Dini abidələrimizin bərpasında müsəlman ölkələrinin iştirakı həmrəylik nümunəsidir

Bəzi müsəlman ölkələrinin dövlət başçılarının Ermənistana rəsmi səfərlərini İslami dəyərlərə hörmətsizlik adlandıran Prezident İlham Əliyev haqlı olaraq bildirir ki, milli mənsubiyyətə bağlılıq, dinə saf etiqad sözdə yox, əməldə olmalıdır

Dinindən, milli mənsubiyyətindən asılı olmayaraq müxtəlif xalqların ikinci Vətəni sayılan, həmrəylik nümunəsi olan Azərbaycan multikultural dəyərləri ilə fərqlənir. BMT, ATƏT, Qoşulmama Hərəkatı, İqtisadi Əməkdaşlıq Təşkilatı (İƏT) kimi nüfuzlu qurumlarda təmsil olunan Azərbaycanın xarici siyasətinin əsasını təşkil edən bütün dövlətlərə qarşılıqlı hörmət prinsipləri əsasında əməkdaşlıq ölkəmizin dünyada mövqeyini möhkəmləndirir, nüfuzunu artırır. Azərbaycanın İCESCO və Türkdilli Dövlətlərin Əməkdaşlıq Şurası (TDƏŞ) ilə möhkəmlənən əlaqələri müsəlman ölkələrinin birlik və həmrəyliyini gücləndirir. Azərbaycanın TDƏŞ-in Zirvə görüşlərində iqtisadi əlaqələrin genişlənməsi, İslami dəyərlərin təbliği istiqamətində gördüyü işlərin yüksək qiymətləndirilməsi, Türkdilli Dövlətlərin Xüsusi Xidmət Orqanları Konfransının 22-ci iclasının Bakıda keçirilməsi müsəlman ölkələrinin təhlükəsizliyinin möhkəmləndirilməsi, regional sabitliyin təminatı baxımından çox əhəmiyyətli olmaqla ölkəmizə marağı artırır.

Artıq tarixdə qalan Ermənistan-Azərbaycan Dağlıq Qarabağ münaqişəsinin davam etdiyi müddətdə Ermənistanın təcavüzünə məruz qalmış ölkəmizin ədalətli mövqeyini dəstəkləyən, işğal altında qalan Azərbaycan torpaqlarında erməni faşistlərinin apardıqları etnik təmizləmə siyasətini pisləyərək, xalqımıza məxsus tarixi-mədəni irsin, İslam abidələri və məscidlərimizin dağıdılmasını bəşəri cinayət adlandıran TDƏŞ-in üzvləri tərəfindən qəbul olumuş bəyanatlarda da Azərbaycanın ərazi bütövlüyünün, sərhədlərinin toxunulmazlığının rəsmi olaraq təsdiqlənməsi, İkinci Qarabağ müharibəsinin davam etdiyi 44 gün ərzində Türk Şurasının Baş katibi adından 4 rəsmi bəyanatın verilməsi ölkəmizin haqq işinə dəstək, İslam həmrəyliyinin nümunəsidir. Dünyanı bürüyən pandemiya dövründə TDƏŞ üzvlərinin iştirakı ilə keçirilən birgə videokonfransda COVID-19-a qarşı mübarizə sahəsində görülən işlərdən bəhs edən Prezident İlham Əliyevin beynəlxalq ictimaiyyət tərəfindən dəstəklənən təşəbbüsləri humanizmə əsaslanan İslami dəyərlərə sadiqlikdir. Cari ilin əvvəlində İCESCO-nun Baş direktoru Salim bin Məhəmməd əl-Malikin rəhbərlik etdiyi nümayəndə heyətini qəbul edən, Türkdilli Dövlətlərin Əməkdaşlıq Şurasının Baş direktoru Bağdad Amreyev ilə videoformatda keçirilən görüşlərdə iştirak edən və müsəlman ölkələrinin dəstəyini yüksək dəyərləndirən Prezident İlham Əliyev 30 illik danışıqlar prosesinin heç bir nəticə vermədiyini diqqətə çatdıraraq bildirmişdir ki, 44 gün davam edən müharibədə qazandığı Zəfər ilə bölgədə yeni reallıqların təməlini qoyan Azərbaycan erməni faşizmini də çökdürdü, regional sabitlik üçün etibarlı təməl yaratdı. Beynəlxalq birliyin sülh yolu ilə edə bilmədiyini və ya etmək istəmədiyini güc yolu ilə reallaşdıran Azərbaycan tarixi torpaqlarını işğaldan azad etməklə, XXI əsrin müharibə salnaməsinə yeni səhifələr yazdı. İşğal olunmuş ərazilərdə 70 məscidi dağıdan, ibadət ocaqlarında donuz saxlayan, İslami dəyərlərə, müsəlman mədəniyyətinə zərbə vuran ermənilərin vəhşiliklərini vandalizm adlandıran Prezident İlham Əliyev İkinci Qarabağ müharibəsindən sonra xarici KİV-lərə müsahibələrində viran qoyulan tarixi abidələrimiz, məscidlərimiz, ziyarətgahlarımız haqqında ətraflı açıqlama verdi. İnsanlara qarşı törətdikləri cinayətləri ilə faşist xislətlərini həyata keçirən, Azərbaycanın mədəni irsinin izlərini məhv edən erməni quldurları təkcə məscidləri deyil, kilsələri də dağıtmaqla bəşəri dəyərlərə düşmən mövqeyini vəhşilikləri ilə bildirdi.

