Vətən uğrunda qanlı döyüşlərin qəhrəmanı

Bu gün Azərbaycanın Milli Qəhrəmanı Rövşən Əkbərovun 50 yaşı tamam olur

Bu gün Azərbaycanın Milli Qəhrəmanı Rövşən Əkbərovun 50 yaşı tamam olur. Ömrünün yarıdan çoxunu hərbi işə sərf edən, ölkəmizin ərazi bütövlüyü uğrunda ağır döyüş yolu keçən bu qəhrəman əmindir ki, qüdrətli Azərbaycan ordusu tez bir zamanda işğal altında olan torpaqlarımızı azad edərək üçrəngli bayrağımızı Şuşada, Xankəndidə, Ağdamda, Cəbrayılda, Füzulidə, Laçında, Kəlbəcərdə və digər işğal olunmuş rayonlarımızda dalğalandıracaq.

Hazırda ölkəmizin böyük bir hərbi birləşməsinə rəhbərlik edən general leytenant Rövşən Əkbərov Azərbaycan dövlətinə, onun Ali Baş Komandanına daim sədaqətlə xidmət edib. Hətta Azərbaycan dövlətçiliyinə qarşı ciddi təhlükələr baş qaldıranda o həmin təhlükələrə qarşı mükəmməl bir hərbçi kimi mərdliklə sinə gərib. 1993-cü il dekabrın 12-də Ulu Öndər tərəfindən Rövşən Əkbərov “Azərbaycan Bayrağı” ordeninə, 1994-cü il may ayının 5-də Azərbaycanın Milli Qəhrəmanı adına, 1995-ci il aprelin 4-də yenidən “Azərbaycan Bayrağı” ordeninə, 2003-cü il iyunun 26-da “Vətən uğrunda” medalına layiq görülmüşdür. 2011-ci ildə isə Prezident İlham Əliyev generalı 3-cü dərəcəli “Vətənə xidmətə görə” ordeni ilə mükafatlandırıb.

Bir mühüm məqamı qeyd etmək istəyirəm ki, general-leytenant Rövşən Əkbərov hərbçi mundirində nə qədər ciddi və zəhmli görünsə də, düşmənə qarşı sərt olsa da, daxilən çox sakit, səmimi, Vətənə, xalqa bağlı insandır. Mən hələ illər bundan əvvəl “Azərbaycan ordusu” qəzetində işləyərkən onunla həmsöhbət olmuşdum. Ordu haqqında onun çox dəyərli fikirlərini eşitmiş və peşəkar hərbçi olduğu qədər də, milli mənəvi dəyərlərə bağlılığını müşahidə etmişdim. Onun fikirləridir: “Ordu dövlətin və millətin vuran əli, basılmaz qalası və ən nəhayət şərəf timsalıdır. Böyük Yaradanın qüdrəti ilə mövcud olan bir tarixi gerçəklikdir ki, ordusu olmayanın yurdu da olmayıb. Yurd burada vətən, dövlət, ata-baba torpağı deməkdir. Millətin dili də ola bilər, torpağı da, vətəni də... Amma ordusu olmasa dövləti olmayacaq, dövləti olmayacaqsa həmişə dilinin, dininin, millətinin təhlükə ilə üz-üzə qalması problemi “Domokl qılıncı” kimi onun başı üzərindən asılı qalacaqdır.”

Əvvəldə qeyd etdiyimiz kimi, general-leytenant Rövşən Əkbərov peşəkar hərbçi kimi daim on cəbhələrdə olub. Əsgərlərlə səngərlərdə gecələdiyi, ağır və qanlı döyüşlərə atıldığı çox məqamlar da olub. Ancaq heç vaxt mənəvi yorğunluğu, Vətənə xidmətdən usanmağı olmayıb. Ona görə ki, bu, bir qanunauyğunluqdur: qəhrəmanlar, Vətənin dəyərli oğulları həmin hisslərdən uzaq olurlar.

