Biz Xocalıya ədalət tələb edirik!

Xocalı soyqırımının 26-cı ildönümü dünya mediasının gündəmində

Heydər Əliyev Fondunun vitse-prezidenti Leyla Əliyevanın rəhbərliyi ilə aparılan “Xocalıya ədalət” beynəlxalq kampaniyası çərçivəsində görülən işlər artıq öz müsbət nəticələrini verməkdədir. Belə ki, dünyanın nüfuzlu kütləvi informasiya vasitələrində 26 il əvvəl ermənilər tərəfindən törədilmiş Xocalı soyqırımı ilə bağlı daha geniş yazılar dərc edilməkdədir.

Malayziyada ingilis dilində nəşr onunan “The Globalist” jurnalında Xocalı soyqırımından bəhs edən “Azərbaycan və onun tarixində ağrılı epizod” sərlövhəli geniş məqalə dərc olunub. Xocalı faciəsini əks etdirən fotolara da geniş yer verilən yazıda qeyd edilib ki, 1992-ci il fevralın 25-dən 26-na keçən gecə Xocalı qanlı əməliyyatın hədəfi olub. Erməni silahlı qüvvələri Sovet İttifaqının 366-cı motoatıcı alayının hərbi texnikası və şəxsi heyətinin köməyi ilə bu şəhərin sakinlərinə qanlı divan tutub. Bu qətliamı yalnız yerli əhaliyə deyil, bütün bəşəriyyətə qarşı törədilən soyqırımı olduğunu yazan məqalə müəllifi Dağlıq Qarabağ münaqişəsinin başlıca səbəblərinin kökündə Ermənistanın Azərbaycana qarşı ərazi iddialarının dayandığını xüsusi vurğulayıb.

Malayziyanın Cənub-Cənub İnformasiya Qapısı Agentliyinin (SSIG) rəsmi internet saytında dərc olunan yazıda isə Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” kampaniyası çərçivəsində görülən işlər əksini tapıb. Bildirilib ki, Azərbaycan rəhbərliyinin məqsədyönlü siyasəti və Heydər Əliyev Fondunun vitse-prezidenti Leyla Əliyevanın səyləri nəticəsində Xocalı faciəsi beynəlxalq səviyyədə soyqırımı kimi tanınmaqdadır. Artıq dünyanın bir çox ölkələri, o cümlədən ABŞ-ın 20-dən çox ştatı parlament səviyyəsində Xocalı faciəsini soyqırımı kimi tanıyıb.

“Xocalıda soyqırımı aktı - ədalət anı nə vaxt yetişəcək”

Fransanın www.atlantico.fr portalında “Dağlıq Qarabağ: 26 il sonra Xocalı kütləvi qırğını ilə bağlı qulaqbatırıcı sükut” başlıqlı məqalədə Fransa, eləcə də Avropa və dünya siyasətçilərinin Ermənistan-Azərbaycan, Dağlıq Qarabağ münaqişəsinin ən qanlı səhifəsi olan Xocalı soyqırımı ilə bağlı mövqelərini açıq şəkildə bəyan etmədikləri təəssüflə qeyd olunub.

“Ər-Riyad” qəzetində (Səudiyyə Ərəbistanı Krallığı) Xocalı soyqırımının 26-cı ildönümü ilə əlaqədar Azərbaycanın bu ölkədəki səfiri Şahin Abdullayevin müsahibəsi yer alıb. Ərəbdilli oxuculara bu soyqırımı barədə ətraflı məlumat verən səfirimiz, həmçinin vurğulayıb ki, BMT Təhlükəsizlik Şurası Ermənistanın işğal etdiyi Azərbaycan torpaqlarından qeyd-şərtsiz çıxarılmasını tələb edən 4 qətnamə qəbul edib, ancaq təcavüzkar ölkə buna məhəl qoymur. Tədqiqatçı alim Seymur Nəsirovun Misirin “alwasela.com” saytındakı “Xocalı soyqırımı - XX əsrin faciəsi” sərlövhəli məqaləsi də bu nöqteyi-nəzərdən diqqətçəkəndir.Yeri gəlmişkən, qeyd edək ki, Xocalı soyqırımının 26-cı ildönümü ilə əlaqədar Azərbaycanın İtaliyadakı səfiri Məmməd Əhmədzadənin müsahibəsi İtaliyanın “Report Difesa” analitik portalında, Ukraynanın Əməkdar Təhsil İşçisi Arif Quliyevin “İnsanlığa qarşı cinayət: hətta öz günahını etiraf edən də hüquqi cəza almadı” sərlövhəli məqaləsi Ukraynanın “Versii” saytında, Azərbaycan Dağ Yəhudiləri İcmasının başçısı Milix Yevdayevin “Xocalı qətliamı: Azərbaycan yəhudisinin düşüncələri” sərlövhəli məqaləsi Amerikanın “Jewish Journal” qəzetində, Bakı Dövlət Universitetinin tədqiqatçısı, İtaliyanın Beynəlxalq İqtisadi və Siyasi Araşdırmalar İnstitutunun üzvü Leyla Rəşidin “Xocalı soyqırımı cəzasız bir cinayərdir” sərlövhəli analitik məqaləsi İtaliyanın Beynəlxalq İqtisadi və Siyasi Araşdırmalar İnstitutunun saytında dərc edilib.İspaniyanın “La Vanguardia” qəzeti ölkəmizin İspaniyadakı səfirliyinin Xocalı soyqırımının 26-cı ildönümü ilə bağlı təşkil etdiyi tədbirdən söz açıb. Rumıniyanın “Agerpres” və “AMOSNEWS” xəbər agentlikləri də Xocalı soyqırımını gündəmə gətiriblər. Beynəlxalq mükafatlar laureatı Nargiz Kasimova Xocalı soyqırımı haqqında həqiqətləri Özbəkistanın “qalampir.uz” portalında özbək dilində öz soydaşlarına çatdırıb.

