Yunus Oğuzla “İmzalı görüş”

Azərbaycan Respublikasının Prezidenti yanında Bilik Fondunun “Mədəni maarifləndirmə” proqramı çərçivəsində keçirilən “İmzalı görüş” layihəsi üzrə “Olaylar” İnformasiya Agentliyinin baş direktoru və eyniadlı qəzetin baş redaktoru, yazıçı Yunus Oğuzla görüş keçirilib.Qonaqları salamlayan Fondun nümayəndəsi Oktay Səmədov “Mədəni maarifləndirmə” proqramı çərçivəsində görülən işlər barədə məlumat verib, “İmzalı görüş” layihəsi çərçivəsində gənclərin yazarlarla təşkil edilmiş görüşlərindən danışıb.O. Səmədov deyib ki, yeniyetmələrin və gənclərin mütaliəyə marağını stimullaşdırmaq üçün onların çağdaş dövrün tanınmış simaları ilə görüşlərinin təşkili vacibdir.Görüşdə akademik Nizami Cəfərov Yunus Oğuzun roman yaradıcılığı barədə söhbət açıb, tələbələr qarşısında onun əsərlərini analiz edib. N. Cəfərov bildirib ki, Yunus Oğuz əsasən tarixi romanların müəllifi kimi tanınır. Onun romanları bədii üsulla olsa da həm tariximizin öyrənilməsində, həm də vətənpərvərlik hisslərinin aşılanmasında mühüm təsirə malikdir.Sonra söz Yunus Oğuza verilib. Yazıçı tarixi mövzuda roman yazmağın zərurətindən danışaraq, müəllifi olduğu əsərlər barəsində ətraflı məlumat verib.

Görüş sual-cavab formatında davam edib. Sonda müəllifin imzalı kitabları iştirakçılara hədiyyə olunub.

Qeyd edək ki, Bilik Fondu tərəfindən təşkil edilən “İmzalı görüş” layihəsi çərçivəsində Milli Məclisin deputatı, yazıçı-publisist Aqil Abbas, yazıçı-publisist Rəşad Məcid, Xalq yazıçısı Çingiz Abdullayev, şair-tərcüməçi Səlim Babullaoğlu, uşaq yazarları Sevinc Nuruqızı, Aygün Bünyadzadə və Mehriban Nağıyeva ilə görüşlər keçirilib.

Taleh Turqut

İki sahil.- 2018.- 3 mart.- S.13.