Mədəniyyətimizin və mənəvi

sərvətlərimizin böyük himayədarı

«Yüksək mədəniyyətə malik olan xalq həmişə irəli gedəcək, həmişə yaşayacaq, həmişə inkişaf edəcəkdir. Mədəniyyət bəşəriyyətin topladığı ən yaxşı nümunələrlə xalqları zənginləşdirir» söyləyən ulu öndər Heydər Əliyev müstəqil Azərbaycanın qurucusu olmaqla mədəniyyətimizin, maddi-mənəvi sərvətlərimizin də qoruyucusu kimi xalqımıza xidmət etmişdir.

«Mədəniyyəti inkişaf etdirmək üçün milli ruhu yaşatmaq lazımdır» əqidəsi ilə xalqın mənəvi dəyərlərini, milli sərvətlərini qoruyan Ulu Öndərin daim diqqət yetirdiyi amil dəyişilməz idi: Soykökümüzün, tarixi sərvətlərimizin təməlində əsrlərdən qaynaqlanan mədəni irsimizə sadiqlik prinsipləri dayanmalıdır. İnanlara, xüsusilə gənc nəslə müstəqilliyin nə qədər qiymətli olduğunu tövsiyə edən Ulu Öndər bildirirdi ki, bunun üçün hər kəs ilk növbədə milli-mənəvi dəyərlərinin mahiyyətini, azərbaycançılığın, mənsub olduğu Azərbaycan xalqının mədəniyyətinin, ədəbiyyatının, incəsənətinin, elminin insanlara verdiyi dəyəri qiymətləndirməlidir.

Həyatda təsdiqlənmiş bir həqiqəti « Azərbaycan ən qədim zamanlardan dinlərin, dillərin və mədəniyyətin təmas və ünsiyyət yeri olmuşdur» sözlərini söyləməklə kifayətlənməyən müdrik şəxsiyyət Heydər Əliyev xalqımızın zəkasını, elmini, mədəniyyətini, dünyaya təbliğ edən görkəmli şəxsiyyətlərimizə həqiqi mənada əsl yaradıcılıq imkanları yaratmışdır. Tarixin sınaqlarından çıxmış « Xalq bir çox xüsusiyyətləri ilə tanınır, sayılır və dünya xalqları içərisində fərqlənir, bu xüsusiyyətlərdən ən yüksəyi, böyüyü mədəniyyətdir» sözlərini həyatda reallaşdıran Azərbaycanın yaradıcı insanlarının qoruycusu olan Ulu Öndərin əsas ideyası bu idi: « Yüksək mədəniyyətə malik olan xalq həmişə irəli gedəcək, yaşayacaq, inkişaf edəcək.» Dünyanın mədəni irsini zənginləşdirən Azərbaycanın mədəniyyət xadimlərinin yaradıcılıqları barədə beynəlxalq səviyyədə səsləndirilən dəyərli fikirlərdə incəsənətimizin hamisi Heydər Əliyevin payı danılmazdır.

Azərbaycan mədəniyyəti çox geniş sahəni əhatə edir. Bu coğrafiyanın genişlənməsində xüsusi əməyi, xidmətləri olan ümummilli lider Heydər Əliyev mədəniyyətimizin sürətli inkişafına nail olmaqla xalqımızın milli ruhunu özünə qaytardı. Bu müdrik şəxsiyyətin respublikamıza rəhbərlik etdiyi illərdə Azərbaycan mədəniyyəti özünün intibah dövrünü yaşadı. Mədəniyyətimizin və incəsənətimizin korifeyləri abidələrlə əbədiləşdirildi. Nəsiminin, Cəfər Cabbarlının, Nəriman Nərimanovun, Cəlil Məmmədquluzadənin, Hüseyn Cavidin abidələri şəhərlərimizin ümumi görkəminə xüsusi cazibədarlıq gətirdi. Üzeyir Hacıbəylinin, Cəlil Məmmədquluzadənin, Hüseyn Cavidin, Cəfər Cabbarlının, Niyazinin, Bülbülün, M.S.Ordubadinin, Əzim Əzimzadənin, Nəriman Nərimanovun, Cəmşid Naxçıvanskinin və başqa mədəniyyət xadimlərinin ev- muzeyləri açıldı. Teatrlarımızda xalqımızın qəhrəmanlıq tarixini əks etdirən dəyərli səhnə əsərləri tamaşaçıların böyük rəğbətini qazandı. Ulu Öndərin qayğısı sayəsində Süleyman Rüstəm, Süleyman Rəhimov, Rəsul Rza, Mirzə İbrahimov, Niyazi, Rəşid Behbudov, Qara Qarayev, Fikrət Əmirov, Tahir Salahov, Mikayıl Hüseynov, Mustafabəy Topçubaşov kimi şair və ədiblər, bəstəkarlar, elm xadimləri o dövrün ən böyük tituluna - Sosialist Əməyi Qəhrəmanı adına layiq görüldülər. Yaradıcı insanların layiq görüldüyü çox əhatəli bu diqqət xalqımıza məxsus milli-mənəvi dəyərlərimizə göstərilən diqqət və qayğının parlaq təzahürü idi.

