. Xalq-iqtidar birliyinin sarsılmazlığı, ümummilli lider Heydər Əliyev ideyalarının ləyaqətlə davam etdirilməsi, sabitlik şəraitində ictimai-siyasi həyatda qazanılan uğurlar, əhəmiyyətli qlobal layihələrin reallaşmasında Azərbaycanın tutduğu mövqe, ölkədə yaradılan sağlam biznes və şəffaf investisiya proqramlarının beynəlxalq təşkilatlar tərəfindən dəstəklənməsi... Seçkilərlə bir sıra informasiya agentliklərinə müsahibəsində bu məqamlara aydınlıq gətirən Azərbaycan Respublikası Prezidenti Administrasiyasının rəhbəri, akademik Ramiz Mehdiyevin açıqlamasında qeyd olunduğu kimi tam demokratik şəraitdə təşkil olunan prezident seçkilərində Azərbaycan seçicisi ümumi səsvermə yolu ilə ölkənin gələcəyi barədə öz seçimini etdi. Seçkilər ərəfəsində Azərbaycanda ictimai-siyasi hadisələri təhlil edən tanınmış “beyin mərkəzləri”nin açıqlamalarında da ən şanslı namizəd kimi cənab İlham Əliyevin adı çəkilirdi. Yüksək vətəndaşlıq və elektoral fəallıq şəraitində keçən seçkilərdə namizədlərə münasibətini bildirən insanlar səs verərkən başa düşürdülər ki, ölkənin gələcəyi, sosial-iqtisadi islahatların sonrakı gedişi, Azərbaycan iqtidarının titanik səyləri nəticəsində əldə edilmiş sabitliyin və inkişafın taleyi ilk növbədə xalqın düzgün mövqeyindən asılıdır.

Cənab İlham Əliyev dövlətə başçılıq etdiyi illərdə dəfələrlə siyasi bəsirət və uzaqgörənlik nümayiş etdirmiş, fəaliyyət qabiliyyətini, mürəkkəb məsələləri dəqiq həll etmək bacarığını təsdiqləmişdir. Buna görə də ölkə vətəndaşları İlham Əliyevə etimad göstərməklə tərəqqiyə, layiqli həyata, sosial rifaha və aydın gələcəyə səs verdilər. Müsahibəsində bu məqamlara aydınlıq gətirən Prezident İlham Əliyevin vurğuladığı kimi seçkiləri müşahidə edən AŞPA, Avropa Parlamenti, ATƏT , İƏT, MDB ölkələri və digər mötəbər təşkilatlar seçki prosesini birmənalı olaraq yüksək qiymətləndirmiş, onun azad, ədalətli və şəffaf keçdiyini bəyan etmişlər. Bu da onu göstərir ki, seçki və onun nəticəsi ilə bağlı Azərbaycan xalqının və beynəlxalq birliyin rəyləri üst-üstə düşmüşdür. Azərbaycan xalqı öz seçimi ilə həm bu günədək həyata keçirilən siyasətə, həm də Prezident İlham Əliyevin gələcək fəaliyyətinə öz dəstəyini ifadə etmişdir. Andiçmə mərasimində Azərbaycanın müstəqilliyi, insanların firavan həyatı naminə çalışacağını bildirən Prezident İlham Əliyevin vurğuladığı kimi on ildə Azərbaycanda ictimai-siyasi proseslər müsbət istiqamətdə getmiş, demokratiya yolu ilə uğurla addımlamışdır.

Azərbaycanda bütün azadlıqlar təmin edilmişdir. Söz, mətbuat, sərbəst toplaşmaq, vicdan azadlığı təmin edilmiş demokratik proseslər müsbət istiqamətdə getmişdir. İqtisadi uğurlarla bərabər, siyasi islahatların davamlı aparılması da ölkəmizin uğurlu inkişafını şərtləndirir.

Azərbaycanda dinlərarası, millətlərarası münasibətlər bir örnəkdir. Keçirilən çoxsaylı beynəlxalq tədbirlər, forumlar, konfranslar Azərbaycanı dünyaya tolerantlıq məkanı, dözümlülük, multikulturalizm mərkəzi kimi təqdim etmişdir. Prezident İlham Əliyevin Bakı Beynəlxalq Multikulturalizm Mərkəzinin yaradılması ilə bağlı imzaladığı fərman da bəşəri dəyərlərə sadiqlik nümunəsidir. Təsadüfü deyil ki, Azərbaycanın bu sahədəki təcrübəsi öyrənilir.

