“Heç vaxt Azərbaycanda doğulduğumu unutmuram”

Paul Murad yaxın gələcəkdə gözəl bir azərbaycanlı qızı ilə evlənmək istəyir

İlk baxışdan onun biznes və siyasət üçün təkrarsız keyfiyyətlərə malik olmasını hiss etmək mümkündür. Amerika mətbuatında onun haqda yazılan yazılarda da “Paul Murad bir neçə işin öhdəsindən məharətlə gəlir” fikirlərinə rast gəlinir. O, Las-Veqasda daşınmaz əmlak biznesində ekspertdir, biznes konfranslarında natiq kimi çıxış edir və artıq bestsellərə çevrilən “Las-Veqasın Manhettenləşməsi” adlı kitabın müəllifidir. Paul Murad həmçinin xeyriyyəçiliklə məşğuldur, kino və əyləncə biznesi ilə geniş əlaqələri var. Dünya Azərbaycanlılarının 3-cü qurultayında ilk dəfə iştirak edən həmyerlimiz “Kaspi”yə müsahibəsində Bakıya gəlişindən qürur duyduğunu söyləyib:

Güclü qüvvə

- Dünya Azərbaycanlılarının 3-cü qurultayından hansı təəssüratlarla ayrıldınız?

- Qurultaya dəvət alanda təklifi böyük fərəhlə qəbul etdim. Amerikadan gələn diaspor nümayəndələrinin tərkibində olmağımdan qürur duyuram. Qurultayda dünyanın hər yerindən azərbaycanlılar iştirak edirdi. Yaşadığım ABŞ-ın Nevada ştatının Las-Veqas şəhərində barmaqla sayılası qədər azərbaycanlı var. Amma biz özümüzü çox güclü qüvvə hesab edirik. ABŞ-da Azərbaycan diasporunun liderlərindən biri Amerika-Azərbaycan cəmiyyətinin prezidenti Tomris Azəri, Amerika-Azərbaycan Şurasının baş direktoru Cavid Hüseynov və USAN təşkilatının həmtəsisçisi və icraçı direktoru Adil Bağırov Azərbaycan diasporunun fəaliyyətini durmadan genişləndirirlər. Bu təşkilatlar Amerikanın bir çox ştatlarında fəaliyyət göstərərək müxtəlif layihələr həyata keçirirlər. Mən ABŞ-ın Nevada ştatında aktiv fəaliyyətlə məşğul olmaqla yanaşı, daim orada yaşayan azərbaycanlı icması ilə də sıx əlaqə saxlayıram. Amerikanın ictimai, siyasi və biznes dairələrindəki geniş əlaqələrimdən istifadə edərək Azərbaycanla bağlı təbliğat aparıram. Biz həmçinin türk diaspor təşkilatı ilə birgə işləyirik. Birlikdə işləmək bizim gücümüzü qüvvətləndirir.

- Amerikada yaşayan azərbaycanlılar ümumiyyətlə, ölkənin siyasi hadisələrində rol oynayırlarmı?

- Bu proses təzəcə başlayır. Mən siyasi fəaliyyətimdə Nyu-York, Kaliforniya, Texas, Hyustonda və başqa şəhərlərdə yaşayan azərbaycanlılardan dəstək alıram. Onlar mənim elektron ünvanıma məktublar göndərir, hətta, maliyyə dəstəyi göstərirlər. ABŞ-da siyasi fəaliyyət üçün maliyyə dəstəyi olmalıdır. Mən sistemin belə olduğuna görə narazıyam. Maliyyə ABŞ-ın siyasətinə çox təsir edir. Seçkilərdə çox şey puldan asılıdır. Bu işdə mənə orada yaşayan azərbaycanlılar kömək etdilər və düşünürəm ki, Azərbaycan diasporunu təmsil edən hər bir namizədə kömək edəcəklər. Qurultayda prezident İlham Əliyev də qeyd etdi ki, biz nə qədər yaxın olsaq, bir o qədər güclü olacağıq. Mən onun bu sitatını həmişə yadımda saxlayaraq düşünürəm ki, nəinki ölkədə, hətta, dünyanın hər yerində yaxın olmaq, birləşmək və siyasi məsələlərdə də bir-birinə dəstək olmaq lazımdır. Biz bir-birimizə dəstək olmaqla öz təşkilatımızın fəaliyyətini genişləndirə və tarixi vətənimizə daha layiqli xidmət göstərməli olarıq.

