Üçrəngli bayrağımızın Xankəndidə, Şuşada dalğalanacağı gün uzaqda deyil

Dövlətimizin başçısı İlham Əliyev Müdafiə Nazirliyinin “N” saylı hərbi hissəsinin yeni hərbi şəhərciyinin açılışında aprel döyüşlərinin böyük hərbi qələbəmiz olduğunu bir daha önə çəkərək bu reallığı da diqqətə çatdırmışdır: “Uzun illər Ermənistan öz ordusu haqqında miflər yaradırdı, uydurmalar irəli sürürdü ki, bunların yenilməz ordusu var. Aprel döyüşləri göstərdi ki, kimin ordusu yenilməzdir. Ermənistan öz acı məğlubiyyətini etiraf etmək istəməsə də, məcburdur ki, etiraf etsin. Məhz aprel döyüşlərindən sonra Ermənistanın müdafiə naziri başda olmaqla bir çox yüksək vəzifəli hərbçilər öz vəzifələrindən kənarlaşdırıldı. Bu, aprel döyüşlərinin nəticəsi idi.”

Aprel döyüşləri Azərbaycan Ordusunun gücünü, qüdrətini, dövlətimizin qətiyyətini bir daha dünyaya nümayiş etdirdi. Xatırlasaq, işğalçı Emənistan və ona havadarlıq edən dövlətlər Azərbaycanın hərbi xərclərini artırmasını dünyaya sülh danışıqlarından imtina kimi təqdim etməyə çalışırdılar. Buna cavab olaraq rəsmi Bakı hər zaman bəyan edir ki, sülh danışıqlarının cəsarətlə aparılması üçün güclü ordunun olması mütləqdir. Digər tərəfdən, Azərbaycanın tam haqqı var ki, işğal altında olan torpaqlarını istənilən yolla azad etsin. Təbii ki, sülh danışıqları səmərə vermədiyi təqdirdə hərb yolunun seçilməsi şəksizdir. Azərbaycan dövlətinin bu mövqeyi ordumuzun gücünə, döyüş qabiliyyətinə əsaslanır. Ölkə Prezidenti bildirir: “Biz hərbi gücümüzü artırmışıq və artıracağıq. Siyasi addımlar atılacaq ki, beynəlxalq ictimaiyyət bu məsələ ilə bağlı öz mövqeyini daha da geniş ifadə etsin. Biz öz iqtisadi gücümüzü artıracağıq və bütün böhranlara baxmayaraq, ordumuza nə qədər vəsait lazımdırsa, o qədər də təmin ediləcəkdir. Bu gün də bizim büdcə xərclərimizin strukturunda hərbi xərclər birinci yerdədir... Ordumuzun ehtiyacları təmin edilməlidir və biz gücləndikcə, əlbəttə ki, münaqişənin həllini yaxınlaşdıracağıq.”

Ölkəmizin iqtisadi imkanlarının genişlənməsi hər sahədə, o cümlədən ordu quruculuğu istiqamətində mühüm tədbirlərin həyata keçirilməsini şərtləndirir. 2003-cü ildə 160 milyon dollar olan hərbi büdcəmiz bu gün 3 milyard dollardan artıqdır. Dövlətimizin başçısı İlham Əliyev hər zaman bəyan edir ki, Azərbaycanın hərbi büdcəsi Ermənistanın ümumi büdcəsinə bərabər olmalıdır. Müharibə şəraitində yaşayan bir ölkədə dövlət büdcəsində hərbi təyinatlı xərclər üçün ayırmalara, ordu quruculuğuna bu cür diqqət və qayğı təbiidir. Ermənistan-Azərbaycan, Dağlıq Qarabağ münaqişəsinin həlli üçün danışıqların istənilən nəticəni verənə kimi orduya ayırmalarda artımın daim diqqətdə saxlanılacağını vurğulayan Prezident İlham Əliyev Birləşmiş Millətlər Təşkilatı Təhlükəsizlik Şurasının - dünyanın ən mötəbər qurumunun 4 qətnaməsinin, digər beynəlxalq təşkilatların oxşar qərar və qətnamələrinin icra edilməməsini ədalətsizlik hesab edərək bir daha bildirir ki, Azərbaycanın ərazi bütövlüyü bərpa edilməlidir: “Azərbaycanın ərazi bütövlüyü danışıqlar mövzusu deyil, olmayıbdır və olmayacaqdır. Biz çalışırıq ki, məsələ tezliklə beynəlxalq hüquq normaları əsasında öz həllini tapsın və Azərbaycanın beynəlxalq birlik tərəfindən tanınan ərazi bütövlüyü bərpa edilsin. Bunun üçün biz diplomatik səylərimizi davam etdirəcəyik. Bizim işimiz haqq işidir. Biz heç bir başqa ölkənin torpağını zəbt etməmişik, heç bir başqa ölkənin torpağında bizim gözümüz yoxdur... Ancaq bu işğal çox çəkə bilməz. Mən tam əminəm ki, Azərbaycanın ərazi bütövlüyü istənilən yolla bərpa ediləcəkdir. Bunu etmək üçün biz daha da güclü olmalıyıq. Azərbaycanda bütün sahələrdə aparılan islahatlar, ölkəmizin inkişafı, bölgədəki mövqelərinin möhkəmləndirilməsi nəticəsində istədiyimizə nail ola biləcəyik.”

