Heydər Əliyev Fondunun vitse-prezidenti
Leyla Əliyeva Azərbaycan həqiqətlərinin dünyaya
çatdırılmasında mühüm rol oynayır
Leyla Əliyevanın çoxşaxəli fəaliyyəti
Azərbaycan gənclərinə yaxşı nümunədir
Hər kəs öz ömrünü
keçdiyi həyat yolu, sərgilədiyi əməlləri
ilə mənalandırır. Bəzi insanların fəaliyyəti
məhdud çevrəni əhatə edir, şəxsi
maraqlardan kənara çıxmır. Elə insanlar da var ki,
onlar həyata baxışı, fəaliyyəti ilə diqqəti
cəlb edirlər. Bu baxımdan Heydər
Əliyev Fondunun vitse-prezidenti, İslam Əməkdaşlıq
Təşkilatı Gənclər Forumunun mədəniyyətlərarası
dialoq üzrə baş əlaqələndiricisi, Rusiyadakı
Azərbaycanlı Gənclər Təşkilatının
(RAGT) sədri, Ətraf Mühitin Mühafizəsi naminə
Beynəlxalq Dialoq İctimai Birliyinin (İDEA) təsisçisi
və sədri Leyla Əliyevanın həyatı və fəaliyyəti
dərin ictimai məzmun kəsb edir. 1985-ci il iyulun 3-də
dünyaya göz açan Leyla Əliyeva daim harada köməyə
ehtiyac varsa, orada olmağa çalışır. Leyla
Əliyevanın çoxşaxəli fəaliyyəti Azərbaycan
gənclərinə yaxşı nümunədir. O, mütəmadi olaraq Azərbaycan həqiqətlərinin
dünyaya çatdırılmasında mühüm rol
oynayır, həmçinin ana təbiətin qorunması,
uşaqların, yeniyetmələrin təhsili,
sağlamlığı ilə bağlı yeni təşəbbüslər
irəli sürür və onların reallaşdırılmasında
fəal iştirak edir.
Leyla Əliyeva Heydər Əliyev Fondunun həyata
keçirdiyi layihələrə sanballı töhfələr
verir
Yuxarıda deyilənlərdən də
göründüyü kimi, Leyla Əliyevanın Azərbaycan
naminə fəaliyyəti çoxşaxəlidir və
müxtəlif istiqamətləri əhatə edir. Bunların
sırasında bir fəaliyyət sahəsi isə Leyla
xanım üçün xüsusilə əvəzolunmaz və
əzizdir. Söhbət onun Azərbaycan xalqının
Ümummilli Lideri Heydər Əliyevin adını
daşıyan Fonddakı fəaliyyətindən gedir. Məlum
olduğu kimi, Azərbaycan Respublikasının Birinci
vitse-prezidenti Mehriban xanım Əliyevanın rəhbərliyi
ilə Fond nəinki Azərbaycanda, eyni zamanda, regionda
görülən işlərin həcminə görə ən
böyük ictimai təşkilata çevrilib. Təbii
ki, burada Mehriban xanım Əliyevanın ətrafında cəmləşən
komandanın da əməyi böyükdür və tam cəsarətlə
deyə bilərik ki, burada Fondun vitse-prezidenti Leyla Əliyeva
özünün yeni ideyaları, təşəbbüsləri,
həmçinin, praktiki fəaliyyəti ilə xüsusi olaraq
fərqlənir. Leyla Əliyeva 10 may 2007-ci il tarixindən
Heydər Əliyev Fondunun Rusiya nümayəndəliyinə rəhbərlik
etməyə başlayıb, 2011-ci ildən etibarən isə
Fondun vitse-prezidenti vəzifəsində
çalışır. O, Heydər Əliyev Fondunun həyata
keçirdiyi layihələrə sanballı töhfələr
verir.
Leyla Əliyeva babası, Azərbaycan
xalqının Ümummilli Lideri Heydər Əliyev irsinə
sonsuz sədaqətinin təzahürü olaraq Ulu Öndərin
adını daşıyan Fondun fəaliyyətinin əhatə
dairəsini həm respublika daxilində, həm də ölkə
hüdudlarından kənarda daha da genişləndirmək
üçün daim yeni ideyalar, təşəbbüslər
irəli sürür və onların həyata keçirilməsində
fəal iştirak edir. Heydər Əliyev Fondunun vitse-prezidenti
kimi, onu daim müxtəlif xeyriyyə tədbirlərinin,
humanitar aksiyaların təşkilatçısı və
iştirakçısı qismində görürük.
