İlham Əliyev: Ordu quruculuğu Azərbaycanda uğurla gedir və gedəcəkdir

Ordu quruculuğunda aparılan islahatların milli təhlükəsizliyimizə xidmət etdiyini “Düşmənin hücumlarının qarşısını qətiyyətlə alan və xeyli canlı qüvvə itirən Ermənistana layiq olduğu dərsi verən Azərbaycan əsgərlərinin mətanəti göstərdi ki, dünya birliyində nüfuzu getdikcə artan, mövqeləri möhkəmlənən, siyasi və diplomatik əlaqələri genişlənən Azərbaycan həm də güclü müdafiə qüdrətinə malikdir” sözləri ilə ifadə edən Ali Baş Komandan vurğulayır ki, biz güclü hərbi potensiala malikik

Nazirlər Kabinetində keçirilən iclasda cari ilin doqquz ayının sosial -iqtisadi inkişafının yekunları, qarşıda duran vəzifələr barədə açıqlama verən Prezident İlham Əliyev ölkənin müdafiə qüdrətinin yüksəldilməsi istiqamətində görülən işlərdən də danışdı: “Ordu quruculuğu Azərbaycanda uğurla gedir və gedəcəkdir. Üçüncü rübdə təmas xəttində Ermənistan silahlı qüvvələrinin təxribatına da bizim hərbçilərimiz layiqli cavab vermişlər. Onlarla işğalçı məhv edilmişdir. Onlara böyük sarsıdıcı zərbə vurulmuşdur.”

Siyasi -iqtisadi inkişaf kontekstində formalaşan ordu quruculuğunun təkmilləşdirilməsi istiqamətində aparılan və bəhrəsini verən islahatlar inkişafın Azərbaycan modelinin əsas prioritetlərindəndir. Prezident, Ali Baş Komandan İlham Əliyevin vurğuladığı kimi, Azərbaycanda ordu quruculuğu ümummilli lider Heydər Əliyevin adı ilə bağlıdır. Hakimiyyətə qayıdışı ilə ayrı-ayrı qruplara xidmət edən könüllü hərbi dəstələri ləğv etməklə nizami ordu yaradılmasını suverenliyimizin başlıca şərtləri kimi diqqətdə saxlayan ulu öndər bütün sahələrdə olduğu kimi ordu quruculuğunda da önəmli islahatlar apardı. Qısa müddətdə qarşısına qoyduğu məqsədə nail olan ümummilli lider Heydər Əliyev “Azərbaycan bir dövlət kimi möhkəmlənib, Azərbaycan silahlı qüvvələri, ordusu yaranıb, güclənib, inkişaf edibdir və o, bu gün müstəqil Azərbaycanın milli mənafelərini, torpaqlarını, onun hüdudlarını qorumağa qadir ordudur” deməklə bir daha bildirirdi ki, xalqla ordunun birliyi həm xalqın qüdrətini artırır, həm də ordunu daha güclü edir. Silahlı Qüvvələr günündə keçirilən hərbi paradlar müdafiə qüdrətimizin yenilməzlik nümunəsi kimi vətəndaşlarımızı sevindirir.

Regionda hərbi və nizami hazırlığı baxımından seçilən Silahlı Qüvvələrimizin getdikcə qüdrətləndiyi bir zamanda Azərbaycan Respublikasının Hərbi Doktrinasının qəbulu tarixi hadisə olmaqla müdafiə və təhlükəsizlik tədbirlərini əks etdirməsi baxımından da əhəmiyyətli oldu. Təhlükəsizlik sisteminin konseptual əsasını təşkil edən amilləri ictimaiyyətə çatdıran, müdafiə siyasətinin məqsəd və prinsiplərinin dövlət siyasətinə uyğun müəyyənləşdirilməsi baxımından əhəmiyyətli sənəd olan doktrinada ordu quruculuğu sahəsində aparılan islahatların parametr və istiqamətləri aydın göstərildi.

