Fransa Respublikasının Dövlət Maliyyə Baş Direktorluğunun nümayəndə heyəti Vergilər Nazirliyində olmuşdur

Josaine Lanteri: "Mən səfər müddətində Vergilər Nazirliyinin böyük və məsuliyyətli işin öhdəsindən necə uğurla gəldiyini gördüm"

Bu günlərdə Fransa Respublikasının Dövlət Maliyyə Baş Direktorluğunun nümayəndə heyəti Vergilər Nazirliyində olmuşdur. Nümayəndə heyətinə Dövlət Maliyyə Baş Direktorluğunun Beynəlxalq əməkdaşlıq idarəsinin rəisi xanım Josaine Lanteri və həmin idarənin rəis müavini Francois Plessieri daxil idi. Qeyd edək ki, səfər Azərbaycan Respublikasının Vergilər Nazirliyi və Fransa Respublikasının Dövlət Büdcəsi, Mühasibatı, Qulluğu və İslahatı Nazirliyinin Dövlət maliyyə Baş İdarəsi (hazırda Dövlət Maliyyə Baş Direktorluğu) arasında imzalanmış texniki əməkdaşlıq sazişi çərçivəsində həyata keçirilmişdir. Səfərin əsas məqsədi iki ölkənin vergi orqanları arasında qarşılıqlı tanışlıq və vergitutma sahəsində təcrübə mübadiləsinin aparılması olmuşdur.

Səfərin birinci günü nümayəndə heyətinə Azərbaycanın vergi sistemi və nazirlikdə həyata keçirilən elektron xidmətlər barədə ətraflı məlumat vermək üçün təqdimat keçirilmişdir. Təqdimatda vergilər nazirinin müşaviri, baş vergi xidməti müşaviri Asəf Əsədov, Kommersiya hüquqi şəxslərin dövlət qeydiyyatının təşkili və iqtisadi təhlil Baş İdarəsinin rəis əvəzi, vergi xidməti müşaviri Rauf Namazov, Vergi ödəyicilərinə xidmət idarəsinin rəisi, baş vergi xidməti müşaviri Elçin Məmmədov, Beynəlxalq münasibətlər idarəsinin rəisi, baş vergi xidməti müşaviri İlqar Əkbərli və qonaqlar iştirak etmişlər.

Təqdimat zamanı Vergilər Nazirliyində tətbiq olunan elektron xidmətlər barədə ətraflı məlumat verilmişdir. Qeyd olunmuşdur ki, 2006-cı ildən etibarən Vergilər Nazirliyində tətbiq olunan Avtomatlaşdırılmış Vergi İnformasiya Sisteminin (AVİS) tətbiqi vergi inzibatçılığında əsaslı dəyişikliklərə gətirmiş, vergi sistemində sənəd dövriyyəsinin elektron formata keçirilməsinə, məlumatların işlənməsi sürətinin dəfələrlə artmasına, operativ və çevik vergi nəzarətinin qurulmasına, digər qurumlarla inteqrasiyaya yol açmışdır. Sonra Vergilər Nazirliyi tərəfindən ƏDV depozit hesabının və elektron vergi hesab-fakturalarının tətbiqindən danışılmış və bu sistemlərin üstün cəhətləri barədə qonaqlara məlumat verilmişdir. Görüşdə həmçinin Vergilər Nazirliyində fəaliyyətin və işçilərin qiymətləndirilməsi sistemi barədə də ətraflı məlumat verilmişdir. Qeyd olunmuşdur ki, bu sistem vasitəsilə Vergilər Nazirliyinin rəhbərliyi üçün həm nazirliyin strukturları, həm də işçilərin qiymətləndirməsinə imkan yaranmışdır.