Diqqətçəkən başlıca məqam isə Prezident İlham Əliyevin Zirvə görüşündə, müsahibələrində Zəngəzurla bağlı söylədiklərinin reallaşması, Azərbaycanın tarixi torpaqlarının həqiqi sahiblərinə qayıtmasıdır. Ərazilərin bərpası prosesində qardaş müsəlman ölkələrinin iştirakını, milli həmrəyliyi «Buna görə də düşünürəm ki, işğalçı qüvvələrin barbarlığını, məhz bizim mədəni-tarixi irsin məhv edilməsini dünya ictimaiyyətinə çatdırmaq, həmçinin bizim tarixi-mədəni abidələrin bərpa edilməsində bizə kömək də TÜRKSOY-un diqqət mərkəzində olacaq» sözləri ilə diqqətə çatdıran dövlət başçımızın vurğuladığı kimi, bu proses artıq başlanıb. Dini abidələr müsəlman ölkələrinin iştirakı ilə daha möhtəşəm görkəm alacaq.

Türk Şurasının cari gündəliyində 2020-2025-ci illər üçün türk strategiyasına və 2020-2040-cı illər üçün türk dünyası barədə təsəvvürləri əks etdirən sənədin hazırlanması, İslam ölkələrinin gələcəyi, siyasət, iqtisadiyyat, mədəniyyət, təhsil, turizm, gənclər və başqa sahələrdəki əməkdaşlığın perspektivlərinin əks olunması, işğaldan azad edilən Şuşanın 2022-ci ildə İslam Mədəniyyətinin Paytaxtı elan edilməsi ilə bağlı təkliflər müsəlman aləminin milli həmrəylik nümunəsidir.

Bakıda şəhid ailələrinə, müharibə əlillərinə mənzillərin və avtomobillərin təqdim olunması mərasimində müsəlman ölkələrinin Azərbaycana dəstəyini qiymətləndirən Prezident İlham Əliyevin «Bir çox ölkələr fərdi qaydada rəsmi şəxslər səviyyəsində dəstək göstərmişlər. Ona görə də mən onlara minnətdaram. Beynəlxalq təşkilatlar, ilk növbədə, Türkdilli Dövlətlərin Əməkdaşlıq Şurası Azərbaycana dəstək göstərmişdir» sözləri ilə TDƏŞ üzvləri olan Türkiyə, Qazaxıstan, Qırğızıstan, Özbəkistana minnətdarlığını bildirmişdir. 57 ölkənin birləşdiyi İslam Əməkdaşlıq Təşkilatının üzvləri arasındakı əməkdaşlığın gücləndirilməsini həmişə vacib amil kimi diqqətə çatdıran Prezident İlham Əliyev dəfələrlə bildirmişdir ki, müsəlman ölkələrinin məscidlərini dağıdan, belə müqəddəs yerlərdə donuz, heyvan saxlayan ermənilərlə iş birliyi İslami dəyərlərə hörmətsizlikdir: «Müsəlman məscidlərini dağıdan Ermənistanla hansı əlaqələr ola bilər? Açın baxın internetdə, görün Ağdam məscidi nə gündədir, Şuşa məscidi nə gündədir, digər şəhərlərdəki məscidlər nə gündədir, onları söküblər. Bu azmış kimi, ermənilər orada heyvan saxlayırlar, hətta bizim müqəddəs ocaqlarımızı təhqir edirlər. Kim edir bunu? Ermənistan. Bu məscidlər təkcə bizim deyil, bütün müsəlman aləminə məxsusdur. Mən sual verirəm, necə ola bilər ki, belə çirkin əməllər törədən bir ölkə ilə hansısa əlaqələr olsun, hansısa dostluq haqqında danışsınlar? Hansı dostluq ola bilər? Ona görə, mən bir daha demək istəyirəm, Ermənistan çalışır ki, onları öz tərəfinə çəksin. Ancaq, ilk növbədə, o ölkələrin xalqları buna imkan verməyəcəklər və verməməlidirlər. Əgər görsələr ki, bu ölkələrin hakimiyyəti öz dini mənsubiyyətini ancaq dildə ifadə edir, o ölkələrin vətəndaşları öz sözünü deməlidir, Azərbaycanla həmrəy olmalıdır. Necə ki, biz bütün müsəlman ölkələri ilə həmrəyik, onlardan da eyni münasibət gözləyirik.»

