Xarici turistlər üçün cazibədar məkan

Azərbaycan turizmin sürətlə inkişaf etdiyi ölkələrdən biridir. Son illərdə bu sahədə görülən işlər, turizmin genişləndirilməsi istiqamətində həyata keçirilən siyasət ölkəmizi xarici qonaqlar üçün daha da cəlbedici edib, Azərbaycana turist axınını ildən-ilə yüksəldib.

Respublikamıza gələn xarici qonaqlarla bağlı statistik göstəricilərin təhlili göstərir ki, turizm sektoru gündən-günə daha da inkişaf edir. İldən-ilə ölkəmizə gələn turistlərin sayında kifayət qədər artım müşahidə edilir. Əlbəttə, mövsümlə bağlı olaraq bir sıra ölkələrdən gələn turistlərin sayında qismən azalma müşahidə edilə bilər, lakin ümumilikdə Azərbaycana gələn turistlərin sayında hər ötən ildə ciddi artım olduğu görünməkdədir. Məsələn, Azərbaycanı ən çox turistlərin ziyarət etdiyi Rusiya və İran kimi ölkələrdən gələnlərin sayında cüzi azalma olsa da bu, ümumi turist sayının artmasına əngəl törədə bilməyib.

Beləliklə, Dövlət Turizm Agentliyinin yaydığı məlumata görə, cari ilin iyul ayında ötən ilin müvafiq dövrü ilə müqayisədə 5,2% artım olub və ötən ay Azərbaycana 330 min xarici qonaq gəlib. Lakin bütövlükdə 2018-ci ilin ilk 7 ayında ölkəyə gələn turistlərin sayı keçən ilin eyni dövrü ilə müqayisədə 9,3% artmışdır.

Sayında cüzi azalma olsa da, Azərbaycana iyul ayında ən çox turist yenə də Rusiyadan gəlib - 119 min nəfər. Bu, təqribən ümumi turistlərin 31 faizi deməkdir. Digər 20% və 15% əcnəbilər isə Yaxın Şərq və Gürcüstanın payına düşür.

Hər zaman Azərbaycana gələn turistlərin çox hissəsinin ərəb ölkələrinin payına düşməsi barədə təsəvvürlər bu statistik göstəricilərdə özünü doğrultmur. Lakin bu bölgədən gələn turistlərin sayında da ciddi artım olmuşdur. Belə ki, Yaxın Şərq bölgəsindən gələn əcnəbilərin sayında ötən ay ilə müqayisədə 30% artım mövcuddur. Bu artımın böyük hissəsini Səudiyyə Ərəbistanından gələn qonaqlar təşkil edir. Daha bir böyük artım- 63% Cənubi və Şərqi Asiya bölgələrindən səyahət edənlər arasında müşahidə olunsa da onların sayı 24 min nəfər olmaqla respublikamıza səfər edənlərin ümumi sayının 7%-ni təşkil edir.

Ümumiyyətlə, yuxarıda da qeyd edildiyi kimi, 2018-ci ilin ilk yeddi ayında Azərbaycana səfər edən qonaqların sayı 1,65 milyondan çox olaraq ötən ilin analoji dövrü ilə müqayisədə 9,3% artmışdır.

Statistikadan da göründüyü kimi, xarici ölkələrdən səfər edənlərin, xüsusilə Gürcüstandan (9%) və Yaxın Şərq bölgəsindən (54%) gələnlərin sayında artım mövcuddur. Bəzi Yaxın Şərq ölkələrindən gələn turistlərin sayında müşahidə edilən artım bəzən hətta 100%-ə çatır. Məsələn, Səudiyyə Ərəbistanından Azərbaycana 42 minə yaxın qonaq gəlib ki, bu da 2017-ci ilin göstəricisi ilə müqayisədə iki dəfədən artıqdır. İraq (25%), Küveyt (227%), Oman (17%) və İsraildən (240%) gələn ziyarətçilərin sayında da əhəmiyyətli dərəcədə inkişaf müşahidə olunmaqdadır.

Qeyd edək ki, son illərdə Azərbaycanda gedən inkişaf, müasir infrastruktur xarici turistlərin cəlb edilməsində və ölkəmizə marağının artmasında ciddi rol oynayıb. Təbii ki, burada son bir neçə ildə bir sıra nüfuzlu beynəlxalq tədbirlərin və idman yarışlarının Azərbaycanda keçirilməsi də təsiredici amillər kimi qəbul edilməlidir.

Bütövlükdə Azərbaycan mədəniyyəti, təbiəti və mətbəxi xarici turiztlər üçün hər zaman maraqlı və cazibədar olmuşdur.

Taleh Turqut

İki sahil.-2018.- 29 avqust.- S.12.