Demokratik prinsiplər Azərbaycanın

dövlət siyasətinin əsasıdır

Ölkəmizin Avropa Şurasına qəbulundan 16 il ötür

Azərbaycanın dünyanın nüfuzlu təşkilatı, ən əsası demokratik prinsiplərin inkişafı ilə məşğul olan Avropa Şurasına bərabərhüquqlu üzv qəbul olunmasından 16 il ötür. 17 yanvar 2001-ci il tarixdə ölkəmizin Avropa Şurasına üzv qəbul olunması barədə qərarın qəbul edilməsi və yanvarın 25-də üçrəngli bayrağımızın qurumun qarşısında dalğalanması ilə ölkəmizin demokratik inkişafında yeni bir mərhələnin əsası qoyuldu. Bu mühüm hadisə Azərbaycanın demokratik dəyərlərə sadiqliyini sözdə deyil, əməldə təsdiqlədiyini bir daha dünyaya nümayiş etdirdi.

Bu fikir beynəlxalq səviyyədə də qeyd olunur ki, Azərbaycanda iqtisadi və siyasi islahatların bir-birini tamamlaması uğurların davamlılığını təmin edir, gələcəyə böyük inamla baxmağa stimuldur. Dövlətimizin başçısı İlham Əliyev demokratik inkişaf baxımından ən öndə gedən ölkələrin təcrübəsinə diqqəti yönəldərək bildirir ki, onların əksəriyyətində iqtisadi inkişaf çox yüksək səviyyədədir, dünyada inkişaf etmiş ölkələr kimi tanınırlar. Bizim də məqsədimiz ondan ibarətdir ki, Azərbaycan inkişaf etmiş ölkələr sırasına daxil olsun. Bunun üçün bütün imkanlar mövcuddur: şəffaf siyasət, siyasi islahatlar, iqtisadi güc, təbii ehtiyatlar, əlverişli coğrafi məkan. Ölkə Prezidenti İlham Əliyevin Sərəncamı ilə işlənib hazırlanan və qəbul edilən “Azərbaycan 2020: gələcəyə baxış” İnkişaf Konsepsiyası bu istəyin reallaşdırılmasının fundamental mexanizmi kimi dəyərləndirilir. Konsepsiyanın hazırlanması zamanı dünya təcrübəsinin araşdırılması, bu işə xarici mütəxəssislərin cəlb olunması, dövlət və ictimai təşkilatlarla geniş müzakirələr aparılması bir daha bu reallığı təsdiqlədi ki, Azərbaycan dövləti islahatları dövrün tələbinə uyğun yeniləşdirməklə yanaşı, qabaqcıl ölkələrin təcrübəsindən bəhrələnməkdə maraqlıdır və bunu əməli işdə sübut edir.

Ölkəmiz beynəlxalq təşkilatlara üzv qəbul olunmaqla, eyni zamanda həqiqətlərini dünya ictimaiyyətinə çatdırmaq üçün tribunanı əldə edir. AŞPA-nın hər sessiyasında Azərbaycanda həyata keçirilən demokratik islahatların yüksək dəyərləndirilməsi də bu təbliğatın real faktlara əsaslanmasından irəli gəlir. Qurumun Azərbaycan üzrə həmməruzəçiləri mütəmadi olaraq ölkəmizə səfər edir, aparılan islahatlarla yaxından tanış olaraq, hazırladıqları hesabatlarında reallıqların əksini tapmasına çalışırlar. Amma bir məqamı da etiraf edək ki, qurumun özündə birləşdirdiyi 47 ölkənin hər birinin Azərbaycana münasibəti eyni ola bilməz. Bu fakt inkaredilməzdir ki, ölkəmizin sürətli demokratik, iqtisadi inkişafını qısqanclıqla qarşılayan xarici qüvvələr var. Onlar hər vəchlə inkişafa kölgə salmaq üçün qeyri-ciddi fikirlər səsləndirir, ətrafında geniş müzakirələr aparırlar. Avropa Şurası Parlament Assambleyasının sessiyalarında tez-tez gündəmə gətirilən “siyasi məhbus” məsələsi də bu məqsədə xidmət edir. Lakin qurumun rəhbərliyi bununla bağlı qəti fikrini səsləndirib - Azərbaycanla Avropa Şurası arasında “siyasi məhbus” məsələsi ilə bağlı heç bir problem yoxdur. Bu məsələ çoxdan qapanıb. 2013-cü ilin yanvarında qurumun qış sessiyasında “siyasi məhbus”larla bağlı hesabatın gündəmə gətirilməsi də həmin qüvvələrin çirkin niyyətlərinə işıq saldı. Amma ölkəmizin xeyrinə atılan addım bir daha yalanın, qərəzin həqiqət üzərində qələbəsinin mümkünsüzlüyünü ortaya qoydu.

