Korrupsiya və rüşvətxorluğa

qarşı ciddi mübarizə aparılır

Dünya Azərbaycanlılarının Həmrəyliyi Günü və Yeni il münasibətilə xalqa təbrikində dövlət başçısı İlham Əliyev bu sahədə “ASAN xidmət”in rolunu xüsusi diqqətə çatdırmışdır

Dünya Azərbaycanlılarının Həmrəyliyi Günü və Yeni il münasibətilə xalqa təbrikində dövlət başçısı İlham Əliyev bir daha ölkəmizin ayrı-ayrı sahələr üzrə qazandığı uğurlar fonunda bu fikri böyük inam və qətiyyətlə bildirmişdir ki, bütün dünyada yaşayan azərbaycanlılar bu gün dünya xəritəsində Azərbaycan kimi dövlətin varlığı ilə fəxr edir. Azərbaycan dünyada öz sözünü deyir, deyəcək və uğurlu inkişafımız bundan sonra da təmin ediləcək.

Qarşıya qoyulan əsas hədəf Azərbaycanın yüksək gəlirli ölkəyə çevrilməsi, inkişaf etmiş ölkələr sırasında olması, bu günə qədər 3 dəfə artan ümumi daxili məhsulun daha iki dəfə artırılmasıdır. Bu fikir də Prezident İlham Əliyev tərəfindən daim önə çəkilir ki, inkişaf etmiş ölkələri fərqləndirən cəhətlərdən biri iqtisadiyyatın inkişafının əsas göstəricilərindən olan ümumi daxili məhsulun formalaşmasında kiçik və orta sahibkarlığın xüsusi yerinin olmasıdır. “Sahibkarlara dəstəyin davamlı olduğunu qeyd edən dövlət başçısı bu günə qədər qeyd olunan istiqamətdə görülən işlərə də daim diqqət yönəldir. Regionların malik olduğu potensialdan istifadə etmək məqsədilə imzalanan Dövlət Proqramları və onların uğurlu icrası qeyri-neft sektorunun inkişafına geniş yol açıb. Hazırda aktivlərinin həcmi 36 milyard dollardan artıq olan Dövlət Neft Fondu dövlət siyasətinin prioritetlərini müəyyənləşdirir. Neft gəlirlərindən səmərəli istifadə, şəffaflıq prinsipinin yüksək səviyyədə qorunması mühüm sosial-iqtisadi layihələrin həyata keçirilməsini surətləndirir. Ötən ilin doqquz ayında ölkə iqtisadiyyatına 19 milyard dollar investisiya qoyulub ki, bunun da 11 milyard dolları daxili sərmayədir. Hazırda ümumi daxili məhsulun 75 faizini təşkil edən valyuta ehtiyatlarımızın həcmi 53 milyard dollara çatıb. Azərbaycan bu göstəriciyə görə dünya miqyasında ən qabaqcıl yerlərdədir. Hazırda “Azərbaycan Respublikasının məşğulluq strategiyası” (2006-2015-ci illər), 2004-2008 və 2009-2013-cü illər üçün regionların sosial-iqtisadi inkişafına dair Dövlət Proqramlarının davamı olaraq “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”, “Bakı şəhərinin qəsəbələrinin 2006-2007 və 2011-2013-cü illər üzrə sosial-iqtisadi inkişafının sürətləndirilməsinə dair Tədbirlər Proqramı””nın davamı olaraq “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”, “2008-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı”, “2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı” və digər biri-birindən əhəmiyyətli sənədlər uğurla icra edilir. Ümumilikdə son on ildə bir milyon 300 min yeni iş yeri yaradılıb. Təkcə ötən ilin doqquz ayında yüz mindən çox yeni iş yeri açılıb ki, onlardan 80 mini daimi iş yeridir. İşsizliyin səviyyəsi 5 faizə enib. Yoxsulluq həddi 5,3 faizdir. Dövlət başçısı İlham Əliyevin qeyd etdiyi kimi, əgər inkişaf etmiş ölkələr sırasında addımlamağı əsas hədəf seçmişiksə, bu göstəricilər qarşıya qoyulan məqsədə yüksək səviyyədə çatacağımıza böyük əsas verir. Yeni mərhələnin əsas məqsədi iqtisadiyyatın rəqabət qabiliyyətliliyinin yüksəldilməsinə və dünya iqtisadi sisteminə səmərəli inteqrasiyasına nail olmaqla uzunmüddətli perspektivdə ölkədə dinamik sosial-iqtisadi inkişafın davamlılığını təmin etməkdir.

