Tarixi 20 il

2003-2023: Şuşa qalamızın zirvəsi Xankəndi məğrurluğu ilə tamamlandı

Qarabağ uğurlarımızın məntiqi nəticəsi Xankəndidə dalğalanan üçrəngli bayrağımızdır

Böyük sərkərdə Napaleon demişdir ki, siyasət taledir. Bu gün həmin ifadəni bu cür ifadə etmək olar: Əliyevlərin bəxtinə yazılan tale kimi. Tarixdə bir həqiqət sübuta yetirilib ki, dövlətin varlığını, xalqın düşüncə tərzini şəxsi keyfiyyətlərində yaşatmaq liderlik fəlsəfəsinin qanunauyğunluğudur və siyasi hadisələrin düzgün məcraya yönəldilməsi müdriklik bacarığından asılıdır. Tarixi əsrlərə söykənən Azərbaycanın dünyada ən qüdrətli dövlət kimi tanınmasının əsasını da bu fəlsəfə təşkil edir.

Oxşar fikirləri «Dahi adam necə yaranır» sualını cavablandıran dünya şöhrətli yazıçı Şekspir demişdir: «Bəziləri dahi doğulurlar, bəziləri dahiliyə çatırlar, bəzilərinə dahilik verilir.» Liderliyin inkarolunmaz qanunları çox olsa da, sonuncu, 21-ci varislik qanununun şərtlərindən olan «şəxsi keyfiyyətlər= müdriklik+ cəsarət» yalnız xalqı tərəfindən sevilən, özündən sonra irs qoyub, sevilən liderlərə nəsib olur.

Liderliyə xas xarakterləri şəxsi keyfiyyətlərində, siyasi fəaliyyətində formalaşdıran, canından artıq sevdiyi Azərbaycanı dünyada tanıdan, 2003-cü ilin 15 oktyabr prezident seçkiləri ərəfəsində Azərbaycan xalqına ünvanladığ müraciətində müstəqilliyimizi tarixi nailiyyətimiz adlandıran və suverenliyimizin əbədiliyi naminə fədakarlıq göstərən Ulu Öndər Heydər Əliyev o dövrdə respublikada Baş nazir vəzifəsində çalışan cənab İlham Əliyevə ümidlərinin təçəssümü kimi baxdığını «...Üzümü Sizə - həmvətənlərimə tutaraq, qarşıdan gələn prezident seçkilərində prezidentliyə namizəd, mənim siyasi varisim, Yeni Azərbaycan Partiyası sədrinin I müavini İlham Əliyevi dəstəkləməyə çağırıram. O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm » sözləri ilə bildirdi. 15 oktyabr 2003-cü ildə ümumxalq etimadı qazanan cənab İlham Əliyev Prezident kimi, Ümummili Liderin, Azərbaycan xalıqının etimadını doğrultdu. Dövlət başçısı kimi, xalqın həmrəyliyini güvən yeri hesab edərək bu birliyə arxalandı. «Boş zaman yoxdur, boşa keçən vaxt vardır!» hikməti ilə yola çıxaraq «nəyi, nə zaman, necə etmək» formulunu varislik sədaqəti, ağlının, zəkasının qüdrəti ilə müəyyənləşdirdi, təkmilləşdirdi, dünyaya nümunə göstərdi. Yaponların «Düyünün içindəki qara daşlardan deyil, ağ daşlardan qorx» kəlamına uyğun səriştəlilik göstərərək Azərbaycanın müstəqilliyini daxili və xarici düşmənlərdən qorudu.

Atalardan qalma misal var: «Yol bilən karvana qatılmaz.» Bu hikmətə inanan, yol göstərəni dünya şöhrətli Ulu Öndər Heydər Əliyev kimi dahi olan Prezident İlham Əliyev ayaq basdığı yeri torpaq deyib keçmədi. Respublikamızı qarış- qarış gəzdi, onu tanıdı, sevdi, insanlarla təmas qurdu, problemləri ilə maraqlandı. Bölgələrə müasirləşmiş şəhər gözü ilə baxdı. Baxmaqla görməyi eyni anlamda düşünmədi. Ağlına , zəkasına inanaraq həqiqəti hər yerdə deyil, lazım gəldiyi yerdə söyləməklə həmkarları arasında seçildi. İlk dəfə Prezident kimi and içən cənab İlham Əliyev « Heydər Əliyev siyasəti Azərbaycana böyük uğurlar gətiribdir» söyləməklə vurğuladı ki, mən Azərbaycanın xoşbəxt gələcəyinə inanıram: «Əminəm ki, ölkəmiz bundan sonra da inkişaf edəcək, daha da güclənəcəkdir.» Bu əminlik təkcə oğulun ataya sədaqəti deyil, bütün Azərbaycan xalqına vədi idi. Yəni, məqsəd, məram, niyyət eyni idi: Davamlı inkişaf, tərəqqi, milli birlik!

