DOST mərkəzləri: İnsanların

ümidlə müraciət etdikləri ünvan

Ölkəmizdə müasirləşən sosial infrastruktur layihələrinin həyata keçirilməsi, ölkə vətəndaşlarının rifah halının yüksəlməsi, sosial xidmət, reablitasiya sisteminin təkmilləşdirilməsi Prezident İlham Əliyevin insan amilinə verdiyi dəyərin ifadəsidir

2018-ci ildə Azərbaycanda keçirilən növbəti prezident seçkilərində ümumxalq səsverməsi ilə yüksək etimad qazanan Prezident İlham Əliyevin yenidən respublikamıza başçılıq etməsi ilə ölkəmizdə sosial siyasət yeniistiqamətlər üzrə uğurla davam etdirildi, sosial xidmət və reabilitasiya sisteminin davamlı inkişafı üçün imkanlar genişləndi, vətəndaşlara xidmətin daha müasir tələblərə uyğun sahələri formalaşdırıldı.

Dövlət siyasətinin əsasında insan amilinin dayandığını bəyan edən Prezident İlham Əliyevin başlıca tövsiyələrindən biri budur ki, iqtisadi inkişafın dinamikasından asılı olmayaraq nəzərdə tutulan sosial islahatlar davam etdirilməli, Azərbaycan vətəndaşı yaxşı yaşamalıdır.

Dünya iqtisadiyyatının üzləşdiyi böhranın, COVID-19 pandemiyasının davam etdiyi dövrdə belə təkmil sosial paketin tətbiqi ilə 4 milyondan artıq ölkə vətəndaşının iqtisadi-sosial vəziyyətinin yaxşılaşdırılması təmin edildi. Sahibkarların fəaliyyəti üçün şərait yaradıldı. Bütün dövlətləri narahat edən, insan amili ilə bağlı hesabatlarda hələ də istənilən rəqəmlərlə ifadə olunmayan işsizlik probleminin həlli, korrupsiyaya qarşı mübarizə üçün yollar axtaran ekspertlərə bu sahədə Azərbaycanın təcrübəsi nümunə göstərildi.

Son illərdə Prezident İlham Əliyevin təşəbbüsü ilə yaradılan və Azərbaycan brendi kimi diqqətçəkən sosial layihələrdən olan «ASAN xidmət»i dünyada ilk və alternativi olmayan yenilik kimi dəstəkləyən BMT-nin rəsmiləri ölkəmizdə yaradılan bu sistemi iqtisadi, sosial inkişafın vəhdəti kimi dəyərləndirirlər. Yeni xidmət növü olan və ailələrin büdcəsinin möhkəmlənməsi naminə «Ailə Biznesinə Asan Dəstək» («ABAD») layihəsinin həyata keçirilməsi ilə iş yerlərinin yaradılması, əhalinin məşğulluq səviyyəsinin artırılması işi sürətləndirildi. «Bizim özünüməşğulluq proqramına böyük ümidlərimiz var. Bu proqram həm iqtisadi inkişafımıza təkan verəcək, xüsusilə regionlarda həm məşğulluq probleminin həllini sürətləndirəcək, eyni zamanda, bəzi vətəndaşlarımızı ələbaxımlıq vərdişindən çəkindirəcək» sözləri ilə bu layihənin genişləndirilməsini özəl bölmənin inkişafına dəstək adlandıran cənab İlham Əliyevin vurğuladığı kimi, bu proqramın icrasına cəlb olunan insanlar daxili potensialdan, əmək resurslarından istifadə etməklə ailə büdcələrini formalaşdıracaq, halal zəhmətləri ilə pul qazanacaq, eyni zamanda, ölkə iqtisadiyyatına töhfələr verəcəklər.

Azərbaycan brendi olan «ABAD»a marağın artması, sosial sahədə aparılan islahatlar, «ASAN xidmət”in analoqu olan yeni layihənin- Dayanıqlı və Operativ Sosial Təminat mərkəzlərinin təşkilini aktuallaşdırdı.