İsrailli ekspert Arye Qut İsraildə çıxan ingilisdilli “The Jerusalem Post” qəzetində “Xocalıda soyqırımı aktı - ədalət anı nə vaxt yetişəcək” sərlövhəli məqaləsində Babiy Yar, Liditsa, Oradur, Xatın, Sonqmiyə ötən əsrin 90-cı illərinin əvvəlində daha bir adın - Xocalının da əlavə olunduğunu bildirərək həmin gecənin dəhşətlərini qələmə alıb: “Erməni silahlı birləşmələrinin vəhşiliyi nəticəsində 613 nəfər qətlə yetirildi, 487 insan əlil oldu, 1275 dinc sakin, o cümlədən qocalar, uşaqlar, qadınlar əsir götürülərək görünməmiş işgəncələrə, təhqirlərə və həqarətlərə məruz qaldılar... Həmin gecə donub ölmüş insanların ümumi sayını hesablamaq mümkün deyildi. Statistik hesabatlara görə, onların əksəriyyəti indi də “itkin düşmüş” hesab olunur”. Daha sonra məqalə müəllifi təəssüflə yazır ki, İkinci Dünya müharibəsinin sonunda nasistlərin əksəriyyəti Nürnberq prosesində beynəlxalq məhkəmə qarşısında dayandı, amma Azərbaycanın dinc vətəndaşlarının Xocalıda kütləvi şəkildə qətlə yetirilməsinin ideoloqları və icraçıları öz layiqli cəzalarını almadılar. Biz Xocalıya ədalət tələb edirik!”

“Xocalı: Dünyanın vicdanında qanayan bir yara”

Perunun “El Peruano” qəzetindəki məqalə isə belə adlanır: “Xocalı soyqırımı: insanlığa qarşı cinayət”. Bu yazıda həm də bugünədək Ermənistanın işğalı altında olan Azərbaycan torpaqlarından didərgin düşmüş bir milyondan artıq azərbaycanlının öz doğma yurdlarına dönməyi hələ də həsrətlə gözlədikləri vurğulanır.

Latın Amerikasının bir çox ölkəsində yayımlanan “Telesur TV” telekanalının internet səhifəsində “Xocalı: Dünyanın vicdanında qanayan bir yara” başlıqlı məqalə ilə çıxış edən tanınmış çilili jurnalist və beynəlxalq analitik Pablo Xofre öz yazısını bu sözlərlə tamamlayıb: “Ermənistan işğal etdiyi əraziləri geri qaytarmağa məcbur edilməli və dünyanın vicdanında qanayan yara olaraq qalmaqda davam edən Xocalı soyqırımına ədalət təmin edilməlidir.”

Rusiyada nəşr olunan “Nezavisimaya qazeta”da dərc edilən “Xocalı faciəsinə qarşı etinasızlıq qəbuledilməzdir” başlıqlı məqalədə Xocalı sakinlərinə divan tutmaq haqqında əmrin Ermənistanın indiki prezidenti, 1992-ci ildə Dağlıq Qarabağda erməni silahlı birləşmələrinin qərargah rəisi olmuş Serj Sarkisyan tərəfindən verildiyi də qeyd olunub.

Pakistanın “National Herald Tribune” qəzetində və nəşrin elektron portalında “Xocalı soyqırımı üçün ədalət” sərlövhəli məqalədə xocalıların məhz azərbaycanlı olduqlarına görə qətlə yetirildikləri diqqətə çatdırılıb. Serbiyanın balkanian.com saytında “Azərbaycan Xocalı faciəsinin qurbanlarını xatırlayır” adlı məqalədə də dünya birliyinin bu soyqırıma laqeyd münasibəti qeyd edilib.

Türkiyənin TRT HABER televiziya kanalı Xocalı soyqırımı ilə bağlı Sinan Burhanın aparıcılığı ilə “Anadolu soruşur” media platforması çərçivəsində geniş veriliş yayımlayıb. Verilişin qonağı Azərbaycan Milli Məclisinin Xocalıdan olan deputatı Elman Məmmədov “Kərkük” qəzetinin departament rəhbəri Aybəniz Kuzeçi, “Cay” TV-nin əməkdaşı Həsən Yavuz və “Yeni çağ” qəzetinin baş redaktoru, yazıçı-publisist Aqil Ələsgərin suallarını cavablandırıb. Türkiyənin NTV və “Ülke TV” kanallarında da Xocalı soyqırımının 26-cı ildönümü ilə bağlı reportajlar yayımlanıb. Şimali Kaliforniyanın San-Fransisko, San-Xose, Kampbel, Mauntin Vyu, Los-Altos, Palo Alto və digər şəhərlərindəki yerli ictimai kanallarda fevral ayının 23-dən başlayaraq ABŞ-da Xocalı soyqırımı mövzusunda çəkilmiş ilk ekran əsərinə - “Zülmətdən qaçarkən” sənədli filminin nümayişinə start verilib.

Qvami Məhəbbətoğlu

İki sahil.- 2018.- 27 fevral.- S.15.