İki mərhələdə Azərbaycana rəhbərlik edən, respublikanın inkişaf istiqamətlərini düşünülmüş parametrlər üzrə müəyyənləşdirən, bütün dünya azərbaycanlılarının Ümummilli Lideri olan Heydər Əliyev əvvəl söylədiyi «Əmin ola bilərsiniz ki, bir Prezident kimi mən bu vəzifəni özümün əsas vəzifəm hesab edirəm və bunu yerinə yetirmək üçün bütün Azərbaycan xalqının qüvvələrini səfərbər edib, bütün imkanlardan istifadə edib, bütün səylərimi səfərbər edib Azərbaycan xalqının istəyinə nail olacağam» sözlərinin alternativi bu siyasətə sadiq qalacağını bəyan edən cənab İlham Əliyevin « Mən məsuliyyətə də , çətinliklərə də hazıram. Əminəm ki, Azərbaycan xalqının dəstəyi ilə qarşıda duran bütün vəzifələri ləyaqətlə yerinə yetirəcəyəm. Demişəm, Azərbaycan xalqı görəcək ki, mən Azərbaycan üçün xalqımız üçün yaxşı Prezident olacağam» vədi oldu.

Arxada qalan 20 ildə ölkəmizdə qazanılan uğurlar, tərəqqi, dinamik inkişaf naminə görülən işlər həqiqi mənada varisliyə sadiqlik kimi aktuallığını qoruyur. Müstəqilliyin əsas şərtlərindən olan, mövcud potensialdan düşünülmüş istifadə etməklə, iqtisadi islahatların tətbiqi ilə bazar iqtisadiyyatına keçməyi, dünya iqtisadi sisteminə inteqrasiyanı ən düzgün yol adlandıran Ulu Öndərin bu sahədəki proqnozlarının daha mütəşəkkil qaydada reallaşmasını təmin edən cənab İlham Əliyevin imzaladığı sərəncamlarla ölkədə sahibkarlığın inkişafı üçün geniş imkanlar yarandı. Prezident kimi ilk günlərdən « Hesab edirəm ki, iqtisadiyyatımızın növbəti mərhələsi məhz özəl sektorun daha fəal iştirakından asılı olmalıdır və bu istiqamətdə bizim üzərimizə düşən vəzifələri yerinə yetirməyə hazırıq» söyləyən cənab İlham Əliyev bu sahədə də Ulu Öndərin tövsiyələrini yerinə yetirdi.

Cənab İlham Əliyevin siyasi fəaliyyətinin uğur salnaməsi olan 20 ilə xronoloji nəzər salmaqla bu müddətdə ölkədə qazanılan biri-birindən əhəmiyyətli nailiyyətələrin coğrafiyasının genişliyini, sosial-iqtisadi sahədə əldə olunan uğurları görmək olar.

