Prezident İlham Əliyev:

Azərbaycan çoxmillətli, çoxdinli ölkədir

Gənclər Siyasəti üzrə Birinci Qlobal Forumda ölkə gənclərinin təhsil, idman, mədəniyyət sahəsində beynəlxalq səviyyədə qazandığı uğurlardan danışan dövlət başçımız bildirdi ki, biz sıx əməkdaşlığa, daha çox anlaşmaya, dəstəyə töhfə verməyə çalışırıq

Düşünülmüş daxili və xarici siyasəti nəticəsində beynəlxalq əlaqələri möhkəmlənən, dünya siyasətinə təsir imkanları artan Azərbaycan öz prinsipial mövqeyinə sadiq qalaraq etibarlı tərəfdaş kimi tanınır, dəstəklənir. Azərbaycanın Qərb ilə Şərq arasında sivilizasiyalararası dialoq məkanı kimi seçilməsi də ölkədə davamlı olaraq qorunan siyasi sabitliyin, demokratik inkişafın nəticəsidir.

Son 10 ildə iqtisadi uğurlarla bərabər siyasi islahatların aparılması da ölkəmizin dəstəklənən mövqeyini şərtləndirmişdir. Belə ki, Azərbaycanda son on il ərzində möhkəmlənən ölkələrarası əməkdaşlıq, dinlərarası, millətlərarası münasibətlər artıq dünya dövlətlərində təcrübə kimi yayılır, öyrənilir, nümunə göstərilir. Ölkəmizdə keçirilən çoxsaylı beynəlxalq tədbirlər, forumlar, konfranslar Azərbaycanı dünyada tolerantlıq məkanı, dözümlülük, mültikulturalizm mərkəzi kimi tanıdır. “Bu bizim həyat tərzimizdir, eyni zamanda siyasətimizdir. Bizim siyasətimizin mərkəzində Azərbaycan vətəndaşıdır” söyləyən Prezident İlham Əliyev vurğulayır ki, respublikamız dünya miqyasında bu istiqamətdə aparılan siyasətlə seçilən, fərqlənən ölkələrdəndir.

Davos İqtisadi Forumu kimi mötəbər bir təşkilatın növbəti iclasının Bakıda keçirilməsi ölkəmiz üçün böyük uğur olmaqla Azərbaycanın dünyada tanıdılması baxımından da əhəmiyyətli idi. Qafqaz və Orta Asiyada gedən proseslər, iqtisadi və siyasi vəziyyətlə bağlı məsələnin müzakirəsi üçün Azərbaycanın seçilməsi bir daha göstərir ki, Azərbaycan nəinki coğrafi, həm də siyasi, iqtisadi və mədəni mərkəzdir.

Dünya miqyasında mötəbər təşkilat kimi tanınan, çox böyük nüfuza malik siyasətçiləri, ictimai xadimləri birləşdirən Madrid Klubunun toplantısının, Amerika-Azərbaycan konfransının, Birinci Qafqaz, Krans Montana Forumlarının Bakıda keçirilməsi də çox əlamətdar hadisə kim yaddaşlarda qaldı.

Bakıda keçirilən Dünya Mədəniyyətlərarası Dialoq Forumu da Azərbaycanın humanitar sahədə, yəni dinlərarası, mədəniyyətlərarası dialoqun aparılması üçün bir mərkəz kimi formalaşmasına öz xidmətini göstərmişdir. Belə mühüm tədbirlər üçün Azərbaycanın seçilməsi onu deməyə əsas verir ki, bu, artıq ənənəvi xarakter daşıyacaqdır. Bakı Beynəlxalq Humanitar Forumlarının keçirilməsi üçün Azərbaycana üstünlük verilməsi ölkəmizə diqqət və marağın ifadəsidir:

