“İslam Həmrəyliyi ili” yeni baxışların

formalaşmasında əhəmiyyətli rol oynayacaq

Ölkə Prezidenti İlham Əliyevin 10 yanvar 2017-ci il tarixli Sərəncamı ilə bu ilin ölkəmizdə “İslam Həmrəyliyi İli” elan edilməsi təbii ki, təsadüfi deyil.

“Müasir müstəqil Azərbaycan dövlətinin qurucusu, ulu öndər Heydər Əliyev Azərbaycanın ən başlıca sərvətlərini qeyd edərkən qədimlərdən bu torpaqda yaşayan, öz taleyini, həyatını bu torpağa bağlayan, müxtəlif dinlərə etiqad edən insanları xüsusi vurğulayırdı: “Ərazimizdə yaşayan azərbaycanlı da, ləzgi də, avar da, kürd də, talış da, udin də, kumık da, başqası da - bütünlükdə hamısı azərbaycanlıdır. Azərbaycanlı sözü bizi həmişə birləşdirib.” Bu fikirləri 2017-ci ilin ölkəmizdə “İslam Həmrəyliyi İli” elan edilməsinə münasibət bildirən YAP Siyasi Şurasının üzvü, Bakı Dövlət Universitetinin Qafqaz xalqları tarixi kafedrasının müdiri, tarix elmləri doktoru, professor, Əməkdar müəllim İradə Hüseynova söylədi:

- Şərqlə Qərbin qovşağında yerləşən Azərbaycan tolerant ölkə imicini yüksək səviyyədə qoruyur. Bu gün Azərbaycanın tolerantlıq təcrübəsi digər ölkələrə nümunə göstərilir və öyrənilməsinin vacibliyi vurğulanır. Ölkəmizin bugünkü reallıqları hər zaman keçilən yola nəzər salmağı bir tələb kimi ortaya qoyur. 1993-cü ildə ulu öndər Heydər Əliyevin xalqın təkidli tələbi ilə hakimiyyətə qayıdışı xalqlar və dinlərarası münasibətlərin müasir dövrün tələblərinə uyğunlaşdırılmasında mühüm rol oynadı. Dövlət-din münasibətləri modeli çərçivəsində inkişaf edən Azərbaycanda bütün dini konfessiyalar qanun qarşısında bərabərdir və eyni statusa malikdir. Ölkəmizin ev sahibliyi etdiyi dini sammitlərdə, sivilizasiyalararası dialoqun gücləndirilməsi məsələlərinə həsr olunmuş beynəlxalq konfranslarda da tolerantlıq təcrübəmiz təqdir olunur. Azərbaycanda milli dəyərlərə sadiqlik, ümumbəşəri dəyərlərə hörmət müasirləşməyə, modernləşməyə yönələn addım kimi qeyd olunur. Təbii ki, ötən il Azərbaycanın BMT-nin Sivilizasiyalar Alyansının VII Qlobal Forumuna ev sahibliyi etməsi də təsadüfi deyildi. Çünki tolerantlığın məkanı, multikultural dəyərlərə sadiq olan müstəqil Azərbaycan mədəniyyətlərarası dialoqun inkişafına, mədəni müxtəlifliyin qorunub saxlanmasına və sivilizasiyalar arasındakı qarşılıqlı münasibətlərin tənzimlənməsinə yönələn mühüm layihələrin reallaşdırılması, mötəbər forumların keçirilməsi sahəsində zəngin təcrübəsi ilə diqqət çəkir. Dövlətimizin başçısı Qlobal Forumdakı çıxışında da bu məqamlara xüsusi diqqət yönəltmişdir ki, Azərbaycan əsrlər boyu dinlər, mədəniyyətlər və sivilizasiyaların bir araya gəldiyi məkan olmuşdur. Biz Şərq ilə Qərb arasında yalnız coğrafi körpü deyil, həm də mədəniyyət körpüsüyük. Əsrlər boyu müxtəlif dinlərin və mədəniyyətlərin nümayəndələri Azərbaycanda sülh şəraitində və ləyaqətlə yaşayıblar. Dini dözümlülük və multikulturalizm burada hər zaman mövcud olmuşdur. Multikulturalizm sözü mövcud olmadığı bir zamanda belə, həmin ideyalar daim yaşayıb.