- ABŞ-da Qarabağ münaqişəsi haqqında nə qədər məlumatlıdırlar?

- Amerikalılar bu barədə çox az bilirlər. Onlar daha çox özlərinə aid olan münaqişələr, məsələn Əfqanıstan, İraq münaqişələri haqqında bilirlər. Düzdür, onların Azərbaycanın diaspor təşkilatlarının fəaliyyətlərindən Azərbaycan haqqında məlumatları var. Biz Amerika Konqresinin və Senatının təmsilçilərini mövcud vəziyyətlə tanış edir və onların diqqətini bu məsələnin həllinə yönəltməyə çalışırıq.

- Dünyanın ayrı-ayrı ölkələrində fəaliyyət göstərən Azərbaycanın diaspor təşkilatlarının bir-biri ilə əlaqələri necədir?

- Təkcə onu bilirəm ki, Amerikanın daxilində münasibətlər sıxdır. Başqa ölkələrin diaspor təşkilatları ilə əlaqəm yoxdur. Ancaq eşitmişəm ki, orada da təşkilatlar Azərbaycan naminə yaxşı işlər görürlər. Sadəcə, ya internet, ya qurultaydakı görüşlər, ayrı-ayrı ölkələrdə keçirilən konqreslər zamanı yaxınlaşmaq lazımdır. Heç olmasa ildə bir dəfə belə görüşlər keçirməyə ehtiyac var. Mən də bu işə hər cür kömək göstərməyə hazıram.

Uğurlu iş adamı

- Siz 5 yaşına qədər Bakıda yaşamısınız. Uşaqlıq yaddaşınızda qalan Bakı çoxmu dəyişib?

- Sonuncu dəfə 2008-ci ilin oktyabrında Bakıda olmuşam. Qurultayın keçirildiyi Heydər Əliyev Sarayını yaxşı xatırlayıram. Uşaq vaxtı o binanın yanında o qədər piyada gəzmişəm... Binanın qarşısındakı fəvvarələrin yanında oynamağım da yadımdadır. Hətta orada fotolarım da var. Sarayın binası təzədən restovrasiya olunub, qarşısındakı meydan da çox dəyişib. İstər-istəməz o binanı görəndə ürəyimdə nostalji hisslər yarandı. Uşaqlıqda gəzdiyim yerlərə təzədən qayıtmağıma sevindim. Şəhərdə həmçinin çoxlu təzə binalar var, tikintilər davam edir. İqtisadi böhran başlayanda hətta ABŞ-ın özündə də bir çox tikintilər tamamilə dayanıb. Amma Bakıda nəinki tikintilər dayanıb, hətta, qızğın iş gedir. Əgər 10-20 il əvvəl Amerikada gedən tərəqqidən danışılırdısa, indi Azərbaycandakı tərəqqidən danışmaq lazımdır.

- İnternet səhifələrindən oxumuşam ki, siz Bakıda iş qurmaq istəyirsiniz.