Leyla Əliyeva zəngin Azərbaycan mədəniyyətinin
ölkə hüdudlarından kənarda təbliği
işində də öz fəallığı ilə
seçilir. Belə ki, 2007-ci il dekabr ayının 19-da Leyla
Əliyeva Moskvada möhtəşəm “Baku” jurnalını təsis
edib. Jurnalın ingilisdilli versiyası 2011-ci ilin oktyabr
ayında İngiltərənin London şəhərində
işıq üzü görüb.
Eyni zamanda, onun təşəbbüsü ilə
2012-ci ildə “Bakıya uçuş: Müasir Azərbaycan
incəsənəti” sərgisi adlı layihə start
götürüb. London şəhərində açılan
sərgi daha sonra Paris, Berlin, Moskva, Roma, Vyana kimi müxtəlif
şəhərlərdə baş tutub və Bakıda təşkil
olunan yekun sərgisi ilə uğurla başa çatıb.
RAGT-nin başlıca vəzifəsi xeyirxah və
faydalı işlər görməkdir
Leyla Əliyevanın ölkəmizin
həm diaspor, həm də gənclər siyasətinin həyata
keçirilməsində yaxından iştirakından
danışarkən isə 10 il bundan əvvəl - 2009-cu il
aprelin 18-də Moskvada təsis konfransı keçirilən
Rusiyanın Azərbaycanlı Gənclər Təşkilatının
(RAGT) fəaliyyətini xüsusi vurğulamaq gərəkdir.
Xatırladaq ki, Rusiyanın 60-dan çox
regionunda fəaliyyət göstərən 83 Azərbaycan gənclər
klubundan və təşəbbüs qruplarından 300-dək
nümayəndənin, habelə Bakıdan dəvət
olunmuş qonaqların və Rusiyanın rəsmi şəxslərinin
iştirak etdiyi təsis konfransında Leyla Əliyeva yekdilliklə
RAGT-nin sədri seçilib.
Ötən 10 ildə Azərbaycan ictimaiyyəti
gənclərdən ibarət RAGT komandasının Leyla
Əliyevanın rəhbərliyi ilə çox səmərəli
fəaliyyətinin şahidi olub. Leyla
Əliyevanın özü cari il iyunun 24-də RAGT tərəfindən
qurumun 10 illiyi münasibətilə Moskvada təşkil olunan
Azərbaycan Mədəniyyəti Gününün təntənəli
açılış mərasimində qürur hissi ilə
vurğulayıb ki, təşkilat ötən dövrdə
çox böyük işlər görüb.
Qeyd edək ki, hazırda Rusiya
Federasiyasının 49 regionunda bu təşkilatın Azərbaycan
gənclərinin 2500-dən çox təşəbbüskar
və kreativ nümayəndələrini birləşdirən
55 bölməsi fəaliyyət göstərir. Qurum
tərəfindən gənclərin fəallığının
artırılmasına, Azərbaycan həqiqətlərinin təbliğinə,
dostluq əlaqələrinin qurulmasına, sağlam həyat tərzinin
təşviq edilməsinə və digər məqsədlərə
hesablanan layihə və tədbirlərinin miqyası kifayət
qədər genişdir. RAGT hər il “Gələcəyə
addım” və “İxtisas qazanılmasına kömək”
mövzularında payız və qış liderlik məktəbləri
təşkil edir. Bundan əlavə, RAGT gənclərin və
tələbələrin 2017-ci ildə Soçidə keçirilmiş
XIX Ümumdünya festivalının
iştirakçısı olub. RAGT-nin çoxşaxəli fəaliyyətindən
bəhs edən Leyla Əliyeva vurğulayıb: “Çox
sevindirici faktdır ki, bizim gənclər Rusiya cəmiyyətinə
inteqrasiya edir və eyni zamanda, öz ənənəvi köklərini
qayğı ilə qoruyub saxlayırlar. RAGT-nin başlıca vəzifəsi
xeyirxah və faydalı işlər görməkdir. Biz
artıq neçə ildir ki, “Qanın milləti yoxdur”
adlı təmənnasız qanvermə aksiyaları
keçirir, təhsil əlaçılarını dəstəkləyir
və həvəsləndirir, Rusiyada keçirilən peşə
müsabiqələrində iştirak edir, “Nə? Harada? Nə
vaxt?”, Şən və Hazırcavablar Klubu (ŞHK) kimi populyar
intellektual oyunlar təşkil edir, uşaq evlərinə,
qocalar evlərinə baş çəkir, ehtiyacı
olanların hamısına kömək əlimizi
uzadırıq”.