Maraq doğuran müsahibədə fikirlərini statistik rəqəmlərlə diqqətə çatdıran Prezident İlham Əliyev bildirir ki, Azərbaycan iqtisadi inkişaf göstəricilərinə görə dünyanın lider ölkələrindən birinə çevrildi və gücləndi: “Düşünülmüş proqramlar əsasında həyata keçirilən məqsədyönlü tədbirlər nəticəsində ümumi daxili məhsul 3,4 dəfə, iqtisadiyyatın qeyri-neft sektoru 2,6 dəfə, büdcə gəlirləri 16 dəfə artdı, strateji valyuta ehtiyatlarının həcmi isə 50 milyard dolları keçdi. Ölkə iqtisadiyyatına qoyulan investisiyaların həcmi isə 170 milyard dolları ötmüşdür.”

Azərbaycanın uğurları aparıcı beynəlxalq təşkilatlar, nüfuzlu reytinq agentlikləri tərəfindən də yüksək qiymətləndirilir. Dünya İqtisadi Forumunun “Qlobal Rəqabət Qabiliyyəti İndeksi 2013-2014” hesabatına əsasən, dünya ölkələrinin rəqabət qabiliyyətliliyi reytinqində Azərbaycan 39-cu yeri tutmuşdur.

Xarici siyasət sahəsində də uğurlu nəticələrə nail olunmuşdur. “Bu illər ərzində dünyada mövqelərimiz möhkəmlənmiş, Azərbaycan beynəlxalq münasibətlər sistemində öz layiqli yeri olan, rəyinə hörmətlə yanaşılan ölkə kimi böyük nüfuz qazanmışdır. Bizdə keçirilən çoxsaylı beynəlxalq tədbirlər əyani şəkildə təsdiq edir ki, ölkəmiz artıq regionun siyasi, iqtisadi və mədəni mərkəzi kimi qəbul edilir” söyləyən Prezident İlham Əliyevin açıqlamasında vurğulandığı kimi dünyada sosial gərginliyin, işsizliyin və yoxsulluğun artması fonunda Azərbaycanda sürətli inkişaf, tərəqqi, əhalinin rifahının yüksəlməsi, ictimai-siyasi sabitlik, milli həmrəyliyin möhkəmlənməsi, inkişafımızın gələcək istiqamətlərini müəyyən edən başlıca amillərdir ki, bu prioritetlər “ “Azərbaycan 2020- gələcəyə baxış” İnkişaf Konsepsiyasında olduğu kimi qəbul olunan “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın da əsas mahiyyət və məqsədidir. Elmin inkişafı, yeniliklərin istehsalata tətbiqi, müasir dövrün çağırışlarını nəzərə almaqla daha mühüm enerji, nəqliyyat, infrastruktur layihələrinin hazırlanması inkişafımıza təsir edən amillərdəndir. Azərbaycan qlobal transmilli və çoxşaxəli regional layihələrin təşəbbüskarıdır. “Ölkəmizin həyata keçiridiyi enerji siyasəti təkcə bizim üçün deyil, həm də regionumuz və dünya üçün mühüm əhəmiyyat kəsb edir” kimi fikirləri ilə qlobal enerji layihələrindən söz açan Prezident İlham Əliyev bildirir ki, “Şahdəniz-2” dünyanın enerji xəritəsində yeni vəziyyətin yaranmasına səbəb olacaq və tarixə “XXI əsrin kontraktı” kimi düşəcəkdir.

Bunun üçün İKT sahələrinin genişləndirilməsini başlıca vəzifə kimi diqqətə çatdıran Prezident İlham Əliyevin imzaladığı “Azərbaycan Respublikasında informasiya cəmiyyətinin inkişafına dair 2014-2020-ci illər üçün Milli Strategiya”da perspektivlər əksini tapmışdır.

Ötən ildən “Azərspase-1” süni peykini orbitə çıxarmaqla kosmik ailənin üzvünə çevrilən, dünyada ilk dəfə tətbiq olunan, Azərbaycan brendi kimi tanınan və əhaliyə 25 növ hüquqi xidmət göstərən, qısa müddətdə bir milyondan artıq müraciəti yerinə yetirən “ASAN xidmət”in fəaliyyətinin genişləndirilməsinin əsasında da İKT-nin inkişafı kimi mühüm məsələlər dayanır. İKT-nin inkişafına yönəldilmiş 3 milyard dollardan artıq vəsait hesabına rabitə və informasiya sahəsinin inkişafı 8,2 dəfə artmışdır.

Təbii ki, görülən işlər qarşıya məqsəd kimi qoyulan Azərbaycan iqtisadiyyatının şaxələndirilməsi istiqamətində nəzərdə tutulan vəzifələrin həllinə imkan yaradacaqdır. Cari ilin “ Sənaye ili” kimi elan olunmasında da məqsəd dövlət nəzarətində olan və ölkədə coğrafiyası genişlənən qeyri-neft sektorunda sənayenin istehsal potensialının artırılması, xarici bazarlara çıxışın sürətləndirilməsi, xarici ölkələrlə birgə fəaliyyət göstərən iri müəssisələrin sayının artırılmasıdır.