Respublikaya rəhbərliyə başladıqdan sonra ölkənin sosial- iqtisadi inkişafını, hərbi qüdrətinin gücləndirilməsini strateji hədəflər kimi diqqətdə saxlayan Prezident İlham Əliyevin başlıca məqsədi Azərbaycanın ərazi bütövlüyünün və suverenliyinin bərpası idi. Respublikamızın zəngin və qüdrətli ölkəyə, regionda aparıcı dövlətə, dünyada çəkisi və nüfuzu olan söz sahibinə çevrilməsi üçün Azərbaycanın müstəqil siyasətini zamanın tələbinə uyğun müəyyənləşdirdiyi yol xəritəsinin istiqamətləri kimi hədəflər də bəlli idi: Güclü iqtisadi potensial formalaşdırmaq, müasir cəmiyyət quruculuğunu daha da təkmilləşdirmək, qüdrətli Silahlı Qüvvələr yaratmaq, beynəlxalq aləmdə bərabərhüquqlu, qarşılıqlı etimada və əməkdaşlığa əsaslanan əlaqələri inkişaf etdirmək. Liderlik üçün tələb olunun - cəmiyyətdə fəallığa nail olmaq, onu konkret məqsəd uğrunda səfərbər etməyi bacarmaq, məsuliyyət, uzaqgörənlik xüsusiyyətləri ilə seçilən Prezident İlham Əliyev dövlətimizin və xalqımızın gələcəyi ilə bağlı məsuliyyəti öz üzərinə götürən, vaxtında və düzgün qərarlar qəbul edərək tarixi bir missiyanı yerinə yetirməyi bacaran böyük şəxsiyyət və siyasi xadim olduğunu zəngin irsə malik siyasi iradəsi ilə doğrultdu. Uzaqgörən məharəti, yüksək mənəvi keyfiyyətləri, kommunikasiya bacarığı ilə həm ölkə daxilində, həm də beynəlxalq aləmdə böyük nüfuz qazanmaqla respublikamıza xarici maraqları, investisiya axınını gücləndirdi. Həmkarlarının dövlət başçımız haqqında «O öz xalqını olduğu yerdən istədiyi yerə yüksəltməyi bacaran qüdrətli tarixi simadır», «O, artıq mövcud olan yolla getmir, yeni yollar salaraq tarix yaradır və bu tarixdə silinməz izlər qoyur» sözlərinin məntiqi nəticəsi budur: «Azərbaycan xalqı xoşbəxtdir ki, parlaq liderliyi ilə tarixi qələbələrə imza ataraq güclü, suveren və müstəqil Azərbaycanı qoruyan Prezident İlham Əliyev kimi lideri var.» Güclü iqtisadiyyat – güclü dövlət formulunun reallaşması cənab İlham Əliyevin qələbə və uğur formuludur, simvoludur. Bu mənada tam məsuliyyətlə söyləmək olar ki, dövlət başçımız İlham Əliyevin hakimiyyəti dövründə Azərbaycan beynəlxalq aləmlə bərabərhüquqlu, qarşılıqlı etimada və əməkdaşlığa əsaslanan əlaqələrin inkişaf etdirilməsi istiqamətində böyük nailiyyətlər əldə edir. Dünya birliyinə, iqtisadiyyatına inteqrasiya edən Azərbaycanın qarşısına yeni üfüqlər açılır. Beynəlxalq reytinqlər və hesabatlarda Azərbaycanın adı ilk sıralarda çəkilir.

Bütün sahələr üzrə nümunə göstərilən ölkəmizin iqtisadi inkişaf göstəricilərinə nəzər salaq. 2003-2022-ci illərdə Azərbaycanda ÜDM 7.3 milyard dollardan 78.7 milyard dollara yüksəlib. Dövlət büdcəsinin xərcləri 1.2 milyard manatdan 36.6 milyard manata çatıb, strateji valyuta ehtiyatları 1.4 milyard dollardan 66.1 milyard dollara qədər artıb, orta aylıq əmək haqqı 77.4 manatdan 839.4 manata yüksəlib, yoxsulluq səviyyəsi 44.7%-dən 5.5%-ə enib. Azərbaycanın neft-qaz ixrac edən ölkə kimi tanınması, ən mühüm tranzit mərkəzinə çevrilməsi aparılan düzgün siyasətin məntiqi nəticəsidir. Dövlət Neft Fondunun valyuta ehtiyatlarının dəfələrlə artırılması sosialyönümlü layihələrin icrası ilə ölkə vətəndaşlarının fəal həyat tərzi daha da yüksəlir.

Dövlət başçımızın beynəlxalq səviyyədə artan nüfuzu, ölkə diplomatiyasının dəstəklənməsi sayəsində 2011-ci ilin oktyabrında Azərbaycan 155 ölkənin səsini qazanaraq BMT Təhlükəsizlik Şurasına (TŞ) qeyri-daimi üzv seçilib. 2019-cu ildən Qoşulmama Hərəkatının (QH) üzv ölkələrinin yekdil qərarı ilə bu təsisata uğurla rəhbərlik edən Azərbaycanın sədrliyi dövründə QH-nin beynəlxalq aləmdə nüfuzu artmışdır. Səmərəli fəaliyyət ölkəmizin Hərəkata sədrliyinin daha 1 il uzadılmasına səbəb olub. Azərbaycanın təşəbbüsü ilə QH tərəfindən həm BMT İnsan Hüquqları Şurasında, həm də Baş Assambleyada COVID-19 pandemiyası ilə mübarizədə bütün ölkələr üçün peyvəndlərə bərabər, məqbul qiymətə, vaxtında və universal əlçatanlığın təmin edilməsi”nə dair qətnamələrin qəbulu Azərbaycanın tolerantlıq və multikultural dəyərlərə sadiqliyidir.