Aprel döyüşləri dövlətimizin başçısı İlham Əliyevin ən yüksək tribunalardan böyük inam və qətiyyətlə səsləndirdiyi “Bir qarış torpağımızı belə düşmənə verməyəcəyik” bəyanatının təsdiqidir. Məlum olduğu kimi, aprel döyüşlərində Füzuli, Cəbrayıl, Ağdərə rayonlarının bir hissəsi işğaldan azad edildi. O ərazilərdə Azərbaycan bayrağı dalğalanır. On minlərlə hektar torpağa bu gün Azərbaycan Ordusu nəzarət edir. O torpaqlarda təmizlik işləri aparılır və yaxın gələcəkdə məcburi köçkünlər o ərazilərə qayıdacaqlar.

Azərbaycan Ordusunun Ermənistan silahlı qüvvələrinə verdiyi aprel dərsləri düşmən ölkədə hələ də böyük rezonans doğurmaqda, ermənilərin rahatlığını pozmaqdadır. Cəbhədəki məlum hadisələrdən sonra işğalçı ölkə üçün indi ən böyük qorxu analoji hadisələrin yenidən təkrarlana biləcəyidir. Elə bu səbəbdəndir ki, xarici himayədarlarına əvvəlkindən daha çox sığınan ermənilərin əsas istəyi Azərbaycanla yeni mümkün hərbi toqquşmaların qarşısının alınmasıdır. Amma bu da çətin ki düşmənə uzun müddət kömək etsin. Çünki əvvəldə də qeyd etdiyimiz kimi, rəsmi Bakı işğal altında olan torpaqlarımızın istənilən yolla azad ediləcəyini ən yüksək tribunalardan bəyan edib. Heç bir güzəştdən söhbət gedə bilməz.

Qətiyyət, peşəkarlıq nümunəsi

İşğalçı Ermənistanın müstəqilliyinin formal xarakter daşıdığı inkaredilməzdir. Bu və ya digər dövlətlərin əlində oyuncağa çevrilən, onların maraqlarının ifadəçisi kimi çıxış edən Ermənistan hakimiyyəti bu gün ölkəsinin hansı səbəblərdən iqtisadi böhran içərisində çapaladığının fərqindədir. İşğalçılıq siyasəti onun bütün enerji layihələrindən kənarda qalmasına səbəb olub. İqtisadi böhran içərisində yaşayan bir ölkənin güclü ordusunun olması nə dərəcədə real ola bilər?

Təbliğatı real faktlara əsaslanan Azərbaycan iqtisadi qüdrətini artırmaqla problemin həllini yaxınlaşdırır. Dövlətimizin başçısı İlham Əliyev bu əminliyi ifadə edir: “Mən tam əminəm, məhz buna görə və digər tərəfdən, artan gücümüz də bunu diktə edir ki, biz mütləq ərazi bütövlüyümüzü bərpa edəcəyik.”

