Abadlaşan və inkişaf edən Şamaxı

Rayonun sosial-iqtisadi uğurları insanların həyatına firavanlıq gətirir

Azərbaycanın bütün bölgələrində böyük abadlıq-quruculuq işləri gedir. Vətəndaşların sosial-məişət problemlərinin həlli də məhz bu dəyərli işlərin nəticəsində sürətlənir. İndi ölkə vətəndaşı Avropa həyat tərzini yaşamaq iddiasındadır. Davamlı təbii qazı, enerjisi olan, müasir standartlara uyğun magistral yolları, geniş infrastrukturu qurulan rayonlarda insanların yeni iş yerləri ilə təmin olunması da sosial rifahı yüksəldən önəmli amildir.

Xüsusən son bir neçə ildə müasir infrastrukturların yaradılması, paytaxtın və eləcə də regionların sosial-iqtisadi inkişafının sürətləndirilməsi üçün Prezident İlham Əliyev tərəfindən 20-dən çox dövlət proqramları imzalanıb. Onların bir çoxu artıq uğurla icra olunub və yüksək nəticələr əldə edilib. Bu gün belə bir inkişaf tendensiyası Şamaxı rayonunda da reallaşır.

2014-cü ildə və cari ilin birinci rübündə rayonda sosial-iqtisadi inkişaf davam etdirilmişdir. Şamaxılılar üçün ən əlamətdar hadisələrdən biri Azərbaycan Prezidenti İlham Əliyevin ötən il mayın 14-də rayona səfər etməsidir. Həmin səfər çərçivəsində dövlətimizin başçısı Şamaxı rayonunun Şərədil kəndində müasir standartlara uyğun inşa olunmuş beşulduzlu “Şamaxı Palace Platinum By Rixos” otelinin açılış mərasimində iştirak etmişdir. Qeyd edək ki, bu otel təkcə Şamaxı rayonu deyil, bölgə üçün də əhəmiyyətli turizm obyektidir. Mükəmməl infrastruktura malik otel kompleksindəki şərait böyük turizm potensialına malik olan Şamaxıda turistlərin yüksək səviyyədə qəbulu üçün geniş imkanlar açır. Turizm sənayesi artıq Şamaxıda da prespektivli sahəyə çevrilmişdir. Ötən il ərzində Sağyan kəndi ərazisində “Sakit göl” istirahət mərkəzi istifadəyə verilmişdir, Pirqulu zonasında isə müasir standartlara cavab verəcək yeni turizm obyektləri tikilir. Hazırda rayonda 1002 yerləşmə yeri olan 26 mehmanxana və mehmanxana tipli obyekt mövcuddur. Təsadüfi deyil ki, son illərdə rayona gələn turistlərin sayı sürətlə arır. Təkcə 2014-cü ildə turistlərin sayı 85252 nəfər təşkil etmişdir ki, onların da 14464 nəfəri xarici turistlər olmuşdur.

