Səhiyyə yeni inkişaf mərhələsində

Azərbaycan rəhbərliyinin apardığı uzaqgörən siyasət nəticəsində ölkəmizin dünya iqtisadiyyatında mövqeyi güclənib. Azərbaycan bu illər ərzində dünya sivilizasiyasının müsbət nailiyyətlərini əks etdirməyə çalışaraq Avropa məkanına uğurla inteqrasiya edir. Belə ki, ölkəmizdə səhiyyə sistemi də iqtisadiyyatımızın və sosial sferanın digər sahələri kimi yeni inkişaf mərhələsinə qədəm qoyub. Prezident İlham Əliyevin rəhbərliyi ilə ölkədə ən müasir tələblərə cavab verən səhiyyə infrastrukturunun yaradılması, yeni xəstəxanaların tikilməsi, mövcud tibb ocaqlarının yenidən qurulması geniş vüsət almışdır. Səhiyyə islahatlarının mühüm istiqaməti olan tibb müəssisələri şəbəkəsinin və strukturun təkmilləşdirilməsi ilə bağlı həyata keçirilən məqsədyönlü tədbirlər nəticəsində əhalinin sağlamlığının qorunmasında və tibbi xidmətin keyfiyyətinin yaxşılaşdırılmasında mühüm uğurlar əldə edilmişdir.

Son 10 ildə səhiyyə sisteminin prioritet sahələri üzrə qəbul olunmuş 11 Dövlət Proqramının həyata keçirilməsi göstərilən tibbi xidmətin səviyyəsini xeyli yüksəltməyə, xəstəliklər üzrə müayinələrin həcminin və keyfiyyətinin artmasına, xəstələrin dərman preparatları ilə təminatının əhəmiyyətli dərəcədə yaxşılaşmasına imkan vermişdir.

Ağır vəziyyətdə yaşayan insanlara dövlət tərəfindən ayrılan sosial yardımlar, cəbhə bölgələrində sağlamlığına ziyan dəymiş hərbi qulluqçuların, eləcə də mülki şəxslərin hər il digər ölkələrə dövlət hesabına sanator-kurort müalicəsinə göndərilməsi, narkomaniya və QİÇS-ə qarşı aparılan mübarizə və profilaktik tədbirlər, maarifləndirmə işləri də əhalimizin sağlamlığının qorunmasına xidmət edir. Ölkəmizdə geniş yayılmış diabetli xəstələrin pulsuz müalicəsi və dərman preparatları, özünənəzarət vasitələri ilə təmin olunması dövlət tərəfindən xüsusi nəzarətdə saxlanılır. Respublikanın müxtəlif bölgələrində fəaliyyət göstərən 27 dializ mərkəzində 2000-dən artıq xəstəyə pulsuz tibbi xidmət göstərilir və onlar müvafiq dərmanlarla tam həcmdə təmin olunurlar.

Əhalinin sağlamlığını hər zaman diqqətdə saxlayan dövlət başçısının tapşırığına əsasən ötən ilin fevralın 14-dən mayın 1-dək bütün ölkə vətəndaşlarının icbari tibbi müyinələrdən keçirilməsi kampaniyası uğurla həyata keçirilmişdir.

Respublikada 2013-cü ildə səhiyyə sisteminə ayrılan büdcə vəsaiti 2003-cü illə müqayisədə 11 dəfədən çox artaraq 669 milyon manat təşkil edib. 2014-cü ildə bu sahəyə 725,6 milyon manat vəsait ayrılıb ki, bu da 2013-cü illə müqayisədə 56,3 milyon manat, yaxud 8,4% artım deməkdir. Təkcə 2013-cü il ərzində respublikamızda 81 tibb müəssisəsində təmir tikinti işləri aparılmış, onlardan 56-sı artıq istifadəyə verilmişdir. İstifadəyə verilən tibb müəssisələri ən müasir səviyyədə təmir olunmaqla yanaşı, onların maddi-texniki bazası da elm və texnikanın ən son nailiyyətləri əsasında hazırlanmış tibbi avadanlıqlarla təchiz olunmuşdur. Dərman preparatlarının alınmasına 2014-cü ildə ayrılan 140 milyon manat məbləğində vəsaitin əksəriyyət təşkil edən hissəsi mövcud Dövlət Proqramları çərçivəsində xəstələrin pulsuz dərman preparatları və tibbi ləvazimatlarla təminatına sərf olunmuşdur. Təkcə paytaxtda və iri şəhərlərdə deyil, bölgələrdə də ən ağır tibbi əməliyyatların aparılması təcrübəsi formalaşmağa başlayıb. İnkişaf yolu tutmuş Azərbaycan səhiyyəsinin nüfuzu getdikcə artır. 2011-ci ilin sentyabrında Dünya Səhiyyə Təşkilatı Avropa Regional Komitəsinin 61-ci sessiyasının məhz Bakı şəhərində yüksək səviyyədə təşkili və keçirilməsi buna əyani sübutdur.

Cavid Əkbərov

İki sahil.- 2015.- 16 yanvar.- S.23.