Terror qurbanlarının xatirəsi yad edildi

 

Milliyyəti, vətəni, əqidəsi olmayan, adı belə insanları dəhşətə salan, damarlardakı qanı donduran, milli mənsubiyyəti bilinməyən, ölüm qoxulu əməlləri ilə dünya ictimaiyyətini narahat edən terror hadisələri ümumbəşəri bəla kimi ölkələri dolanmaqdadır.

 

Dünyanın müxtəlif ölkələrində baş verən qanlı hadisələr də göstərir ki, terror aktları beynəlxalq, regional sabitliyə ən böyük təhlükədir. 2001-ci ildə Amerikada qoşa göydələnlərin dağıdılmasından sonra ABŞ-ın yaratdığı beynəlxalq antiterror koalisiyasına qoşulan və illərdən bəri ermənilərin hərbi, ekoloji, mədəni və mənəvi terrorundan əziyyət çəkən Azərbaycan milliyyəti, vətəni olmayan terrorçulara qarşı mübarizədə səyini əsirgəmir.

Artıq müasir texnologiyalardan belə  istifadə etməklə törədilən  terror elə qorxulu kabusdur ki, onun dəhşətlərinin yalnız bütün xalqların gücündən, qüvvəsindən istifadə etməklə aradan qaldırılması mümkündür. Son illərdə dünyada baş verən qətliamlar göstərir ki, ən qüdrətli dövlət də  nə qədər güclü müdafiə olunsa belə terrora qarşı təkbaşına mübarizə apara bilməz.

Bütün dünya xalqlarını düşündürən və çox mühüm məsələyə həsr olunan milli, fiziki, nüvə təhlükəsizliyinin möhkəmlənməsi sahəsində beynəlxalq əməkdaşlığın gücləndirilməsi üçün səylərin artırılması, uzunmüddətli və səmərəli əməkdaşlıq məsələlərində daha ciddi addımların atılması kimi prioritetlərin diqqətə çatdırıldığı məqamlarda vurğulanır ki, planetdə sülhün bərqərar olunması, silahlar üçün ayrılan vəsaitin insanların rahat, əmin- amanlıq şəraitində yaşamasına sərf edilməsi terrorizmə qarşı mübarizənin başlıca amilidir.

Türkiyədə, İraqda, Suriyada, Fələstində, Əfqanıstanda... baş verən terror hadisələri, dinc əhaliyə, güc strukturlarına qarşı yönələn hücumlar çox saylı kütləvi insan tələfatları kənd və şəhərlərin dağılması ilə nəticələnən terrorların hədəfləri, maraqları qarşılarına qoyduqları məqsədlərinə çatmaq üçün dinc əhalini qorxu altında saxlamaqdır. Kütləvi qırğınlar törətməkdən belə çəkinməyən terrorizmə qarşı mübarizə məqsədilə yaradılan beynəlxalq koalisiyanın səylərinə baxmayaraq “çiçəklənən” bu bəşəri bəla hər gün qanlı əməliyyatlara imza atır. Terrorizmin qarşısının alınmasında əməkdaşlığın gücləndirilməsi ilə bağlı beynəlxalq konfranslar təşkil olunsa da  sərhəd tanımayan, bəşəriyyət üçün ən böyük təhlükə olan terrorun  qan-qada nəfəsli güllə səsləri susmaq bilmir

30 aprel 2009-cu ildə Azərbaycan Dövlət Neft və Sənaye Universitetində (keçmiş Azərbaycan Dövlət Neft Akademiyasında) törədilən, 13 nəfərin ölümü , xeyli tələbənin yaralanması ilə nəticələnən terror dünyada törədilən qanlı hadisələrin siyahısına daxil edilib.

Azərbaycan xalqını sarsıdan,  nifrətlə qarşılanan bu hadisədə dünyasını dəyişmiş müəllim və tələbələrin xatirəsi universitetin kollektivi tərəfindən qeyd olunur.

Universitetin foyesində düzəldilmiş barelyefin açılış mərasimində çıxış edənlər bildirdilər ki, hadisə zamanı həlak olanların xatirəsinin əbədiləşdirilməsi bəşəri bəla olan terrora qarşı ən təsirli mübarizə üsuludur.

Universitetin rektoru , professor Mustafa Babanlı 8 il bundan əvvəl namərd gülləsinin qurbanı olan universitetin müəllim və tələbələrinin xatirəsinin daim əziz tutulduğunu bildirdi:

- Sabitlik və sülhün tərəfdarı olan xalqların qardaşlıq, dostluq şəraitində yaşaması üçün aparılan bütün danışıqlarda sülhsevər siyasəti, diplomatik səyləri ilə diqqət çəkən, terror cəhdlərinə qarşı mübarizədə fərqlənən Azərbaycan tolerant ölkə olduğunu siyasətinə sadiqliyi ilə təsdiqləyib. Milliyyətindən asılı olmayaraq insanlığa, bəşəriyyətə yönəlmiş cinayət olan belə aktlara qarşı beynəlxalq səviyyədə aparılan mübarizədə fərqlənən Azərbaycan erməni terrorundan əziyyət çəkən ölkə olmaqla beynəlxalq koalisiyanın üzvü kimi də səylərini əsirgəmir. Çox təəssüf ki,  qanlı əllər universitetimizdən də yan keçməmişdir. 30 apreldə terrorçunun gülləsi ilə susdurulan müəllimlərimizin, tələbələrimizin ruhuna hörmət olaraq bu təşəbbüsu həyata keçirdik. Bununla da onları daim öz sıralarımızda hiss etdiyimizi bildirdik. Həlak olanların əksəriyyəti gənclər olduğu üçün bu, ölkə gənclərinin terrora qarşı mübarizədə fəallığını artıran, qüvvələrini səfərbər edən bir addımdır. Hər gün bu barelyefin qarşısından keçən tələbələr Vətənə layiq övlad kimi yetişməklə daim gənc qalacaq terror qurbanlarının xatirəsinə ehtiramlarını  yüksək təhsilləri ilə bildirməlidirlər.