Tarixi keçmişi qədim və zəngin olan Şamaxının abadlaşdırılması və yenidən qurulması, sosial problemlərin həlli edilməsi işləri ötən aylarda da uğurla davam etdirilmişdir. “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrası ilə əlaqədar ötən müddət ərzində rayonun abadlaşdırılması və əsas sosial problemlərin həlli istiqamətində xeyli işlər görülmüşdür. Belə ki, ermənilərin xalqımıza qarşı törətdikləri soyqırımını əks etdirən abidə yenidən qurularaq əsaslı təmir edilmişdir. Abidənin ətrafında yerləşən bütün fərdi yaşayış evlərinin dam örtükləri yenisi ilə əvəz edilmiş, fasad hissələri aqlay daşla üzlənmiş, pəncərə blokları yenisi ilə əvəz edilmiş və evlərin giriş qapıları rənglənmişdir. Ərazidə olan bütün barılar dekorativ üslubda üzlənmişdir. Həmin ərazidə piyadalar üçün səkilər çəkilmiş, asfalt-beton örtüyü vurulmuş və işıqlandırma sistemi quraşdırılmışdır. Abidənin ətrafında 600 m2 yeni yaşıllıq zolağı salınaraq həmişəyaşıl bəzək kolları və dekorativ ağaclar əkilmişdir. Həmçinin Şəhidlər xiyabanının əsaslı təmir və yenidənqurulması işləri başa çatdırılmışdır. Eyni zamanda sürüşmə zonasında yerləşdiyi nəzərə alınaraq əraziyə 1680 m2 10-15 sm qalınlığında beton verilərək aqlay daşla üzlənmişdir. Bundan əlavə, məzarların ətrafı mərmərlə üzlənmış, şəhidlərin soyad və adları mərmər lövhədə yazılmış, mövcud abidə xüsusi memarlıq üslubunda mərmər və şəbəkə ilə işlənilmişdir. Ərazinin tam yenidən işıqlandırılması işləri həyata keçirilmişdir. Şəhidlər xiyabanının ərazisi boyük parka çevrilərək 3 hektara çatdırılmış, parkda 5000 min kv.metrə qədər yaşıllıq zolağı salınmış və 800-ə qədər yeni ağaclar əkilmişdir. Bakı istiqamətindən Şamaxı şəhərinə girişdə 2000 kv. metr məsafədə yaşıllıq zolağı salınmışdır. Şəhərdə ötən il ərzində salınmış yaşıllıq zolaqlarının qorunub saxlanılması məqsədilə Zoğalavayçay su anbarından şəhərin S.Ə.Şirvani küçəsinə və şəhərə giriş istiqamətində yerləşən qala divarlarına qədər 4000 p/m-ə qədər 60 və 50 mm-lik plasmas boru ilə texniki su xətti çəkilib istifadəyə verilmişdir. Şəhərin N.Nərimanov küçəsində xeyli abadlıq işləri görülmüşdür. Belə ki, 400 metr məsafədə yaşıllıq zolaqları salınmış səkilərə asfalt-beton örtüyü vurulmuşdur. Hazırda işlər davam etdirilir. Rayon icra hakimiyyəti binasının qarşısında yerləşən parkda əsaslı təmir işləri aparılmışdır. Əraziyə 900 kv.metr üzlük daş döşənmiş və 800 kv.metr yeni yaşıllıq zolağı salınaraq kollar və ağaclar əkilmiş, əraziyə işıqlandırma sistemi çəkilmişdir. 2014-cü il ərzində şəhərin küçələrinin abadlaşdırılması və yenidənqurulması xüsusu diqqət mərkəzində saxlanılmışdır. Belə ki, şəhərin küçələrinə ümumilikdə 56000 kv.metr asfalt beton örtüyü vurulmuşdur. Bundan əlavə, 13 km-lik Şamaxı-Çuxuryurd-Qızmeydan avtomobil yolunun tikintisi başa çatdırılmış, 53 km-lik Şamaxı-Padarçöl yolunun əsaslı təmir və yenidənqurma işləri davam etdirilmişdir. 6 min nəfər əhalinin yaşadığı 4 yaşayış məntəqəsini birləşdirən 11 km-lik Şamaxı-Göylər-Quşçu avtomobil yolunun tikintisi müvafiq sənədlər aidiyyəti qurumlara təqdim olunmuş və bu tədbirin həyata keçirilməsi “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”na salınmışdır.

Bakı-Şamaxı magistral avtomobil yolunun 110-cu km-də, Sabir qəsəbəsinin qarşısında abadlıq və yenidənqurma işləri aparılmışdır. Belə ki, 200 metrlik məsafəyə torpaq daşınaraq süni təpələr yaradılmış və həmin təpələrdə yaşıllıq zolaqları salınaraq ağac və bəzək kolları əkilmişdir. Sabir qəsəbəsinin girişində yerləşən barıların üzləri sökülərək yeni üzlük tametlə üzlənmişdir. Əraziyə bardürlər düzülmüş, piyada səkiləri salınmış və asfalt örtük vurulmuşdur. Magistral yol boyu yerləşən evlərin fasadları üzlük daşla üzlənmiş, dam örtükləri yenisi ilə əvəz edilmişdir. Magistral yolun üstündə yerləşən Mərzəndiyə kənd qəbristanlığının 260 metr barısı sökülərək yenisi ilə əvəz edilmiş və dekorativ üslubda bəzədilmişdir. Rayonda ekoloji vəziyyətin yaxşılaşdırılmasını, zərərli tullantılar səbəbindən içməli suya, ətraf mühitə və vətəndaşların sağlamlığına təhlükə törədən amillərin aradan qaldırılmasını, uzun illərdir ki, şəhər sakinlərinin haqlı narazılığına səbəb olan böyük problemlərdən biri olan şəhərin ərazisində yerləşən zibilxana Saqiyan kəndinə köçürülmüş və yeni salınmış zibilxanaya 3 km məsafədə yol çəkilərək çınqıl döşənmişdir. Hazırda keçmiş zibilxananın yerində abadlıq və təmizləmə işləri aparılır. Ötən dövr ərzində regional qeydiyat şöbəsi üçün inzibati binanın tikintisinə başlanmışdır. Hazırda işlər sürətlə davam etdirilir. S.Ə.Şirvani küçəsində yerləşən 40 mənzilli yaşayış binasının dam örtüyü dəyişdirilərək yenisi ilə əvəz edilmişdir. Şəhərin Gənclər küçəsində yerləşən 40 mənzilli binanın dam örtüyü tam dəyişdirilmiş, fasad hissəsi yeni üzlük materialı ilə üzlənmiş, pəncərə blokları yenisi ilə əvəz edilmişdir. Şəhriyar küçəsində bir sıra fərdi mənzillərin dam örtüyü dəyişdirilmiş, fasad hissələri isə yeni üzlük materialı ilə üzlənmişdir.

