Novruz milli birlik rəmzi, bolluq, bərəkət bayramıdır

Odlar yurdu Azərbaycanımıza ilin ən gözəl fəsli olan bahar gəlib. Onun ilıq nəfəsi ilə oyanan təbiət yenidən yaşıl libasına bürünür. Bu gün hər kəs müstəqil siyasət aparan, inkişaf və tərəqqi yolunda inamla irəliləyən respublikamızın hər yerində baharın gəlişini, xalqımızın qədim el bayramı olan Novruzu böyük sevinc və fərəhlə qarşılayır.Novruz bayramı uzaq keçmişlərdən mənəvi dünyamızın ən dərin qatlarınadək nüfuz etmiş, müqəddəs dəyərlərimizin təşəkkülünə töhfələr vermiş və milli düşüncə tərzimizin ayrılmaz tərkib hissəsi olmuşdur. Milli-mənəvi dəyərlərimizi özündə əks etdirən, dünyaya tanıtdıran Novruz ta qədimlərdən sülh və əmin-amanlığın təmin olunması, insanlar arasında birlik və mehribanlığın nişanəsi olub. Qədim dövrlərdən bəri xalqımız Novruzu yeni ilin başlanğıcı hesab edib, onu bolluq, bərəkət və firavanlığın əzəli kimi rəmziləşdirib. Novruz sərhəd tanımayan, türkün bütün əzəli torpaqlarında məskunlaşmış, eyni soykökünə mənsub insanları sarsılmaz birliyə, dostluq və həmrəyliyə, bolluq və firavanlıq uğrunda birgə mübarizəyə səfərbər edən, onların milli-etnoqrafik dəyərlərini tarix boyu bütün incəliklərinə qədər qoruya-qoruya çağdaş dünyamızın qloballaşma meydanınadək gətirib çıxaran bəşəri bir bayramdır.2010-cu ildə BMT-nin qərarı ilə martın 20-si Beynəlxlaq Novruz Günü elan olunub. Təbii ki, bu böyük bir coğrafiyada yaşayan 220 milyondan çox insanın milli mənəvi yaddaşına dünyanın ən mötəbər təşkilatı səviyyəsində verilən qiymətin bariz nümunəsi, özündə saflığı, paklığı, ali insani dəyərləri təcəssüm etdirən, həyatın yenidən canlanmasının müjdəçisi olan Novruzun müqəddəsliyiniə olan inamın təntənəsidir.Əsrlərin sınağından çıxmış mənəvi dəyərlərimizi, adət-ənənələrimizi özündə yaşadan Novruz bolluğun, bərəkətin və xeyirxahlığın təcəssümüdür. Novruz həm də sülh, əmin-amanlıq və dostluq bayramıdır. Hər il ümummilli lider Heydər Əliyevin qayğısı və diqqəti ilə Azərbaycanda Novruz bayramı geniş xalq şənlikləri ilə keçirilib. Müstəqillik əldə etdikdən sonra milli bayramımız nəinki Azərbaycanda, o cümlədən qəlbi vətən məhəbbəti ilə döyünən soydaşlarımız tərəfindən ölkəmizin hüdudlarından kənarda da qeyd edilir.Azərbaycanı dünyanın çiçəklənən, tərəqqi edən dövlətlərindən birinə çevirmək arzusu ilə yaşayan Heydər Əliyev Novruz bayramı münasibətilə Azərbaycan xalqına ünvanladığı təbriklərdə ölkədə gedən bütün ictimai-siyasi prosesləri təhlil edir, böyük quruculuq işlərini, xalqın həyat səviyyəsinin yüksəlişini önə çəkirdi: “Novruz şənlikləri sübut edir ki, ölkəmizdə daxili ictimai-siyasi sabitlik bərqərar olubdur. İnsanlar ağır əziyyətlərdən, daxili toqquşmalardan, ədavətdən, ziddiyyətlərdən xilas olub rahat yaşayır, gələcəyə inamla baxırlar... Deməli, bu bayram əmin-amanlığın, ictimai-siyasi sabitliyin rəmzidir. Bu bayram ölkədə gedən hüquqi, dünyəvi, sivil dövlət quruculuğunun rəmzidir. Bu bayram çağdaş məmləkətimizdə insan hüquqlarına olan yüksək hörmət və qayğının rəmzidir. Novruz onu göstərir ki, Azərbaycanda dövlət müstəqilliyi dönməz amilə çevrilib”.Bu gün Azərbaycanı yeni zirvələrə doğru inamla aparan Prezident İlham Əliyev yüksək mənəvi dəyərlərimizi, adət və ənənələrimizi yaşadan bu ümumxalq bayramını həmişə yüksək qiymətləndirib. Xalqımızı Novruz bayramı münasibətilə təbrik edən dövlətimizin başçısı hər birimizə, azərbaycançılıq məfkurəsi işığında dünyanın bütün guşələrində yaşayan