Azərbaycan mədəniyyəti Parisi fəth etdi

Mehriban Əliyeva: «Azərbaycan qısa bir zamanda çox böyük nailiyyətlər əldə edib. Bu gün Azərbaycan bölgənin ən sürətlə inkişaf edən ölkəsidir»

Azərbaycan mədəniyyətinin təntənəsi ötən həftə dünyanın mədəniyyət paytaxtı olan Parisdə yaşanıb. Prezident İlham Əliyevin Azərbaycanın müstəqilliyini bərpa etməsinin 20-ci ildönümünün qeyd olunması ilə bağlı imzaladığı Sərəncama əsasən təşkil edilən möhtəşəm mərasim Azərbaycan mədəniyyətinin təbliği baxımından mühüm addım olub.

Parisdə respublikamızın müstəqilliyini yenidən bərpa etməsinin 20-ci ildönümünə və “Azərbaycan” kitabının təqdimatına həsr olunmuş təntənəli mərasim Heydər Əliyev Fondunun, ölkəmizin Fransadakı səfirliyinin təşəbbüsü və dəstəyi ilə baş tutub.

Mərasimdə Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva iştirak edib.

Fransanın mədəniyyət naziri Frederik Mitteran Azərbaycanın müstəqilliyinin bərpa edilməsinin 20-ci ildönümü münasibətilə təbriklərini çatdıraraq Fransanın Azərbaycan mədəniyyətinin ən yaxın dostlarından biri olduğunu vurğulayıb.

“Azərbaycanı yaxşı tanıyırıq”

Nazir qeyd edib ki, Heydər Əliyev Fondu Azərbaycan mədəniyyətinin təşviqi sahəsində mühüm işlər görüb və bu sahədə böyük rol oynayıb. “Biz bilirik ki, Azərbaycan muğam və aşıq musiqisi ölkəsidir. Bu baxımdan Azərbaycan mütəmadi olaraq festivallar və musiqi tədbirləri keçirir, bu tədbirlər isə böyük uğurla nəticələnir. Kinorejissor Maqsud İbrahimbəyov indi artıq çox yaxşı tanınır və mən onun soyadını bu cür tələffüz etməklə bildirmək istəyirəm ki, deməli, biz həm də Azərbaycanı yaxşı tanıyırıq. Biz cənab Rüstəm İbrahimbəyovu da tanıyırıq və bu şəxslər gözəl əsərlərin müəllifləridir. Azərbaycan, eyni zamanda, dahi Sabirin, Nəsrəddin Xocanın vətənidir. Bütün bu zəngin mədəni irsdən danışarkən demək istəyirik ki, biz Üzeyir Hacıbəylinin də əsərlərinə yaxşı bələdik. Bu əsərlər həm bizim auditoriya qarşısında səslənib, həm də aşıqların gözəl çıxışlarını fransız yazıçısı Jorj Sand öz əsərlərində təsvir edib. Fransa çox şaddır ki, bu cür mədəni zənginliyə malik olan Azərbaycan bizim ölkədə getdikcə daha yaxşı tanınır. Biz istəyirik ki, Azərbaycanın mədəni irsi burada daha çox təşviq olunsun”.

F.Mitteran Azərbaycanın paytaxtının muğam şəhəri kimi məşhur olduğunu, ölkəmizin xalçaçılıq məktəbinin də getdikcə tanındığını vurğulayıb: “Bu, onu göstərir ki, ölkənizin mədəniyyəti zəngindir. Azərbaycan nəinki bu cür möhtəşəm konsertləri təşkil etməklə fərqlənir, eyni zamanda, ölkəniz Luvr muzeyində aparılan bərpa işlərində də öz rolunu oynayıb və muzey tam bərpa olunduqdan sonra öz qapılarını ictimaiyyətə açıb. Deyə bilərəm ki, bu məsələdə Azərbaycan nümunəvi fəaliyyət göstərib”. Fransalı nazir qeyd edib ki, ölkələrimiz arasında mədəni mübadilə daimi olaraq genişlənir, möhkəmlənir. F.Mitteran Fransa ilə Azərbaycan arasındakı mədəniyyət sahəsində əməkdaşlığın Mehriban Əliyevanın şəxsi iştirakından qaynaqlandığını vurğulayıb. Belə ki, Mehriban Əliyeva Fransa Respublikasının prezidentinin bir il əvvəl qəbil etdiyi rəsmi qərarla Fransanın Fəxri Legionu ordeni ilə təltif edilib. Bu orden ölkənin birinci xanımına Luvr muzeyində aparılan bərpa işlərində göstərdiyi xidmətlərə görə verilib. Eyni zamanda, Mehriban Əliyeva Bakıda fransızdilli məktəbin açılmasında müstəsna rol oynayıb. “Qeyd edim ki, gələn il Azərbaycan “Plezyiğ düfğans” adlı sərgini qəbul edəcəkdir. Bu, elə bir layihədir ki, mən bu layihəyə çox bağlıyam və ona öz dəstəyimi verirəm. Bakıda açılacaq həmin sərginin davamı da olacaqdır. Bu sərgi vasitəsilə biz Fransanın incəsənət nümunələrini Azərbaycanda daha yaxşı tanıda biləcəyik. Beləliklə, Bakı bu prosesə böyük təkan vermiş şəhər olacaqdır. İnanıram ki, biz münasibətlərimizin keyfiyyətindən çıxış edərək bu əməkdaşlığı daha da genişləndirməliyik. Hesab edirəm ki, biz hamımız ölkələrimizin mənafeyi uğrunda prezident İlham Əliyevin qeyd etdiyi və onun atasının çalışdığı kimi işləməliyik. Bu, bir daha onu göstərir ki, Fransa ilə Azərbaycan arasında keyfiyyətli dostluq əlaqələri mövcuddur və biz istəyirik ki, bu irəliləyiş bundan sonra da davam etsin”.

