Avstriyalı turist: “Şahdağ” İstirahət Mərkəzindəki şəraiti Avstriyadakı qış turizm məkanları ilə müqayisə etmək olar

“Şahdağ” İstirahət Mərkəzinə ailəmlə birlikdə gəlmişəm. Demək olar ki, bütün həftəsonlarını burada keçiririk. Qışda xizək sürmək, yayda isə əsrarəngiz təbiətdən zövq almaq, təmiz hava qəbul etmək, dincəlmək üçün bu istirahət mərkəzində əla şərait yaradılıb.

Bu sözləri AZƏRTAC-a müsahibəsində “Şahdağ” İstirahət Mərkəzində ailəsi ilə birlikdə dincələn avstriyalı turist Henrik Peterssen söyləyib.

Avstriyanın paytaxtı Vena şəhərində yaşayan H.Peterssen işlə əlaqədar Bakıya köçüb. O, Azərbaycanın bir çox səfalı məkanlarında olub. Qusarda yerləşən turizm mərkəzi onun daha çox xoşuna gəlib. H.Peterssen deyib: “Bilirsiniz ki, mənim Vətənim Avstriya qış turizminin inkişaf etdiyi ölkələrdən biridir. Mənim ölkəmdə hamı xizək sürməyi və başqa qış idman növlərini çox xoşlayır. Ona görə də qış aylarında “Şahdağ” İstirahət Mərkəzinə gələrək xizək sürmək imkanından yararlanıram. Buradakı şərait, qiymətlər və turistlərə göstərilən xidmətin səviyyəsi məni və ailə üzvlərimin ürəyincədir. Bu istirahət məkanındakı şəraiti Avstriyadakı qış turizm mərkəzləri ilə müqayisə etmək olar. “Şahdağ” İstirahət Mərkəzində yay turizmi üçün də ideal şərait var. Məhz buna görə də üç ildir ki, ailəmlə burada dincəlməyə gəlirəm”.

Iki sahil.- 2015.- 5 avqust.- S. 12.