Beynəlxalq aləm Azərbaycandakı antikorrupsiya tədbirlərini dəstəkləyir

Beynəlxalq təşkilatlar hökumətin son addımlarını alqışlayırlar

Azərbaycan hökuməti antikorrupsiya tədbirlərini daha da genişləndirməkdədir. Hər keçən gün bu prosesin yeni elementləri açıqlanır. İşində qüsurlara yol verən dövlət məmurlarının cəzalandırılması ilə yanaşı, korrupsiya yaradan amillərin aradan qaldırılması üçün də iş aparılır. Məsələn, yaxın günlərdə ölkə qanunvericiliyinə korrupsiyaya qarşı mübarizə tədbirləri çərçivəsində dəyişikliklər ediləcək. Belə ki, ölkə prezidenti tərəfindən antikorrupsiya tədbirləri çərçivəsində qanunlara edilən əlavə və dəyişikliklər bağlı qanun layihəsi artıq parlamentə təqdim edilib. Gözlənilən dəyişikliklər dövlət və inzibati orqanların fəaliyyətində şəffaflığa xidmət edəcək, pozuntu hallarının qarşısının alınmasına yönələcək. Azərbaycanda korrupsiya qarşı mübarizə tədbirləri beynəlxalq təşkilatlar tərəfindən də dəstəklənməkdədir. Son günlər müxtəlif beynəlxalq təşkilatların təmsilçiləri hökumətin addımlarını təqdir edən açıqlamalar verməkdədirlər.

Məsələn, daim Azərbaycandakı prosesləri diqqətlə izləyən ATƏT artıq hökumətin antikorrupsiya tədbirlərinə dəstəyini ifadə edib. ATƏT-in Bakı Ofisinin rəhbəri Əli Bilgə Cankorel təmsil etdiyi təşkilatın son vaxtlar Azərbaycanda vüsət alan antikorrupsiya tədbirlərini diqqətlə izlədiyini bildirib. Onun sözlərinə görə, Azərbaycanda korrupsiyaya qarşı mübarizənin yeni bir mərhələsinin başlaması sevindiricidir. Bu tədbirlər beynəlxalq ictimaiyyət tərəfindən də diqqət mərkəzində saxlanılır. Səfir həyata keçirilən tədbirlər barədə beynəlxalq ictimaiyyətin də məlumatlandırılacağına ümidvar olduğunu bildirib. «Ümidvaram ki, bu tədbirlər davamlı olacaq» - deyə Ə.B.Cankorel vurğulayıb. ATƏT-in Bakı ofisinin rəhbəri təmsil etdiyi təşkilatın korrupsiyaya qarşı mübarizənin tərkib hissəsi olan çirkli pulların yuyulmasına qarşı mübarizənin də Azərbaycanda yüksək səviyyədə qurulmasından razılığını ifadə edib. Onun sözlərinə görə, ATƏT-in Bakı ofisi Azərbaycanda bu işi həyata keçirən Maliyyə Monitorinqi Xidməti ilə yaxından əməkdaşlıq edir. Bu əməkdaşlıq çərçivəsində xidmətin praktiki və tənzimləyici funksiyalarının reallaşdırılmasına texniki yardım göstərilir.

Avropa Şurasının Korrupsiyaya qarşı Dövlətlər Qrupu (GRECO) da Azərbaycanın korrupsiyaya qarşı mübarizə tədbirlərini dəstəkləməkdədir. Təşkilatın icraçı katibi Volfqanq Rau bildirib ki, Azərbaycanda korrupsiya ilə mübarizə sahəsindəki yeni təşəbbüsləri müsbət qiymətləndirir. O, təmsil etdiyi qurumun bu səyləri yalnız alqışladığını bildirib: “Korrupsiya ilə mübarizəyə yönəlmiş istənilən təşəbbüsü biz yalnız alqışlaya bilərik. GRECO öz hesabatlarında dəfələrlə Azərbaycanın “Şəffaflığın artırılması və korrupsiyaya qarşı mübarizə” üzrə Milli Strategiyanın (2007-2011-ci illər) qəbul olunmasını müsbət qiymətləndirib və qurumun verdiyi tövsiyələrə uyğun olaraq, həyata keçirilmiş bəzi konkret irəliləyişlərdən məmnunluğunu bildirib. Bu, əsasən korrupsiya hallarını araşdıran hökumət nümayəndələrinin iş metodlarının və vasitələri, korrupsiyanın qarşısının alınması sahəsində dövlət qulluqçularının hüquq və vəzifələrini, o cümlədən 2007-ci ilin may ayında qəbul edilən vəzifəli şəxslərin etik qaydalarını nəzərdə tutan xüsusi normativ əsaslar və çirkli pulların yuyulmasına qarşı mübarizənin mexanizmləri kimi vacib məsələlərdir. Eyni zamanda, GRECO-nun tərtib etdiyi bir sıra tövsiyələri ilə bağlı bəzi dəyişikliklərin edilməsi hələ də vacib olaraq qalmaqdadır”.

ABŞ-ın Azərbaycana təyin olunmuş yeni səfiri Metyu Brayza da antikorrupsiya tədbirlərini dəstəklədiklərini bildirib. O, jurnalistlər üçün keçirdiyi qəbulda bu məsələyə münasibət bildirərək deyib ki, ABŞ Azərbaycanda gedən antikorrupsiya tədbirlərini alqışlayır: “Biz bu təşəbbüsün daha da davam etdirilməsi və dərinləşdirilməsində öz dəstəyimizi göstərməyə hazırıq. Bu, bizim ümidimizi əks etdirəcək ki, Azərbaycan artıq nativ ölkə olaraq özünü büruzə verməkdədir. Bu, çox müsbət bir nativdir”.

Avropa Şurasının MONEYVAL Komitəsinin icraçı katibi Con Ringgut təmsil etdiyi təşkilatın Azərbaycanın çirkli pulların yuyulmasına qarşı mübarizə tədbirlərini yaxından izlədiyini bildirib. «Doğurdan da Azərbaycan bu sahədə çox böyük uğurlara nail olub» - deyə icraçı katib vurğulayıb.

İlham QULİYEV

Kaspi.- 2011.- 19-21 fevral.- S. 5.