“Gözləntilərimiz böyükdür”

Şahin İsmayılov «Azərbaycan gəncliyi 2011-2015-ci illərdə» Dövlət Proqramının real nəticələrinin qısa müddətdə hiss olunacağına inanır

Məlum olduğu kimi, prezident İlham Əliyev «Azərbaycan gəncliyi 2011-2015-ci illərdə» Dövlət Proqramının təsdiq edilməsi haqqında sərəncam imzalayıb. Dövlət Proqramı üzrə həyata keçiriləcək tədbirlərin icrasını Gənclər və İdman Nazirliyi əlaqələndirəcək. Həmin məqsədlə Gənclər və İdman Nazirliyi tərəfindən aidiyyəti dövlət orqanlarının və ictimai təşkilatların nümayəndələri cəlb Əlaqələndirmə Şurası yaradılacaq. Gənclər və İdman Nazirliyi Dövlət Proqramının həyata keçirilməsinə aidiyyəti beynəlxalq və qeyri-hökumət təşkilatlarının, elmi tədqiqat müəssisələrinin və yaradıcılıq ittifaqlarının cəlb olunmasını təmin etməlidir.

Dövlət Proqramında regionlarda gənclərin intellektual klublarının yaradılması, gənclərin daha geniş kütləsinin intellektual fəaliyyətə cəlb edilməsi, asudə vaxtın səmərəli təşkil olunması də nəzərdə tutulub. Eyni zamanda, Azərbaycanın “online fikir bankı”nın yaradılması, informasiya texnologiyaları vasitəsilə gənclər arasında innovativ düşüncənin təşviq edilməsi də proqrama daxil edilib. Eyni zamanda cəzaçəkmə müəssisələrindən azad olan gənclərin reabilitasiyası məqsədilə tədbirlərin həyata keçirilməsi də nəzərdə tutulub. Sənəddə əvvəllər məhkum olunmuş gənclərin cəmiyyətə inteqrasiyasının təmin edilməsinə isə xüsusi diqqət ayrılıb. Əmək və Əhalinin Sosial Müdafiəsi Nazirliyi, Ədliyyə Nazirliyi, Daxili İşlər Nazirliyi, Gənclər və İdman Nazirliyi, tələbələrin elmi, mədəni fəaliyyətinin dəstəklənməsi və sosial müdafiəsi, “Azərbaycan tələbə kartı”nın tətbiq edilməsi və gənclərin vahid beynəlxalq güzəştli kartlar sisteminə qoşulmasına şərait yaradılması təhsil alan gənclərə sosial dəstəyin artırılması da ora daxildir. Proqrama tələbə yataqxanaları sisteminin təkmilləşdirilməsi, tələbələrin sosial-məişət problemlərinin həll edilməsi də daxildir.

Bununla bağlı suallarımızı Azərbaycan Tələbə Gənclər Təşkilatları İttifaqı (ATGTİ) sədri Şahin İsmayılova ünvanladıq.

- Şahin müəllim, ölkə prezidenti tərəfindən təsdiqlənmiş Dövlət Proqramında nəzərdə tutulan məsələlər gənclərin gözləntilərinə cavab verirmi?

- Əlbəttə ki, Dövlət Proqramında nəzərdə tutulan məsələlər əvvəlcədən müzakirə olunan mövzuları əhatə edir. Proqramın hazırlanması ilə bağlı keçirilən forumlarda bizim təşkilat tələbələrin problemlərini qabardırdı. Biz tələbələrin sosial vəziyyətinin yaxşılaşdırılması, digər problemlərin həll edilməsi ilə bağlı güzəştlərin nəzərdə tutulmasını istəyirdik. Əgər bu gün biz təsdiqlənmiş Dövlət Proqramına diqqət yetirəriksə, burada bizim təkliflərimizin nəzərə alındığını görərik. Hətta mən deyərdim ki, indiyədək bizdə heç bir dövlət proqrammı bu qədər müzakirədən sonra qəbul olunmamışdı. Bilirsiniz ki, proqram qəbul olunmamışdan öncə bizim gənclər təşkilatlarının təmsilçilərinin cənab prezidentlə görüşü oldu. Sonra müvafiq dövlət qurumlarının, partnyor təşkilatların iştirakı ilə birgə müzakirələr keçirdik. Bu müzakirələr zamanı bütün istək və arzularımızı ifadə etdik. Sevindirici haldır ki, imzalanmış proqram çox konkret xarakter daşıyır. Bölmələr üzrə nəzərdə tutulan tədbirlərə hansı dövlət qurumlarının məsul olduğu dəqiq şəkildə göstərilib. Nəzərdə tutulan işlərin hansı tarixdə həyata keçiriləcəyi də dəqiqləşdirilib. Bütün bunlar onu deməyə əsas verir ki, bu dövlət proqramı kifayət qədər praktik olacaq. Proqramda nəzərdə tutulan işlərin həyata keçirilməsi üçün xüsusi Əlaqələndirmə Şurasının yaradılması da nəzərdə tutulur. Düşünürük ki, bu proqramın icrasından sonra – 2015-ci ildə Azərbaycan gəncliyi öz inkişafının yeni bir mərhələsinə qədəm qoyacaq. Həmin dövrdə Azərbaycan gəncliyi indikindən də gözəl simada təqdim olunacaq. Mənim fikrimcə, bu proqram gəncliyimizin inkişafına təkan verəcək.