«Ordu quruculuğu bizim üçün ən başlıca, ən prioritet məsələdir. Bu da təbiidir. Çünki biz müharibə şəraitində yaşayırıq. Müharibə hələ bitməyib. Müharibənin birinci mərhələsi başa çatıb. Bizim əsas vəzifəmiz ölkəmizin ərazi bütövlüyünü bərpa etməkdir» sözlərini əməli fəaliyyəti ilə gerçəkləşdirən, Silahlı Qüvvələrimizi ən masir, beşinci nəsil silah- sursatlarla təminatına diqqəti artıran Prezident,” Ali Baş Komandan İlham Əliyevin səyləri ilə Azərbaycanın Silahlı Qüvvələri dünyanın ən güclü orduları sırasına daxil olub, hərbçilərimizin döyüş qabiliyyəti, hərbçilərimizin peşəkarlığı NATO standartları səviyyəsinə çatdırılıb. Cənubi Qafqazda ilk olaraq Azərbaycanda Müdafiə Sənayesi Nazirliyi nəzdində 20-dən çox hərbi zavod yaradılıb, 1200 adda hərbi təyinatlı müxtəlif məhsulların istehsalına başlanılıb.

44 günlük Vətən müharibəsində qazanılmış tarixi Zəfər Prezident, Ali Baş Komandan İlham Əliyevin düşünülmüş siyasətinin, qətiyyətinin və prinsipiallığının nəticəsidir. 30 ilə yaxın Ermənistanın işğalı altında qalan torpaqlarımızın azad edilməsi, Vətən müharibəsində qazanılan Zəfər, 2023-cü ilin sentyabr ayında Qarabağda Azərbaycanın apardığı lokal xarakterli antiterror tədbirləri ilə erməni separatizminə son qoyulması Silahlı Qüvvələrmizin şücaəti, Ali Baş Komandan İlham Əliyevin sərkərdəlik məharətinin ifadəsi, eyn zamanda, ata vəsiyyətinə sadiqlikdir.

İşğaldan azad edilmiş ərazilərə Böyük Qayıdış konsepsiyasına uyğun bərpa-quruculuq işlərinin davam etməsi, keçmiş məcburi köçkünlərin doğma torpaqlarına qayıdışı” Prezident İlham Əliyevin Sərəncamı ilə təsdiq edilmiş, 2022-2026-cı illəri əhatə edən «Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı»na uyğun aparılır. Proqramda nəzərdə tutulmuş 100 yaşayış məntəqəsinin konseptual layihəyə uyğun həlli istiqamətində quruculuq işləri davam etdirilir. 2021-2023-cü illərdə dövlət başçısı tərəfindən 105 layihənin təməli qoyulub. 2022-ci il iyulun 19-dan başlayaraq azad olunmuş ərazilərə ümumilikdə 679 ailə olmaqla, 2715 nəfər keçmiş məcburi köçkünün qayıdışı baş tutub. İlin sonuna qədər ümumən 1400-ə yaxın ailə olmaqla, 5000-dən artıq soydaşımızın doğma yurdlarına qayıdışı reallaşacaq. Cəmi 9 aya Füzuli, Zəngilan Beynəlxalq Hava limanları inşa edilib. Laçın rayonunda hava limanının tikintisi davam edir. Qısa müddətdə 22 yol layihəsindən 6-nın tikintisi artıq başa çatıb, Bərdə-Ağdam, Horadiz-Ağbənd dəmir yolu xətləri üzrə tikinti işləri davam etdirilir. 12 yeni Su Elektrik Stansiyası, 12 yarımstansiya istifadəyə verilib. 100 min hektara yaxın sahə mina və partlamamış hərbi sursatlardan təmizlənib.