Şamaxı rayonunda iqtisadi inkişaf ötən il də yüksək templə davam etdirilmişdir. Rayonda 138,9 milyon manat dəyərində ümumi məhsul buraxılışı olmuşdur. Qeyd olunan müddət ərzində rayonda əsas kapitala yönəldilən investisiyaların həcmi 26,5 milyon, tikinti-quraşdırma işlərinin həcmi 26,1 milyon, sənaye məhsulunun həcmi 5,3 milyon manat təşkil etmişdir. İl ərzində orta aylıq əmək haqqı əvvəlki illə müqayisədə 26,8 manat artaraq 260,9 manat təşkil etmiş, əhalinin pul gəlirləri ilkin hesablamalara görə 2013-cü illə müqayisədə 13,5 mln. manat artaraq 281,8 mln manata çatmışdır. Əsasən aqrar rayon olan Şamaxıda heyvandarlıq da iqtisadiyyatda aparıcı sahələrdən birini təşkil edir. Ötən ilin sonuna kimi rayonda iribuynuzlu mal-qaranın sayı 37911 başa, xırdabuynuzlu heyvanların sayı 190570 başa, quşların sayı isə 270014 başa çatdırılmışdır ki, bu da 2013-cü illə müqayisədə müvafiq olaraq iri buynuzlu heyvanların sayı 301 baş, xırda buynuzlu heyvanların sayı 3168 baş, quşların sayı isə 1849 baş artmışdır. Həmin dövrdə ət istehsalı 4843,7 ton, süd istehsalı 23011 ton, yun istehsalı 375,4 ton və yumurta istehsalı 16 milyon ədəd olmuşdur ki, bu da əvvəlki ilin müvafiq dövrünə nisbətən ət istehsalı (diri çəkidə) 36 ton, süd istehsalı 336,9 ton, yun istehsalı 1,7 ton, yumurta istehsalı isə 6 min ədəd artmışdır. Ötən il kənd təsərrüfatı sahəsində 43,7 milyon manatlıq məhsul istehsal olunmuşdur.

Məlum olduğu kimi, keçən əsrin 70-80-ci illərində Şamaxı Azərbaycanın ən böyük üzümçülük rayonlarından biri idi. Hazırda bu sahənin inkişafına xüsusi diqqət göstərilir. Bu baxımdan dövlətimizin başçısının tapşırığı ilə hazırlanan və qəbul edilən “2012-2020-ci illərdə Azərbaycan Respublikasında üzümçülüyün inkişafına dair Dövlət Proqramı”nın bu sahənin yenidən dirçəldilməsində mühüm rolu olmuşdur. Hazırda rayonda üzüm bağlarının sahəsi 1622 hektara çatdırılmışdır. Keçən il isə 10 hektar sahədə yeni üzümlük salınmışdır. Bundan əlavə, Meysəri kəndinin ərazisində üzüm əkilməsi məqsədilə 330 hektar torpaq sahəsi ayrılmış və 40 hektar sahədə plantaj şumu çıxarılmışdır. Rayonda sahibkarlığın inkişaf etdirilməsi, dövlət tərəfindən bu sahəyə hərtərəfli dəstəyin göstərilməsi xüsusi diqqət mərkəzində olmuşdur. 2014-cü ildə İqtisadiyyat və Sənaye Nazirliyinin Sahibkarlığa Kömək Milli Fondunun vəsaiti hesabına Şamaxı rayonu üzrə 68 sahibkara 4,8 mln. manat güzəştli kreditləri verilmişdir. Bu kreditlər hesabına 2014-cü ildə 120 yeni iş yeri yaranmışdır. 2014-cü ildə Şamaxıda sahibkarlıq fəaliyyəti ilə məşğul olanların sayı artaraq 1800 subyektə çatdırılmış, rayon üzrə 1069 daimi iş yeri açılmışdır. Ümumi məhsul buraxılışında qeyri-dövlət sektorunun xüsusi çəkisi artmaqda davan etmişdir. Ümumiyyətlə, Dövlət proqramlarının qəbulundan sonra Şamaxı rayonunda 11112 yeni iş yeri açılmışdır.