Təsadüfi deyil ki, dünyanın ən mötəbər iqtisadi qurumu olan Davos Ümumdünya İqtisadi Forumu rəqabət qabiliyyətliliyinə görə Azərbaycanı 38-ci yerə layiq görmüşdür. Prezident İlham Əliyevin imzaladığı fərmanlarda, təsdiq etdiyi iqtisadi siyasət sənədlərində bu məqsədin gerçəkləşməsi üçün yerinə yetirilməsi zəruri olan vəzifələr müəyyənləşdirilib. Ölkənin malik olduğu iqtisadi potensialın gücləndirilməsi, qeyri-neft sektorunun inkişaf etdirilməsi, hər bir regionun malik olduğu potensialdan tam və səmərəli istifadə olunması, yeni iş yerlərinin açılmasına şərait yaradılması, sahibkarlığın inkişaf etdirilməsi, sosial xidmətlərin həcminin, keyfiyyətinin və ünvanlılığının əhəmiyyətli dərəcədə artırılması, yoxsulluğun azaldılması mühüm prioritetlərdir. Böyük əhəmiyyət kəsb edən infrastruktur layihələrinin həyata keçirilməsi, antiinhisar tədbirlərinin gücləndirilməsi, “Korrupsiyaya qarşı mübarizə üzrə Dövlət Proqramı”nın təsdiqlənməsi, “Dövlət orqanlarının elektron xidmətlər göstərilməsinin təşkili sahəsində bəzi tədbirlər haqqında”, eyni zamanda “Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin fəaliyyətinin təmin edilməsi haqqında” fərmanlar bazar iqtisadiyyatının əsas aparıcı qüvvəsi olan sahibkarlığın inkşafına geniş yol açan mühüm addımlardır. Dövlət başçısı İlham Əliyevin Yeni il təbrikində əsas diqqət göstərdiyi məsələlərdən biri məhz korrupsiya və rüşvətxorluğa qarşı mübarizə oldu: “Korrupsiya və rüşvətxorluğa qarşı ciddi mübarizə aparılır. “ASAN xidmət” bu sahədə xüsusi yerə malikdir. Artıq 7 mərkəz yaradılmışdır, 3 milyon 500 min müraciət edilmişdir. “ASAN xidmət” ictimai xidmətlər sahəsində, korrupsiya və rüşvətxorluğa qarşı mübarizədə xüsusi rol oynayır. Bu xidmətin yaradılmasından cəmi iki il keçdiyini nəzərə alsaq, görürük ki, biz nə qədər böyük irəliləyişə nail ola bilmişik. Korrupsiya və rüşvətxorluğa qarşı bundan sonra da ciddi mübarizə aparılacaq, həm cəza tədbirləri, inzibati tədbirlər və sistem xarakterli tədbirlər görüləcəkdir.” Məlum olduğu kimi, dövlət başçısının 5 sentyabr 2012-ci il tarixli “Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin fəaliyyətinin təmin edilməsi haqqında” fərmanına uyğun olaraq istifadəyə verilən “ASAN xidmət”in məqsədi məhz dövlət orqanlarının hüquqi xidmətlərinin göstərilməsində vətəndaşların rahatlığının, şəffaflığın təmin edilməsi, korrupsiya hallarının istisna edilməsi, müasir texnologiyaların, “bir pəncərə” prinsipinin tətbiq edilməsi, dövlət qulluqçusu-vətəndaş münasibətlərində yeni düşüncə tərzinin-”dövlət qulluqçusunun vəzifəsi vətəndaşın hüququnu təmin etməkdir” yanaşmasının formalaşdırılmasıdır.

Elektron xidmətlərin sayının artırılması vacib amil kimi önə çəkilir. Bu gerçəklik də diqqətə çatdırılır ki, Azərbaycanın daha yüksək pilləyə qalxması üçün imkanlar var. Müəyyən bürokratik əngəllərin aradan qaldırılması və biznes mühitinin yaxşılaşdırılması istiqamətində atılacaq yeni-yeni addımlar biznes cədvəlində Azərbaycanı daha da yüksək pilləyə çıxaracaq. Prezident İlham Əliyevin sərəncamları ilə təsdiqlənmiş “Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı” və “Açıq Hökumətin təşviqinə dair 2012-2015-ci illər üçün Milli Fəaliyyət Planı” bu istiqamətdə işlərin davamlılığına, problemin həllinə olan diqqətin təsdiqidir. Bir sözlə, ölkənin hərtərəfli inkişafı dövlət siyasətinin əsasını təşkil edir, kompleks tədbirlər nəticəsində qarşıya qoyulan məqsədlər gerçəkliyə çevrilir.

Yeganə Əliyeva

İki sahil.- 2015.- 8 yanvar.- S.2.