Prezident İlham Əliyev və Birinci xanım Mehriban Əliyevanın iştirakları ilə Əmək və Əhalinin Sosial Müdafiəsi Nazirliyinin tabeliyindəki Dayanıqlı və Operativ Sosial Təminat (DOST) Agentliyinin və ilk DOST mərkəzinin açılışı sosial islahatların tərkib hissəsi olmaqla önəmi, çoxşaxəli xidmət strukturu ilə də fərqlənir.

Dünya təcrübəsində ilk olan bu yeni xidmət növləri ilə tanışlıq zamanı xarici qonaqlar bildirirlər ki, DOST konsepsiyası – Azərbaycanın mühüm sosial uğuru, vətəndaş məmnunluğunu ifadə edən alternativi olmayan yenilikdir. Yenidən Prezident seçildikdən sonra sosial islahatların coğrafiyasını genişləndirən, istiqamətlərini şaxələndirən dövlət başçımız İlham Əliyevin Fərmanı ilə yaradılan

DOST Agentliyi və Agentliyin DOST mərkəzləri sosial sahədə vətəndaş məmnunluğuna yönəlik köklü islahatların ən mühüm nailiyyətlərindəndir. DOST Agentliyinin fəaliyyətini sosial islahatların müasir növü kimi yüksək qiymətləndirən dövlət başçısı İlham Əliyevin bu sözlərində xalqa dəyər, insana qayğı, məhəbbət duyğuları əks olunub: «Bizim siyasətimiz demək olar ki, DOST mərkəzlərində öz əksini tapır – islahat, innovasiya, korrupsiyaya, rüşvətxorluğa qarşı mübarizə, yeni texnologiyalar, gənclərin bu işlərə cəlb olunması, könüllülərin fəaliyyəti. Yəni, bu mərkəzlər müasir Azərbaycanın simasını əks etdirir və ölkəmiz məhz bu yolla inkişaf etməlidir. Müasirlik, yenilik, islahatlar, gənclərin bu işlərə böyük dərəcədə qoşulması ölkəmizin inkişafına xidmət göstərəcək.»

Birinci vitse-prezident, Heydər Əliyev Fondunun prezidenti Mehriban xanım Əliyevanın təşəbbüsü olan DOST konsepsiyasının dövlət sosial xidmətlərinin (156 növdə xidmət) «bir pəncərə»dən, innovativ yanaşmalar əsasında modern və çevik, tam şəffaf mexanizmlər üzərində qurulması ilə ölkəmizin bu sahədə yeni brendi formalaşıb. Təsadüfi deyil ki, bu gün DOST konsepsiyası beynəlxalq səviyyədə də böyük maraq kəsb edərək yüksək dəyərləndirilir və Azərbaycanın bu sahədəki təcrübəsini öyrənməyə maraq göstərən ölkələrin sayı artır.

2022-ci ilin fevral ayında Beynəlxalq Pensiya və Sosial Fondlar Assosiasiyasının Fəxri fərmanına layiq görülən DOST Agentliyinin bu günlərdə Avropa Sosial Şəbəkəsinin Avropa Sosial Xidmətlər Mükafatını qazanması da DOST konsepsiyasının müasir dünyanın innovasiyalar sahəsində mühüm nailiyyətləri sırasında olduğunu göstərir. «Texnologiya alətləri» kateqoriyasında sosial xidmətlərdə smart modelin tətbiqinə görə DOST Agentliyi 20 mindən çox səslə Avropanın nüfuzlu Mükafatına layiq görülüb. Təşkilata üzv Avropa dövlətlərinin DOST layihəsinə olan marağının göstəricisi kimi həmin səslərin 17 mini qeyd edilən dövlətlərdən gəlib. DOST bu gün Avropa Sosial Şəbəkəsi Şurasının Avropa İttifaqı üzvü olmayan yeganə dövlət qurumu, eyni zamanda, şəbəkənin tədbir və müzakirələrinin fəal iştirakçısı olan yeganə MDB təmsilçisidir. Bu da DOST-a Avropada olan böyük marağı və onun uğurlu islahat təcrübəsi kimi qəbul edildiyini ehtiva edir.

