ARDNŞ-də insan resurslarının idarə edilməsi

sahəsində görülən işlər və qarşıda duran

vəzifələrə həsr olunmuş geniş müşavirə

Oktyabrın 22-də ARDNŞ-nin Baş ofisində insan resurslarının idarə edilməsi sahəsində görülən işlər və qarşıda duran vəzifələrə həsr olunmuş geniş müşavirə keçirilmişdir.

Tədbirdə Şirkətin vitse-prezidentləri, idarə və müəssisələrin rəhbərləri, eləcə də kadr xidmətlərinin məsul işçiləri iştirak etmişlər. Tədbiri giriş sözü ilə açan ARDNŞ-nin birinci-vitse-prezidenti, akademik Xoşbəxt Yusifzadə Şirkətin strukturunun təkmilləşdirilməsi, apardığı kadr siyasəti, bu məqsədlə yaradılmış İnsan Resurslar Departamentinin fəaliyyətindən danışmış, kadr seçiminin obyektiv və şəffaf aparıldığını diqqətə çatdırmış, bu sahədə mövcud problemlərin aradan qaldırılması istiqamətində zəruri tədbirlərin həyata keçirilməsinin vacibliyini vurğulamışdır.

Təqdimatla çıxış edən İnsan Resursları Departamentinin rəisi Asif Bəkirli insan resurslarının idarə edilməsinin əsasları barədə ətraflı məlumat vermiş, ARDNŞ-nin kadr siyasətindən danışmışdır. Bildirilmişdir ki, hazırda Departament qarşısında duran əsas məqsəd tələb olunan vakant yerlər üzrə savadlı, səriştəli və peşəkar kadrların seçilməsi, bu prosesin ədalətli və şəffaf keçirilməsidir. İnsan resurslarının idarə edilməsi müəssisə daxilində insan resurslarının planlanması, bunun üçün lazımi iş analizlərinin və öhdəliklərin müəyyənləşdirilməsi, insan resurslarının seçilməsi üçün iş elanlarının verilməsi, iş üçün müraciət edənlərin qəbul edilməsi, görüşlərin aparılması, işə uyğunlaşma, təhsil və inkişaf işləri, uğur və iş qabiliyyətinin ölçülməsi, vəzifədə yüksəlmə, iş dəyişdirmə, işdən çıxarılma, işi qiymətləndirmə, əmək haqqı, nizam-intizam, sosial-mədəni fəaliyyətlər, tibbi xidmət və başqa oxşar işləri koordinə edir. ARDNŞ-nin insan resurslarının səmərəli idarə edilməsi, o cümlədən kadrların seçilməsi, hazırlanması, işə qəbulu, karyera yüksəlişinin planlaşdırılması, peşəkarlıq səviyyəsinin artırılması, habelə bununla əlaqədar digər işlərin görülməsi istiqamətində bir sıra tədbirlər həyata keçirilmiş, müvafiq standartlar və digər daxili normativ sənədlər qəbul edilmişdir. A. Bəkirli qeyd olunan normativ sənədlərin tələblərindən irəli gələrək ARDNŞ üzrə həyata keçirilmiş işə qəbul, başqa işə keçirilmə, təlim ehtiyaclarının müəyyənləşdirilməsi, həmçinin insan resurslarının daha səmərəli idarə edilməsi ilə bağlı qarşıda duran vəzifələr haqqında geniş söz açmışdır. O, qeyd etmişdir ki, son bir ildə 3433 nəfər ARDNŞ-nin idarə və müəssisələrinə işə qəbul olunmuşdur ki, bunun da 2962 nəfəri yerli strukturlar, 471 nəfəri isə İnsan Resursları Departamenti tərəfindən həyata keçirilmişdir. İşçilərin yerdəyişməsi ilə bağlı isə son bir ildə 31630 əməliyyat icra olunmuşdur. Bu əməliyyatların 218-i Departament tərəfindən həyata keçirilmişdir. Həmin dövrdə 104 nəfər üzrə aparılmış yerdəyişmə əməliyyatı qanunvericiliyə zidd olduğu üçün pozuntu kimi qiymətləndirilmişdir.

Tədbirdə çıxış edən Şirkət rəhbərliyinin nümayəndələri, eləcə də yerli struktur təşkilatların təmsilçiləri kadr siyasəti çərçivəsində çoxsaylı işlərin həyata keçirilməsinə baxmayaraq, insan resurslarının idarə edilməsi ilə bağlı proseslərin daim təkmilləşdirilməsinə ehtiyac olduğunu bildirmiş, bu mənada keçirilən müşavirənin əhəmiyyətini yüksək qiymətləndirmişlər. Sonda mövcud problemlərin aradan qaldırılması yolları müzakirə edilmiş, təkliflər dinlənilmişdir.

Nail Rəhimzadə

İki sahil.- 2014.- 23 oktyabr.- S.4.