Gəlir məktəb zamanı

V-XI siniflər üzrə dərsliklərin yerlərə çatdırılması işi yekunlaşır. Bu il də məktəblərin dərsliklərlə təminatında heç bir problem olmayacaq

Dünya təcrübəsi və təhsilin məzmununda aparılan islahatlar göstərir ki, dərsliklər yeni, daha səmərəli məzmun və forma tələb edir. Məhz bu baxımdan, hər il orta ümumtəhsil müəssisələrinin dərsliklərinin yenilənməsi məsələsi gündəmə gəlir.

2010-2011-cu tədris ilinə dərsliklərlə təminata gəlincə, artıq təhsil naziri Misir Mərdanovun əmrinə əsasən, «Ümumtəhsil məktəbləri üçün dərsliklərin nəşri, çapı və paylanması qaydaları»na və “Ümumi təhsil sistemində dərslik siyasəti” sənədinə uyğun olaraq 2010-2011-ci tədris ilinə I, III, VI, VIII-XI siniflər üçün 111 adda dərslik və müəllim üçün metodik vəsaitin siyahısı, tirajı, həcmi və formatı təsdiqlənib. Həmin vəsaitlərin çapı ilə bağlı tender prosedurunun mövcud qanunvericiliyə uyğun keçirilməsini təmin etmək isə nazirliyin Dərslik və nəşriyyat şöbəsinin üzərinə düşür. Bundan başqa, dərslik komplektlərini qiymətləndirmək üçün Dərslikləri Qiymətləndirmə Şurasına mövcud qaydada təqdim etmək, keçid balını toplamış, maliyyə təklifi qəbul edilmiş və Tender komissiyasının qərarına əsasən qalib hesab olunmuş dərslik komplektlərinə qrif verilməsi və dərslik komplektlərinin (dərslik və müəllim üçün metodik vəsait) çapı üzrə nəşriyyat-poliqrafiya müəssisələri ilə müvafiq satınalma müqavilələrinin bağlanmasını təmin etmək də bu şöbənin üzərinə düşür. Bu vəzifələrə 2010-2011-ci tədris ilinə çapa təsdiqlənmiş I və V-XI sinif dərsliklərinin məzmununun, poliqrafik icra keyfiyyətinin yaxşılaşdırılması məqsədilə orta məktəb müəllimlərindən ibarət yaradılmış işçi qruplarının müəllif, elmi redaktor və nəşriyyatlarla birgə işini təşkil etmək, ümumtəhsil məktəblərinin I və V-XI sinifləri üçün dərsliklərin mövcud qanunvericiliyə uyğun olaraq çapının təşkili və onların ümumtəhsil müəssisələrinə bölgü əsasında yeni dərs ilinin əvvəlinədək çatdırılması ilə bağlı müvafiq tədbirlər də daxildir. Məktəb kitabxanalarının oxu materialları, o cümlədən bədii, tədris, ensiklopedik, sorğu xarakterli və digər ədəbiyyatlarla zənginləşdirilməsini təmin etmək, xüsusi tipli məktəblər üçün və milli azlıqların dillərində dərsliklərin hazırlanması, nəşri və çapı ilə bağlı işlər də şöbə tərəfindən həyata keçirilir. Həm ibtidai, həm də yuxarı sinif şagirdləri üçün daha bir neçə dərsliyin əvvəlki variantlarda yenidən çap edildiyini deyən Dərslik və nəşriyyat şöbəsinin müdiri Faiq Şahbazlının sözlərinə görə, bu il də istifadə olunacaq dərs vəsaitləri arasında tamamilə yeni müəlliflərin tərtib etdiyi dərsliklər olacaq. Belə ki, rus bölməsi üçün «Azərbaycan dili» dərsliyi, IX sinif şagirdləri üçün «Coğrafiya», XI sinif üçün «İnformatika», «Ən yeni tarix», eləcə də «Azərbaycan Respublikasının Konstitusiyası» dərsliklərini yeni müəlliflər hazırlayıb. X-XI siniflər üçün «Biologiya», VIII-IX sinif şagirdləri üçün isə «Azərbaycan dili» dərsliklərinin hazırlanmasına da yeni müəlliflər dəvət edilib. Belə ki, orta məktəb müəllimləri olan bu müəlliflərin prosesə cəlbi dərsliklərdə ara-sıra müşahidə olunan problemlərin aradan qaldırılmasında əhəmiyyətli rol oynayacaq. Nazirlik rəsmisi əlavə edib ki, artıq V-XI sinif şagirdləri üçün bütün dərsliklərin rayon məktəblərinə çatdırılması prosesi yekunlaşmaq üzrədir. Ölkədə dərslik siyasətinin daim dövlətin diqqət mərkəzində olduğunu və bu prosesin tamamilə pulsuz həyata keçirildiyini də deyən şöbə müdiri bu il də təhsil müəssisələrinin dərsliklərlə təminatında heç bir problem olmayacağını vurğulayıb: ”Ölkəmizdə dərslik siyasəti «Ümumi təhsil sistemində dərslik siyasəti» sənədi ilə tənzimlənir. Bu sənədə əsasən, bütün təhsil ocaqları şagirdlərin sayına görə dərs vəsaiti ilə təmin edilir. Yeni dərs ili ərəfəsində daha bir neçə dərslik yenidən hazırlanıb”. Tamamilə yeni olan dərs vəsaitləri isə kurrikulum əsasında ilk dəfə hazırlanan III siniflər üçün 40 adda dərslikləri və müəllimlər üçün vəsaitlərdir. Xaricdəki Azərbaycan məktəbləri və “Bazar günü” məktəbləri üçün də dərslik hazırlanması prosesinin davam etdiyini deyən F.Şahbazlının sözlərinə görə, 7-10 ölkədə fəaliyyət göstərən “Bazar günü” məktəbləri üçün xeyli sayda dərsliyə ehtiyac yaranır. Bu günlərdə Moskvada fəaliyyət göstərən 157 saylı məktəbə kitab göndərən nazirlik ümumilikdə həmin məktəblərin ehtiyaclarını ödəməyə çalışır. Amma hələ ki Gürcüstan və Dağıstanda fəaliyyət göstərən Azərbaycan məktəblərinin dərslik tələbatı müəyyənləşməyib. Bunu öyrənmək niyyətində olan nazirliyin müraciətinə isə hələlik heç bir rəsmi cavab gəlməyib. Ümumiyyətlə, Gürcüstandan ölkəmizə verilən sifarişlərdə azalma müşahidə olunur. Səbəb isə adıçəkilən ölkənin özündə Azərbaycan məktəbləri üçün də dərsliklərin hazırlanmasıdır.

Həqiqət İsabalayeva

Kaspi. -2010. -21-23 avqust. – S.4.