Tədbirdə qonaqlara Azərbaycanda tətbiq olunan vergilər, Vergilər Nazirliyinin strukturu və fəaliyyəti, vergi ödəyicilərinə göstərilən xidmətlər, nazirlikdə tətbiq olunan son nəaliyyətlər barədə təqdimatlarla ətraflı məlumat verilmişdir. Vergilər Nazirliyində struktur islahatlarından danışılarkən Bakı Şəhər Vergilər Departamentinin strukturuna edilmiş son dəyişikliklərin əhəmiyyəti vurğulanmışdır. Bununla bərabər, vergi ödəyicilərinə göstərilən müasir xidmətlər ətraflı qeyd olunmuşdur. Vergilər Nazirliyinin "195" telefon məlumat xidməti barədə məlumat verilmiş və qeyd edilmişdir ki, ötən ilin sentyabr ayında bu telefon məlumat xidmətinə İqtisadi İnkişaf Nazirliyi də qoşulmuşdur. Gələcəkdə "195" telefon məlumat xidmətinin bütün dövlət orqanlarını əhatə etməklə vahid "Call Center"ə çevrilməsinin mümkünlüyü vurğulanmışdır.

Sonra nümayəndə heyətini maraqlandıran digər məsələlər ətrafında fikir mübadiləsi aparılmışdır.

Günün ikinci yarısında Azərbaycan Respublikasının Vergilər Nazirliyi və Fransa Respublikasının Dövlət Maliyyə Baş Direktorluğu arasında imzalanmış texniki əməkdaşlıq sazişində nəzərdə tutulmuş məsələlər və hər iki ölkənin vergi orqanlarının əməkdaşlığının gələcək perspektivləri müzakirə olunmuşdur. Görüş zamanı Dövlət Maliyyə Baş Direktorluğunun Beynəlxalq əməkdaşlıq idarəsinin rəisi Josaine Lanteri Vergilər Nazirliyində tətbiq olunan elektron layihələrin onlarda böyük maraq doğurduğunu və bununla əlaqədar vergi orqanları arasında fikir mübadiləsinin aparılması, həmçinin təcrübənin öyrənilməsi məqsədilə qarşılıqlı səfərlərin təşkil edilməsinin böyük əhəmiyyət daşıdığını qeyd etmişdir.

Vergilər nazirinin müşaviri Asəf Əsədov Vergilər Nazirliyində həyata keçirilən islahatlardan danışmış və informasiya texnologiyalarının son nailiyyətlərinin vergi inzibatçılığına tətbiqinin bir çox beynəlxalq təşkilatların, o cümlədən Dünya Bankı, Beynəlxalq Valyuta Fondu, Avropa Birliyinin böyük marağına səbəb olduğunu nümayəndə heyətinin diqqətinə çatdırmışdır. Bildirilmişdir ki, bu yaxınlarda Şamaxı rayonunda Vergilər Nazirliyinin Tədris Mərkəzinin yeni inzibati binası istifadəyə veriləcək. Asəf Əsədov Tədris Mərkəzinin yeni inzibati binasında ildə 400-500 nəfərin iştirakı ilə müxtəlif mövzularda treninqlərin keçiriləcəyini vurğulamışdır. İstifadəyə veriləcək Tədris Mərkəzində Vergilər Nazirliyi və Dövlət Maliyyə Baş Direktorluğu tərəfindən hər iki ölkənin vergi orqanlarını maraqlandıran mövzular ətrafında müzakirələrin aparılması üçün birgə treninqlərin keçirilməsinin mümkünlüyü də bildirilmişdir.

Səfərin ikinci günü Dövlət Maliyyə Baş Direktorluğunun nümayəndə heyəti Vergilər Nazirliyi yanında Xüsusi Rejimli Vergi Xidməti Departamentində və Bakı Şəhər Vergilər Departamentinin Kommersiya hüquqi şəxslərin dövlət qeydiyyatı idarəsində olmuşlar. Burada qonaqlara kommersiya hüquqi şəxslərin dövlət qeydiyyatının "bir pəncərə" prinsipi ilə aparılması, Vergilər Nazirliyi tərəfindən iri vergi ödəyiciləri ilə işlərin qurulması və onlara göstərilən xidmətlər barədə məlumat verilmişdir. Qeyd olunmuşdur ki, 2008-ci ilin yanvar ayının 1-dən etibarən Azərbaycan Respublikasının Prezidenti cənab İlham Əliyevin müvafiq sərəncamına uyğun olaraq kommersiya hüquqi şəxslərin dövlət qeydiyyatının "bir pəncərə" prinsipi ilə aparılmasına başlanmışdır.

Sonra nümayəndə heyətinə kommersiya hüquqi şəxslərin qeydiyyatı prosedurları əyani surətdə göstərilmişdir.

