Belə Nigar heç zaman olmayacaq…

Eldar və Nigar komplekslərindən və toylardan danışdılar

"Eurovision-2011"in qalibləri Eldar Qasımovla Nigar Camalın Day.Az saytına müsahibəsi.

- Eldar, Nigar, gününüz necə keçir?

Nigar: Hər gün müəyyən işlər, öhdəliklər, səfərlər var. Çamadan hər zaman hazırdır (gülür). Səhər tezdən oyanıram. Gün səhər saat 7-də başlayır: səhər yeməyi, görüşlərə hazırlıq… Gecə saat 12-də yatmağa çalışıram. Düzdür, səfərlərlə əlaqədar olaraq, bu, heç də həmişə alınmır. Amma artıq vərdiş etmişəm.

Eldar: Bəli, Nigarın söylədiyi kimi, hər gün görüşlər var və bu, çox maraqlıdır. Daim işləyir, fəal iş rejimində oluram. Robot deyilik və təbii olaraq yoruluruq. Amma bu, xoş yorğunluqdur. Sevimli işinlə məşğul olmağa getdiyini düşündükdə, bütün yorğunluq keçir.

- Uşaq vaxtı nədən qorxurduz?

Nigar: Mən əsasən qaranlıqdan qorxmuşam. 20 yaşım olarkən də qaranlıqdan qorxurdum və otaqda işıq yandırılmadan yataqdan qalxa bilmirdim (gülür). Maraqlıdır ki, qızlarım qaranlıqdan qətiyyən qorxmurlar. Onlar cəsarətlidirlər. Mən sudan da çox qorxurdum. Dənizi sevirdim. Amma üzə bilmədiyim üçün dalğalardan qorxurdum. İndisə peşəkar üzgüçü olmasam da, yaxşı üzürəm (gülür).

Eldar: Sözün düzü, mən elə indi də tənhalıqdan çox qorxuram. Uşaqlıqda isə hörümçəkdən qorxmuşam. Ondan iyrəndiyimi deyə bilmərəm. Bu, məhz qorxmaq idi. Bir dəfə qorxu ilə mübarizə aparmaq qərarına gəldim və hörümçəyi götürərək əlimin üstünə qoydum. İndi daha sakitəm.

- Demək olar ki, hər gün konsertdə, tədbirlərdə, çəkilişlərdəsiz. Geyim seçimində sizə kömək edirlər, yoxsa hər şeyi öz zövqünüzlə edirsiz?

Nigar: Yox, mən özüm seçirəm. Əlbəttə ki, "Eurovision"dakı çıxış zamanı xüsusi stilist və modelyerimiz var idi. Amma qalan vaxtlarda bunu özüm edirəm.

Eldar: Mən də nə geyəcəyimi özüm müəyyənləşdirirəm.

- Nədən daha çox razısız - səhnədəki görünüşünüzdən, yoxsa ifanızdan?

Nigar: Mən özümə çox tənqidi yanaşıram. Görünüşümdən və ifamdan həmişə razı qaldığımı söyləyə bilmərəm. Çıxışıma baxdıqda, həmişə özümdə nöqsan tapıram. Daim öz üzərimizdə işləyirik. Peşəkar olmaq üçün bu, çox vacibdir.

Eldar: Məndə də tam eyni vəziyyətdir. Artist gərək özündə həm yaradıcılığı, həm xarici görünüşü, həm də danışıq qabiliyyətini birləşdirsin. Yəni bunlar kompleks olmalıdır. Məsələn, xarici görünüşü xoş olmayan şəxsin dahi müğənni olması mümkün deyil. Bu, insanları itələyir. Odur ki, hər şeyə fikir verməyə çalışırıq. Allaha şükür ki, hələlik alınır.

- Azərbaycanı "Eurovision-2012"də təmsil etmək istərdinizmi?

Nigar: Belə təklif olarsa, əlbəttə ki, imtina etmərik. Həmin həyəcanı, hissləri təkrar yaşamaq əla olar. Amma əlbəttə ki, heç kim qələbəyə zəmanət verə bilməz.

Eldar: Yenə də Nigarla həmfikirəm. Yaşananları bir daha yaşamağı çox istərdik. Amma bunun baş verəcəyini düşünmürəm.

- Xarici ifaçılardan kiminlə duet oxumaq istərdiniz?