Rövşən Əkbərova görə, Azərbaycan xalqı həmişə öz ordusuna inanıb, onu sevib və yaşadıb. Yenə də generalla söhbətimi xatırlayıram. O deyirdi ki, ordu ilə xalqın bir-birinə bağlılığı pozulmaz qanundur. Ona görə ki, onlar biri digərindən yaranır. Biri digərini qorumağa borcludur. Millət ordusunu yaşatmalıdır ki, ordu da millətini və dövlətini qorumaq gücünə malik olsun. Bu balans pozulanda onların hər ikisinin yaşamaq imkanları tükənir və mövcudluğu sual altına düşür.

Yenə də onun qənaətincə, Azərbaycan gənci üçün orduda xidmət şərəf və ləyaqət məsələsidir. Çünki hərbi xidmət kişilik, ərlik məktəbidir. İnsan öncə Vətənini, anasını qorumağı bacarmalıdır ki, sonra qadınını, övladlarını qorumaq ona etibar edilsin.

Rövşən Əkbərov ulu öndər Heydər Əliyevin hərbçi kadrlarındandır. Belə ki, o, 1979-cu ildə əsasını ümummilli lider Heydər Əliyevin qoyduğu Cəmşid Naxçıvanski adına Hərbi Məktəbə daxil olmuşdur. O, burada təhsilini müvəffəqiyyətlə başa vuraraq hərbi təhsilini Kiyev Ali Ümumqoşun Komandirləri məktəbində davam etdirmişdir. Sonrakı illərdə o, müxtəlif hərbi akademiyalarda təhsil almışdır. Məhz Qarabağda müharibə başlayanda R.Əkbərov bir zabit kimi göstərdiyi fədakarlıqlara görə qısa müddətdə tanınmış hərbçi oldu.

Rövşən Əkbərov bildirir ki, Azərbaycanın ordu quruculuğunda ulu öndər Heydər Əliyev mərhələsi mövcuddur. Məhz zəif dövlət, gücsüz ordu amili 90-cı illərin əvvəllərində cəmiyyətdə bir psixoloji gərginlik yaratmışdı. Azərbaycanın Qarabağ müharibəsində verdiyi 20 min şəhidin hər biri özünü Vətən yolunda qəhrəmancasına fəda etmişdi. Amma onların qəhrəmanlıqlarına baxmayaraq, torpaqlarımızın işğalının davam etməsi insanlarımızda öz dövlətinə və ordusuna inamı azaldırdı. Belə bir məqamda xalqa ordunu qura biləcək, işğalı durduracaq, insanları səfərbər edəcək və ən nəhayət dövləti iflas olmaqdan qurtaracaq bir şəxsiyyət gərək idi. Ulu Öndər xalqın tələbi ilə sözün həqiqi mənasında bir xilaskar kimi yetişdi. Beləliklə də Azərbaycanın dövlət və ordu quruculuğunda Heydər Əliyev epoxası başladı.

Bu gün Azərbaycan ordusu həm ən müasir silahlarla təminatına, həm də peşəkarlığına görə bölgənin ən qüdrətli ordusudur. Azərbaycan Prezidenti, Ali Baş Komandan İlham Əliyevin rəhbərliyi ilə ordumuz bu gün də çox yüksək templə öz döyüş qabiliyyətini artırır. Bu gün ordumuza ayrılan vəsait Cənubi Qafqazdakı respublikaların hər birinin ayrı-ayrılıqda dövlət büdcələrinə bərabərdir. Azərbaycan dövləti çəkinmədən ordusunu gücləndirmək xəttini tutubdur. Məhz Rövşən Əkbərov kimi qəlbi Vətən və xalq üçün döyünən on minlərlə hərbçilərimiz Ali Baş Komandanın əmrinə müntəzirdirlər. İndi Azərbaycan cəmiyyətində Şuşaya, Laçına, Kəlbəcərə, Ağdama və digər işğal olunan torpaqlarımıza qələbə bayraqlarını sancmaq arzusu hakim kəsilibdir. Təbii ki, yaxın zamanlarda həmin torpaqlara qələbə möhürünü Azərbaycan hərbçiləri vuracaqdır.

Elçin Zaman

İki sahil.- 2015.- 4 iyun.- S.24.