Həmrəylik, birlik xalqımızın böyük sərvətidir

 

İslam həmrəyliyi radikalizm və ekstremizmə qarşı mübarizədə ən güclü vasitədir

 

Prezident İlham Əliyevin Sərəncamı ilə 2017-ci ilin “İslam Həmrəyliyi ili” elan olunması mütərəqqi addım, müsəlman ölkələri arasında birliyin möhkəmlənməsinə yönəlmiş təşəbbüsdür.  Müstəqillik əldə etdikdən sonra dövlətlərarası münasibətlərin möhkəmləndirilməsi,   çoxəsrlik tarixə,  oxşar adət-ənənələrə malik  müsəlman ölkələri arasında  iki və çoxtərəfli  əlaqələrin qurulması istiqamətində aparılan siyasət özünü doğruldur.

 

“Bizim xalqlarımızı ortaq tarix, mədəniyyət, müştərək dəyərlər birləşdirir. Əsrlər boyu bizim xalqlarımız bir-biri ilə sıx əlaqədə olmuşdur, əməkdaşlıq etmişik, bir yerdə yaşamışıq, bir-birimizə dayaq, arxa olmuşuq. Bu gün isə müstəqil dövlətlər kimi biz bütün məsələlərdə bir yerdəyik, bir yerdə olmalıyıq” söyləyən Prezident  İlham Əliyev xüsusilə müsəlman ölkələri ilə əməkdaşlığın möhkəmləndirilməsini başlıca vəzifə kimi qarşıya qoyur.

Dünya ictimaiyyətinin diqqətini cəlb edən beynəlxalq tədbirlərin ölkəmizdə keçirilməsi sübut edir ki, çoxkonfessiyalı, çoxmillətli ölkə kimi tanınan Azərbaycanda bütün dinlərin, xalqların nümayəndələri bir ailə kimi yaşayırlar. Dünyanın tanınmış simalarının, mütərəqqi, sağlam düşüncəli  insanların iştirak etdikləri tədbirlərdə ümumi maraqlara xidmət edən müzakirələr aparılır, xoşagəlməz meyillərin aradan qaldırılması  üçün çıxış yolları axtarılır. Qanlı toqquşmaların, müxtəlif bölgələrdə müharibələrin davam etdiyi müasir dövrümüzdə  dini, milli zəmində qan tökülməsi bütünlükdə dünya siyasətinə təsir edən amildir. Beynəlxalq humanitar əməkdaşlığın dərinləşməsi ilə müəyyən dərəcədə bu mənfi meyillərin qarşısını almaq, sabitliyin təminatı üçün müsbət meyilləri gücləndirmək insanlığa verilən dəyərdir.

Dünyanın 100-dən çox ölkəsini birləşdirən Avropa Şurasının və İslam Əməkdaşlıq Təşkilatının üzvü kimi dünya siyasətinə təsir imkanları artan Azərbaycan münaqişəli problemlərin həllində tutduğu  ədalətli və beynəlxalq hüquqa əsaslanan mövqeyi ilə sabitliyin təminatı üçün öz sözünü deyir, mövqeyini bildirir,  müxtəlif dinlərə məxsus millətlər arasında əlaqələrin yaradılmasına  töhfə verir.  2008-ci ildə  Avropa Şurası və İslam Əməkdaşlıq Təşkilatı arasında  əlaqələrin möhkəmlənməsi üçün   Avropa ölkələri mədəniyyət nazirlərinin Bakıda keçirilmiş toplantısına  İƏT-ə üzv ölkələrin mədəniyyət nazirlərinin dəvət olunması dünyada çox böyük əks-səda yaratmışdı.  Bir il sonra “Bakı prosesi”” adı verilən belə görüşlərin-  İslam Əməkdaşlıq Təşkilatına üzv ölkələrin mədəniyyət nazirlərinin toplantısına  Avropadan mədəniyyət nazirlərinin də dəvət olunması alternativi olmayan tolerantlıq və multikulturalizmə,  humanitar sahədə dinlərarası, mədəniyyətlərarası dialoqun  güclənməsinə töhfə kimi tarixi əhəmiyyəti ilə seçildi. “Düzdür, multikulturalizm bir anlayış olaraq yeni bir ifadədir, ancaq bu həmişə Azərbaycanda olub. İctimai-siyasi quruluşdan asılı olmayaraq Azərbaycan bütün dövrlərdə sülh, əməkdaşlıq, qarşılıqlı anlaşma məkanı olmuşdur və biz bu ənənələri yaşadırıq” söyləyən  Prezident İlham Əliyevin həmrəylik ili ilə bağlı imzaladığı Sərəncam təqdirəlayiqdir və  Azərbaycanda aparılan siyasət bu müsbət meyillərin güclənməsinə xidmət edir.

