ARDNŞ milli-mənəvi dəyərlərin inkişafına dəstək verir

Səttar Bəhlulzadənin 100 illik yubileyinə həsr olunmuş tədbir keçirildi

Dünən ARDNŞ-nin təşkilatçılığı ilə Azərbaycanın xalq rəssamı Səttar Bəhlulzadənin 100 illik yubileyi münasibətilə tədbir keçirildi. Öncə mərasim iştirakçıları xalq rəssamının Əmircandakı qəbirüstü abidəsini ziyarət edərək gül dəstələri qoydular.

Sonra ARDNŞ Sosial İnkişaf idarəsi mədəniyyət və istirahət işləri Departamentinin Səttar Bəhlulzadə adına mədəniyyət sarayında davam etdirilən tədbirdə rəssam Səttar Bəhlulzadənin həyat və yaradıcılığından bəhs edən film nümayiş olundu. Azərbaycan Rəssamlar İttifaqının sədri Fərhad Xəlilov çıxış edərək xalq rəssamının yaradıcılığından danışdı. O bildirdi ki, Səttar Bəhlulzadənin adı ölkəmizin hüdudlarından kənarda da yaxşı tanınır. S.Bəhlulzadə Avropada fərdi sərgisi olan ilk Azərbaycan rəssamıdı. Onun əsərləri müxtəlif illərdə fərdi sərgilər çərçivəsində bir çox xarici ölkələrdə nümayiş etdirilmişdir. O əsl təbiət aşiqi idi və əsərlərindən də hiss olunur ki, təbiətə vurğunluğu rəssama ciddi uğurlar gətirb.

S.Bəhlulzadənin rəsmlərində Azərbaycan mədəniyyətinin qədim ənənələri və müasirliyin sintezi olduğunu bildirən əməkdar incəsənət xadimi Ziyadxan Əliyev sənətkarın əsərlərinin hər zaman yüksək zövq verdiyini vurğuladı.

Şair Musa Ələkbərli Səttar Bəhlulzadə ilə bağlı xatirələrini bölüşərək sənətkarın incə qəlbə sahib olduğunu vurğuladı. Onun yaratmış olduğu rəsm əsərlərinin əsrlər böyu yaşayacağını bildirən şair rəssama həsr etdiyi şerini söylədi.

Sənətkarın yaxın qohumu Rəfael Abdinov mərasimin təşkilatçıları-ARDNŞ-yə, Suraxanı RİH-ə, Azərbaycan Rəssamlar Akademiyasına, Rəssamlar İttifaqına və tədbir iştirakçılarına minnətdarlığını bildirdi. R. Abidinov S.Bəhlulzadənin həyatı, ondan miras qalan əsərlərin yaranış tarixi, Səttar Bəhlulzadənin zəngin həyat və yaradıcılığının öyrənilməsində onun gündəliklərinin əhəmiyyətini xüsusi vurğuladı.Qeyd etdi ki, hələ tələbəlik illərində yazmağa başladığı gündəliklərində rəssam öz düşüncələrini qeyd etmiş, gündəliyin səhifələrində eskizlər çəkmişdir.

Daha sonra sənətkarın 100 illik yubileyi münasibətilə keçirilmiş rəsm sərgisinin qaliblərinə mükafatlar təqdim olundu. 17 nəfər ARDNŞ Sosial İnkişaf idarəsi, 3 nəfər Azərbaycan Rəssamlar İttifaqı, 1 nəfər Rəssamlar Akademiyası tərəfindən mükafatlardırıldı.

ARDNŞ-in Sosial İnkişaf İdarəsinin rəis müavini Vasif İmanov qalibləri təbrik etdi və onlara uğurlar arzuladı. Bildirdi ki, müsabiqədə məqsəd gənclər arasında Səttar Bəhlulzadə yaradıcılığının və bədii irsinin geniş təbliğ edilməsi və öyrənilməsdir. Həmçinin Azərbaycan təsviri sənətinə, mədəniyyətinə və incəsənətinə marağın artırılması, təsviri sənət sahəsində yeni istedadların aşkar edilməsi, gənc rəssamların yaradıcılıq fəaliyyətlərinin inkişaf etdirilməsi və onların yeni yaradıcılıq axtarışlarının stimullaşdırılmasıdır.

Tədbir maraqlı konsert proqramı ilə yekunlaşdı.

Aynurə Şirinova

İki sahil.- 2009.- 11 dekabr.- S. 5.