Həmin gün fransalı nümayəndə heyəti Vergilər Nazirliyi yanında Xüsusi Rejimli Vergi Xidməti Departamentinin fəaliyyəti ilə də yaxından tanış olmuşlar. Departamentin rəisi, baş vergi xidməti müşaviri Zaur Fəti-zadə Xüsusi Rejimli Vergi Xidməti Departamentinin iş fəaliyyəti, həmçinin iri vergi ödəyicilərinə göstərilən xidmətlər barədə qonaqlara ətraflı məlumat vermişdir. Görüşdə Vergilər Nazirliyi və Dövlət Maliyyə Baş Direktorluğunun nümayəndələri arasında qeyd olunan məsələlər ətrafında müzakirələr aparılmışdır. Direktorluğun nümayəndələri kommersiya hüquqi şəxslərin dövlət qeydiyyatının "bir pəncərə" prinsipi ilə aparılmasının, eləcə də Vergilər Nazirliyi tərəfindən iri vergi ödəyicilərinə göstərilən xidmətlərin böyük əhəmiyyət kəsb etdiyini bildirmişlər. Qonaqlar qısa dövr ərzində Vergilər Nazirliyi tərəfindən görülən işləri yüksək qiymətləndirmişlər.

Qeyd edək ki, səfər müddətində nümayəndə heyəti Bakının görməli yerlərini gəzmiş, "Azəriilmə" müəssisəsində Azərbaycanın qədim xalçaçılıq sənəti ilə yaxından tanış olmuşlar.

Nümayəndə heyətinin görüşləri başa çatdıqdan sonra səfər təəssüratları barədə məlumat almaq üçün bizi maraqlandıran suallarla Fransa Respublikasının Dövlət Maliyyə Baş Direktorluğunun Beynəlxalq əməkdaşlıq idarəsinin rəisi xanım Josaine Lanteriyə müraciət etdik:

- Xanım Lanteri, səfərinizin məqsədi və Azərbaycan Respublikasının Vergilər Nazirliyi ilə Fransa Respublikasının Dövlət Maliyyə Baş Direktorluğu arasındakı əlaqələr barədə nə deyə bilərsiniz?

- Hələ bir neçə il öncə Vergilər Nazirliyinin nümayəndələri ilə görüşümüz zamanı fikir mübadiləsi aparmış və razılığa gəlmişdik ki, iki ölkənin vergi orqanları arasında saziş imzalansın. Həmin saziş ötən ilin dekabr ayında imzalandı və biz də öz növbəmizdə çalışırıq ki, sazişdən irəli gələn vəzifələri yerinə yetirək. Qeyd etmək istərdim ki, ölkələrimizin vergi orqanları arasındakı əlaqələr hazırda çox yüksək səviyyədədir və çalışacağıq ki, əməkdaşlığımızı daha da inkişaf etdirək. Hesab edirəm ki, maliyyə və vergi orqanlarının əməkdaşlıq etməsi təcrübə mübadiləsi aparılması baxımından vacibdir. Bu baxımdan Dövlət Maliyyə Baş Direktorluğu ilə Vergilər Nazirliyi arasında əməkdaşlıq edilməsi və təcrübə mübadiləsinin aparılması böyük əhəmiyyət kəsb edir. Səfər çərçivəsində keçirilən görüşlərdə həm bizim, həm də Vergilər Nazirliyi üçün bir neçə maraqlı məsələ oldu ki, gələcəkdə bununla əlaqədar müzakirələrimizin davam etdirilməsi qərara alındı. Azərbaycanda Vergilər Nazirliyi tərəfindən tətbiq olunan ƏDV-nin depozit hesabı və elektron vergi hesab-fakturalarının tətbiqi, işçilərin və menecerlərin fəaliyyətinin qiymətləndirilməsi sistemi ilə yaxından tanış olduq. Xüsusilə qeyd etmək lazımdır ki, kommersiya hüquqi şəxslərin dövlət qeydiyyatının Vergilər Nazirliyi tərəfindən "bir pəncərə" prinsipi ilə aparılması, hətta notariat xidmətinin burada yerləşdirilməsi təqdirəlayiqdir. Həmçinin, Xüsusi Rejimli Vergi Xidməti Departamentində işin təşkili və aparılması bizim marağımıza səbəb oldu. Ona görə səfərimizdən çox razıyıq və ümid edirəm ki, gələcəkdə də qarşılıqlı səfərlər davam etdiriləcək.

