Azərbaycan dünyada gedən mənfi

proseslərdən kənarda qalmağı bacarır -

Müsahibimiz Milli Məclisin deputatı Musa Qasımlıdır

- Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunmuş iclasındakı nitqində ölkəmizin başçısı cənab İlham Əliyev bildirdi ki, ötən il bütün dünyada qarışıqlıq hökm sürsə də, Azərbaycanda sabitlik daha da möhkəmləndi, inkişaf bərqərar oldu. Bunun səbəblərini hansı amillərlə əsaslandırardınız?

-Bəli, Nazirlər Kabinetinin 2016-cı ilin sosial-iqtisadi inkişafının yekunlarına həsr edilmiş iclasında cənab Prezident İlham Əliyevin nitqini diqqətlə dinlədik. Doğrudan da bu nitq siyasi, iqtisadi, sosial, xarici siyasət, mədəni inkişaf və digər sahələrin siyasi şərhi baxımından böyük əhəmiyyət daşıyır. Həqiqətən, 2016-cı il bütün dünya üçün ağır il oldu. Dünya mürəkkəblik, ziddiyyət, terror hadisələri, müharibələr və s. baxımından ağrılı dönəmdən keçdi. Dövlətlərarası münasibətlər kəskinləşdi, qarşıdurmalar artdı. Əlbəttə, Azərbaycan dünyanın bir parçasıdır. Müstəqil dövlətik və dünyanın müxtəlif ölkələri ilə əlaqələrimiz, qarşılıqlı münasibətlərimiz var. Dünyada baş verən proseslər müəyyən mənada bizə də təsir edir. Amma mühüm hadisə ondan ibarətdir ki, bu gün Azərbaycan dünyada gedən mənfi proseslərdən kənarda qalmağı bacarır. Bu siyasi xəttə görə, Azərbaycan bir çox ölkələrə nümunə oldu. Çünki ölkəmizdə sabitlik hökm sürür. Sabitlik olmayan yerdə inkişaf və tərəqqidən söhbət gedə bilməz. Bu gün Azərbaycan hər bir insanın, vətəndaşın, xaricdən gələn qonaqların rahat və təhlükəsiz yaşaması üçün ən etibarlı ölkədir. Azərbaycan vətəndaşı günün istənilən saatında küçədə rahat hərəkət edə bilirsə, bu özü demokratik göstəricidir. Hətta demokratiyadan ağızdolusu danışan ölkələrdə belə bu vəziyyətə rast gəlmək çətindir. Elə ölkələr var ki, saat səkkizdən sonra küçədə adam tapmaq olmur. Bu isə birmənalı şəkildə Prezident İlham Əliyevin yeritdiyi siyasətin bariz nümunəsidir. Dövlət siyasətinin əsas xəttini vətəndaşın rahat, qayğısız yaşaması tutur. Ölkə vətəndaşının bu günü dünənindən daha yaxşı olmalıdır. Bu, yalnız sabitlik şəraitində ola bilər. Azərbaycan xalqı hər zaman anarxiyanın, qarışıqlığın əleyhinə olub. Bu da təhsil, elm, savadla əlaqəlidir. Adını çəkmək istəmədiyim ölkələrdə baş verən qanlı hadisələrin arxasında birbaşa savadsızlıq durur. Bu da cəhalətə gətirib çıxarır. Bildiyiniz kimi, cənab Prezident ötən ili “Multikulturalizm ili” elan etdi. Bununla da Azərbaycan bütün dünyaya göstərdi ki, inkişaf elə müxtəlif dilli insanların, müxtəlif etnik dini qrupların bir millət halında mehriban yaşamasındadır. Hesab edirəm ki, 2016-cı ildə Azərbaycan dünyaya həqiqətən örnək oldu.

- Bu il isə ölkəmizdə “İslam Həmrəyliyi ili” elan olundu. Bununla ölkəmiz dünyaya hansı mühüm mesajı verəcək?

- Nə üçün bu il ölkəmizdə “İslam Həmrəyliyi ili” elan olundu? Çünki IV İslam Həmrəylik Oyunları bu il ölkəmizdə keçiriləcək. Dünyanın qabaqcıl, demokratiyadan ağızdolusu danışan ölkələrində İslam dinini gözdən salmağa çalışırlar. Harada bir müsəlman görürlərsə, orada terrorçu axtarırlar. Heç kəs dini mənsubiyyətinə görə terrorçu adlandırıla bilməz. İrlandiya, İspaniya kimi ölkələrdə fəaliyyət göstərən məşhur terror təşkilatları var, amma heç kim “xristian terrorçusu”, “xristian terrorizmi” demir. İslam ölkələrinin daxilində təriqətlərarası, cərəyanlararası mübahisələr gedir. Bütün bunlar da cəhalət, savadsızlıqla bağlıdır. Azərbaycanın müstəqilliyinin cəmi 25 yaşı var. Amma həmin müsəlman ölkələri illərdir ki, müstəqildirlər. Azərbaycan İslam ölkələrini birləşdirir və göstərir ki, biz bir olmalıyıq. Azərbaycan dünyəvi dövlətdir. Əhalimizin mütləq əksəriyyəti müsəlmanlardır. Biz müstəqilik. Başa düşürük ki, həmrəy olmalıyıq və bizə qarşı qurulan “kirli” planları pozmalıyıq. Bütün bunlar onu göstərir ki, Azərbaycanın dövlət başçısı təkcə ölkəmizə, İslam dünyasına qarşı qurulan oyunların deyil, eyni zamanda, dünyada gedən mənfi proseslərin qarşısını almağın yollarını göstərir. İslam dünyasını birləşdirən, ortaq məxrəcə gətirən bir mərkəz var. Bu mərkəz Azərbaycandır. Hesab edirəm ki, bundan təkcə müsəlman ölkələri deyil, eyni zamanda, digər ölkələrin də öyrənəcəyi çox şey var.