Azərbaycan xalqı qarşısında Heydər Əliyevin heç bir zaman unudulmayacaq tarixi xidmətləri çoxdur. Dahi Azərbaycan dramaturqu və şairi Hüseyn Cavidin nəşinin uzaq Sibirdən respublikamıza gətirilməsi, doğma yurdu Naxçıvanda dəfn olunması, Naxçıvanda Cavid ev muzeyinin açılması, Cavidlər kompleksinin yaradılması Ulu Öndərin əbədiyaşar şairin xatirəsinə hörmət və ehtiramının nümnəsidir. «Nəsimi»”, «Nizami»”, «Babək»”, «Dədə Qorqud»”, «Qaçaq Nəbi»”, «Qatır Məmməd”» kimi tarixi filmlər Ulu Öndərin diqqəti sayəsində ekranlaşdırılmış, tamaşaçı rəğbəti qazanmışdır. Bütün varlığı , canı, ruhu ilə Azərbaycana bağlı olan Ulu Öndər 1993-cü ildə hakimiyyətə qayıtdıqdan sonra də mədəniyyətimizin inkişafına, mənəvi dəyərlərimizin qorunmasına təkcə respublikanın rəhbəri kimi deyil, əsl vətəndaşlıq qayğısı ilə diqqət göstərirdi. Klassik şairlərimiz Məhəmməd Füzulinin 500, Nəsiminin 600, «Kitabi- Dədə Qorqud»” dastanının 1300 illik yubileylərinin beynəlxalq səviyyədə qeyd olunması Ulu Öndərin xalqımıza göstərdiyi tarixi xidmətlərindəndir.

Ulu Öndər «İstedad xalqın milli sərvətidir» sözlərini də həyatda reallaşdırdı. Xüsusi istedada, yüksək zövqə malik uşaq və yeniyetmələrin, gənclərin milli-mənəvi dəyərlərimizə sadiqlik ruhunda tərbiyəsini vətənpərvərliyin başlıca amili hesab edən fenomen insanın əsas tezislərindən biri də bu idi ki, gənclərimiz milli ruhda, milli mənəvi dəyərlərimiz əsasında tərbiyə olunmalıdırlar. Bu siyasəti davam etdirən Prezident İlham Əliyevin, Birinci vitse-prezident, Heydər Əliyev Fondunun prezidenti Mehriban xanım Əliyevanın Ulu Öndərə layiq xidmətləri xalqımız tərəfindən daim dəstəklənir, qiymətləndirilir.

Şuşada görkəmli Azərbaycan şairi Molla Pənah Vaqifin bərpa olunmuş abidəsinin açılış mərasimində Ulu Öndərin Azərbaycan mədəniyyətinin inkişafına göstərdiyi xidmətləri milli-mənəvi dəyərlərimizin qorunması kimi dəyərləndirən Prezident İlham Əliyevin «Əziz dostlar, təxminən 40 il bundan əvvəl, bax, bu yerdə atam durmuşdu, mən isə o tərəfdə durmuşdum. Şaxtalı-qarlı havada Vaqifin məqbərəsinin açılışı idi. Ondan sonra 1982-ci il iyulun 29-da atamla bərabər ikinci dəfə Şuşaya gəlmişdim. O vaxt Vaqif Poeziya Günləri keçirilirdi. Bu gün isə ikinci dəfə Vaqifin məqbərəsinin açılışını biz qeyd edirik. Vaqif Poeziya Günləri keçirilərkən atamın 59 yaşı var idi. Bu gün mənim 59 yaşım var. Bəziləri hesab edə bilər ki, bu, təsadüfdür. Ancaq mən hesab edirəm ki, burada böyük rəmzi məna var, tarix təkrarlanır. Azərbaycan tarixinin qara səhifəsi artıq arxada qaldı və biz yenidən nəfəs almağa başlamışıq» sözləri tarixi şəxsiyyət Heydər Əliyevin çoxsaylı əvəzsiz, daim yaşanan xidmətlərinin yalnız bir nümunəsidir. İşğaldan azad edilmiş bölgələrimizdə aparılan quruculuq- abadlıq işləri, Şuşanın yenidən dirçəlməsi, mədəniyyət mərkəzində tarixi abidələrin bərpası Ulu Öndərimizin mədəni irsimizin inkişafına göstərdiyi xidmətlərin davamıdır.

Arzu Süleymanova,

ADPU-nun nəzdində Azərbaycan

Dövlət Pedaqoji Kollecin müəllimi

İki sahil.- 2023.- 1 aprel.- S.11.