Hazırda ölkəmizdə 5 DOST mərkəzi fəaliyyət göstərir və ötən dövrdə 800 mindən çox vətəndaş bu sosial layihənin xidmətlərindən faydalanıb. Bu xidmətlərdən vətəndaşların məmnunluq səviyyəsi isə 98 faiz üzərindədir. «Könüllü DOST» proqramı da bu gün aktual olan sosial layihələrdəndir. 2015-ci ildə ölkəmizdə keçirilən Birinci Avropa Oyunları zamanı yaranan və fəaliyyət istiqamətləri genişlənən könüllük hərəkatı da Azərbaycana məxsus yenilikdir. Yuxarıda adı çəkilən Avropa Sosial Şəbəkəsinin qeyd edilən müsabiqəsində də DOST Könüllülərinin fəaliyyətinə dair «Dəyərləri birləşdir – bərabərliyə nail ol”» adlı ərizəsi «Möhtəşəm Heyət» kateqoriyasında Avropa müsabiqəsinin finalçısı olub. Qeyd edək ki, DOST Agentliyi 4 istiqamət üzrə ISO sertifikatlarına da layiq görülüb.

Azərbaycanın yeni brendinə çevrilən 2019-2025-ci illərdə Bakıda və ölkəmizin regionlarında açılacaq, ən müasir texniki avadanlıqlarla təmin olunan 31 DOST mərkəzlərinin fəaliyyətini «Vətəndaşlara yüksək xidmət göstərmək üçün burada bütün şərait, bütün imkanlar var. Bina çox gözəldir, müasirdir, həm xarici görünüşü, həm də dizayn-tərtibat baxımından. Bu, bir daha onu göstərir ki, sosial sahə bizim üçün prioritet sahədir. Hər mərkəzdə təqribən 100-150 iş yeri olacaq, bu da çox önəmlidir. Hər bir mərkəzdə könüllülər qrupu fəaliyyət göstərəcək. Beləliklə, bu mərkəzlər vətəndaşlara yüksəksəviyyəli xidmət etmək üçün gözəl şərait yaradacaqdır» sözləri ilə ölkə vətəndaşlarına diqqət kimi dəyərləndirən, sosial sahənin dövlət üçün prioritet olduğunu diqqətə çatdıran cənab İlham Əliyev vurğulayıb ki, bu sahə ilə bağlı bizim siyasətimiz daha geniş miqyasda və məqsədyönlü şəkildə icra ediləcəkdir.

«Bizim siyasətimiz sosialyönümlü siyasətdir» tövsiyəsinə sadiq qalan dövlət başçımızın işsizliyin aradan qaldırılmasına, qeyri-neft sektorunun inikşafına yönələn islahatlar paketi ölkə vətəndaşları tərəfindən rəğbətlə, sevinclə qarşılanır. «DOST» mərkəzlərinin simasında ölkəmizdə geniş tətbiq olunan sosial islahatlar əksini tapır. DOST” mərkəzlərinin tərkibindəki «Çağrı Mərkəzi» ölkə üzrə gündəlik 5 minədək zəng qəbuluna şərait yaradır.

Yeni yaradılan xidmət növündən razılığını «DOST»a dost olaq, «DOST»u dünyada tanıdaq» sözləri ilə bildirən ölkə vətəndaşları insanların rahatlığı üçün yaradılan belə yüksək əsviyyəli xidmət üçün dövlət başçımıza daim minnətdarlıq edirlər.

Vətəndaş maraqlarına xidmət edən, onun müasir sosial trendlərə çevik uyğunlaşmasına hesablanan, şəffaflıq, sosial ədalət və yeni dövrün çağırışlarından irəli gələrək xidmət sektorunda qabaqcıl innovasiyaların tətbiqi Prezident İlham Əliyevin sosial siyasət fəlsəfəsinin ana xəttini təşkil edir və əhali tərəfindən rəğbətlə qarşılanır.

DOST mərkəzlərində əhaliyə pensiya, sosial sığorta, sosial müavinət, əlillik, əmək və məşğulluq, övladlığa götürmə, bank, notariat, həmçinin tibbi sosial ekspertiza sahələri üzrə bütövlükdə 132 növ üzrə xidmət göstərilməsi insanların əlavə vaxt itkisinin qarşısının alınmasına da imkan yaradır.

X. Məmmədova

İki sahil.- 2022.- 12 aprel.- S.8.