Ötən müddət ərzində əhalinin sosial müdafiəsinin gücləndirilməsi məqsədilə rayonda sosial yardıma ehtiyacı olan insanların müəyyənləşdirilməsi, onlara ünvanlı sosial yardımın verilməsi daim diqqət mərkəzində saxlanılmışdır. 2014-cü ildə 5 nəfər Qarabağ müharibəsi əlili və 1 nəfər şəhid ailəsi rayon icra hakimiyyətində güzəştli mənzil növbəsinə götürülmüşdür. Əmək və Əhalinin Sosial Müdafiəsi Nazirliyinin sifarişi ilə 2013-cü ildə Şamaxı şəhərində tikintisinə başlanılmış Qarabağ muharibəsində əlil və şəhid olmuş ailələr üçün 36 mənzilli yaşayış binasının tikintisi 2014-cü ildə davam etdirilmişdir. Binanın bu il istifadəyə verilməsi nəzərdə tutulmuşdur. Bundan əlavə, rayonun qəsəbə və kəndlərində bu kateqoriyadan olan insanlara dövlət tərəfindən fərdi mənzillərin tikintisi üçün torpaq sahələri ayrılmışdır. Əhaliyə göstərilən nəqliyyat, poçt, rabitə və məişət xidmətlərinin həcmi və səviyyəsi yüksəlmişdir. Ötən il ərzində “Şamaxı Sərnişin Servis” MMC tərəfindən əhaliyə göstərilən nəqliyyat xidmətinin keyfiyyəti xeyli yaxşılaşdırılmışdır. Belə ki, rayonun Göylər, Muğanlı və Mərzəndiyə kəndlərinə yeni avtobus marşrutları açılmışdır.

2014-cü ildə rayon ərazisində yeni qazlaşma, təmir-bərpa və əsaslı təmir işləri davam etdirilmişdir. Belə ki, ötən dövr ərzində istehlakçıların və əhali abonentlərinin normal, fasiləsiz, təhlükəsiz və stabil təbii qazla təmin olunmaları üçün ölçü qovşaqlarında mövcud kollektorların üzərində qaz tənzimləyiciləri, eləcə də daxili qaz kəmərlərinin üzərində müxtəlif tipli 75 ədəd 300-500 m3 qaz tənzimləyiciləri quraşdırılmışdır. Bundan əlavə, şəhərin bir neçə iri küçələrində istismar müddətini başa vurmuş, həyətlərdən keçən yeraltı və yerüstü qaz kəmərləri yeni 43503 p/m-lik küçə qaz xətləri ilə əvəz edilmişdir. Rayonun Şərədil kəndinin qazlaşdırılması başa çatdırılaraq 105 abonent təbii qazla təmin olunmuşdur. 2014-cü ilin may ayında rayonun Mərzəndiyə, Nüydi, Yenikənd, Dağ Bağırlı və Saqiyan kəndlərinin qazlaşdırılmasına başlanılmışdır. Hazırda Saqiyan kəndində 114525 p/m, Yenikənd, Dağ Bağırlı kəndlərində 11907 p/m, Nüydi kəndində 4840 p/m qaz xətləri çəkilmiş və bu işlər ardıcıl olaraq davam etdirilir. Çuxuryurd kəndində yeni yaşayış massivi tam qazlaşdırılmış, şəhərin 48a saylı yeni yaşayış massivinin qazlaşdırılmasına başlanılmışdır. Hazırda rayonun 34 yaşayış məntəqəsi üzrə 16485 abonent təbii qazla təmin olunur ki, bu da Şamaxı rayonunda olan 20067 təsərrüfatın 82,1 faizini təşkil edir. Ötən müddət ərzində şəhərin su təchizatının yaxşılaşdırılması və kanalizasiya sisteminin yenidən qurulması işlərinin daha da sürətləndirilməsi və bu sahədə yol verilən nöqsaqların aradan qaldırılması məqsədilə həyata keçirilən operativ tədbirlər öz bəhrəsini verməkdədir. İşin sürəti və keyfiyyəti artmışdır. Ötən il ərzində şəhərin küçələrinə 39,8 km kanalizasiya 48,3 km isə su xətləri çəkilmişdir. İndiyədək ümumilikdə şəhərin müxtəlif küçələrində 111,9 kilometr kanalizasiya və 122,7 kilometr su xətti çəkilmişdir.

