Namərd gülləsinin qurbanı olan ömürlər…

ADNSU-da 30 aprel terroru qurbanlarının xatirəsi yad edilib

Aprelin 30-da Azərbaycan Dövlət Neft və Sənaye Universitetində (ADNSU) 30 aprel terroru qurbanlarının xatirəsinə həsr olunan anım tədbiri keçirilib.

Universitetin professor-müəllim heyəti və faciə qurbanlarının yaxınlarının iştirak etdikləri anım mərasimi 30 aprel terror qurbanlarının xatirəsinə qoyulmuş barelyefin önündə keçirilib. Abidənin önünə ADNSU kollektivi adından əklil qoyulub, gül dəstələri düzülüb.

Terror qurbanlarının xatirəsi bir dəqiqəlik sükutla yad edilib.

Tədbirdə çıxış edən ADNSU-nun rektoru, professor Mustafa Babanlı faciə qurbanlarının ailələrinə və yaxınlarına başsağlığı verərək 14 il əvvəl törədilmiş terror hadisəsindən danışıb və bu qətliam nəticəsində ADNSU-nun çox dəyərli müəllim və tələbələrinin həyatına son qoyulduğunu deyib.

Faciə qurbanlarının xatirəsinin universitetdə daim əziz tutulduğunu qeyd edən rektor, professor Mustafa Babanlının sözlərinə görə, faciə qurbanlarının xatirəsinin əbədiləşdirilməsi üçün bir sıra tədbirlər həyata keçirilib. Universitetin terror aktının törədildiyi ikinci tədris korpusunun foyesində faciə qurbanlarının xatirəsinə həsr olunmuş barelyef açılıb. Hadisədən bəhs edən və universitetin istehsalı olan “Bir sal yadına” sənədli filmi yaradılıb. Eyni zamanda, ADNSU-da hər il terror aktının ildönümü müxtəlif tədbirlərlə qeyd olunur.

M.Babanlı Azərbaycanın tarixi Zəfərində vətənpərvər gəncliyin rolundan da bəhs edərək qanları, canları ilə tarix yazan şəhidlərimizin ruhu qarşısında baş əyib, qazilərimizə şəfa diləyib. O, universitetdə Vətən müharibəsində şəhidlik zirvəsinə ucalan 23 məzunun həyat yolunu özündə əks etdirən sərgi açıldığını diqqətə çatdırıb.

Rektor əlavə edib ki, 30 aprel terroru qurbanlarının da Azərbaycanımızın bugünü üçün böyük arzuları, istəkləri, özlərinin gələcək planları vardı. Namərd gülləsinə qurban getməsəydilər bu gün onlar da həmkarları kimi, ölkə iqtisadiyyatının inkişafında əsl vətəndaş kimi fədakarlıq göstərəcək, Vətənə layiq olduqlarını xidmətləri ilə bildirəcəkdilər. ADNSU-nun foyesində 30 aprel terroru qurbanlarının xatirəsinə həsr olunmuş barelyef gündəlik olaraq onun önündən keçən minlərlə tələbəyə 14 il əvvəl bu təhsil ocağında yazılmış qəhrəmanlıq salnaməsini xatırladır, onlara yaxşı təhsil alaraq, elmin sirlərinə dərindən yiyələnərək qalib Azərbaycanın gələcək inkişafına böyük töhfələr verməyə çağırışlar edir.

M.Babanlı bildirib ki, dünyanın hər hansı bir ölkəsində həyata keçirilən terror bütün bəşəriyyətə, insanlığa qarşı törədilən faciədir. Ona görə də dünya birliyi terrorizmə qarşı qətiyyətlə mübarizə aparmalıdır. Sağlam düşüncə naminə bu gün geniş təbliğat, maarifləndirmə tədbirləri həyata keçirilməlidir.

Anım tədbirində 30 aprel hadisəsindən bəhs edən videoçarx nümayiş olunub.

Anım tədbirində çıxış edən 30 aprel terror qurbanlarının valideynləri, doğmaları, hadisənin şahidləri universitet rəhbərliyinə minnətdarlıqlarını ifadə edib, faciələrimizin unudulmamasında, gələcək nəsillərə çatdırılmasında belə tədbirlərin əhəmiyyətini vurğulayıblar.

Qeyd edək ki, Azərbaycan Dövlət Neft Akademiyasında (indiki Azərbaycan Dövlət Neft və Sənaye Universitetində) 2009-cu il aprelin 30-da törədilmiş terror aktından 14 il keçir. Qanlı terror aktı nəticəsində 12 nəfər həlak olub, 13 nəfər ağır xəsarət alıb.

Yaqut Ağaşahqızı

İki sahil.- 2023.- 3 may.- S.7.