Jurnalistlər üçün master kurs keçirildi

Dünən Mətbuat Şurası və “Azercell Telekom” MMC-nin təşkilatçılığı ilə “Biznes xəbərlərin yazılması və redaktəsi: master kurs” adlı tədbir keçirildi.

Tədbiri giriş sözü ilə açan Mətbuat Şurasının sədri Əflatun Amaşov bu kimi tədbir-seminarların keçirilməsinin, beynəlxalq təcrübənin tətbiq olunmasının vacibliyini vurğuladı. Ə.Amaşov bundan sonra tez-tez jurnalistlərlə bağlı analoji layihələrin həyata keçiriləcəyini bildirdi. Onun sözlərinə görə, bu layihələr ölkəmizdə jurnalistlərin peşəkarlıq səviyyəsinin artmasına xidmət göstərir.

“Azercell Telekom” MMC-nin Korporativ ünsiyət və korporativ sosial məsuliyyət bölümünün rəhbəri Ülviyyə Həsənzadə qeyd etdi ki, KİV nümayəndələri ilə daim sıx əlaqədə olan “Azercell” indiyədək jurnalistlərin inkişafına yardım edən müxtəlif layihələrə imza atıb. Bu tədbirlər şirkətin İnkişafı Paylaşmaq Platforması çərçivəsində həyata keçirilir. Ü.Həsənzadə vurğuladı ki, Azercell Telekom MMC çalışacaq ki, bundan sonra da jurnalistlərimizin Qərb texnologiyası ilə tanışlığında körpü rolunu oynasın.

“Biznes xəbərlərin yazılması və redaktəsi” mövzusunda təşkil edilən master kurs Kommunikasiya sahəsində ekspert Aleksandr Straunik tərəfindən keçirildi. Aleksandr Straunik Avropanın bir neçə ölkəsində həm jurnalist, həmçinin də kommunikasiya sahəsində müşavir və məsləhətçi kimi uzun illər çalışıb. Onun keçdiyi seminarın məqsədi biznes xəbərlərin, xəbər başlıqların yazılması, fakt və rəy mənbələrin göstərilməsi, faktın yoxlanılması, o cümlədən internetdən istifadə edərək, tədqiqat üsulların əsaslarını tədris etmək üçün məlumatlandırıcı kursun təşkil olunmasından ibarətdir. Kursda həmçinin korporativ xəbərlərin yazılması, gündəliyin tərtibatı və korporativ mesajın yerləşdirilməsi kimi mövzular ümumi şəkildə nəzərdən keçirildi.

Sonda master kurs iştirakçılarına sertifikat və “Azercell” Telekom MMC tərəfindən xatirə hədiyyəsi verildi.

Orxan Vahidoğlu

İki sahil.- 2009.- 10 noyabr.- S. 7.