Təbii ki, Ermənistanı bu gün qorxuya salan məqamlardan biri Prezident İlham Əliyevin “İşğaldan azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında” Sərəncamı olub. İşğalçı ölkədə bu, çox geniş səs-küy yaradıb. Açıq və qəzəbli şəkildə qeyd olunur ki, Serj Sarkisyanın cəfəngləri, rəsmi Yerevanın uydurduğu yalanlar daha erməni xalqı tərəfindən qəbul olunmur.

Xatırlasaq, işğalçı ölkədə kütləvi tərketmələr zamanı da hakimiyyətin yeritdiyi siyasətə etiraz bildirilir, ən əsası Dağlıq Qarabağın Azərbaycanın ərazisi olduğu vurğulanır. Dövlətimizin başçısı İlham Əliyevin həyata keçirdiyi siyasət dəstəklənir. Ölkəmizdə iqtisadi inkişaf və bundan qaynaqlanan digər istiqamətlər üzrə atılan addımlar cənab İlham Əliyevin uğurlu siyasətinin nəticəsi kimi qeyd olunur. Bir məqamı da qeyd edək ki, ABŞ-ın “Gullap İnternational” təşkilatı Cənubi Qafqaz ölkələrində ölkə əhalisinin Prezidentinə münasibətini öyrənərkən işğalçı ölkədə əhali öz prezidentlərinə deyil, cənab İlham Əliyevin siyasətinə dəstəyini ifadə etmişdi.

Aprel döyüşləri, bunun ardınca işğaldan azad edilmiş ərazimizdə bərpa işlərinin görülməsi ilə bağlı Sərəncam bir daha Azərbaycan dövlətinin qətiyyətini və prinsipiallığını, ölkə Prezidenti İlham Əliyevin peşəkarlığını, verdiyi vədləri konkret əməli işində təsdiqlədiyini nümayiş etdirdi. Prezident İlham Əliyevin imzaladığı Sərəncamdan sonra sosial şəbəkələrdə paylaşılan statuslardan və verilən şərhlərdən bu qənaətə gəlmək olar ki, Ermənistanda ümumi əhvali-ruhiyyə kifayət qədər pessimistdir. Belə görünür ki, cəmiyyət Dağlıq Qarabağ münaqişəsinin həllinin uzanmasından, bununla bağlı Ermənistanın üzləşdiyi çoxsaylı problemlərdən daha çox narazılıq bildirir.

Ermənilər həm hərbi, həm də diplomatiya cəbhəsində Azərbaycana daha böyük fərqlə uduzmağın gerçəkliyini anlamağa başlayıblar

Hər zaman qeyd etdiyimiz kimi, zaman hakim, tarix isə yaddaşdır. Bu yaddaşlıq fonunda işğalçı Ermənistanın bu günə qədər apardığı təbliğatın əsassızlığı, qərəzliliyi bir daha açıqlanır. Bu reallıq Ermənistan hakimiyyətinə çox yaxşı bəllidir ki, yalanın həqiqət üzərində qələbəsi mümkünsüzdür. Baxmayaraq ki, S.Sarkisyan dünyanın nüfuzlu təşkilatlarının tribunasından öz yalanlarını həqiqət kimi sırımağa çalışır, utanmadan Dağlıq Qarabağın Ermənistanın ərazisi olduğunu bildirir. Amma unutmayaq ki, tarix faktlara əsaslanır. İşğalçı dövlət hər zaman fakt qarşısında aciz qalır.

