Konstitusion islahatlar ölkənin inkişafına xidmət edir

Səbail rayon seçiciləri ümumxalq səsverməsinə yüksək səviyyədə hazırlaşır

Ölkəmiz mühüm kampaniyaya- “Azərbaycan Respublikasının Konstitusiyasına əlavələr və dəyişikliklər edilməsi haqqında” Referendum Aktına müvafiq olaraq ümumxalq səsverməsinə hazırlaşır. İnsan hüquq və azadlıqlarının qorunmasına, demokratiyanın hüdudlarının genişləndirilməsinə, əhalinin sosial müdafiəsinin gücləndirilməsinə yönəldilən, zamanın tələbinə uyğunlaşdırılan Konstitusiyaya olunacaq əlavə və dəyişikliklərin hər biri əhəmiyyətlidir.

“Konstitusiyaya əlavə və dəyişikliklər zamanın tələbindən irəli gəlir. Mahiyyət və keyfiyyət etibari ilə beynəlxalq normalara və Konvensiyalara uyğun olan əlavə və dəyişikliklərdə insan amilinə diqqət ön plana çəkilir.” Bu fikir dünən Dənizcilərin Mədəniyyət evində “Yeni Azərbaycan” təşviqat qrupunun səlahiyyətli nümayəndələrinin və vəkil edilmiş şəxslərinin dənizçilərlə keçirdiyi görüşdə xüsusi vurğulandı.

Tədbiri giriş sözü ilə açan YAP İdarə Heyətinin üzvü, Səbail rayon təşkilatının sədri, “Yeni Azərbayan” referendum üzrə təşviqat qrupunun vəkil edilmiş şəxsi Zahid Qaralov bildirdi ki, MSK-da 9 təşviqat qrupu qeydiyyatdan keçib. İlk qeydiyyatdan keçən Yeni Azərbaycan Partiyasının yaratdığı “Yeni Azərbaycan” təşviqat qrupudur.

Z.Qaralov Azərbaycanın ötən müddətdə keçdiyi inkişaf yolundan geniş bəhs etdi. Qeyd etdi ki, Azərbaycan bu gün həyata keçirdiyi demokratik islahatların əhəmiyyətinə görə nümunəvi ölkə kimi qeyd olunur. Son prezident seçkilərində Azərbaycan dövləti bir daha demokratik dəyərlərə sadiqliyini nümayiş etdirdi. Ölkəmizdə demokratiya institutu təkmilləşir, müasirləşir, mütərrəqqi qanunların tətbiqinə diqqət artırılır. Konstitusiyaya əlavə və dəyişikliklərdə bu məqamlar öz əksini tapır. Ölkə vətəndaşlarının şəxsi həyatına müdaxilələrin qanunla qəbul olunmuş qaydalara uyğun müdafiəsinin təşkili üçün nəzərdə tutulan maddələr, eyni zamanda uşaq hüquqlarının qorunması, onların həyatına, mənəviyyatına, sağlamlığına təsir edə biləcək halların qarşısının alınması üçün dövlət nəzarətinin artırılması, vətəndaşların hüquqlarının qorunması, insanların vəzifələrinin yalnız Ali Qanunla müəyyənləşdirilməsi kimi maddələr Konstitusiyaya əlavə və dəyişikliklərdə öz əksini tapır. Dəyişikliklərdə bələdiyyələrə səlahiyyətlərini həyata keçirməkdə müstəqillik verilməsi, yerli özünüidarə orqanlarının yerləşdikləri ərazidə yaşayan vətəndaşlar qarşısında məsuliyyət daşıdıqlarını təsdiqləyən maddələr də dünya təcrübəsinə uyğunlaşdırılır.

Z.Qaralov bildirdi ki, ilk Konstitusiyamız ulu öndər Heydər Əliyevin rəhbərliyi ilə 1995-ci ildə qəbul olunub. Bu gün Milli Məclisin qərarı ilə Milli Konstitusiyamıza əlavə və dəyişikliklərin edilməsi zərurəti aydındır. Məlum olduğu kimi dəyişikliklərlə bağlı ilk referendum 2002-ci ilin avqustunda keçirilib. Həqiqət budur ki, Ali Qanuna əlavə və dəyişikliklər xalqın istək və arzusunu özündə birləşdirir.

Bu gün Azərbaycan dinamik inkişaf yolunda inamla irəliləyir. Ölkəmiz son illərdə iqtisadi artımın sürətinə görə dünyada liderliyi ələ alıb. İqtisadi imkanların genişlənməsi dövlətimizin siyasi mövqeyinin daha da möhkəmlənməsinə zəmin yaradıb. Bu gün regionda Azərbaycanın iştirakı olmadan hansısa iqtisadi və siyasi layihənin həyata keçirilməsinin mümkünsüzlüyü ölkəmizin artan nüfuzunun göstəricisidir.

Bu inkişaf, tərəqqi sözsüz ki, Ali Qanunumuzda da öz əksini tapmalıdır. Bu baxımdan martın 18-də keçiriləcək ümumxalq səsverməsi ölkə ictimaiyyəti tərəfindən yüksək dəyərləndirilir. Konstitusiyanın 29 maddəsinə 40-dan artıq əlavə və dəyişikliklər edilməsi nəzərdə tutulub. Bu dəyişikliklərin hər birinin mahiyyətini ictimaiyyətə olduğu kimi çatırmalıyıq.Sıraları günbəgün artan YAP-ın ölkədə keçirilən hər bir seçki prosesindən uğurla çıxdığını qeyd edən Z.Qaralov partiya üzvlərinin ümumxalq səsverməsində də fəallıq nümayiş etdirəcəyinə əminliyini ifadə etdi.