Bu yaxınlarda işini yekunlaşdıran və Azərbaycana daha böyük marağın ifadəsi olan dördüncü Bakı Beynəlxalq Humanitar Forumundan sonra paytaxtımızda Gənclər Siyasəti üzrə Birinci Qlobal Forumun keçirilməsi daha bir tarixi hadisə dir. Forumda çıxış edən və fəal inkişaf sahəsində gənclərin fəaliyyətinin yüksəlməsinə başlıca amil kimi diqqət yetirildiyini bildirən Prezident İlham Əliyev təhsil, mədəniyyət, incəsənət və idman sahəsində qazanılan nailiyyətlərdə gənclərin rolunu yüksək dəyərləndirdi: “Gənclər siyasətinə gəldikdə, həmçinin olduqca mükəmməl qanunvericilik bazası mövcuddur. Gənclər siyasəti ilə bağlı qanun var. Azərbaycanda gənclərlə bağlı iki Dövlət Proqramı qəbul olunub. Bu yaxınlarda biz Gənclər Fondu yaratmışıq. Dövlət büdcəsindən bu fonda ayrılan vəsaitlər gənclərə özlərini cəmiyyətdə təqdim etməyə şərait yaradır.”

Son illərdə Azərbaycan gənclərinin idman sahəsində qazandığı nailiyyətlərin xüsusilə diqqətəlayiq olduğunu bildirən Prezident İlham Əliyev haqlı olaraq vurğulayır ki, idman əsas prioritetlərdəndir. Azərbaycan idmançıları beynəlxalq yarışlarda, olimpiadalarda, dünya və Avropa çempionatlarında, oyunlarında ölkəmizi laiyqincə təmsil edirlər. XXX London Yay Olimpiya Oyunlarında Azərbaycanın 200 ölkə arasında 30-cu yeri tutması ölkəmizdə idmanın inkişafının göstəricisidir. “Gələn il Azərbaycanda ilk Avropa Oyunları keçirəcəyik. Bu bizim üçün tarixi hadisə olacaq. Panamerika, Asiya, Afrika oyunlarından fərqli olaraq Avropa Oyunları əvvəllər heç zaman keçirilməyib” söyləyən Prezident İlham Əliyevin bildirdiyi kimi 2016-cı ildə Dünya Şahmat Olimpiadasının, 2017-ci ildə İslam Həmrəyliyi Oyunlarının, 2020-ci ildə futbol üzrə Avropa çempionatının bəzi oyunlarının Azərbaycanda keçirilməsi ilə bağlı qərarların qəbulu ölkəmizdəki siyasi sabitlik və inkişafa dəstək olmaqla gənclər siyasətinin də uğurlu davamına maraqdan irəli gəlir.

Bəşəriyyət bu istiqamətdə inkişaf edir, ümumbəşəri dəyərlər hər bir normal cəmiyyətdə əsas təşkil edir. Belə olan halda multikulturalizmlə bağlı problemlər əlbəttə ki, açıq şəkildə müzakirə edilməlidir. Hər bir insan, xüsusilə gənclər multimədəniyyətli cəmiyyətlərin inkişafı naminə öz töhfəsini verməlidir. Bu sahədə çox mühüm addımlar atan Azərbaycanda bu istiqamətdə toplanan təcrübə dövlət siyasətinin əsasını təşkil etməklə nümunə göstərilir.

Dağlıq Qarabağ münaqişəsinin müzakirəsi ilə bağlı Parisdə keçirilən görüşlərdən sonra ölkələrin təhlükəsizliyinin önəmini gənclərin diqqətinə çatdıran Prezident İlham Əliyevin qeyd etdiyi kimi, Azərbaycan humanitar fəlakətlə də üzləşmişdir. Uzun illərdir ki, beynəlxalq birlik tərəfindən tanınan Azərbaycan torpaqlarının 20 faizi hələ də Ermənistan silahlı qüvvələrinin işğalı altındadır. Azərbaycanın əzəli torpaqları olan Dağlıq Qarabağ və onun ətrafında yerləşən yeddi bölgəyə erməni işğalçı qüvvələri nəzarət edir, gəncləri ölümə sürükləyən, gələcəyimizi təhdid edən narkotik bitkilər yetişdirirlər. Eyni zamanda Azərbaycan xalqına qarşı etnik təmizləmə aparır, ekoloji və mənəvi terror törədirlər. Bir milyondan artıq azərbaycanlı öz doğma torpağında qaçqın-köçkün vəziyyətinə salınmışdır.