“Xocalıya Ədalət!” kampaniyası erməni
vəhşiliyini beynəlxalq miqyasda ifşa edir
Leyla Əliyevanın çoxşaxəli fəaliyyətinin
mühüm bir istiqamətini isə Azərbaycan həqiqətlərinin
dünya ictimaiyyətinə çatdırılması təşkil
edir. Məhz onun təşəbbüsü ilə 2008-ci ildə
“Xocalıya Ədalət!” beynəlxalq kampaniyasına start
verilib.
“Xocalıya Ədalət!” kampaniyası erməni
vəhşiliyini beynəlxalq miqyasda ifşa edir. İndiyədək
Avropa, Asiya, Afrika, Şimali və Cənubi Amerikanın 100-ə
yaxın ölkəsində bu faciə ilə əlaqədar tədbirlər
keçirilib. Görülən tədbirlər öz müsbət
nəticələrini verməkdədir. Belə ki, Meksika,
Pakistan, Çexiya, Peru, Kolumbiya, Panama və Sudan parlamentlərinin
müvafiq sənədlərində Xocalıda törədilmiş
kütləvi qətllərin soyqırımı aktı
olduğu təsdiq edilib. Rumıniya, Bosniya, Serbiya, İordaniya
parlamentləri, eləcə də ABŞ-ın
ayrı-ayrı ştatlarının icra və qanunvericilik
orqanları Xocalı faciəsinə dair müvafiq qətnamələr
qəbul edib.
“Xocalıya Ədalət!” kampaniyası
İslam Konfransı Təşkilatına üzv dövlətlərdə
də geniş miqyas alıb. Xüsusilə Leyla
Əliyevanın 2008-ci ildə İKT Gənclər Forumunun mədəniyyətlərarası
dialoq üzrə baş əlaqələndiricisi seçilməsi
qurumun Azərbaycan ərazilərinin Ermənistan tərəfindən
işğalına daha çox diqqət ayırmasında
mühüm rol oynayıb. 2010-cu ildə isə İslam Əməkdaşlıq
Təşkilatına üzv olan ölkələrin parlamentləri
“Xocalıya Ədalət!” kampaniyasını dəstəkləyən
xüsusi qətnamə qəbul edib.
İDEA ətraf
mühit problemləri üçün optimal həll
yolları tapır
Azərbaycanda ekoloji mühitin
yaxşılaşdırılmasına yönələn məqsədyönlü
dövlət siyasəti həyata keçirilir. Təsadüfi deyil ki,
Prezident İlham Əliyevin müvafiq Sərəncamı ilə
respublikamızda 2010-cu il “Ekologiya ili” elan
edilib. Eyni zamanda, cəmiyyət də ətraf
mühitin qorunması ilə bağlı dövlət tərəfindən
həyata keçirilən tədbirlərə hərtərəfli
dəstək verir. Leyla Əliyevanın təşəbbüsü
ilə 12 iyul 2011-ci il tarixində ölkəmizdə
İDEA (Ətraf Mühitin Mühafizəsi naminə Beynəlxaq
Dialoq) İctimai Birliyinin fəaliyyətə başlaması
deyilənləri bir daha təsdiqləyir.
İDEA ətraf mühit problemləri üçün
optimal həll yolları tapır. Qısa müddət ərzində
İDEA gənc ekoloqlar və tələbələr
üçün genişmiqyaslı ağacəkmə fəaliyyətləri,
o cümlədən 5 qitə və 90 ölkədən 1200
iştirakçının qatıldığı “Yer Kürəsi
uşaqların gözü ilə” uşaqlar üçün
beynəlxalq fotomüsabiqə və digər müxtəlif
layihələr həyata keçirib. İDEA həmçinin
2011-ci ildə Qəbələdə baş tutan konfrans və
2012-ci ildə UNEP-in əməkdaşlığı ilə
reallaşdırılan “Yaşıl həftə” konfranslar
silsiləsi kimi beynəlxalq mütəxəssislərin
iştirak etdiyi çoxsaylı konfrans və görüşləri
reallaşdıraraq dünyanın müxtəlif ölkələrindən
olan gənc ekoloqların şəbəkələşməsini
təmin edib. Rəhbərlik etdiyi ictimai birliyin
reallaşdırdığı layihələr barədə məmnuniyyətlə
söhbət açan Leyla Əliyeva bildirib ki, bu günə
qədər İDEA Azərbaycanda 5 milyondan çox ağac əkib.