“Yeni Azərbaycan” referendum üzrə təşviqat qrupunun səlahiyyətli nümayəndəsi Musa Quliyev qeyd etdi ki, qarşıda duran əsas vəzifə Konstitusiyanın 29 maddəsinə edilən əlavə və dəyişikliklərin hər bir birinin mahiyyətini seçicilərə çatdırmaq, maarifləndirmə işini yüksək səviyyədə həyata keçirməkdir.

Bu gün Azərbaycan sosial-iqtisadi inkişafın yüksək mərhələsindədir. Məhz Milli Məclis yeni dövrün tələblərinə uyğun olaraq Konstitusiyaya əlavə və dəyişikliklərin edilməsi ilə bağlı qərar qəbul etdi. Yəni bu dəyişikliklər birdən-birə ortaya çıxmadı. Ölkəmizin bu günkü inkişafı, tərəqqisi həmin dəyişiklikləri zəruri etdi.

M.Quliyev çıxışını bir neçə tezis əsasında qurdu. Bildirdi ki, hər bir dəyişiklik Azərbaycanın gələcək inkişafına yönəlib. Bu dəyişikliklərdə Azərbaycanın ictimai, siyasi, sosial uğurları öz əksini tapıb. Demokratik cəmiyyətin varlığını təsdiqləyən amillərin inkişafına xidmət edən müddəalar da əsas yer tutur. Düşünürəm ki, bu dəyişikliklərin hər biri seçicilər tərəfindən tam aydın başa düşüləcək, ümumxalq səsverməsində fəal iştirakları ilə bunu bir daha təsdiqləyəcəklər.

M.Quliyev müxalif qüvvələrin Konstitusiyaya əlavə və dəyişikliklərin əhəmiyyətini azaltmaq istiqamətində göstərdikləri cəhdlərə diqqəti yönəldərək bildirdi ki, bu gün qarşıda duran əsas vəzifələrdən biri də onların apardığı bu təbliğatın əsassızlığını sübut etmək, dəyişikliklərin mahiyyətini daha dolğun şəkildə ictimaiyyətə çatıdmaqdır. Bu gün müxalif qüvvələrin Konstitusiyanın 29 maddəsinə olunan əlavə və dəyişikliklərdən yalnız birinə, 101-ci maddədə edilən dəyişikliyə daha çox diqqət yönəltmələri onların maraqlarının nədən ibarət olduğunu açıqlayır. Həmin maddədə edilən dəyişikliyə diqqət yetirsək onların təbliğatının əsassızlığı aydın şəkildə özünü büruzə verir. Guya bu dəyişiklik demokratiyaya ziddir. “Demokratiya odur ki, atılan addım cəmiyyətin inkişafına xidmət edir. Demokratiya odur ki, xalq atılan addımı dəstəkləyir. Demokratiya xalqın iradəsini əks etdirir.” Bu gün Azərbaycan xalqı referenduma çıxarılan məsələləri dəstəkləməklə müxalifətin apardığı təbliğatın qərəzli olduğunu bir daha təsdiqləyir.

M.Quliyev dənizçiləri ümumxalq səsverməsində fəal olmağa çağırdı.

Tədbirdə Azərbaycan Dövlət Dəniz Akademiyasının əməkdaşı Firəngiz Rzayeva, “Şah İsmayıl Xətai” gəmisinin kapitanı Cabir Əsgərov çıxış edərək bildirdilər ki, xalqımız 18 mart 2009 - cu il tarixdə Referendum yolu ilə Azərbaycan Respublikası Konstitusiyasına edilmiş əlavə və dəyişikliklərə öz münasibətini bildirəcəkdir. Əlavə və dəyişikliklərin insan hüquqlarının daha etibarlı təminatına xidmət etməsi 17-ci maddədə özünü aydın gostərir. Dövlətin sosial siyasətinin mühüm prinsiplərindən biri ölkənin hər bir vətəndaşı kimi cəmiyyətin gələcəyi olan uşaqların qayğı ilə əhatə olunması, onların hüquqlarının qorunmasıdır. “Azərbaycan son 5 ildə çox böyük uğurlara nail olub. Xalqımızın ümummilli lideri Heydər Əliyevin siyasi kursunu layiqincə davam etdirən cənab İlham Əliyevin rəhbərliyi sayəsində respublikamızda iqtisadiyyatın bütün sahələrində, o cümlədən dəniz nəqliyyatındakı sürətli inkişaf hər birimizi sevindirir və daha da yaxşı işləməyə ruhlandırır.”

Ən müxtəlif sahələri əhatə edən bu dəyişikliklər və əlavələr dövlətimizin inkişafına xidmət edəcəkdir. İnsan hüquqlarının müdafiəsi, iqtisadi inkişaf, bərabərlik hüququ, vicdan azadlığı və s. sahələrdə nəzərdə tutulan alavə və dəyişikliklər öz demokratikliyi və humanistliyi ilə diqqəti cəlb edir. “Biz dənizçilər bu əlavə və dəyişiklikləri dəstəkləyir və onlara yekdilliklə səs verəcəyik.”

Yeganə Əliyeva

İki sahil.- 2009.- 21 fevral.- S. 6.