soydaşlarımıza həmrəyliyimizin rəmzi olan bu el bayramı münasibətilə bol sevinc, ruzi-bərəkət, firavanlıq arzu edərək, varlığımızdakı tükənməz yenilikçilik ruhu sayəsində ümummilli mənafelər naminə bütün sınaqlardan bundan sonra da alnıaçıq çıxacaq və taleyüklü məsələlərin layiqincə həllinə nail olacağımızı bildirib: “Azərbaycan torpağında qədim tarixi köklərə malik Novruz bayramı uzaq keçmişlərdən mənəvi dünyamızın ən dərin qatlarınadək nüfuz etmiş, müqəddəs dəyərlərimizin təşəkkülünə töhfələr vermiş və milli düşüncə tərzimizin ayrılmaz tərkib hissəsi olmuşdur. Əcdadımızın nikbin həyat fəlsəfəsini dolğun nümayiş etdirən bu bayram Uca Tanrının nemətlərinə minnətdarlıq duyğusunun təcəssümü, böyük hikmətlə yaradılmış təbiətin ilahi nizamına ehtiramın təzahürüdür. Yurdumuzun çoxəsrlik mədəni sərvətlər xəzinəsində Novruz şərəfli yer tutur. Gələcəyə inamımızı sarsılmağa qoymayaraq bizi ümidlərlə yaşadıb daim yolumuzu işıqlandıran Bahar bayramına fikir tariximizin görkəmli nümayəndələri həmişə rəğbət bəsləmişlər. Novruz bayramı azadlıq və istiqlal duyğularımızın ifadəsinə çevrilməklə möhtəşəm yubileyi ərəfəsində olduğumuz Azərbaycan Xalq Cümhuriyyətinin gerçəkləşməsi və XX əsrin sonlarına doğru xalqımızın müstəqil dövlətçilik idealına yenidən qovuşması üçün zəmin hazırlamış milli özünüdərk amillərindəndir”.Son 14 ildə ölkəmizdə güclü sənaye potensialının yaradılması istiqamətində irimiqyaslı layihələr həyata keçirilib. Bu gün qətiyyətlə demək olar ki, respublikamızın iqtisadiyyatı əsasən qeyri-neft sektoru hesabına inkişaf edir. Prezident İlham Əliyevin rəhbərliyi ilə həyata keçirilən irimiqyaslı layihələrin, Dövlət proqramlarının uğurla reallaşdırılması sayəsində bu istiqamətdə ciddi uğurlar əldə edilib. Regionların sosilal-iqtisadi inkişafına dair Dövlət proqramlarının uğurlu icrası sayəsində respublikamızın bütün bölgələrinin siması tamamilə dəyişib, müasir tələblərə cavab verən infrastruktur yaradılıb, yeni iş yerləri açılıb, qeyri-neft sektorunun inkişafı, daha çox valyuta gətirən strateji əhəmiyyətli kənd təsərrüfatı məhsullarının istehsalının artırılması üçün bütün imkanlardan istfadə edilməsi əhalinin məşğulluğunu daha da artırıb.Prezident İlham Əliyev Bakıda Novruz bayramı münasibətilə ümumxalq şənliyində çıxışı zamanı bildirib ki, Azərbaycan iqtisadi sahədə də böyük uğurlara imza atıb: “Biz bu bayramı gözəl iqtisadi nəticələrlə qarşılayırıq. İki ayda ümumi daxili məhsul 1,3 faiz, qeyri-neft sektorunda isə 2,3 faiz artmışdır. Sənaye istehsalı 1,4 faiz, qeyri-neft sektorunda isə 8,4 faiz artmışdır. Kənd təsərrüfatı məhsullarının istehsalı təxminən 4 faiz, əhalinin gəlirləri isə 10,2 faiz artmışdır. İnflyasiya 4,7 faizdir. Yəni, bizim nəzərdə tutduğumuz vəzifələr icra edilir. İki ayda valyuta ehtiyatlarımız 2,1 milyard dollar artmışdır və hazırda 44 milyard dollara bərabərdir. Bu, böyük rəqəmdir. Biz valyuta ehtiyatlarımızı il ərzində daha da artıracağıq. Manatın məzənnəsi sabitdir. Bütün infrastruktur layihələri uğurla icra edilir. Bir sözlə, son müddət ərzində iqtisadi siyasətlə bağlı aparılan ciddi islahatlar öz gözəl nəticələrini vermişdir. Biz bu islahatları dərinləşdirəcəyik, bundan sonra da aparacağıq və Azərbaycan iqtisadiyyatının dayanıqlığını bundan sonra da təmin edəcəyik”.Həyata keçirilən tədbirlər sayəsində bütün sahələrdə hərtərəfli və dinamik inkişaf təmin edilib, respublikamızın iqtisadiyyatının qısa, orta və uzunmüddətli inkişaf hədəflərinin müəyyənləşdirildiyi, milli iqtisadiyyat və iqtisadiyyatın əsas sektorları üzrə strateji yol xəritələri sənədində bu sahəyə xüsusi diqqət yetirilib və çoxsaylı tədbirlər müəyyən edilib.