Bölgənin ən sürətlə inkişaf edən ölkəsi

Heydər Əliyev Fondunun prezidenti Mehriban Əliyeva Azərbaycanın müstəqilliyinin bərpa olunmasının 20-ci ildönümünə həsr olunan ilk tədbirin Fransada - dünyanın ən möhtəşəm, ən gözəl və ən zövqlü şəhərlərindən biri olan Parisdə keçirilməsindən qürur duyduğunu bildirib: “Müstəqil ölkə kimi Azərbaycan çox gəncdir. Lakin Odlar yurdu adlanan bu diyarın tarixi kökləri uzaq keçmişə gedib çıxır. Burada - Cənubi Qafqazda, Xəzər dənizinin sahilində ilk dövlətlər hələ eramızdan əvvəl 2-ci, 1-ci minilliklərdə mövcud idi. Ölkəmizin ərazisindən tarixi İpək Yolu keçir. Sivilizasiyaların və mədəniyyətlərin qovuşduğu strateji bir məkanda yerləşən Azərbaycan uğrunda əsrlər boyu mübarizələr aparılıb. Baxmayaraq ki, müxtəlif dövrlərdə Azərbaycan müxtəlif imperiyaların tərkib hissəsi olub, xalqımız öz tarixini, mədəniyyətini, dilini qoruyub saxlayaraq milli mənliyini itirməyib”.

Müstəqillik yolumuzun asan və hamar olmadığını xatırladan Mehriban Əliyeva bu yolda itkilərimiz, ağrılarımız, acılarımızın da kifayət qədər olduğunu diqqətə çatdırıb: “Bütün bu illər Azərbaycan xalqı müstəqillik arzusu ilə yaşayırdı. Nəhayət, 1991-ci ildə Azərbaycan xalqı öz taleyinin, öz torpağının, öz ölkəsinin sahibinə çevrildi. Şübhəsiz ki, tarixi baxımdan 20 il o qədər də böyük dövr deyildir. Lakin biz ötən illərə nəzər salsaq aydın olur ki, Azərbaycan qısa bir zamanda çox böyük nailiyyətlər əldə edib. Bu gün Azərbaycan bölgənin ən sürətlə inkişaf edən ölkəsidir”.

Azərbaycan iqtisadiyyatının sürətlə inkişaf etdiyini, ölkədə sosial yönümlü layihələrin uğurla həyata keçirildiyini, ölkəmizdə neft və qaz kəmərlərinin, qeyri-neft sektorunun yüksəlişini, yeni iri infrastruktur layihələrin inkişafımızı təmin etdiyini diqqətə çatdiran Mehriban Əliyeva bildirib ki, paytaxtımızın və başqa şəhərlərimizin yeni siması, ultramodern binalar, yollar, körpülər, bərpa olunan və yeni tikilən muzey və salınan parklar inkişafımızın sübutudur.

Varlığımız - mədəni irsimiz

Mehriban xanım mərasim iştirakçılarının diqqətinə çatdırıb ki, bizim əsas varlığımız mədəni irsimizdir, Azərbaycanın qədim xalçaçılıq məktəbi, nadir miniatürləri, ədəbiyyatı və poeziyası, musiqisi, rəqsləri, təsviri sənəti, memarlıq abidələridir. Mehriban xanım vurğulayıb ki, bütün bu nailiyyətləri ölkəmiz Dağlıq Qarabağ münaqişəsi kimi uzun sürən və hələ də həllini tapmamış problemin mövcudluğu şəraitində əldə edib: “Biz əminik ki, gün gələcək və Azərbaycanın ərazi bütövlüyü bərpa olunacaq, hər bir məcburi köçkün, hər bir qaçqın öz doğma torpağına qayıdacaqdır. Bizim hər bir nailiyyətimizin arxasında Azərbaycan vətəndaşının zəkası, biliyi, bacarığı, istedadı və əməyi durur. Azərbaycan gələcəyə istiqamətlənən dövlətdir. Biz böyük yolun əvvəlindəyik. Müstəqil və dünyəvi dövlət olaraq, tariximizə və köklərimizə sadiq olaraq, mədəniyyətimizi və ənənələrimizi qoruyaraq biz ümumdünya dəyərlərinə, azadlıq, demokratiya, aşkarlıq, dünya birliyinə inteqrasiya yolunu seçmişik”.

