Vergilər Nazirliyində görüş keçirilmişdir

Ötən həftə Vergilər Nazirliyinin Mərkəzi Aparatında Beynəlxalq Maliyyə Korporasiyasının və İrlandiyanın "Enerprise Registry Solutions" şirkətinin nümayəndə heyəti ilə görüş keçirilmişdir.

Keçirilən görüşdə əsas məqsəd "Enerprise Registry Solutions" şirkəti tərəfindən Azərbaycanda kommersiya hüquqi şəxslərin dövlət qeydiyyatında "bir pəncərə" sisteminin qiymətləndirilməsi və qeydiyyat sisteminin gələcək inkişafı ilə bağlı görüləcək tədbirlərin müzakirəsi olmuşdur.

Görüşdə Vergilər Nazirliyi tərəfdən vergilər nazirinin müavini, 3-cü dərəcəli dövlət vergi xidməti müşaviri Sahir Məmmədxanov, vergilər nazirinin müşaviri, baş vergi xidməti müşaviri Asəf Əsədov, Kommersiya hüquqi şəxslərin dövlət qeydiyyatının təşkili və iqtisadi təhlil Baş İdarəsinin rəisi, baş vergi xidməti müşaviri Zaur Fətizadə, Beynəlxalq münasibətlər idarəsinin rəisi, baş vergi xidməti müşaviri İlqar Əkbərli və vergilər nazirinin mətbuat katibi, 1-ci dərəcəli müfəttiş Fariz Səmədov, qarşı tərəfdən isə Beynəlxalq Maliyyə Korporasiyasının (İFC) Azərbaycanda biznes mühitinin təkmilləşdirilməsi layihəsinin rəhbəri Boris Divyak, həmin layihənin hüquq məsələləri üzrə müşaviri Fəxriyar Cabbarov, "Enerprise Registry Solutions" şirkətinin baş meneceri Deklan Giney, həmin şirkətin layihə meneceri Stefan Mörrey və hüquq məsələləri üzrə ekspert Ronan Kormakeyn iştirak etmişlər.

Qonaqları salamlayan vergilər nazirinin müavini Sahir Məmmədxanov onları Bakıda görməkdən məmnun olduğunu qeyd etmişdir. Azərbaycanın vergi sistemində son illər həyata keçirilən uğurlu islahatlar haqqında məlumat verən Sahir Məmmədxanov əldə olunan nailiyyətlərdə ümummilli lider Heydər Əliyevin və onun layiqli davamçısı, möhtərəm Prezidentimiz cənab İlham Əliyevin müstəsna rolunun olduğunu bildirmişdir. Ölkə rəhbəri tərəfindən ötən ilin yanvar ayının 1-dən etibarən kommersiya hüquqi şəxslərin dövlət qeydiyyatının aparılmasının məhz Vergilər Nazirliyinə tapşırılmasının bütün nazirlik əməkdaşlarının üzərinə böyük məsuliyyət qoyulduğunu vurğulamışdır. Qeyd olunmuşdur ki, qısa müddət ərzində görülmüş işlər nəticəsində qeydiyyat proseduru tamamilə sadələşdirilmiş və sahibkarlar tərəfindən böyük razılıqla qarşılanmışdır.

Çıxış edən "Enerprise Registry Solutions" şirkətinin baş meneceri Deklan Giney Azərbaycanın paytaxtı Bakıda olmaqdan məmnunluğunu ifadə etmiş və "bir pəncərə" prinsipinin fəaliyyəti ilə tanış olmaq üçün yaradılan şəraitə görə nazirliyin rəhbərliyinə öz təşəkkürünü bildirmişdir. Bakıda olduqları müddət ərzində kommersiya hüquqi şəxslərin dövlət qeydiyyatının "bir pəncərə" prinsipi üzrə aparılması proseduru ilə yaxından tanış olduqlarını və bu müddət ərzində görülən işlərin təqdirəlayiqliyini vurğulamışdır. Deklan Giney görülən işlərin nəticəsi olaraq Dünya Bankı və Maliyyə Korporasiyasının layihəsi olan "Doing Business"in 2008-ci il üçün tərtib edilən hesabatında Azərbaycanın 64-cü pillədən 13-cü yerə yüksəldiyini və ən islahatçı ölkə elan olunduğunu qeyd etmişdir. Qonaq, eyni zamanda, biznes nümayəndələri ilə görüşdüklərini və həmin görüşlər zamanı "bir pəncərə" prinsipinin tətbiqinin müsbət qarşılandığının şahidi olduğunu bildirmişdir.

Sonra qeydiyyat sisteminin gələcək inkişafı, nəzərdə tutulan təkmilləşmələr və bu istiqamətdə görüləcək işlər haqqında ətraflı müzakirələr aparılmışdır.

Toğrul ƏLİYEV

İqtisadiyyat.- 2009.- 12-17 mart.- S.4.