Özünü bizə dost kimi təqdim etmək istəyən bəzi ölkələrin Ermənistana silah- sursatla yardım göstərməsi müsəlmanları, Azərbaycan əsgərini öldürən ermənilərə dəstəkdir. Müsəlman ölkəsindən Xankəndiyə müntəzəm olaraq səfər edən iritonnajlı nəqliyyat vasitələrində daşınan silahlardan azərbaycanlılara qarşı istifadə olunur. Prezident İlham Əliyevin « Laçın dəhlizi bizim gözümüzün önündədir. Siz Şuşada olarkən Laçın dəhlizini görə bilərsiniz. Orada bir yer var, yuxarıdan bütün avtomobillər görünür. Oradan məsafə bəlkə də 10 metrdir. Bizim orada təbii ki, texniki vasitələrimiz, kameralarımız var. Biz Laçın dəhlizi ilə Rusiya sülhməramlı qüvvələrinin nəzarətində olan bölgələrdə baş verən hadisələri də izləyirik. Xankəndiyə gedən avtomobillərin sayını dəqiqliyi ilə bilirik» sözləri müsəlman olsa da , İslami dəyərələrə zidd olan günahsız qanların tökülməsinə yardım göstərənlər dini mənsubiyyətinlərinə xəyanət edənlərdir.

Bu günlərdə «CNN TÜRK»ə müsahibəsində Türkiyə-Azərbaycan qardaşlığının simasında İslam həmrəyliyinin sarsılmazlığından bəhs edən Prezident İlham Əliyev dünyada oxşar tarixə, mədəniyyətə, etnik köklərə malik, dili, etnik kökləri bir-birinə yaxın ölkələr arasındakı xoşagəlməz halları etiqadsızlıq adlandırır: «Bəziləri bir-birinə düşməndir. Yəni, ortaq tarix və ortaq etnik köklər hələ o demək deyil ki, ölkələr də qardaş ölkələr olsunlar, xalqlar da qardaş xalqlar olsunlar. Yəni, bu, böyük bir siyasətin təzahürüdür.»

Prezident İlham Əliyev BMT-nin ölkəmizdə yeni təyin olunmuş rezident əlaqələndiricisi xanım Vladanka Andreyevanı qəbul edərkən 30 ilə yaxın işğal altında saxladıqları Azərbaycan torpaqlarında vandallıq törədən ermənilərin əməllərinə göz yumulmasını bəşəri dəyərlərə hörmətsizlik kimi diqqətə çatdırmışdır.

«Biz UNESCO-nu, demək olar ki, 30 ilə yaxındır gözləyirik. Bilmirəm bunu bilirsiniz ya yox biz, bir neçə il bundan öncə hələ işğal dövründə, UNESCO-nu buraya səfər etməyə və bizim ərazilərdə nələrin törədildiyini görməyə dəvət etmişdik. Çünki ATƏT-in Minsk qrupu işğal olunmuş ərazilərə artıq iki faktaraşdırıcı missiya göndərmişdi. Biz onlardan yenidən bir missiya göndərməyi xahiş etdik, lakin onlar göndərmədilər. Biz UNESCO-dan tarixi abidələrimizə erməni təcavüzkarları tərəfindən dəymiş ziyanı gəlib görməyi xahiş edirdik, lakin onlar imtina etdilər. UNESCO rəsmiləri dedilər ki, UNESCO siyasi məsələlərə qarışmır. Lakin müharibə bitdikdən sonra UNESCO tərəfindən onların gəlmək istədiyinə dair siqnallar aldıq. Əlbəttə, biz öz təəccübümüzü bildirdik. Çünki demək olar, 30 il idi ki, biz onları çağıranda gəlmirdilər. Müharibədən sonra isə gəlməyə qərar verdilər. Buna görə biz buna razılaşdıq və mənim də bildiyim qədər son məlumat belə idi ki, missiya artıq yaradılıb, amma indi Ermənistan yenə etiraz edir. Buna görə yenə də missiya gecikir» söyləyən Prezident İlham Əliyev BMT-nin Qaçqınlar üzrə Ali Komisarlığı ilə əlaqələrə toxunaraq bildirmişdir ki, təşkilatın qurumları ilə qarşılıqlı etimadı gücləndirmək əsas məqsədimizdir.

Bu günlərdə işğaldan azad olunmuş ərazilərdə törədilmiş erməni vandallıqlarından dəhşətə gələn Türk Şurasına üzv olan və müşahidəçi dövlətlərin media orqanlarının əməkdaşları işğaldan azad olunmuş Azərbaycan torpaqlarında gördükləri dağıntıları, erməni vəhşiliklərini insanlığa qarşı cinayət adlandırmışlar.

Xuraman İsmayılqızı

İki sahil.- 2021.- 4 sentyabr.- S.18.