Milli musiqimiz, xalçalarımız, mətbəximiz...

Mərasim Azərbaycan musiqiçilərinin konsert proqramı ilə davam edib. Milli musiqimizin ən gözəl nümunələri auditoriyanı heyrətə salıb. Xalq artisti Teymur Göyçayevin dirijorluğu ilə Qara Qarayev adına Azərbaycan Dövlət kamera orkestrinin ifasında Üzeyir Hacıbəylinin “Koroğlu” operasının uvertürası, Şirzad Fətəliyevin balabanda orkestrin müşayiətilə ifa etdiyi “Sən gəlməz oldun” mahnısı, Üzeyir bəyin “Arşın mal alan” musiqili komediyasına yazdığı uvertüra, Fikrət Əmirovun bəstələdiyi əvəzsiz sənət əsərləri Azərbaycan musiqisinin nə qədər zəngin olduğunu tədbir iştirakçılarına bir daha sübut edib. Dahi bəstəkar Qara Qarayevin bəstələdiyi rəqs və İsfar Sarabskinin ifa etdiyi “Novruz” caz kompozisiyası, xanəndə Mirpaşa Şükürovun ifasında “Qarabağ şikəstəsi” də mərasimə xüsusi əhval-ruhiyyə bəxş edib.

Maraqlı və rəngarəng konsert proqramı Azərbaycan mədəniyyətinin nadir incilərinin sorağının mötəbər mərasimlərdən gəldiyini, mədəniyyətimizin inkişafına dövlət səviyyəsində qayğının, Heydər Əliyev Fondunun Azərbaycan mədəniyyətinin təbliğində oynadığı əvəzolunmaz rolu bir daha təsdiq edib.

Mərasim iştirakçıları “Vals”ı, Niyazinin “Arzu”su, “Küçələrə su səpmişəm” məşhur xalq mahnısı, Natiq Şirinovun “Azərbaycan ritmləri” mərasimə sirli bir ovqat bəxş edib. Gecənin yekununda Fikrət Əmirovun dünyada məşhur “Min bir gecə” baletindən bir parça Fransa tamaşaçılarında ölkəmizə, onun zəngin musiqisinə böyük maraq oyadıb.

Mərasim iştirakçıları Azərbaycan sərgisinə də maraqla baxıblar. Sərginin ən əhəmiyyətli məqamı burada Qarabağ xalılarının nümayiş etdirilməsi olub. Ölkəmizin ayrılmaz parçası olan Qarabağda toxunan xalılar öz gözəlliyi, rəng çaları, ornamentlərin quruluşu ilə tamaşaçıları heyran edib. Bu mədəniyyət nümunələri Qarabağın əzəli Azərbaycan torpağı olduğunu bir daha təsdiqləyib. Xalçalarımıza olan maraq təsdiqləyib ki, dünya mədəniyyətinin inkişafına yetərincə təsir edən Azərbaycan xalçaları tarix boyu öz gözəlliyi ilə bütün dünyanı heyran qoyub. Belə ki, indi Azərbaycan xalıları dünyanın ən məşhur saraylarını, muzeylərini bəzəyir. Sərgidə qədim misgərlik məmulatları da maraqla nümayiş olunub. Qədim el sənətinə verilən dəyər Avropa tamaşaçılarını heyrətə gətirib.

Sərgi çərçivəsində “Azərbaycan” kitabının fransız dilində nəşr olunan versiyasının təqdimatı da keçirilib. Qeyd edək ki, Heydər Əliyev Fondunun ən mühüm layihələrindən olan “Azərbaycan” nəşrinin doğma dilimizdə olan versiyası ötən ilin əvvəlində Bakıda prezident İlham Əliyevin və Azərbaycanın birinci xanımı Mehriban Əliyevanın iştirakı ilə təqdim olunub.

Ölkəmizin tarixi, mədəniyyəti, təbiəti, insan qaynaqları, bölgələrimiz haqqında oxucuda kifayət qədər dolğun təəssürat yaradan nəşrdə Azərbaycan, onun Şərq və Qərb koloritlərinin cəmləndiyi paytaxtı tərənnüm edilib.

Qonaqlara həmçinin Azərbaycan milli mətbəxinin nümunələri təqdim olunub.

Azərbaycan mədəniyyətinin Parisdə nümayişi əsl hadisə kimi yadda qalıb.

Təranə Məhərrəmova

Kaspi.- 2011.- 22 fevral.- S. 9.