"Məşədi İbad"ın İran səfəri

Azərbaycan Dövlət Musiqili Komediya Teatrının İranda keçiriləcək 27-ci Beynəlxalq Fəcr Festivalına göndərdiyi video materiallar və sənədlər festivalın Təşkilat Komitəsi tərəfindən qəbul edilib.

Bununla da teatr bu mötəbər festivalda iştirak etmək şansı qazanıb. Teatrın mətbuat xidmətindən qəzetimizə verilən məlumata görə, dahi bəstəkar Ü.Hacıbəylinin "Məşədi İbad" operettası ilə festivala qatılacaq teatrın kollektivi yanvar ayının 22-si və 23-ü Tehranın ən böyük teatr-konsert salonu, möhtəşəm Talari Vəhdət Sarayında çıxış edəcək. Tamaşada əsas rolları Əməkdar artist Ramiz Məmmədov (Məşədi İbad), Ramil Qasımov (Sərvər), Nadir Xasıyev (Rüstəm bəy), Nərgiz Kərimova (Gülnaz), Xalq artisti Arif Quliyev (Hambal), Əməkdar artist Elçin Həmidov (Qəzetçi Rza), Əməkdar artist Əkbər Əlizadə (İntiligent Həsən), Səmədzadə Xasiyev (Həsənqulu bəy), Əzizağa Əzizov (Qoçu Əsgər), Novruz Qartal (Məşədi Qəzənfər) ifa edirlər. Xalq artisti Afaq Bəşirqızı isə Sənəm rolunda çıxış edəcək. Kollektiv festivala 45 nəfərlik heyətlə qatılacaq.

Qeyd edək ki, Musiqili Komediya Teatrı İran, İraq, Niderland, Kanada, Polşa, Ukrayna, Gürcüstan, Tacikistan, Almanya, Fransa, Macarıstan, Sudan, Pakistan kimi ölkələrin teatr kollektivlərinin qatıldığı bu festivalda ilk dəfədir ki, iştirak edir. Bu, Musiqili Komediya Teatrının son 20 ildə ilk mötəbər sənət yarışmasıdır.

Təranə

Kaspi. -2010. – 7 yanvar. – S.15.