Dövlətimizin başçısı İlham Əliyev çıxışlarında Azərbaycana qarşı qərəzli kampaniyanın aparılmasından bəhs edərkən bu məqamı xüsusi qeyd edir: “2013-cü ilin əvvəlində Avropa Şurası Parlament Assambleyasında da əlamətdar hadisə baş vermişdir. Yanvar ayında sessiyada Azərbaycana qarşı əsassız, qərəzli, ikili standartlar əsasında təşkil edilmiş hücum fiaskoya uğramışdır. Assambleyada böyük əksəriyyət antiazərbaycan kampaniyasına qoşulmamışdır, bu, kampaniyanın təşəbbüskarlarını, o cümlədən pərdəarxası təşəbbüskarlarını məyus etmişdir və Azərbaycanın haqlı mövqeyini müdafiə etmişdir. Siyasi amillərlə şərtlənən qətnamənin layihəsi keçmədi, Azərbaycanın mövqeyi üstünlük təşkil etdi. Beləliklə, Azərbaycan beynəlxalq arenada növbəti qələbə qazanmışdır.” Ölkə Prezidenti bu mühüm hadisəni ədalətin təntənəsi kimi dəyərləndirərək qeyd etmişdir ki, haqq-ədalət həmişə zəfər çalmalıdır: “Azərbaycan öz prinsipial, ədalətli mövqeyini nümayiş etdirdi və Assambleyanın qərarı antiazərbaycan qüvvələrinə vurulan ən böyük zərbələrdən biridir. Hesab edirəm ki, bundan sonra onlar və onların arxasında dayanan antiazərbaycan qruplaşmalar özləri üçün nəticə çıxaracaqlar.”

Reallığı inkar etmək qeyri-mümkündür. Ölkəmizdəki sabitlik, davamlı inkişaf və vətəndaş cəmiyyətinin formalaşması ilə xarakterizə edilən iqtisadi tərəqqi Azərbaycanda demokratik təsisatların inkişafı üçün etibarlı zəmin yaradır. Quruma tamhüquqlu üzv kimi qəbulumuz hər iki tərəf üçün faydalıdır. AŞPA-nın ilk sessiyasında ulu öndər Heydər Əliyev bu fikri xüsusi vurğulamışdır ki, Avropa Şurası Azərbaycana nə qədər gərəkdirsə, Azərbaycan da Avropa Şurasına bir o qədər lazımdır. Ötən dövr ərzində AŞ ilə uğurlu əməkdaşlıq, qarşılıqlı münasibətlər öz müsbət nəticəsini verir. Ölkəmizdə ən mütərəqqi prinsiplərə, beynəlxalq təcrübəyə, demokratiyanın tələblərinə əsaslanan institut yaranıb, seçki sistemi təkmilləşdirilir.

Məlumdur ki, 2003-cü ilin mayında Seçki Məcəlləsi Azərbaycan hökuməti ilə ATƏT-in Demokratik Təsisatlar və İnsan Haqları Bürosunun, Avropa Şurası Venesiya Komissiyasının birgə rəyi əsasında qəbul olunub. Sonrakı dövrlərdə də dövlətimiz beynəlxalq əməkdaşlıq sayəsində bu sənədə əlavə və dəyişikliklər edərək, dünyanın qabaqcıl ölkələrinin təcrübəsinin öyrənilməsində maraqlı olduğunu sübut edib. Eyni zamanda Avropa Şurası Venesiya Komissiyası ilə birgə əməkdaşlıq nəticəsində “Sərbəst toplaşmaq azadlığı haqqında” qanuna əlavə və dəyişikliklər edilib, “Siyasi partiyalar haqqında” yeni qanun qəbul olunub.

Konstitusiyamızda əksini tapan maddələrin üçdə iki hissəsi insan hüquq və azadlıqlarının qorunmasına yönəlib. O da məlumdur ki, 2009-cu ildə Konstitusiyaya edilən əlavə və dəyişikliklər sırasında “Dövlətin ali məqsədi” maddəsinə edilən əlavə bir daha vətəndaş amilinə dəyəri nümayiş etdirmişdir. Həmin əlavəyə əsasən, dövlətin ali məqsədi insan hüquq və azadlıqlarının qorunması ilə yanaşı, onların layiqli həyat səviyyəsini təmin etməkdir. Avropa Şurasının qəbul etdiyi qətnamələrdə də Azərbaycanın demokratik prinsiplərə sadiqliyi təqdir olunur. Azərbaycanın demokratiya təcrübəsi nümunə göstərilir.

16 illik zaman Azərbaycan-Avropa Şurası münasibətlərinə müxtəlif istiqamətlərdən işıq salır. O da məlumdur ki, qurum demokratik prinsiplərin inkişafı ilə məşğul olsa da, yeganə problemimiz olan Ermənistan-Azərbaycan, Dağlıq Qarabağ münaqişəsi qurumun sessiyalarında əsas müzakirə olunan məsələlərdəndir. Ermənistan və Azərbaycan bu quruma üzv qəbul olunarkən götürdükləri öhdəliklərdən biri məsələnin sülh yolu ilə həllidir. AŞPA-nın 2005-ci ildə qəbul etdiyi qətnamədə Dağlıq Qarabağ problemi ilə bağlı mövqeyi öz əksini tapıb. Sənəddə Azərbaycanın mövqeyi dəstəklənir, Ermənistanın işğalçılıq siyasəti pislənilir.

Qısa təhlil fonunda bu reallıq bir daha öz təsdiqini tapır ki, dövlətimizin həyata keçirdiyi siyasətin önündə hərtərəfli inkişaf, insanların yüksək həyat səviyyəsinin təmin olunması dayanır. Cənab İlham Əliyev daim bildirir ki, atılan addımlar hansısa dövlətə, təşkilata xoş gəlmək deyil, Azərbaycanın uğurlu gələcəyi üçündür. Demokratikləşmə sadəcə bir şüar, niyyət yox, hərtərəfli inkişaf üçün əsasdır. Demokratik, hüquqi, dünyəvi dövlət quruculuğu yolunu tutan Azərbaycan bu istiqamətdə inamla addımlayır.

Yeganə Əliyeva

İki sahil.- 2017.- 17 yanvar.- S.3.