“Ulduz” qapılarını açdı

2001-ci ildə “Ulduz” şokolad fabrikinin fəaliyyətə başlaması respublika iqtisadiyyatında qənnadı və yeyinti sahəsinin inkişafına güclü təkan verib

Dünən “Ulduz” Şokolad Fabrikində mətbuat nümayəndələri üçün “Açıq Qapı” günü elan edildi. Əvvəlcə media nümayəndələri üçün fabrikin konfrans zalında təqdimat keçirildi.

Təqdimat mərasimində “Veysəloğlu” Şirkətlər Qrupunun Maliyyə və İnkişaf işləri üzrə müşaviri İlqar Nuri qeyd etdi ki, fabrikin əsas məqsədi yerli və xarici bazarlarda beynəlxalq standartlara cavab verən yüksək keyfiyyətli və geniş çeşidli məhsullar təqdim edərək öz nüfuzunu qorumaq və artırmaq, fəaliyyət sahəsini yerli və beynəlxalq qanunvericiliyin tələbləri, Keyfiyyət İdarəetmə və Qida Təhlükəsizliyi Sistemlərinə uyğun olaraq qurmaq və Halal Qida qanunlarına riayət edərək, istehlakçıya tam təhlükəsiz, etibar etdiyi qidanı təqdim etməkdir. İ.Nuri hal-hazırda fabrikdə müxtəlif sahələrdə 600-ə yaxın işçi çalışdığını bildirərək yaxın illərdə fabrikdə yeni məhsulların istehsalı ilə istehsalat sahələrinin genişləndirilməsi nəzərdə tutulur. İstehsal həcminin artması işçilərin də saylarının bir neçə dəfə artmasına şərait yaradacaq. İşçilərin şəraiti barədə məlumat verilərkən İ.Nuri onu da əlavə etdi ki, fabrik rəhbərliyi işçilərin rahatlığını təmin etmək məqsədilə işçilərin iş vaxtı çay və isti yeməklə, işə gəlib getmələri üçün nəqliyyat vasitəsilə, həmçinin xüsusi iş geyimləri ilə təminatını yüksək səviyyədə həyata keçirir. İşçi heyətinin bilik və bacarıqlarının, peşəkar səviyyəsinin artırılması üçün şirkət hesabına daxili, xarici kurslar və seminarlar təşkil olunur.

Təqdimat mərasimində fabrikin direktoru Vüsal Şərifov rəhbərlik etdiyi istehsal müəssisəsi barədə ətraflı məlumat verərək bildirdi ki, 2001-ci ildə “Ulduz” şokolad fabrikinin fəaliyyətə başlaması respublikamızın iqtisadiyyatında qənnadı və yeyinti sahəsinin inkişafına güclü təkan verib. Onun sözlərinə görə, fabrikin fəaliyyətə başlaması daxili istehsala, qənnadı və yeyinti sənayesinə yeni keyfiyyət, yeni dad gətirib. V.Şərifov qeyd etdi ki, “Ulduz” şokoladlarını müxtəlif çeşidlərdə yerli bazara təqdim etməyə başlayan fabrikin məhsulları tez bir zamanda istehlakçılar tərəfindən sevilib. “Məhsullara olan tələbat hər gün artırdı. Fabrik yerli bazara yeni bir ad “Ulduz” şokoladlarını müxtəlif çeşidlərdə təqdim etməklə öz mövqeyini bir qədər də möhkəmləndirdi. Keyfiyyətli məhsul, zövqləri oxşayan qablaşdırma, sərfəli qiymət, yüksək səviyyədə xidmət müştərilərin sayının sürətlə artmasına səbəb oldu. Fabrik ilk məhsulu olan, tez bir zamanda istehlakçılar tərəfindən sevilərək qəbul edilən “Ulduz” şokoladlarından bu günkü müxtəlif rəngarəng çeşidli məhsullarına qədər böyük inkişaf yolu keçib. “Ulduz” fabriki yerli bazarla yanaşı Orta Asiya, Rusiya, Gürcüstan kimi xarici bazarlarda da şokolad markaları olan “Ritm”, “Rocky”, “Tango”, “Xonça”, “Seasons”, “Sema”, “Wedding” və bir sıra digər məhsulların müxtəlif çeşidləri ilə böyük nüfuz qazanıb. Fabrik 2014-cü ilin əvvəlindən daha iki yeni xəttin - Topnut markalı Draje və Cırtdan, Freş, Alpinmilk, Villi markalı Karamel xətlərinin işə salınması ilə öz fəaliyyət sahəsini genişləndirib. Fabrikdə istehsal olunan müxtəlif çeşidli şokolad məhsulları Azərbaycanın bütün bölgələrinə də yayılıb və böyük istehlakçı kütləsinin rəğbətini qazanıb. İnkişafdakı dinamikliyi möhkəmləndirmək, ixrac potensialını daha da genişləndirmək məqsədi ilə beynəlxalq standartların tələblərinə uyğun təkmilləşdirmə siyasəti bu gün də davam etdirilir.” V.Şərifov fabrikin inkişaf edərək ölkə hüdudlarından kənarda da tanınmağa və istehlakçı auditoriyasını genişləndirməyə nail olduğunu dilə gətirib. Fabrikin rəhbəri onu da bildirdi ki, ötən illərdə fabrikin ixrac potensialı daha da artırılaraq Rusiya Federasiyasının Moskva, Sankt Peterburq, Ufa, Mahaçkala, Kazan, Krasnodar, Rostov, Çelyabinsk, Yekaterinburq, Kalininqrad, Nijnı Novqorod, Nazran, Qroznı kimi iri şəhərlərinə, eyni zamanda Ukrayna, Belorus, Gürcüstan, Latviya, Litva, Estoniya, Qırğızıstan, Türkmənistan, Tacikistan, Monqolustan, İsrail, İraq, Fələstin, Yəmən, Əfqanıstan, BƏƏ və digər ölkələrə Azərbaycan məhsullarının ixracına başlanılıb.