İDEA suya qayğıkeş münasibət və
plastik tullantıların ətraf mühitə təsiri
mövzusunda seminarlar keçirir. “Təbiət
çoxdandır ki, bizə siqnal verir, bizim onu müdafiə
etməyimizə çox ehtiyac var. Yer kürəsi bizim
ümumi evimizdir, buna görə də planetimizin qorunub
saxlanması və abadlaşdırılması məsələsi
birgə həll edilməlidir. Soçidə
bəbirlərin populyasiyasının bərpası mərkəzi
ilə bizim ekoloqların birgə səyləri buna
misaldır. Mən çox ümidvaram ki,
biz vəhşi heyvanların bu nadir növünü qoruyub
saxlamaq üçün əlimizdən gələni edə
biləcəyik. Bizim İDEA Beynəlxalq
kampaniyamız Həştərxanda körpə nərə
balıqlarının Xəzər dənizinə buraxılması
üzrə ekoloji tədbirdə iştirak edib. Çox ümid edirəm ki, biz ən qədim və
maraqlı heyvanlardan biri olan Xəzər nərəsinin
populyasiyasını bərpa edə biləcəyik. Bu yaxınlarda biz Vyaçeslav Fetisovla birlikdə Azərbaycanda
nərə balıqlarını Xəzər dənizinə buraxdıq.
İnsan bunu öz əli ilə edəndə
keçirdiyi hissləri sözlə ifadə etmək çətindir”,
- deyə Leyla Əliyeva vurğulayıb.
Onu da qeyd
edək ki, İDEA tərəfindən dəstəklənən
“Azərbaycanın 9 möcüzəsi”, “Uğura gedən
yol”, “Azərbaycan Respublikası ərazisində ceyranların
mühafizəsi, reintroduksiyası və tarixi
areallarının yenidən bərpası”, “Eko-skaut” və digər
layihələr cəmiyyətdə böyük populyarlıq
qazanıb.
Leyla
Əliyevanın çoxşaxəli fəaliyyəti həm
Azərbaycanda, həm də beynəlxalq səviyyədə
yüksək qiymətləndirilir
Əlbəttə, bir yazı daxilində Leyla
Əliyevanın çoxşaxəli fəaliyyətini tam əhatə
etmək mümkün deyil. Onu vurğulamaq yerinə
düşər ki, Leyla Əliyevanın çoxşaxəli
fəaliyyəti həm Azərbaycan dövləti və cəmiyyəti
tərəfindən, həm də beynəlxalq səviyyədə
yüksək qiymətləndirilir.
Belə ki, Leyla Əliyeva 2011-ci ilin iyulunda Azərbaycanla
bağlı həqiqətlərin dünya ictimaiyyətinə
çatdırılmasında xidmətlərinə görə
Azərbaycan Respublikasının Prezidenti İlham Əliyevin Sərəncamı
ilə “Tərəqqi” medalı ilə təltif olunub. O, 2011-ci ilin noyabrında
Nyu-Yorkda humanitar aksiyalarda fəal iştirakına görə
“Key to life” fəxri mükafatına layiq görülüb. Bundan başqa, Leyla Əliyeva yenə 2011-ci ildə
BMT-nin sertifikat və xüsusi vəsiqəsini alıb.
Leyla Əliyeva 2012-ci il sentyabrın 12-də
“Həştərxan vilayəti qarşısında xidmətlərinə
görə” mükafatı ilə təltif olunub. 2013-cü il aprelin 5-də Ətraf Mühitin Mühafizəsi
VII Beynəlxalq Layihə Olimpiadası (İNEPO-Avrasiya) Təşkilat
Komitəsinin idarə heyəti tərəfindən “Ekoloji
Mühitin Qorunmasına Görə” xüsusi Beynəlxalq
Şərəf Mükafatı ilə
mükafatlandırılıb. 2013-cü il dekabrın 20-də
III dərəcəli Müqəddəs Mələksima
“Knyaginya Olqa” ordeni və “Volqoqrad vilayəti
qarşısında xidmətlərə görə” medalı
ilə təltif olunub. 2015-ci ilin mayında Leyla Əliyeva
aclıqla mübarizə, ərzaq təhlükəsizliyinin təmin
olunması, kənd təsərrüfatı, meşə və
balıqçılıq təsərrüfatının səmərəliliyinin
artırılması, sağlam ərzaq sistemlərinin
yaradılması kimi məqsədlərə nail olunmasına
verdiyi töhfəyə görə BMT-nin Ərzaq və Kənd
Təsərrüfatı Təşkilatının Xoşməramlı
səfiri adına layiq görülüb. 2015-ci il
oktyabrın 20-də Rusiya Federasiyasının “Puşkin”
medalı ilə təltif olunub. Leyla Əliyeva həmçinin
2016-cı il sentyabrın 28-də Moskva
Dövlət Beynəlxalq Münasibətlər İnstitutunun
Elmi Şurasının qərarı ilə bu ali məktəbin
“Xidmətlərə görə” medalına layiq
görülüb.
Mübariz ABDULLAYEV
İki sahil.- 2019.- 3
iyul.- S.-4