2014-cü ildə təhsilin maddi-texniki bazası möhkəmləndirilmiş, onun infrastrukturu yenilənmişdir. Belə ki, Nüydü, Dəmirçi, Əngəxaran tam orta məktəblərində cari təmir işləri görülmüş, Uşaq-gənclər idman məktəbi isə əsaslı təmir olunmuşdur. Hesabat ilində 380 şagird yerlik Mədrəsə qəsəbə tam orta və 80 şagird yerlik Şərədil kənd ümumi orta məktəblərinin tikintisinə başlanılmışdır. Talışnuru və Hacıqədirli kənd tam orta məktəblərinin tikintisi üçün layihə sənədləri hazərlanmış, Göylər 1 saylı kənd tam orta məktəbinin binasının tikintisi Dövlət Proqramına daxil edilmişdir. 2014-cü ildə rayonda Heydər Əliyev Fondunun təşəbbüsü ilə S.Ə.Şirvani kqçəsində 100 yerlik 5 saylı, Şəhriyar qəsəbəsinin ərazisində 100 yerlik 4 saylı uşaq bağçasının tikintisinə başlanmış, Mədrəsə qəsəbə körpələr evi-uşaq bağçasının əsaslı təmir işləri davam etdirilmişdir.

Rayonun 6 müəllimi “Ən yaxşı müəllim” respublika müsabiqəsində iştirak etmiş və onlardan 2 nəfəri Prezident İlham Əliyevin müvafiq Sərəncamı ilə “Ən yaxşı müəllim” müsabiqəsinin qalibləri olmuşdur. Prezidentin müvafiq Sərəncamı ilə həmin müəllimlər beş min manat məbləğində birdəfəlik pul mükafatı ilə mükafatlandırılmışlar. Sevindirici haldır ki, şəhər 10 saylı tam orta məktəbin müəllimi Şəhla Qəribova “Elektron təhsil” respublika müsabiqəsinin qalibi olmuş və mükafatlandırılmışdır. 2013-2014-cü tədris ilində 544 nəfər məzundan 191 nəfəri ali məktəblərə daxil olmuşdu ki, bu da əvvəlki illə müqayisədə 5 faiz artıqdır.

Son illər dövlət başçısının tapşırığına əsasən respublikanın hər yerində olduğu kimi, Şamaxıda da səhiyyə müəssisələrinin maddi-texniki bazasının möhkəmləndirilməsi əhaliyə göstərilən tibbi xidmətin yaxşılaşdırılmasında əsaslı rol oynamışdır. Rayonda 131 çarpayılıq rayon mərkəzi xəstəxanası, 15 çarpayılıq Göylər kənd sahə xəstəxanası, 14 kənd həkim məntəqəsi, 20 tibb məntəqəsi və Şamaxı Müalicə-Diaqnostika Mərkəzi əhaliyə səhiyyə xidməti göstərir. Ötən il ərzində rayon əhalisinə göstərilən səhiyyə xidmətinin yaxşılaşdırılması istiqamətində bir sıra tədbirlər həyata keçirilmişdir. Rayon mərkəzi xəstəxanasının həkimlərindən ibarət səyyar həkim briqadaları yaradılaraq il ərzində həftədə bir dəfə olmaqla qəsəbə və kəndlərdə əhaliyə tibbi xidmətlər göstərmişlər.

