Qədim diyar Naxçıvanda gözəl quruculuq işləri görülür

NAXÇIVAN MUXTAR RESPUBLİKASININ YARADILMASININ 85 İLLİYİ TAMAM OLMUŞDUR

Bakı, (AzərTAc). Fevralın 9-da Naxçıvan Muxtar Respublikasının yaradılmasının 85 illiyi tamam olmuşdur.

Azərbaycanın qədim tarixə, zəngin mədəniyyətə və çoxəsrlik dövlətçilik ənənələrinə malik Naxçıvan diyarı çətin, mürəkkəb və eyni zamanda, parlaq inkişaf yolu keçmişdir. Əsrlərdən bəri Şərq aləminin elmi-mədəni mərkəzlərindən biri kimi şöhrət tapan bu diyar neçə-neçə görkəmli alim, sənətkar və tarixi şəxsiyyət yetirmişdir.

Müasir Müstəqil Azərbaycan Respublikası kimi, onun ayrılmaz tərkib hissəsi olan Naxçıvan Muxtar Respublikasının mövcudluğu və bugünkü inkişafı ümummilli lider Heydər Əliyevin adı ilə bağlıdır. Muxtar respublikanın əhalisi müstəqil dövlətçiliyimizin qurulması və möhkəmləndirilməsi, Vətənimizin ərazi bütövlüyünün qorunması, ölkədə demokratik dəyərlərin bərqərar olması kimi ali amallara qovuşmaq üçün ulu öndər Heydər Əliyevin respublika rəhbərliyinə qayıdışı uğrunda mübarizənin ön sıralarında getmişdir. 1991-ci il sentyabrın 3-də Muxtar Respublika Ali Məclisinin fövqəladə sessiyasında qədim diyarın sakinlərinin təkidli tələbi və arzusu ilə Heydər Əliyev Naxçıvan Muxtar Respublikası Ali Məclisinin sədri vəzifəsini öhdəsinə götürmüşdür.

1992-ci ilin noyabrında Naxçıvan şəhərində Heydər Əliyevin yaradıcısı olduğu Yeni Azərbaycan Partiyasının əsası qoyulmuşdur. Həmin dövrdə Naxçıvan bütün ölkədə milli-demokratik hərəkatın mərkəzi, möhkəm dövlətçiliyin, siyasi sabitliyin mövcud olduğu bir bölgə idi.

XX əsrin 90-cı illərinin əvvəlində, SSRİ-nin süqutu ərəfəsində yaranmış şəraitdən istifadə edən Ermənistan Azərbaycana qarşı açıq silahlı təcavüzə başlayanda Naxçıvan Muxtar Respublikası da çətin sınaq qarşısında qaldı. Diyarı Azərbaycanın əsas ərazisi ilə birləşdirən yollar bağlandı, Naxçıvan blokada şəraitində yaşamağa başladı. Azərbaycan o vaxtkı rəhbərliyinin muxtar respublikanın taleyinə laqeyd münasibəti vəziyyəti daha da çətinləşdirdi.

Belə ağır şəraitdə Naxçıvan əhalisi böyük mərdlik və yenilməzlik nümayiş etdirərək, ulu öndər Heydər Əliyevin rəhbərliyi ilə Azərbaycanın bu qədim torpağını erməni işğalı təhlükəsindən xilas etdi.

O zaman muxtar respublika rəhbərliyinin milli müstəqillik yolunda atdığı cəsarətli addımlar bütün Azərbaycan xalqı tərəfindən rəğbətlə qarşılanmış, respublikada cərəyan edən ictimai-siyasi proseslərə öz müsbət və həlledici təsirini göstərmişdir.

1993-2003-cü illərdə də ulu öndər Heydər Əliyev bu diyardan qayğısını əsirgəmədi. Onun Azərbaycana ikinci dəfə rəhbərliyi dövründə muxtar respublikanın sosial-iqtisadi inkişafı ilə bağlı dövlət səviyyəsində qərarlar qəbul olundu.

Ümummilli lider tərəfindən əsası qoyulan bu işlərin Prezident İlham Əliyev tərəfindən uğurla davam etdirilməsi Naxçıvan diyarını yeni inkişaf mərhələsinə çıxarmışdır. İndi Naxçıvan Muxtar Respublikası milli dövlət quruculuğu prosesinin fəal iştirakçısıdır, ölkəmizin iqtisadi qüdrətinin artırılmasına və intellektual potensialının gücləndirilməsinə dəyərli töhfələr verir. Bir sıra göstəricilərə görə muxtar respublika ölkənin başqa regionlarından öndə gedir. Prezident İlham Əliyev qədim diyara səfərlərinin birində vurğulamışdır ki, mən hər dəfə Naxçıvana gələndə, yeni obyektlərin açılışında iştirak edəndə çox sevinir, qürur hissi keçirirəm ki, Azərbaycanın qədim torpağı olan Naxçıvanda belə gözəl işlər görülür.

Naxçıvan Muxtar Respublikasının 85 illik yubileyi ilə bağlı Prezident İlham Əliyevin 2009-cu il 6 fevral tarixli Sərəncamına əsasən ölkəmizdə keçiriləcək çoxsaylı tədbirlərdə yurdumuzun bu qədim diyarının keçmişinə, bu gününə, onun ölkəmizin tarixindəki roluna və yerinə bir daha nəzər salınacaq, gələcək inkişaf perspektivlərindən söhbət açılacaqdır.

İki sahil.- 2009.- 10 fevral.- S. 4.