Barelyefin hazırlanmasında əməyi olan Azərbaycan Dövlət Rəssamlıq Akademiyasının rektoru, Xalq Rəssamı, tanınmış heykəltaraş Ömər Eldarova, onun yetirməsi Nurəli Şahbazova barelyefin ideya müəllifi kimi minnətdarlığını bildirən Mustafa Babanlı çəkilən zəhməti terror qurbanlarının xatirəsinə ən böyük ehtiram adlandırdı.

“Təbiətdə rast gəldiyimiz zəhərli varlıqlar arasında toxunulmadıqda belə  ziyan verən yeganə əqrəbdir ki, rast gəldiyi bütün canlılara zərər verir, sancır” söyləyən Ömər Eldarov bildirdi ki, barelyefdə terrorçunu məhz əqrəbin simvolunda  verməkdə niyyətləri dinc əhaliyə qarşı amansız vəhşiliklər törədən terror təşkilatlarının ümumi obrazını ifadə etməkdir:

-Universitetin rektorluğu ilə apardığımız məsləhətləşmələrdən sonra belə qərara gəldik ki, həlak olanları qızılgül, terrorçunu isə əqrəbin simasında  çatdırmaq daha məqsədəuyğundur. Pannoda yer alan qəmli qızılgüllərin qöncə və ya tam açılmış halda göstərilməsi isə həlak olanların yaşlarına uyğun ifadəli təsvirdir. Mustafa müəllimin barelyefin hazırlanmasında çəkdiyi zəhməti onun pedaqoq kimi tələbələrə ehtiramı, vətəndaşlıq borcu adlandırardım. 

Milli Məclisin deputatı, YAP Siyasi Şurasının üzvü, partiyanın Nəsimi rayon təşkilatının sədri Məlahət İbrahimqızı bu təşəbbüsü terrora qarşı mübarizədə ən təsirli  vasitə adlandırdı:

- Səbəblərindən, kimə qarşı törədilməsindən asılı olmayaraq terror təşkilatları arasında fərq qoyulmamalıdır. Harada baş verməsindən asılı olmayaraq sonda həyatını itirən insanlar, dağılan, xaraba qoyulan şəhərlər, öldürülənlər gələcəyimizi etibar edəcəyimiz uşaqlar, gənclərdir. Qanlı hadisələrin separatçılıq halları ilə müşayiət olunması isə daha böyük fəlakətlər törədir. Kütləvi qırğınlarla, soydaşlarımızın qətli ilə nəticələnən belə dəhşətlərin şahidi olan Azərbaycan illərdən bəridir ki, terrorun, separatçılığın ağrı-acısını yaşayır. 30 aprel hadisələri də Azərbaycan xalqının xatirəsində daim yaşayacaq, terror qurbanları yad olunacaq. Deyildiyi kimi, həlak olanların hamısı universitetin sayılıb seçilən tələbələri, müəllimləri idi. Namərd gülləsinə qurban getməsəydilər bu gün onlar da həmkarları kimi, ölkə iqtisadiyyatının inkişafında əsl vətəndaş kimi fədakarlıq göstərəcək, Vətənə layiq olduqlarını xidmətləri ilə bildirəcəkdilər. Çox təəssüf ki, bu günü yaşamaq onlara nəsib olmadı. İnanıram ki, universitetin tələbələri gələcək işləri ilə həlak olanların arzularını da yaşadacaqlar. Universitet rəhbərliyinin bu təşəbbüsünü bütünlükdə terrora məruz qalmış bütün soydaşlarımızın xatirə simvolu adlandırardım.

Milli Məclisin deputatı, YAP Xətai rayon təşkilatının sədri, ADNSU-nun professoru Hüseynbala Mirələmov çıxış edərək 30 aprel terror qurbanlarının xatirəsinin əbədiləşdirilməsini təqdirəlayiq hal adlandırdı:

- Bəşəriyyətin üzləşdiyi terrorizm o qədər nəhəngdir ki, heç bir ölkə bu bəlaya qarşı təkbaşına mübarizə apara bilməz. Terrorizm əleyhinə mübarizədə öz sözünü deyən ölkəmizdə Vətən yolunda şəhid olanlara, terror qurbanlarına hörmət və ehtiram dövlət siyasətinin əsasını təşkil edir. Universitetdə təşkil olunan bu mərasim, hazırlanan barelyef bu siyasətə uyğun həyata keçirilən tədbir, ən xeyirxah təşəbbüsdür.

Terror qurbanlarının valideynləri də çıxış edərək dünyadan vaxtsız köçmüş övladlarının xatirəsinin əbədiləşdirilməsinin rəmzi olan barelyefin hazırlanmasında əməyi olan hər kəsə- universitetin rektorluğuna, müəlliflərə minətdarlıqlarını bildirdilər.

 

Xuraman İsmayılqızı

 

İki sahil.- 2017.- 21 fevral.- S.20.