- Azərbaycan Respublikasının Vergilər Nazirlyində həyata keçirilən islahatlar və yeniliklər Sizdə hansı təəssürat yaratdı?

- Mən bu səfər müddətində Vergilər Nazirliyinin böyük və məsuliyyətli bir işin öhdəsindən necə uğurla gəldiyini gördüm. Vergilər Nazirliyi tərəfindən vergi ödəyicilərinə göstərilən xidmətlərin yüksək səviyyədə təşkil olunduğunun şahidi olduq və biz də bütün dövlətlər kimi, göstərilən xidmətlərin səviyyəsinin daim artırılmasına çalışırıq. Xüsusilə kommersiya hüquqi şəxslərin qeydiyyatının "bir pəncərə" prinsipi ilə aparılması, "195" telefon məlumat xidməti vasitəsilə Vergilər Nazirliyi tərəfindən vergi ödəyicilərinə göstərilən xidmətləri qeyd etmək vacibdir. Vurğulamaq istərdim ki, Vergilər Nazirliyi vergi ödəyicilərinə yüksək səviyyədə xidmət göstərməklə bərabər, vergi qanunvericiliyinin pozulması halları ilə də ciddi mübarizə aparır. Eyni zamanda, Vergilər Nazirliyində əməkdaşların və menecerlərin qiymətləndirmə sisteminin yüksək səviyyədə təşkil olunduğunu müşahidə etdik. Vergilər Nazirliyi tərəfindən görülən bütün işlər həqiqətən də yüksək qiymətləndirilməlidir.

- Vergilər Nazirliyi ilə Fransa Respublikasının Dövlət Maliyyə Baş Direktorluğu arasındakı əməkdaşlığın gələcək perspektivləri barədə nə deyə bilərsiniz? Eyni zamanda, müsbət təcrubə sahəsində əməkdaşlıq imkanlarını necə qiymətləndirirsiniz?

- Yaxın zamanlarda vergi əməkdaşlarının tədrisi ilə bağlı müzakirələrə başlamağı nəzərdə tuturuq. Eyni zamanda, Vergilər Nazirliyi tərəfindən tətbiq olunan ƏDV-nin depozit hesabı və elektron vergi hesab-fakturalarının tətbiqi, həmçinin işçilərin və menecerlənin qiymətləndirilməsi və təkmilləşdirilməsi, iri vergi ödəyicilərinə göstərilən xidmətlər bizim böyük marağımıza səbəb olmuşdur. Bununla əlaqədar, ölkələrimizin vergi orqanları əməkdaşlarının qarşılıqlı səfərlərinin həyata keçirilməsi nəzərdə tutulur. Biz də öz növbəmizdə Vergilər Nazirliyinin nümayəndələrini Fransada görməkdən məmnun olardıq.

- Xanım Lanteri, Bakı haqqında təəssüratlarınız…

- Azərbaycanın paytaxtı bizi çox valeh etdi, xüsusilə şəhərin qədim yerlərini vurğulamaq istərdim. Biz səfərimiz müddətində Azərbaycanın qədim tarixini özündə əks etdirən Bakının qədim Qala divarları, İçərişəhər, Karvansarada olduq və bu zaman özümüzü Azərbaycanın qədim dövründə hiss etdik. Azərbaycan xalçalarını isə xüsusilə vurğulamaq istərdim. Səfər çərçivəsində imkan tapıb "Azəriilmə" müəssisəsində Azərbaycanın qədim xalçaçılıq sənəti ilə yaxından tanış olduq. Bu tanışlıq məndə Azərbaycan haqqında çox gözəl təəssüratlar yaratdı.

Sonda bir daha qeyd etmək istərdim ki, Azərbaycanın paytaxtı çox gözəldir və mən Bakıya bir daha səfər etmək, şəhərlə daha yaxından tanış olmaq istərdim.

Əliyev Toğrul

İqtisadiyyat. -2010. – 23-29 aprel. – S.3.