Forumlarda dəfələrlə səsləndirildiyi kimi, həmrəylik, birlik Azərbaycan xalqının böyük sərvətidir. Bütün dinlərə məxsus tarixi abidələr dövlət tərəfindən qorunur, ehtiyac duyulduqda dövlət vəsaiti hesabına bərpa olunur.  Azərbaycanda məscidlər, kilsələr, sinaqoqlar tikilir.  Müxtəlif dinlərə məxsus bayramlar birlikdə qeyd olunur. Qafqazda ən qədim  alban kilsəsi ölkəmizdədir. Qədim zərdüştlük, atəşpərəstlik məbədi qorunub saxlanılır. Başqa sözlə deyilsə, bütün dinlərə hörmət və etiram Azərbaycanın  dövlət siyasətidir və ölkə vətəndaşları tərəfindən böyük rəğbətlə qarşılanır, ümumi inkişafımıza xidmət edərək ictimai əhval-ruhiyyəni qaldırır.

Bakıda Beynəlxalq Multikulturalizm Mərkəzinin yaradılmasında da məqsəd insanları bir amal naminə birləşdirməkdir.  Çünki təhlükəli meyil olan islamofobiya, ksenofobiyanın davam etdiyi müasir dövrümüzdə millətlərarası həmrəyliyin güclənməsi vacibdir.

Əfsuslar olsun ki, dünyada təhlükələr artır. Qanlı toqquşmalar, müharibələr nəticəsində Suriyada və digər müsəlman ölkələri tamamilə dağıdılır, yüz minlərlə günahsız insan həlak olur, milyonlarla, on milyonlarla insan qaçqın-köçkün vəziyyətinə düşür. Belə hallar radikalizm meyillərini gücləndirir. İnsanlar öz canlarını qurtarmaq üçün Avropaya üz tuturlar. “ Stop İslam” deyən Avropa ölkələrində miqrantlara qarşı alçaldıcı hərəkətlərə yol verilir. Bəla burasındadır ki, Avropada radikal qüvvələrə daha böyük dəstək göstərilir, sivilizasiyalararası toqquşma təhlükəsi artır və çox böyük fəlakətlər törədilir.

Təbiidir ki, islamofobiya bütün İslam aləmini narahat edir.  Bilərəkdən İslam haqqında mənfi rəy formalaşdırılır, terrorla eyniləşdirilir.  Amma həqiqətdə  terrordan ən çox əziyyət çəkən elə müsəlman ölkələridir.  Müsəlman aləmində gedən radikallaşma, təriqətçilik, silahlı dəstələrin maliyyələşdirilməsi, müəyyən  dairələr tərəfindən dəstək qazanması da narahatedici amillərdir. Ona görə də həmrəyliyin, millətlərarası birliyin təminatına xidmət edən, təbliğatı əhəmiyyəti ilə seçilən tədbirlərin davamlı olması vacibdir.

“İslam  Həmrəyliyi İli”ndə 57 müsəlman ölkə idmançılarını bir araya gətirəcək İslam Həmrəyliyi Oyunlarının keçirilməsi tərəfdaşlığa və  dostluğa dövlət səviyyəsində göstərilən diqqətdir. Birinci Avropa Oyunlarından sonra  İslam ölkələri arasında  belə möhtəşəm yarışların təşkili ilk növbədə İslam həmrəyliyini gücləndirəcək. Bütün dünya ictimaiyyəti  görəcək ki,  İslam  sülh, mərhəmət və qardaşlıq dini, Azərbaycan isə böyük imkanlara malik müsəlman ölkəsidir və ən mötəbər beynəlxalq yarışları keçirməyə qadirdir.

Azərbaycan o ölkələrdəndir ki, səsini ucaldır, dini radikalizmə, insanlara qarşı ədalətsizliyə qarşı mübarizəni əməli işi ilə diqqətə çatdırır. Sülhsevər mövqeyini “Biz ədalətin, insanlığın tərəfdarıyıq. Bütün vacib beynəlxalq məsələlərlə bağlı bizim öz mövqeyimiz var. Hesab edirəm ki, əgər bizim təcrübəmiz geniş şəkildə öyrənilərsə, o zaman dünyada münaqişələrin və dini, milli zəmində qarşıdurmaların sayı da azalacaqdır” sözləri ilə bəyan edən Prezident İlham Əliyev vurğulayır ki,   İslam həmrəyliyi radikalizm və  ekstremizmə qarşı mübarizədə ən güclü vasitədir. İslam Həmrəyliyi Oyunlarını təşkil etməklə  müxtəlif dinlərə  humanizm prinsipindən yanaşan, fərql baxış sərgiləyən Azərbaycan insanları  zərərli ideologiyaların, məzhəb və dini ayrı-seçkiliyin  təsirindən qorumaqla dini siyasiləşdirməyə çalışanlara da cavabdır. Belə tədbirlər zəngin  milli mənəvi dəyərləri əsrlərdən bəri qorunub saxlanılan İslamın  təbliği baxımından da əhəmiyyətlidir.

 

Xuraman İsmayılqızı

 

İki sahil.- 2017.- 15 fevral.- S.9.