- Mən həmişə Bakıya dönüb baxanda burada biznes, yoxsa başqa bir növ fəaliyyətlə məşğul olmaq barədə düşünürəm. 2008-ci ildə bu barədə düşünürdüm və görürəm ki, burada çoxlu imkanlar və potensial var. Açıq gözlə ətrafıma baxaraq, faydalı və gəlirli imkanlar üçün fikirləşirəm. 20 ildir ki, Amerikada yaşayıram. Sovet İttifaqı dağılandan sonra oraya getmişəm. İnstitutu bitirib beynəlxalq biznes üzrə təhsil aldım. Universitetdə təhsil illərimdə həmçinin bir semestr Honq-Konqda, həmçinin İspaniyada oxudum. Dünyanı daha yaxşı öyrənmək üçün başqa dilləri öyrənirdim. Rus, ingilis və ispan dillərini bilirəm. İspan dilində danışmağım isə mənim Nevada ştatının ümumi əhalisinin 30%-i təşkil edən latın amerikalıların icması ilə təmaslarım üçün vacibdir. Maliyyə üzrə təhsilimi bitirdikdən sonra Cənubi Amerikada, Asiyada beynəlxalq korporasiyalarda işlədim. Qismət olsa burada da iş qurmaq istəyirəm.

- Necə fikirləşirsiniz, siz uğurlu biznesmensiniz?

- Əlbəttə, mən Amerikada uğurlu iş adamıyam. Mən hər şeyi sıfırdan başlamışam. 16 yaşımda iki çamadanla, valideynlərim yanımda olmadan Amerikaya getmişəm. Cibimdə bir neçə yüz dollar vardı. Ətrafda heç kəsi tanımırdım. Yeni ölkə, yeni dil, yeni insanlar... Əlbəttə, başlanğıc üçün çox çətin idi. Amma mənim Amerika arzularım vardı. Həyat təcrübəsi olmadan tanımadığım insanların içərisində işləmək asan deyildi. Öz taleyimə, təhsilimə özüm cavabdeh idim. Əlbəttə, ailəm, qohumlar, dostlar, amerikalılar mənə köməklik göstərdilər. Xüsusi məktəbdə, universitetdə oxudum. O vaxtdan işləyirəm. Dünyanın bir sıra ölkələrində də işləməklə yaxşı təcrübə toplamışam. Bir sıra mükafatlarım, təltiflərim var. 2006-cı ildə Las-Veqasda dərc olunan biznes jurnalı məni 40 yaşına çatmamış aparıcı iş adamlarının siyahısına salıb. Bu dəyərləndirmədən şərəf duyuram. Həmin şəhərdə biznes fəaliyyətim siyasi və ictimai fəaliyyətimlə yanaşıdır. Keçən ilin sonlarında Nevada ştatının qubernatoru məni dövlət komitəsinin daşınmaz əmlak məsələləri üzrə üzvü təyin edib. Mən həmin komitədə ən cavan adamam. O komitədə həm də Azərbaycanı təmsil edirəm. Heç vaxt Azərbaycanda doğulduğumu unutmuram. Ulu öndər Heydər Əliyevin «Mən həmişə fəxr etmişəm ki, azərbaycanlıyam» fikirlərini özüm üçün sitata çevirmişəm.

- Siz həmçinin Nevada ştatının vitse-qubernatoru seçilmək istəmisiniz.

- İki il bundan əvvəl Nevada ştatının vitse-qubernatoru seçilmək istədim. Onu da qeyd edim ki, mən Nevada ştatı tarixində dövlət səviyyəli vəzifəyə namizədliyini irəli sürən ilk immiqrant, Amerika tarixində isə bu qismdə olan ilk azərbaycanlıyam. 9 ay ərzində çox güclü seçki kampaniyam keçdi. Amerikada yaşayan azərbaycanlıların USAN təşkilatı, “Azerbaijani American Council və Turkish Council” kimi təşkilatlar və digər icmalar mənə dəstək verdilər. Güclü rəqibim vardı. Ancaq seçkinin son gününə qədər nə siyasi jurnalistlər, nə də ekspertlər kimin seçiləcəyini sona qədər bilmirdi. Çox təəssüf ki, mən seçkilərdə uduzdum. Ancaq uduzsam da bütün ştatdan çoxlu səs toplaya bildim. Ola bilsin ki, növbəti seçkidə iştirak edim.