Tarixə qısa nəzər salan İ.Hüseynova bildirdi ki, sovetlər dövründə xalqımız nə qədər məhrumiyyətlərlə, çətinliklərlə üzləşsə belə dininə, mənəvi dəyərlərinə sadiq qalmışdır. Müstəqillik əldə etdikdən sonra dini ənənələrimizin təbliği, islami dəyərlərə hörmət və ehtiram güclənmişdir. Son on üç ildə bu siyasətin ölkə Prezidenti İlham Əliyev tərəfindən uğurla davam etdirilməsi beynəlxalq səviyyədə də yüksək qiymətləndirilir. İslami dəyərlərdən qaynaqlanan başqa dinlərə dözümlülük, qarşılıqlı anlaşma prinsiplərinə sadiq qalan azərbaycanlılar hər zaman bütün millətlərə hörmətlə yanaşırlar.

Açıqlamada bu məqam da qeyd olundu ki, Azərbaycanın sürətli inkişafı, ölkədəki sabitlik, vətəndaş həmrəyliyi, dini və milli tolerantlıq mühiti bəzi daxili qrupların və xarici qüvvələrin, müəyyən əcnəbi dairələrin maraqlarına cavab vermir. Ölkəmizin hüdudlarından kənarda yaradılan və sistemli şəkildə istiqamətləndirilən müxtəlif missioner təşkilatları və dini təriqətlər Azərbaycana da ayaq açır və onlar respublika ərazisində şəbəkələşməyə cəhd göstərirlər. Bu gün dövlətçilik maraqlarımıza zidd fəaliyyət göstərən, əsrlərlə formalaşmış milli mənəvi dəyərlərimizə, adət-ənənələrimizə, milli və dini hisslərimizə hörmət etməyən, cəmiyyət daxilində gərginlik yaratmaq, vətəndaşları doğru yoldan sapdırmaq və üz-üzə qoymaq, onları dünyanın müxtəlif yerlərindəki münaqişələrdə iştiraka meyilləndirmək və təhrik etmək istəyənləri, şəbəkələşərək pozuculuq fəaliyyəti göstərənləri ifşa etmək, onların əsl simasını cəmiyyətə tanıtmaq əsas vəzifələrdəndir. Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasında da cənab İlham Əliyev bu faktı xüsusi qeyd etmişdir ki, İslamı terrorizmlə eyniləşdirir, islamofobiyaya rəvac verir, xalqları dinə görə bölür, müsəlman qaçqınlarına qarşı hörmətsizlik edirlər. Avropa İttifaqına üzv olan bəzi ölkələrin rəhbərləri “Stop İslam” deyirlər. Bəziləri deyirlər ki, biz miqrantları qəbul etməyə hazırıq, ancaq müsəlmanları yox. Bu, faşizmdir və faşizm harada yaranıb biz yaxşı bilirik və unutmamışıq. Faşizm İslam aləmində yaranmayıb. Ona görə, İslam Həmrəyliyi Oyunlarının çox böyük mənası var. Azərbaycan bu Oyunları keçirməklə bir daha gücünü, imkanlarını göstərir, dini dəyərlərə sadiqliyini nümayiş etdirir. Bizi bölmək, aramıza nifaq salmaq, bir-birimizə qarşı qoymaq istəyənlər öz hədəflərinə çatmamalıdırlar.

Bu gün Azərbaycanın beynəlxalq münasibətlər sistemində artan yeri və rolundan bəhs edən İ.Hüseynova bunun təsdiqi kimi, ölkəmizin ev sahibliyi etdiyi beynəlxalq səviyyəli tədbirləri vurğuladı: “2015-ci ildə Azərbaycan ilk Avropa Oyunlarına ev sahibliyi etdi. Bu il isə IV İslam Həmrəyliyi Oyunlarına ev sahibliyi edəcək. Azərbaycanda keçirilən müxtəlif tədbirlər, o cümlədən İslam Həmrəyliyi Oyunları bu məqsədə xidmət edir ki, müsəlman aləmində əlaqələr daha da yaxın olsun, münaqişələrə son qoyulsun, əməkdaşlıq üçün daha yaxşı zəmin yaradılsın. Dövlətimizin başçısı İlham Əliyev bu nöqteyi-nəzərdən yanaşaraq bildirir ki, İslam Həmrəyliyi Oyunları təkcə idman tədbiri deyil. Bu, böyük siyasi, mədəni tədbir, ictimai hadisədir. Bu, bir daha Azərbaycanı müstəqil, öz dəyərlərinə, İslam dəyərlərinə sadiq ölkə kimi, eyni zamanda, müasir ölkə kimi göstərir və bu gün İslama qarşı çirkin kampaniya aparanlara da bir cavab olacaq.

İ.Hüseynova onu da bildirdi ki, millətlərarası, dinlərarası münasibətlərin sağlam istiqamətdə inkişafında Azərbaycanın sadiq qaldığı dəyərlər doğrudan da öyrənilməyə və təbliğ olunmağa layiqdir.

Yeganə Əliyeva

İki sahil.- 2017.- 27 yanvar.- S.14.