Dövlətimizin başçısı İlham Əliyevin bəyanatları sırasında xalqın səbrinin tükənməz olmadığı da xüsusi yer tutur. Bu tükənməzliyin təsdiqi məhz aprel döyüşləridir. İstər cəbhə xəttində yaşananlardan, istərsə də dövlətimizin başçısı İlham Əliyevin məlum Sərəncamından sonra sosial mediada paylaşılan statuslarda və yazılan şərhlərdə çox məqamlara aydınlıq gətirilir. Karen Mkrtçyan adlı “Facebook” istifadəçisi “Nə vaxta qədər belə davam edəcək? Bu gün Cocuq Mərcanlıya, sabah isə Şuşaya” başlıqlı status paylaşıb. Digər istifadəçi Arut Xaçatryan adlı bir nəfər “Twitter”də belə bir paylaşım edib: “Biz hələ də anlaya bilmirik ki, İlham Əliyevin fəaliyyətindən niyə Serj Sarkisyan nəticələr çıxara bilmir? Azərbaycan torpaqları geri qaytarır, bizdə isə geri dönən yalnız əsgərlərimizin cənazəsidir. S.Sarkisyan Ermənistanı məhvə aparır.” Henrix Aşotyan adlı biri isə “Facebook”da Prezident İlham Əliyevin imzaladığı Sərəncamla bağlı paylaşılan statusa belə bir şərh yazıb: “Açıq reallıq budur. Aprel döyüşlərində İlham Əliyev Serj Sarkisyana yüksək peşəkarlığın necə olduğunu göstərdi. Bizim prezident bəs nə etdi? Seyrçi mövqeyində qaldı. Azərbaycan Prezidenti bu gün Cocuq Mərcanlı kəndinin bərpası ilə bağlı sərəncam imzalayır. Belə davam etsə, Stepanakert (Xankəndi - red.), Şuşa, Kəlbəcər üçün də belə sərəncamlar gözləniləndir”. Robert Şaqinyan adlı biri isə “Twitter”də yazıb: “Ötən il azərbaycanlıların aprel hücumundan sonra qorxu hələ də canımızdadır. İlham Əliyev Azərbaycan üçün lazımi addımlar atır, ərazilərin qaytarılması ilə bağlı işlər görür. Cocuq Mərcanlı kəndi buna nümunədir. Bəs Serj nə edir?”

Bu kimi statusları xeyli sayda sadalamaq olar. Göründüyü kimi, artıq erməni əhalisi hakimiyyətin yeritdiyi siyasətin ölkəyə nə kimi bəlalar gətirdiyini sosial şəbəkələrdə paylaşmaq məcburiyyətindədir. Dağlıq Qarabağ probleminin həllinin vacibliyini bildirən əhali hakimiyyətin ölkə üçün nə etdiyini düşünəndə hansısa bir uğuru önə çəkməyin mümkünsüzlüyünü etiraf edir.

Ümumiləşdirilmiş şəkildə desək, ötən ilin aprelində Ermənistan-Azərbaycan qoşunlarının təmas xəttində yaşananlar dünyadan hadisələrə düzgün dəyər verməyi bir tələb kimi ortaya qoydu. İşğalçı dövlət sülh istəmədiyini bir daha nümayiş etdirdi. Azərbaycan Ordusunun düşmənə cavabı bu reallığı ortaya qoydu ki, münaqişənin həllində sülh danışıqları səmərə vermədiyi təqdirdə müharibə variantına üstünlük verilərsə, Silahlı Qüvvələrimiz işğal altında olan torpaqlarımızı azad etmək qüdrətindədir. Dövlətimizin başçısı İlham Əliyevin həmin ərəfədə keçirilən Təhlükəsizlik Şurasının iclasında səsləndirdiyi bu bəyanatı bir daha xatırlatmaq istərdik: “... biz münaqişənin həlli ilə bağlı öz prinsipial mövqeyimizdən dönməyəcəyik. Bununla bərabər, biz danışıqlara sadiqik, bundan sonra da çalışacağıq ki, bu münaqişə sülh yolu ilə öz həllini tapsın. Bununla bərabər, biz Ordumuzun gücünü daha da artıracağıq. Ona görə artıracağıq ki, bax, bu təxribatlar, erməni təxribatları cavabsız qalmasın. Hesab edirəm ki, bu gün - aprelin 2-si onlar üçün yaxşı dərs olacaqdır.”

Azərbaycan Ordusunun işğalçı dövlətin silahlı qüvvələrinə verdiyi dərs bu gün böyük inam və qətiyyətlə Cocuq Mərcanlıdan başlanan böyük yolu ruh yüksəkliyi ilə təhlil etməyimizə əsas yaradır.

Yeganə Əliyeva,

İki sahil.- 2017.- 28 yanvar.- S. 3.