Ali Baş Komandanın hər bir əmrini yerinə yetirməyə daim hazır olduqlarını bildirən əsgər və zabitlərin peşəkarlığının, hərbi hazırlığının gücləndirilməsi üçün həyata keçirlən tədbirlərin davam etdiriləcəyini bildirən Prezident İlham Əliyevin qeyd etdiyi kimi müharibə şəraitində yaşayan respublikamızın Milli Ordusunun Ermənistan silahlı qüvvələri tərəfindən işğal olunan ərazilərimizi azad etmək üçün imkanlarını artırması müstəqil Azərbaycanın daxili işidir və bu sahədə kənardan müdaxilə yolverilməzdir.

Regionda hərbi və nizami hazırlığı baxımından seçilən Silahlı Qüvvələrimizin qüdrəti cari ilin iyul-avqust aylarında Ermənistanın təxribat-kəşfiyat qruplarının təmas xəttində törətdikləri xəyanət nəticəsində yaranan hərbi qarşıdurmada bir daha bəlli oldu. Düşmənin hücumlarının qarşısını qətiyyətlə alan və xeyli canlı qüvvə itirən Ermənistana layiq olduğu dərs verən Azərbaycan əsgərlərinin mətanəti göstərdi ki, dünya birliyində nüfuzu getdikcə artan, mövqeləri möhkəmlənən, siyasi və diplomatik ələaqələri genişlənən Azərbaycan həm də güclü müdafiə qüdrətinə malikdir. “Necə ki, siyasi və iqtisadi meydanda ermənilərə qalib gəlmişik, döyüş meydanında da onlara qalib gəlməyə qadirik. Biz güclü hərbi potensiala malikik. Artıq bu, müxtəlif vaxtlarda nümayiş etdirilib. Hərbi təlimlərdə və paradlarda bizim texnikamız nümayiş etdirilir. Amma bizim ən böyük gücümüz əsgərlərimizin cəsarəti, vətənpərvərliyidir.”

Bölgədə ən qüdrətli orduya malik Azərbaycanın Mərkəzi və Şərqi Avropa ölkələri ilə əməkdaşlığın inkişaf etdirilməsi məqsədilə NATO tərəfindən yaradılmış Şimali Atlantika Əməkdaşlıq Şurasına daxil olması, “Sülh naminə tərəfdaşlıq” proqramına qoşularaq (MDB-də 4-cü ölkə) hərbi təlimlərdə iştirak etməsi nizami ordumuzun NATO standartları səviyyədə hazırlıqlı olmasının göstəricisidir . Ölkəmizi qurumda ləyaqətlə təmsil edən hərbçilərimiz təlimlərdə fəal iştirak etməklə hərbi hazırlığı ilə diqqəti çəkir. Azərbaycan zabitlərinin beynəlxalq standartlara cavab verən xidmətlərinin beynəlxalq hərbi ekspertlər tərəfindən yüksək qiymətləndirilməsi hər bir azərbaycanlıda qürur hissi doğurur. Bu baxımdan inamla demək olar ki, NATO ilə Azərbaycan arasında əməkdaşlığın getdikcə daha da güclənməsi ölkəmizdə ordu quruculuğuna göstərilən diqqət və qayğının ifadəsidir.

Bakıda keçirilən NATO PA-nın “Cənubi Qafqaz: Çağırışlar və imkanlar” mövzusunda 86-cı Rouz-Rout seminarında da ölkəmizə önəmli tərəfdaş kimi xüsusi dəyər verildi. Quruma üzvlüyünün 20-ci ildönümünə təsadüf edən belə tədbirlərin üçüncü dəfə Azərbaycanda keçirilməsi mürəkkəb region olan Cənubi Qafqazda iqtisadi inkişafı ilə bölgədə liderlik edən ölkəmizə maraqdan irəli gəlir.

Seminarda “Bütün neft və qaz sərmayələrini bir yerə qoysaq Azərbaycan iqtisadi artım möcüzəsi yaratmışdır” kimi sözlərin səslənməsi,

“Azərbaycanın artan siyasi, iqtisadi imkanları sayəsində ordu quruculuğu istiqamətində aparılan islahatlar Alyansın standartlarına uyğunlaşdırılacaq” kimi ifadələr qarşılıqlı inamın ifadəsi olmaqla NATO-Azərbaycan əməkdaşlığının davamlı olacağını göstərir.