Fabrikin Keyfiyyətə nəzarət şöbəsinin müdiri Lalə Eminova hər zaman istehlakçılara yüksək keyfiyyətli məhsullar təklif edən müəssisədə bu gün müasir standartlara cavab verən avadanlıqlar quraşdırıldığını söylədi. Qeyd etdi ki, fabrikdə yaradılan şərait, texnoloji avadanlıqların daim yenilənməsi “Ulduz” şokolad fabrikini qida sənayesi sektorunda qabaqcıl şirkətlərdən birinə çevirib. Onun sözlərinə görə, istehsal prosesində keyfiyyətə daim önəm verən şirkətin rəhbərliyi bunun üçün Almaniya, Belçika, İtaliya və bir sıra qabaqcıl Avropa ölkələrinin tanınmış şokolad istehsalçılarının fəaliyyət mexanizmini öyrənib və fabrikdə yeni müasir avadanlıqlar quraşdırılıb. L.Eminova vurğuladı ki, tamamilə avtomatlaşdırılmış, müasir qurğuların istismara verilməsi sayəsində məhsul istehsalı artırılıb və fabrikdə dünyanın an qabaqcıl müəssisələri ilə rəqabət apara biləcək modern iş şəraiti qurulub. “Hazırda fabrikin istehsal gücü saatda 3200 kiloqram və daha artıqdır. Əldə olunan uğurlar kollektivi daha məsuliyyətlə çalışmağa, texnoloji yeniliklərin tətbiqini daim diqqət mərkəzində saxlamağa sövq edir. Bazar iqtisadiyyatı şəraitində fəaliyyət göstərən hər bir müəssisə kimi “Ulduz” şokolad və karamel fabriki də bu gün öz araşdırmalarını davam etdirərək işini günün tələbləri səviyyəsində qurmağa çalışır.”

Mətbuat və ictimaiyyətlə əlaqələr şöbəsinin müdiri İlham Məmmədzadə və başqaları da çıxış edərək, istehsal müəssisəsində yaradılan şərait, əldə olunan nailiyyətlər barədə ətraflı məlumat verdilər.

Təqdimat mərasimindən sonra jurnalistlər istehsal prosesi ilə yaxından tanış oldular. Fabrikin müasir anbar infrastrukturuna malik olması onu öz sektorunda qabaqcıl şirkətlərdən birinə çevirib. Bazar iqtisadiyyatının təşəkkül tapdığı bir dövrdə, müasir texnologiyaların istehsalata tətbiqi, eləcə də müştəri məmnuniyyəti “Ulduz”un əsas fəaliyyət hədəflərindəndir. Fabrik işçilərin və müştərilərin təhlükəsizliyini təmin etmək məqsədi ilə işçilər mütəmadi olaraq tibbi müayinədən keçirilir.

Media nümayəndələri fabrikin işçilərinin gündəlik istifadə etdiyi yeməkxanada nahar etdikdən sonra “Açıq Qapı” günü sona çatdı.

Orxan Vahidoğlu

İki sahil.- 2014.- 1 oktyabr.- S.13.