Ölkəmizə gələn turistlərin sayı artır

Qeyri-neft sektorunda turizmin məxsusi yeri olduğunu qeyd edən dövlət başçısı cənab İlham Əliyev bu sahənin bundan sonra da prioritet olacağını xüsusi qeyd edir. Məlumdur ki, son illər Azərbaycanda turizm sektoruna dövlətimiz tərəfindən böyük qayğı göstərilir və ölkəmizdə artıq turizmin infrastrukturu formalaşdırılmışdır. Təsadüfi deyil ki, 2011-ci il ölkəmizdə “Turizm ili” elan olunmuşdur. Turizmin inkişafı ilə bağlı qəbul edilən dövlət proqramları da bu günə kimi bu sahənin inkişafına güclü stimul verir.

Hazırda bölgələrdə ən müasir səviyyədə hotellər tikilir. Şimal-qərb zonasında - Şamaxı, Qəbələ, Şəki, Quba və başqa məkanlarda müasir tələblərə cavab verən otellər inşa edilib. Ölkədə turizmin inkişafına göstərilən diqqətdən danışarkən dövlətimizin başçısı bildirmişdir: “Turizmin inkişafı ilə bağlı böyük addımlar atılmışdır. Xüsusilə, bölgələrdə bir neçə beşulduzlu otel istifadəyə verilmişdir. Yeni turizm mərkəzləri açılır. Azərbaycanın turizm potensialı artıq ölkəmizin inkişafına, xalqımızın rifah halının yaxşılaşmasına xidmət göstərir. Əminəm ki, Azərbaycan vətəndaşları getdikcə daha çox ölkə daxilində istirahətə üstünlük verəcəklər. Çünki Azərbaycanda yaradılan imkanlar dünya səviyyəsindədir. Bunu bizim vətəndaşlar da, xaricdən gələn turistlər də qeyd edirlər”.

Qeyri-neft sektorunun bir hissəsi olan turizmdə hər il olduğu kimi, bu ildə yüksək artım müşahidə olunur. Milli Turizm Təbliğat Bürosunun mətbuat katibi Kənan Quluzadənin mətbuata verdiyi açıqlaması onu deməyə əsas verdi ki, təkcə ötən illə müqayisədə bu il Azərbaycana gələn turistlərin sayında 20 faiz artım var. O bildirib ki,2016-cı illə müqayisədə bu il artım tempi daha yüksək olub: “Əgər 2016-cı ildə turistlərin sayında 16 faizə qədər artım olmuşdusa, bu il bu artım 20 faiz olub”.

K.Quluzadə vurğulayıb ki, Azərbaycan Prezidenti İlham Əliyev turizm sahəsinin inkişafına böyük dəstək göstərir və ölkədə infrastruktur xeyli inkişaf edib: “Qarşıya qoyulan plana əsasən, 2020-ci ildə Azərbaycana gələn turistlərin sayı 4.5 milyon nəfər olmalıdır, lakin turistlərin sayında inkişaf tempinə əsasən deyə bilərik ki, bu rəqəmə daha tez nail olunacaq. Azərbaycana gələn turistlərin coğrafiyasında da genişlənmə var və bütün istiqamətlərdən ölkəyə gələn turistlərin sayında artım müşahidə edilir”.

Bu yaxınlarda Milli Məclisdə 2018-ci il dövlət büdcəsinin müzakirəsi zamanı çıxış edən iqtisadiyyat naziri Şahin Mustafayev qeyd edib ki, gələn il xidmət sektorunda 2,7 faiz artım gözlənilir. Turizm sahəsində yaradılan infrastruktur ölkəyə turistlərin gəlməsini artıracaq. Həmçinin, 2018-ci ildə Azərbaycanın turizm sektorunun 6,6%, daha sonrakı 3 ildə isə 6%-dən çox artacağı proqnozlaşdırlır.

Bütün bunlar, əlbəttə ki, Prezident İlham Əliyevin rəhbərliyi ilə, ölkə həyatının digər sahələri kimi, turizm sektoruna da ayırdığı diqqətin nəticəsidir

Mənsumə Babayeva

İki sahil.- 2017.- 22 noyabr.- S.15.