Azərbaycanın xarici siyasət sahəsində qazandığı nailiyyətləri müsahibəsində açıqlayan Prezident İlham Əliyev bu sahədə də çox uğurlar qazanıldığını bildirir. “Bu gün Azərbaycan müstəqil siyasət yürüdən, qlobal siyasi proseslərə və beynəlxalq münasibətlər sisteminə öz baxışı olan, mövqeyi nəzərə alınan bir dövlət hesab olunur” söyləyən Prezident İlham Əliyev Azərbaycanın BMT Təhlükəsizlik Şurasına qəbulunu xarici siyasətimizin dünya birliyində dəstəklənməsi, beynəlxalq aləmdə böyük nüfuza sahib olması kimi şərtləndirir. Azərbaycan ATƏT, AŞPA, Aİ, İƏT kimi qurumlarla iki və çox tərəfli münasibətlərə hörmət və ehtiramla yanaşır. Keçən il Avropa İttifaqı ilə vizaların sadələşdirilməsi ilə bağlı imzalanan saziş Aİ ilə Azərbaycan arasında qarşılıqlı strateji tərəfdaşlığın ən səmərəli formatını yaratmaq imkanlarını artıracaq. “Eurovision” mahnı yarışmasının ölkəmizdə mütəşəkkilliklə keçirilməsi, Birinci Avropa Oyunları üçün Azərbaycanın seçilməsinin özü xarici siyasətimizin, respublikada mövcud olan təhlükəsizliyin və sabitliyin təzahürüdür. Azərbaycanın altı ay müddətinə AŞPA Nazirlər Komitəsinə rəhbərliyi kimi etimada layiq görülməsi də xarici siyasətimizin növbəti uğurudur. Danılmaz faktdır ki, Azərbaycan qlobal təhlükəsizliyə, dünyada sülhün bərqərar olmasına, sivilizasiyalar və mədəniyyətlərarası dialoqun inkişafına layiqli töhfəsini verir. Hazırda Azərbaycan Cənubi Qafqaz regionunun siyasi, iqtisadi və humanitar mərkəzinə çevrilmişdir. Bakı şəhərinin mühüm beynəlxalq tədbirlərə ev sahibliyi etməsi artıq ənənə halını almışdır. 2013-cü ildə İslam Əməkdaşlıq Təşkilatı çərçivəsində Fələstinə yardım məqsədilə beynəlxalq konfransın, III Beynəlxalq Humanitar Forumun, İkinci Mədəniyyətlərarası Dialoq Forumunun, Davos Dünya İqtisadi Forumunun və digər yüksək səviyyəli qlobal tədbirlərin keçirilməsi buna sübutdur. Avropa və Asiya ölkələri ilə ənənəvi tərəfdaşlıq münasibətlərini davam etdirmək, Qoşulmama Hərəkatı ölkələri, Latın Amerikası və Afrika dövlətləri ilə siyasi, iqtisadi və humanitar əməkdaşlığın gücləndirilməsi xarici siyasətimizin prioritetlərindəndir. Təsadüfi deyil ki, son dövrlərdə Latın Amerikasının bir sıra ölkələri Ermənistan-Azərbaycan, Dağlıq Qarabağ münaqişəsinin həllində Azərbaycanın haqlı mövqeyinə dəstək verir. Artıq dünyanın 10 ölkəsi 1992-ci ildə erməni silahlı birləşmələri tərəfindən Xocalıda törədilmiş qətliamı soyqırımı aktı kimi tanımış, həmin dövlətlərin parlamentləri müvafiq qərarlar qəbul etmişlər.

Deyilənlər bir daha göstərir ki, ölkəmizin daxili və xarici siyasətinin əsasında Azərbaycan dövlətçiliyinin, xalqının milli maraqları, mənafelərin qorunması kimi ümdə məsələlər dayanır. Ermənistan-Azərbaycan, Dağlıq Qarabağ münaqişəsinin həllində də siyasətimizin müsbət nəticə verəcəyinə daim əmin olan Prezident İlham Əliyevin vurğuladığı kimi danışıqlar prosesini hər cür bəhanələrlə pozmağa, status-kvonu saxlamağa çalışan Ermənistanın cəhdləri boşa çıxacaq. Sonda haqq-ədalət, Azərbaycanın prinsipiallığı, tutduğu ədalətli mövqe qalib gələcək, münaqişə Azərbaycanın ərazi bütövlüyü çərçivəsində həllini tapacaq.

Xuraman İsmayılqızı

İki sahil.- 2014.- 21 may.- S.3.