Prezident İlham Əliyevin oktyabrın 15-də Xankəndi şəhərinin mərkəzi meydanında, həmçinin, Xocalıda, Əskəranda, Ağdərədə Azərbaycan Respublikasının Dövlət Bayrağını ucaltması sadalanan uğurların məntiqi nəticəsidir. 30 il gözlənilən tarixi gün münasibətilə Azərbaycan xalqını, xarici ölkələrdə yaşayan bütün soydaşlarımızı təbrik edən Prezident İlham Əliyev Ali Baş Komandan kimi Ulu Öndərə Qələbə raportu verdi. «İyirmi il bundan əvvəl Prezident kimi öz vəzifə borcumu yerinə yetirməyə başlayanda qarşıma bir nömrəli vəzifə qoymuşdum ki, Azərbaycan Bayrağı o vaxt işğal altında olan bütün ərazilərdə, bütün torpaqlarda, bütün şəhər və kəndlərdə qaldırılsın. Hər gün, hər saat biz bu müqəddəs məqsədə doğru gedirdik. Hər gün biz bu müqəddəs anı yaxınlaşdırırdıq və dəfələrlə deyirdim ki, hər birimiz, hərə öz yerində öz işi ilə bu günü yaxınlaşdırmalıdır» söyləyən cənab İlham Əliyev dövlət başçısı kimi vədini yerinə yetirdi. Bu Zəfər bir daha göstərdi ki, bütün dünya miqyasında güclü siyasi, iqtisadi müstəqilliyini qoruyan Azərbaycanla hesablaşırlar. Bu uğur Vətən müharibəsi dövründə cəmi 44 gün ərzində düşməni kapitulyasiya aktına imza atmağa məcbur edən, eyni zamanda, keçən ay 23 saat davam edən lokal xarakterli antiterror tədbirləri zamanı erməni separatizminə son qoymuş, qüdrətli Silahlı Qüvvələrimizin rəşadəti, şəhidlərimizin qəhrəmanlığı canı, qanı bahasına qazanılmışdır. «Biz Ordumuzla, Silahlı Qüvvələrimizlə fəxr edirik, onlar bizim qürur mənbəyimizdir. Təkcə Azərbaycan vətəndaşları yox, əminəm ki, dünyada yaşayan on milyonlarla azərbaycanlı Azərbaycan əsgəri və zabiti ilə, Azərbaycan dövləti ilə haqlı olaraq fəxr edir» söyləyən Ali Baş Komandan İlham Əliyev daim söylədiyi «Azərbaycan xalqı və dövləti bu vəziyyətlə heç vaxt barışa bilməzdi. Mən dəfələrlə deyirdim ki, biz heç vaxt bu vəziyyətlə barışmayacağıq, heç vaxt imkan verməyəcəyik ki, bizim torpağımızda ikinci erməni dövləti yaradılsın» sözlərini qətiyyəti ilə həqiqətə çevirdi. « O gündən üç il keçməmiş biz bu gün buradayıq, Xankəndidəyik, Xankəndinin mərkəzindəyik, Azərbaycan Gerbi, Azərbaycan Bayrağı altında. Bu, böyük xoşbəxtlikdir və tarixi hadisədir. İndi bu tarix haqqında danışmaq mənim üçün bəlkə o qədər də düzgün deyil. Çünki bu tarixi biz yaşamışıq, bu tarixi biz yaratmışıq. Azərbaycan xalqı elə bir Qələbə qazanıb ki, həm dillər əzbəri olub, həm də bu Qələbə əbədi bizimlə olacaq. Bu Qələbə bizim tariximizdə əbədi olacaq. Bizdən sonra gələn nəsillər bu Qələbə ilə əbədi və haqlı olaraq fəxr edəcəklər» söyləyən Prezident İlham Əliyevin «Heydər Əliyev İli»ndə Xankəndidə Azərbaycan Bayrağını qaldırması böyük rəmzi məna daşıyır. «Onu da bildirməliyəm ki, Azərbaycan torpağında heç bir tarixi, coğrafi və siyasi əsası olmayan Dağlıq Qarabağ Muxtar Vilayəti də 100 il bundan əvvəl - 1923-cü ildə yaradılmışdır. Bu, 100 ilin tarixidir» söyləyən dövlət başçımızın sözləri Hərbi Qənimətlər Parkında xəcalət çəkən sınıq-salxaq hərbi avadanlıqların, saxta «prezidentlərin», «paralament sədr»lərinin, boş ərazilərdə narkotik yetişdirən « generalların», bütünlükdə separatçı rejimin tam məhfi, iflası deməkdir. Bütün dünya gördü ki, Qarabağ Azərbaycandır!

Xuraman İsmayılqızı

İki sahil.- 2023.- 17 oktyabr, №189.- S.5.