- Gənclər təşkilatları bu proqramın imzalanmasını necə qiymətləndirirlər?

- Səmimi şəkildə deyim ki, hələ ölkə prezidenti bu proqramın hazırlanması ilə bağlı sərəncam verdiyi andan bu qərar çox böyük əks-səda doğurdu. Gənclər təşkilatları prezidentin təşəbbüsünü çox böyük ruh yüksəkliyi ilə qəbul etdilər. Dərhal müzakirələr başlandı, çoxsaylı təkliflər irəli sürüldü. Proqramın imzalanması da böyük ruh yüksəkliyi ilə qarşılandı. Sosial şəbəkələrdəki müzakirələri izləməklə gənclərin bu proqrammı necə böyük ümidlə qarşıladığını görmək mümkündür. Gənclər təşkilatları da imzalanmış Dövlət Proqramından razı qaldılar. Hansı sahədə çalışmasından asılı olmayaraq hər bir gənc bu proqramdan müəyyən bir stimul aldı. Bu dəqiqə də proqram ətrafında çox qızğın müzakirələr getməkdədir. Proqram imzalandıqdan sonra biz gənclər arasında rəy sorğusu da keçirdik. Sorğunun nəticələrinə əsasən, əminliklə demək olar ki, gənclərimiz imzalanmış sənədi çox böyük ruh yüksəkliyi ilə qarşılayıblar. Gənclər xüsusi ilə də onların sosial vəziyyətinin yaxşılaşdırılmasına yönəlmiş, yataqxana probleminin həlli, gənc ailələrə dəstək, məşğulluq problemi və digər məsələlərlə bağlı proqramda nəzərdə tutulan işləri yüksək qiymətləndiriblər. İndi bizim istədiyimiz odur ki, bu proqram həqiqətən də real nəticələrini versin və ölkə gəncləri onun həyata keçirilməsində yaxından iştirak etsinlər. Çünki Dövlət Proqramına diqqət yetirsək, orada nəzərdə tutulan işlərin bir qismi məhz gənclərin özləri tərəfindən həyata keçirilməlidir. Yəni bizim bu proqramla bağlı gözləntilərimiz böyükdür.

- Proqramla bağlı müzakirələr getdiyi ərəfədə gündəmə gətirilən əsas məsələlərdən biri də gənclərin mənzil şəraitinin yaxşılaşdırılmasına dəstək idi. Bunun üçün güzəştli ipoteka kreditlərinin şərtlərinin daha da yüngülləşdirilməsi təklif olunurdu. Amma Dövlət Proqramında bununla bağlı müddəalara rast gəlinmir.

- Bəli, doğrudan da müzakirələr zamanı gənclərin mənzil şəraitinin yaxşılaşdırılması ilə bağlı tədbirlərin görülməsinə ehtiyac olduğu vurğulandı. Bizim gənclər təşkilatları rəhbərlərinin cənab prezidentlə görüşündə də bu məsələ gündəmə gəldi. Orada qeyd olundu ki, ipoteka kreditləri ilə bağlı dünyada müxtəlif təcrübələr var. O vaxt tapşırıq verildi ki, bununla bağlı qısa müddət ərzində təkliflər hazırlanıb təqdim olunsun. Artıq bununla bağlı müzakirələr başlayıb. Hazırda ipoteka kreditləri 35 min manat həcmində verilirsə, gələcəkdə bunun 50 min manata çatdırılması nəzərdə tutulur. Bundan əlavə, kreditlər üçün nəzərdə tutulan faiz dərəcələri də böyük ehtimalla aşağı salınacaq. Proqramda bu məsələ əksini tapmasa da ölkə rəhbərliyi səviyyəsində bu barədə tapşırıq verilib. Yəqin ki, ən münasib dünya təcrübəsi seçiləcək və buna müvafiq qərar qəbul olunacaq. Mən ümid edirəm ki, son nəticədə ipoteka kreditləri ilə bağlı biz gənclərin gözləntilərinə uyğun standartlar müəyyənləşdiriləcək.

- Biz bu proqramın real nəticələrini gənclərin həyatında nə vaxt hiss edə biləcəyik?

- Dövlət Proqramına diqqət yetirsək, orada nəzərdə tutulan işlərin bəzilərinin icrası elə 2011-ci ildən başlamalıdır. Düşünürəm ki, biz ən qısa müddətdə bu istiqamətdə həyata keçirilən işlərin şahidi olacağıq. Buna heç bir şübhə olmamalıdır. Çünki ortada çox böyük siyasi iradə, dəqiq tədbirlər planı, kifayət qədər maddi resurs var. Allaha şükür ölkəmizin iqtisadi vəziyyəti Dövlət Proqramında nəzərdə tutulan işlərin həyata keçirilməsinə imkan verir. İnanıram ki, müvafiq dövlət qurumları da proqramın həyata keçirilməsinə ən yüksək səviyyədə dəstək verəcəklər. Bütün bunları reallaşdıra bilsək, qarşıdakı aylarda gənclərimiz proqramın real nəticələrini öz həyatlarında hiss etməyə başlayacaqlar.

İlham QULİYEV

Kaspi.- 2011.- 22 iyul.- S.8.