“Təhlükəsizlik məslələrinə gəldikdə, biz həmçinin yalnız gənc nəslə güvənirik” söyləyən dövlət başçımızın çağırış xarakterli tövsiyələri də maraqla qarşılanır: “Beynəlxalq ictimaiyyət nəinki bu məsələ ilə əlaqədar, ümumiyyətlə bizi qəti surətdə dəstəkləyir. Bu, yalnız bizim fəal diplomatiyamızın və beynəlxalq səviyyədə səylərimizin sayəsində deyil, o cümlədən Azərbaycanın artıq etibarlı tərəfdaş, müstəqil xarici siyasət yürüdən, regional və beynəlxalq problemlərə gəldikdə, öz mövqeyi ilə seçilən ölkə kimi tanınması nəticəsində mümkün oldu.”

Dünyanın müxtəlif ölkələrini təmsil edən gənclər arasında fərqli peşə sahibləri olsa da irqindən, milli mənsubluğundan asılı olmayaraq sağlam düşüncəli gənclərin maraq dairəsində olan qlobal məsələlərin üstünlük təşkil etdiyi müasir dövrümüzdə hadisələrə siyasi baxışların düzgün istiqamətləndirilməsi, dünyada sülhün, əmin-amanlığın təminatı hər kəsin maraq və diqqət göstərdiyi qlobal problemdir. Çıxışında siyasətçilərin məsuliyyət məsələsinə toxunan Prezident İlham Əliyev dünyada ədalət prinsipinə hörmətlə yanaşmanın regional sabitliyə başlıca töhfə olduğunu da xatırlatdı. Bəzi ölkələrdə siyasi sabitliyin pozulması naminə populist çağırışların, yalançı vədlərin törətdiyi fəsadları bütün ölkələrin siyasi sabitliyi, insanların dinc yaşaması üçün təhlükə adlandırdı. İnsanları “onları gözləyən xoş güzəran” adı ilə aldadaraq cinayətlərə sürükləyən qorxulu tendensiya kimi diqqətə çatdırdı: “Siyasi xadimlərin siyasi məsuliyyəti, iqtisadiyyat üzərində məsuliyyət, həmçinin çox əhəmiyyətli məsələdir. Siyasətçilər öz vədlərini yerinə yetirməlidirlər.”

Forumda qeyd olunduğu kimi, insanların bir araya gəlməsində musiqi, idman böyük əhəmiyyət daşıyır. Qarşılıqlı anlaşma, dostluq rəmzi olan belə humanitar tədbirlər zamanı insanlar sağlam rəqabət naminə mübarizə aparır. Belə tədbirləri millətləarası dialoq adlandırmaq daha məqsədəuyğundur. Bu sahədə isə Azərbaycanın böyük təcrübəsi vardır. Doğrudan da Şərqlə Qərb arasında körpü olan Azərbaycan xalqların birlik və əməkdaşlıq əlaqələri üçün də əlverişli, sülh və sabitlik məkanıdır. Azərbaycanın sivilizasiyalararası dialoqların təşkilindəki təşəbbüsləri dəstəklənir. Bu təcrübənin belə humanitar Forumlarla davam etdirilməsinin özü insanlığa verilən qiymət, xalqların milli mənəvi dəyərlərinə hörmətdir.

Azərbaycan elə bir ölkədir ki, orada müxtəlif dinlər mövcuddur, xalqlar həmişə sülh, həmrəylik, əməkdaşlıq şəraitində yaşamışlar. Ölkəmizdə cəmiyyətin maraqları ilə dövlət siyasəti yanaşı dayanır. Yəni bəşəriyyətin gələcəyi üçün vacib amil olan birgəyaşayış qaydalarının təbliği sahəsində Azərbaycan təcrübəsi daim öyrənilməlidir.

Xuraman İsmayılqızı

İki sahil.- 2014.- 31 oktyabr.- S.2.