Hesabat ilində mədəniyyət müəssisələrinin maddi-texniki bazasının gücləndirilməsi istiqamətində bir sıra tədbirlər görülmüşdür. Mədəniyyət mərkəzində, Mərkəzi Kitabxanada, Kərkənc kənd Sənətkarlıq evində, Çuxuryurd və Bağırlı kənd Folklor evlərində, Əngəxaran kənd Diyarşünaslıq klubunda cari təmir işləri aparılmış və inventar avadanlıqlarla təchiz olunmuşdur. Rayonda 71 tarixi mədəniyyət abidəsi mövcuddur. Onlardan 1-i dünya, 23-ü ölkə və 47-si isə yerli əhəmiyyətli abidələrdir. Rayonun ərazisində mövcud olan tarix və mədəniyyət abidələrinin mühafizəsi, istifadəsi və bərpası daim diqqət mərkəzində saxlanılmış, 2014-cü ildə beş yeni arxeoloji abidə aşkar olunmuşdur. Hesabat ilində Dünya Bankının Şimal-Qərb dəhlizi üzrə regional inkişaf və turizm potensialının inkişaf etdirilməsi layihəsinin identifikasiyası ilə əlaqədar 2015-2020-ci illər üçün rayonda həyata keçirilməsi nəzərdə tutulmuş turizm inkişaf layihəsi hazırlanaraq Mədəniyyət və Turizm Nazirliyinə təqdim olunmuşdur.

Şamaxı rayonunun ictimai-siyasi və mədəni həyatında gənclərin rolu davamlı olaraq artmaqdadır. Nüfuzlu idman tədbirlərinin, beynəlxalq bilik yarışmalarının bir çoxunun qalibləri məhz şamaxılı gənclərdir. Gənclər, eyni zamanda, vətənpərvərlik istiqamətində cox böyük layihələrə imza atıblar. Rayonun həm təhsil ocaqlarında, həm də dövlət müəssisələrində çalışan gənclər intellektual dünya görüşlərinə görə xüsusi fərqləniblər. Sağlam gənclik, sağlam gələcək deməkdir. Bu mənada Şamaxı rayonu idman qurğularının və stadionların sayına görə ölkədə önəmli yerləri tutur. Burada idmanla məşğul olan gənclərin sayı minlərlədir.

Rayon sakinləri ilə söhbətlərimizdə aydın oldu ki, Şamaxı Rayon İcra Hakimiyyətinin başçısı Asif Ağayev davamlı olaraq qəsəbə və kəndlərdə sakinlərlə görüşlər keçirərək onların problemləri, təklif və təşəbbüsləri ilə yerində tanış olaraq həllinə və reallaşmasına nail olur. Əslində bu prinsip Prezident İlham Əliyevin məmurlar qarşısında qoyduğu başlıca vəzifənin-xalqa ləyaqətlə xidmətin reallaşması istiqamətində həyata keçirilən böyük bir işdir. Kənd və qəsəbələrdə keçirilən görüşlərdə, eləcə də vətəndaşların qəbulu zamanı diqqəti çəkən ən mühüm məqam insanların problemlərinə həssaslıqla yanaşılması, haqlı şikayətlərin operativ qaydada həll edilməsidir. İl ərzində rayonun 3 qəsəbə və 41 kəndində rayon icra hakimiyyətinin başçısı ilə keçirilmiş səyyar görüş-qəbullarda 4135 nəfər iştirak etmiş, 155 müraciət olunmuşdur. Səyyar qəbullarda qaldırılan məsələlərin həll edilməsi üçün aidiyyəti üzrə müvafiq tapşırıq və göstərişlər verilmişdir. Məhz rayon icra hakimiyyəti başçısının davamlı olaraq yerlərdə keçirdiyi səyyar qəbul-görüşlərin nəticəsidir ki, əvvəlki ilin müvafiq dövrü ilə müqayisədə qəbula gələnlərin sayı rayon icra hakimiyyəti başçısı aparatında 170 nəfər, səyyar qəbullarda isə 132 nəfər azalmışdır.

Bütün bu inkişaf və uğurlara rəğmən deyə bilərik ki, Şamaxı rayonu 2015- ci ildə də iqtisadi və sosial sahələrdə böyük uğurlara imza atacaqdır. Ona görə ki, rayondakı böyük işgüzarlıq, səmimi təşəbbüskarlıq mühiti və ən başlacası isə ölkəmizin gələcəyinə, xüsusən də Prezident İlham Əliyevin apardığı mövcud siyasi kursa böyük inam və dəstək vardır.

Elçin Zaman

İki sahil.- 2015.- 24 aprel.- S.27; 30.