Eldar: Çoxları ilə. Selin Dion və Ledi Qaqa ilə dueti isə daha çox istərdim.

Nigar: Mən də çoxları ilə… Amma daha çox Cennifer Lopez və Rianna ilə.

- Eldar, sizin yeni Nigarınız peyda ola bilərmi?

Eldar: Yox! Bu Nigar əvəzolunmazdır. Ola bilsin ki, Elmira, Sədaqət, Reyhan, Leyla peyda olsun. Amma belə Nigar heç zaman olmayacaq… Ümid edirəm.

Nigar: …(gülür).

- Fikrinizcə, "Eurovision" qaliblərinin əksəriyyətinin populyarlığı niyə 1 il çəkir?

Eldar: Yəqin ki, bu, ifaçının özündən və əhatəsindəki insanlardan asılıdır. Onlar müğənniyə kömək edə bilər, yaxud əksinə. Amma əsas ifaçının özüdür. Bəxt, uğur, tale də az rol oynamır.

Nigar: Məsələn, "ABBA"nı götürək. Onlar müsabiqədən sonra da populyarlıqlarını saxladılar. Selin Dion və digərləri haqda da bu fikri söyləmək olar. Biz də əlbəttə ki, öz üzərimizdə işləyəcək və populyarlığımızı qoruyub saxlamağa çalışacağıq.

- Kompleksləriniz varmı?

Nigar: Keyfiyyətsizliklərimiz? (gülür). Qırışların yaranacağı ilə bağlı qorxu var. Amma mən həyata adi yanaşmağa, onu olduğu kimi qəbul etməyə öyrəşmişəm. Əsas sağlamlıqla bağlı hər şeyin qaydada olması, doğmaların sağlam olması, səni olduğun kimi qəbul etməsidir.

Eldar: Məncə, kompleksi olmayan insan yoxdur. Kimin kompleksi yoxdursa, o, xəstədir. Mənim çox kompleksim var. Məsələn, şəkillərdə yaxşı düşmürəm və bunu xoşlamıram. Gülərkən gözlərimi çox qıyıram və bundan da xoşum gəlmir. Qırışlardan isə qorxmuram (gülür).

- Aparıcı qismində toya dəvət almısınızmı?

Nigar: Məndən tamada çıxmaz (gülür). Açığı, bu haqda düşünməmişəm. Bilmirəm. Mən şokdayam (gülür).

Eldar: Yaxınlarımın və dostlarımın toyunu məmnuniyyətlə idarə edərəm. Amma repertuarla bağlı problem çıxardı. Ümumiyyətlə, ziyafətlərdə çıxış etməyi çox istərdim.

- Azərbaycanca başa düşür və yaxşı danışırsınız. Türkiyədə qatıldığınız şou-proqramda tərcüməçi nəyinizə gərək idi?

Eldar: Onu verilişin aparıcısı Bəyaz tərcüməçi kimi təqdim etdi.

Nigar: Biz tərcüməçiyə heç bir ehtiyac duymurduq. O, sadəcə verilişə «Best Model of Azerbaijan -2011» müsabiqəsinin qalibi kimi dəvət almışdı. Niyəsə onu tərcüməçi kimi təqdim etdilər.

- Və son olaraq, müxtəlif ölkələrdə, müxtəlif səhnələrdə çıxışlar etmisiniz. Publikada fərq hiss edirsinizmi?

Nigar: Burada çıxış edərkən doğma evindəsən, daha isti və təbii qarşılanırsan. Bunu Türkiyə tamaşaçıları haqda da demək olar. Bizi orada da Bakıda olduğu kimi, sevgi ilə qarşılayırlar. Eldar: Bilirsiniz, bəziləri bizi məhz qalib olduğumuz üçün sevmir. Necə oldu ki, bu kiçik Cənubi Qafqaz ölkəsi qalib gəldi?! Odur ki, bəzi ölkələrdən qərəz gözləmək olar. Məsələn, Rusiyada bəziləri bizi sevsə də, digərləri görmək belə istəmir. Çünki biz 1-ci, onlar isə 16-cı yeri tutub. Yenə də bizi sevən və dəstəkləyən hər kəsə təşəkkür. Bizi sevməyənlərə isə birinciliyə layiq olduğumuzu sübut edəcəyik.

Kaspi.- 2011.- 19 iyul.- S 16.