Dağlıq Qarabağ münaqişənin istənilən variantda həllinin mümkünlüyünü diqqətə çatdıran Ali Baş Komandanın ordumuzun qüdrətinə inamı böyükdür.

“Münaqişənin ərazi bütövlüyü prinsipləri çərçivəsində və Azərbaycanın ərazi bütövlüyü çərçivəsində həll olunması məsələsi danışıqlar prosesində və razılaşdırılmış məsələlərdə öz əksini tapıb” söyləyən, müdafiə qüdrətimizin istənilən səviyyədə olduğunu Ermənistan rəsmilərinin diqqətinə çatdıran Prezident İlham Əliyev rəsmi İrəvanı qeyri-konstruktiv mövqeyindən əl çəkməyə çağırmaqla, Azərbaycan əsgərinin döyüş hazırlığının artdığını da bildirir.

İldən-ilə artan iqtisadi imkanlarından istifadə edərək ordu quruculuğu sahəsində nailiyyətlər qazanan Azərbaycanın uğurlarından ehtiyatlanan ermənipərəst qüvvələrin narahatlığının heç bir əsası olmadığını “ Müdafiə məsələlərini həll etmək Azərbaycanın süveren hüququdur” sözləri ilə bildirən Ali Baş Komandan İlham Əliyevin tez-tez cəbhə bölgəsində olması əsgərlərin döyüş əhval-ruhiyyəsini artırmaqla xalq- ordu birliyini möhkəmləndirir.

Müdafiə Sənayesi Nazirliyinin, onun bölmələrinin yaradılması da Azərbaycan iqtisadiyyatının güclənməsini göstərən amildir.

Qısa müddətdə Müdafiə Snayesi Nazirliyinin hərbi təyinatlı zavod və yerli istehsal birliyinin yaradılması o deməkdir ki, Azərbaycan Ordusuna lazım olan əsas təminat daxili istehsal hesabına formalaşmalıdır. Həmin müəssisələrdə 700 adda hərbi təyinatlı məmulat istehsal olunur. Dövlət büdcəsindən ordu quruculuğu və müdafiə məqsədləri üçün ayrılan vəsaitlər 10 dəfədən çox artırılmışdır. Azərbaycanda ordu quruculuğu prosesi daxili imkanlar hesabına həyata keçirilir.

Özünü müvafiq hərbi avadanlıqlarla təmin edən Müdafiə Sənayesi Nazirliyinin formalaşması, təkmilləşməsi, istehsal etdiyi məhsulların beynəlxalq standartlara cavab verməsi artan müdafiə qüdrətimizin göstəricisidir.

Dövlət başçısı kimi İlham Əliyevin bu sahədəki yeniliklərlə daim maraqlanması, müasir texnologiyalar əsasında müasir silah növlərinin Azərbaycanda hazırlanması üçün maddi və maliyyə bazasının formalaşması istehsal olunan məhsulların çeşid və keyfiyyətini yüksəldəcək. Başlıca tələb və tapşırıq da budur: Silahlı qüvvələrin ehtiyacını ödəyə biləcək həcmdə, beynəlxalq standartlara uyğun məhsul istehsalını artırmaq: “Hazırda biz öz gücümüzü artırırıq və eyni zamanda danışıqlar prosesində iştirak edirik. Mən tam əminəm ki, ordumuz nə qədər güclü olsa danışıqlar prosesində mövqeyimiz o qədər güclənər.

Regionda ilk olaraq “ADEX-2014” beynəlxalq müdafiə sənayesi sərgisinin Azərbaycanda təşkili ölkəmizdə siyasi -iqtisadi inkişaf kontekstində formalaşan ordu quruculuğunun təkmilləşdirilməsi istiqamətində aparılan və bəhrəsini verən islahatların uğurudur. Ölkəmizin müdafiə sənayesinin inkişafını əks etdirən “ADEX-2014” sərgisinin Bakıda təşkili bir də ona görə əhəmiyyətlidir ki, dünya iqtisadiyyatına inteqrasiyanı əsas prioritet kimi hədəf seçən Azərbaycanda bütün sənaye sahələrində müşahidə olunan inkişaf ölkəmizin müdafiə qüdrətini möhkəmləndirən hərbi sənayenin formalaşmasına da təsirini göstərir.