Ölkə başçısı həmçinin bildirib ki, Azərbaycanın uğurlu iqtisadi islahatları çox ciddi sosial siyasətlə tamamlanır: “Həmişə demişik ki, bizim siyasətimizin mərkəzində Azərbaycan vətəndaşı dayanır. Köklü iqtisadi islahatlar bəzən sosial sahəyə mənfi təsir göstərir. Ona görə hətta əvvəlki illərdə - bir-iki il bundan əvvəl iqtisadi böhran dövründə bir dənə də olsun sosial proqram ixtisara düşməmişdir, bütün sosial öhdəliklər vaxtında yerinə yetirilmişdir. İmkanlarımız artdıqca biz dərhal sosial məsələlərə daha da böyük diqqət göstərməyə başladıq. Daha doğrusu, daha böyük maliyyə vəsaiti ayırmağa başlamışıq. Bu il büdcədən maliyyələşən təşkilatlarda əməkhaqqı 10 faiz artmışdır. Əgər biz dünya xəritəsinə baxsaq, görərik ki, indiki dövrdə nadir ölkələrdə maaşlar artır. Biz imkan daxilində bunu edirik və bundan sonra da edəcəyik”.Prezident İlham Əliyevin uğurlu xarici siaysətinin nəticəsində Ermənistan-Azərbaycan, Dağlıq Qarabağ münaqişəsinin ədalətli şəkildə həlli istiqamətində mövqelərimiz daha da möhkəmlənib. Münaqişənin həllində Azərbaycanın mövqeyi qəti və prinsipial xarakter daşıyır. Artıq bu mövqe dünya birliyi tərəfindən də dəstəklənir və bildirilir ki, Dağlıq Qarabağ Azərbaycanın ayrılmaz hissəsidir. Azərbaycan işğal faktı ilə heç zaman barışmayacaq və öz ərazisində ikinci erməni dövlətinin yaradılmasına imkan verməyəcək. Ötən dövr ərzində ATƏT-in Minsk qrupunun vasitəçiliyi ilə Azərbaycan və Ermənistan prezidentləri arasında keçirilən bütün görüşlərdə xalqımızın iradəsi əsasında dövlətimizin başçısı tərəfindən danışıqlar prosesində ölkəmizin strateji mövqeyi məhz bu şəkildə qoyulub.Respublikamız daha bir siyasi hadisə ərəfəsindədir. Aprelin 11-də Azərbaycanda növbəti prezident seçkiləri keçiriləcək. Bu seçkinin də azad və ədalətli, şəffaf keçirilməsi üçün zəngin qanunvericilik bazası mövcuddur. Ölkəmizdə istər seçki qanunvericiliyinin təkmilləşdirilməsi, istərsə də seçkilərə hazırlıq məsələlərinə xüsusi diqqət göstərilir. Prezident İlham Əliyevin 2017-ci il 21 fevral tarixli Sərəncamı ilə Azərbaycan Respublikasının Birinci vitse-prezidenti vəzifəsinə təyin edilən Mehriban xanım Əliyeva uzun illərdir ki, çoxşaxəli fəaliyyəti ilə müstəqil dövlətimizin inkişafına böyük töhfələr verib. Onun fəaliyyəti xalqımız tərəfindən yüksək qiymətləndirilir.Dünən paytaxt Bakıda keçirilən Novruz şənliyində iştirak edən Prezident İlham Əliyev bildirib ki, ölkəmizdə daxili sabitlik mövcuddur və sabitliyin əsas təminatçısı Azərbaycan xalqıdır: “Xalq-iqtidar vəhdəti sabitliyin əsas təminatçısıdır. Daxili siyasətlə bağlı görülən işlər, aparılan islahatlar öz gözəl nəticələrini verməkdədir. Dünyada gedən proseslər bir daha onu göstərir ki, ancaq sabit olan ölkələr uğurla inkişaf edə bilər. Ancaq sabit olan ölkələrə xarici sərmayə qoyulur, insanlar rahat, təhlükəsizlik şəraitində yaşayırlar. Bu gün dünya gündəliyinin əsas məsələsi məhz təhlükəsizlik məsələləridir. Azərbaycan bu istiqamətdə apardığı siyasətlə dünyada böyük rəğbət qazanmış ölkələrdən biridir. Ölkəmizdə daxili risklər üçün heç bir mənbə yoxdur. Xarici risklərdən isə biz özümüzü qoruyuruq və bundan sonra da qoruyacağıq, Azərbaycan xalqının rahat yaşamasını təmin edəcəyik”.

Zahid Rza

İki sahil.- 2018.- 20 mart.- S.27.