- Musa müəllim, bəs iqtisadi baxımdan ölkəmiz bu yarışlardan nə əldə edəcək?

- Bilirik ki, hazırda dünyada qlobal böhran hökm sürür. Təlatümlər, enmə-qalxmalar var. Dərindən düşünəndə görürük ki, bu Oyunların keçirilməsi məhz Azərbaycana lazımdır. Düşünürlər ki, Azərbaycan müəyyən qədər xərc çəkəcək, bu xərci niyə çəkməlidir? Bu, bəsit yanaşmadır. Tarixi bir təcrübə var. Bəzən dövlətlər hətta fayda götürmədikləri yerə belə strateji məqsədləri üçün xərc qoyurlar. Tarixçi olduğum üçün dediyim fikrə müxtəlif nümunələr gətirə bilərəm. Azərbaycan bunu edəndə fayda yox, strategiya güdür. Bu Oyunların ölkəmizdə keçirilməsi İslam ölkələrinin, idmançıların bir araya gəlməsi ilə yanaşı, İslam aləminin gənc alim və jurnalistlərinin bir araya gəlməsi deməkdir. Diqqət edin, Azərbaycan maddi cəhətdən nə qoyacaq, mənəvi, strateji cəhətdən nələri əldə edəcək. Bütün bunların hamısı dərindən düşünülmüş məsələlərdir. Bu, Azərbaycanın dünyada mövqeyinin möhkəmlənməsi deməkdir. Cənab Prezident hər hansı bir strategiya müəyyənləşdirəndə 5, 10, 15 il deyil, hətta yarım əsrlik bir strategiya düşünür. Ölkəmizə xeyli media nümayəndəsi gələcək. Onların hər birinin Azərbaycan haqqında bir məlumat belə yazması bizim üçün böyük töhfədir. Ona görə də hesab edirəm ki, cənab Prezidentin 2017-ci ili “İslam Həmrəyliyi ili” elan etməsi, bu Oyunların Azərbaycanda keçirilməsi strateji əhəmiyyət daşıyır. Bu mənada maliyyə, texniki məsələlər ikinci dərəcəlidir. Bütün bunların hamısı dövlət və millətimizin maraqlarına yönəlmişdir.

- Necə düşünürsünüz, dövlətimiz qeyri-neft sektorunun inkişafı siyasətini həyata keçirdiyi vaxtdan bu günə qədər iqtisadiyyatın neftdən asılılığını minimum səviyyəyə endirə bilibmi?

- Bir məsələni açıq söyləmək lazımdır: Ulu öndər Heydər Əliyevin müəyyənləşdirdiyi strategiya ondan ibarət idi ki, neftdən gələn gəlirlər Azərbaycanın qeyri-neft sektorunun inkişafına yönəlsin. Fikir verin, ölkəmizdə neftlə bağlanan sindromların heç biri yaşanmır. Təbii ki, biz neft ixrac edən ölkəyik, Azərbaycanda neft-qaz ehtiyatları var. Neftdən gələn gəlirlərlə məktəblər tikilir, yollar təmir olunur, yeni iş yerləri açılır və s. Qeyri-neft sektorunun təməlində ilk növbədə elm və təhsil dayanır. Çünki millətin gələcəyi elm və təhsildən asılıdır. Ölkəmizin başçısı cənab İlham Əliyev dəfələrlə çıxışlarında vurğulayır ki, neft kapitalını insan kapitalına çevirmək lazımdır. Bizim onsuz da neft, qaz ehtiyatlarımız var. Amma ölkəni irəliyə aparan insandır, kadrlardır. Bilirsiniz ki, hazırda üç sahənin inkişafı dövlətin qarşısında duran prioritet məsələdir. Bunlar yeni texnologiyalar, turizm və kənd təsərrüfatının inkişafıdır. Turizm və kənd təsərrüfatı bir-biri ilə sıx bağlı olan sahələrdir. Əgər turizmi inkişaf etdirmək istəyiriksə, mütləq kənd təsərrüfatı olmalıdır. Çünki turist obyektlərinə xaricdən gələn kənd təsərrüfatı məhsullarını versək, o zaman sərf etdiyimiz xərclər borcumuzu ödəməz. Bir faktı nəzərinizə çatdırmaq istəyirəm. 1994-cü il 20 sentyabr tarixində “Əsrin müqaviləsi”ni imzalamaqla Azərbaycan hətta bir-biri ilə iqtisadi münasibətləri olmayan ölkələri belə bir masa ətrafında oturtmağı bacardı. Göstərdi ki, biz birləşdirən gücük, qüvvəyik. Azərbaycan vuruşmaq üçün bir ölkə deyil. Gəlin, əməkdaşlıq edək. Çünki Azərbaycan xalqı bunu bacarır.

Şəfiqə Dadaşova,

Röya Şahbazi

İki sahil.- 2017.- 25 yanvar.- S.12.