Dünyanın 34 ölkəsindən 200 şirkət və 22 rəsmi nümayəndənin iştirak etdiyi sərgidə ölkəmiz 37 müəssisədə istehsal olunan məhsullarla təmsil olunur. Azərbaycan müdafiə sənayesinin qısa müddətdə belə inkişaf etməsi milli müdafiə sahəsində inkişafın Azərbaycan modelinin təsdiqidir. Müdafiə Sənayesi Nazirliyinin, onun bölmələrinin yaradılması da Azərbaycan iqtisadiyyatının güclənməsini göstərən amildir.

“Azərbaycan markası” ilə nümayiş etdirilən avadanlıqlara artan maraq bunu bir daha göstərdi. Dünyanın ən qüdrətli dövlətlərinin təmsil olunduğu sərgilərdə hərbi sənaye sahəsində ilk addımlarını atan Azərbaycanın iştirakının özü iqtisadi, müdafiə qüdrətimizin göstəricisidir.

Hazırda sayı 51 olan istehsal sahələrinə 5 yeni zavodun, 7 istehsal sahəsinin əlavə olunacağı planlaşdırılır.

Dünya hərb sənayesində özünəməxsus yeri olan Türkiyə, Rusiya, Fransa, Çin, İsrail, Cənubi Afrika Respublikasının şirkətlərinin iştirak etdiyi sərgilərdə Azərbaycanın Müdafiə Sənayesi Nazirliyinin müəssisələrində istehsal olunan avadanlıqların nümayişi və maraqla qarşılanması təqdir olunası haldır.

Milli Ordumuzun əsgər və zabitləri respublikanın təhlükəsizliyini, əhalinin əmin-amanlığını və mühafizəsini təmin etmək, ölkəmizin sərhədlərini sudan, qurudan, havadan qorumaq , Ermənistan silahlılarının nəzarət etdiyi torpaqlarımızı işğaldan azad, ərazi bütövlüyümüzü bərpa etmək iqtidarındadır. Atəşkəs rejiminə əməl etməyən Ermənistanın intensivləşən hərbi müdaxilələrinin qarşısının alınması, düşmənə layiq olduğu cavabın verilməsi də göstərir ki, artıq Azərbaycan ordusu güclənib, qüdrətlənib. Əsgərlərimiz cəbhə bölgələrində fəallıq göstərir. Xüsusilə strateji əhəmiyyətli bölgələrdə müdafiə işinin daha möhkəm, etibarlı təşkili Ermənistanda xof yaradır.

Azərbaycanın müdafiə qüdrətinin yenilməzliyini “Bir daha demək istəyirəm ki, biz beynəlxalq müstəvidə çox böyük nüfuza malikik. Əlbəttə ki, Azərbaycan Ordusu bu gün nəinki bölgədə, dünya miqyasında güclü ordular sırasındadır - həm hərbi potensialına, həm döyüş qabiliyyətinə, həm də təchizata görə. Əminəm ki, Azərbaycan gücləndikcə ordumuz da güclənəcəkdir. Ordumuz istənilən vəzifəni həll etməyə hazırdır, buna qadirdir. Mən Ali Baş Komandan kimi bundan sonra da ordu quruculuğuna, ordunun inkişafına öz dəstəyimi verəcəyəm” sözləri ilə ifadə edən Prezident İlham Əliyevin qeyd etdiyi kimi güclü Azərbaycan gücsüz Ermənistan ilə istənilən dildə danışa bilər: “Biz sadəcə olaraq bölgədə, regionda sabitliyi qorumaq üçün hələ ki, danışıqlar yoluna üstünlük veririk. Çünki Azərbaycan bölgədə sabitləşdirici ölkədir.”

Xuraman İsmayılqızı

İki sahil. - 2014.- 24 oktyabr.- S. 6.