Aqrar sektorda istehsal artır, ixrac stimullaşır

Prezident İlham Əliyevin qeyri-neft sektorunun inkişafı ilə bağlı qarşıya qoyduğu konkret vəzifələr yeni mərhələdə aqrar sahənin inkişafını daha da sürətləndirib. Həyata keçirilən tədbirlər, hüquqi bazanın daha da möhkəmləndirilməsi, dövlət tərəfindən əkinlərə ayrılan subsidiyalar, kənd təsərrüfatı məhsullarının alış qiymətinin artırılması və digər güzəştlər bu sahənin inkişafına xidmət edir.

Prezident İlham Əliyev regionların 2014-2018-ci illərdə sosial-iqtisadi inkişafı Dövlət Proqramının icrasının üçüncü ilinin yekunlarına həsr olunmuş konfransda qeyd edib ki, indi bu sahədə islahatlar aparılır, tədbirlər görülür. Emal müəssisələri şəbəkəsinin genişləndirilməsinə, əkin sahəsi strukturunun təkmilləşdirilməsinə, xüsusilə də ixrac potensialı yüksək olan sahələrin inkişaf etdirilməsinə diqqət göstərilir. İxracın kreditləşməsi, ixrac əməliyyatlarına təminatın verilməsi, ixrac kreditləri üzrə faizlərin bir qisminin ödənilməsi də prosesi daha çevik hala gətirir. Artıq ölkəmizdə bəzi malların, xüsusən də aqrar məhsulların istehsalı daxili tələbatdan daha çox olmağa başlayıb ki, bu da yerli məhsulların ixracına imkan verir.

Azərbaycan regionlarının sosial-iqtisadi inkişafı Dövlət Proqramının uğurlu icrası aqrar sahəyə də öz müsbət təsirini göstərib. Ötən il kənd təsərrüfatı 2,6 faiz artıb.

Kənd təsərrüfatının ənənəvi sahələrindən olan baramaçılığa subsidiyaların verilməsi artıq gələn il bu istiqamətdə məhsuldarlığın artmasına ciddi təkan verəcəkdir. Bu günlərdə Nazirlər Kabinetinin “Barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi bütün növ yaş baramanın hər kiloqramına görə subsidiyanın verilmə Qaydası”nı təsdiq etməsi də bunun əyani sübutudur. Qaydaya əsasən, barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi bütün növ yaş baramanın (əyrilən və karapaçax barama istisna olmaqla) hər kiloqramına görə verilən subsidiyanın məbləği 5 manat müəyyən edilib.

Ölkə başçısının tapşırığı ilə aqrar sektorun, xüsusilə ixracyönümlü məhsulların istehsalının stimullaşdırılması, bu sahəyə hərtərəfli dövlət dəstəyi kənd təsərrüfatının ənənəvi sahələrinin, o cümlədən pambıqçılığın, baramaçılığın, fındıqçılığın dirçəldilməsinə güclü təkan verib. Ötən il pambıq əkinlərinin sahəsi əvvəlki ilə nisbətən 2,8 dəfə artaraq 52057,7 hektara çatıb. Respublikada 87 min 237,7 ton pambıq tədarük olunub ki, bu da 2015-ci illə müqayisədə 2,5 dəfə çoxdur. Baramaçılığın inkişaf etdirilməsi məqsədilə ilin sonlarında Çindən Azərbaycana 1,5 milyon ədəd tut tingi gətirilib və 37 rayona paylanılıb.

Göründüyü kimi, aqrar sektora dövlət dəstəyinin gücləndirilməsi istehsalın artımı ilə yanaşı, ixracın stimullaşdırılmasına, əhalinin məşğulluq və həyat səviyyəsinin yüksəlməsinə, yeni iş yerlərinin yaranmasına ciddi təsir edəcək, kənd təsərrüfatının ənənəvi sahələrinin keçmiş şöhrəti yenidən bərpa olunacaq.

Zahid Rza.

İki sahil.- 2017.-16 mart.- S.-17