Amerika arzusu

- Haqqınızda oxumuşam ki, siz bir neçə humanitar layihələr həyata keçirmisiniz. Xeyriyyəçilik layihələrinizin istiqaməti nədir?

- Mən 16 yaşında Amerikaya gələndə amerikalılardan kömək gördüm. Onlar mənə orta məktəbdə təhsilimə, universitetdə və sonra da kömək etdilər. İndisə bunları qaytarmaq istəyirəm.

Yaşadığım imkansızlıqlar seçki kampaniyası apardığım vaxt sadə insanların problemlərini daha yaxşı başa düşməyə kömək etdi. Əslində mən buna üstünlük kimi baxıram. Mən indi o adamlara kömək etmək istəyirəm ki, onların buna ehtiyacı var. Hələ 16 yaşımda müxtəlif sosial, dünyada dostluğun inkişafına kömək və s. təşkilatlarda iştirak etmişəm. Nevada ştatında elə təşkilatlar var ki, orada yalnız yaşlı adamlar xeyriyyə məqsədi ilə çalışırlar. Mən ətrafıma baxaraq “bəs gənclər hardadır?”- deyə düşündüm və iki il bundan əvvəl Gənc Xeyriyyəçilər Cəmiyyətini yaratdım. Bu şirkət könüllü fəaliyyət göstərməklə 20-30 yaş arası gəncləri öz icmalarına dəstək verməyə çağırır. Artıq 2 ildir ki, bu təşkilat işini uğurla davam etdirir. Hazırda bu təşkilatın rəhbərliyini başqa adamlara vermişəm. Mən həmçinin, Las Veqasda yerləşən “Opportunity Village” xeyriyyə qrupunun direktorlar şurasına daxiləm. Bu təşkilat da fiziki qüsurları olan uşaqlara yardım göstərməklə məşğuldur. Bundan başqa bir sıra ictimai və siyasi təşkilatlarla da sıx əməkdaşlıq edirəm.

Məqsədim təkcə özümçün uğurlu olmaq yox, həm də başqalarına kömək etməkdir. Amerika və Nevada mənə bu arzumu gerçəkləşdirmək imkanı verib.

- Özünüzü Bakıda qonaq kimi hiss edirsiniz?

- Görün neçə ildir ki, Bakıdan ayrılmışam. İndi yalnız qonaq kimi gəlirəm. Hər dəfə gələndə də burda insanların böyük qonaqpərvərliyinin şahidi oluram. Azərbaycan bütün dünyada öz qonaqpərvərliyinə görə məşhurdur. Mən 5 yaşına qədər Azərbaycan dilində sərbəst danışmışam. Sonra isə rus dilində oxumuşam. 20 ildir ki, ingilis dilində yazır, oxuyur və düşünürəm. Ancaq Azərbaycan dilində sərbəst danışmaq, müsahibə vermək mənim arzumdur. Əgər Ələddinin sehrli çırağı əlimdə olsaydı, ondan ilk növbədə bunu istəyərdim.

- Bəs o biri arzularınız nədir?

- İkinci arzum - yaxın gələcəkdə gözəl bir azərbaycanlı qızı ilə evlənmək istəyərdim. Üçüncü arzum isə bütün azərbaycanlılar xoşbəxt və rahat yaşasınlar. Əlbəttə, arzularım çoxdur, ancaq bunlar ani olaraq ağlıma gəldi.

- Bakıda nə qədər qalmağı planlaşdırırsınız?

- İyulun 12-də doğum günümdür. Əlimə fürsət düşmüşkən ad günümü Bakıda - tarixi vətənimdə, qohumlarımın və dostlarımın əhatəsində qeyd etmək istəyirəm. Bu, mənim doğum günümə ən böyük hədiyyəm olacaq. İyulun 14-də isə Amerikaya gedəcəyəm. Qarşıda hələ böyük işlər var.

Təranə MƏHƏRRƏMOVA

Kaspi.-2011.-12 iyul.- S.8.