İldən-ilə dövlət orqanlarının saytlarının vəziyyəti yaxşılaşır

Osman Gündüz: “Amma hələ də bu sahədə ciddi problemlər qalmaqdadır”

Azərbaycanda dövlət orqanlarının fəaliyyətində internetin imkanlarından istifadə edilməsi artmaqdadır. Bu günlərdə Prezident Administrasiyasının şöbə müdiri Fuad Ələsgərov bildirib ki, yaxın bir neçə ayda internetlə bağlı islahatlar həyata keçiriləcək. 3 ay müddətində hər bir dövlət orqanının saytında xüsusi elektron xidmət bölməsi fəaliyyətə başlayacaq.

Azərbaycan İnternet Forumunun prezidenti Osman Gündüz bu sahədə həyata keçirilən islahatları dəstəklədiyini bildirdi.

- Açığı, mən Amerikadan yeni qayıtdığımdan dövlət orqanlarının internet resurslarından istifadəsi ilə bağlı hazırlanmış yeni layihədən xəbərsizəm. Amma istənilən halda, dövlət orqanlarının elektron xidmətlər göstərməyə başlamaları alqışlanmalıdır. Hesab edirəm ki, bu təklifin reallaşması dövlət orqanlarının saytlarındakı məlumatların artmasına gətirib çıxaracaq. Vətəndaşa nə lazımdır? Əlbəttə, hər bir vətəndaş istəyir ki, evindən, redaksiyasından çıxmadan dövlət orqanının fəaliyyəti ilə bağlı sayt vasitəsi ilə məlumat alsın. Bütün dünyada da bu praktika var. Azərbaycanda da qanuna görə dövlət orqanlarının internet resursları vasitəsi ilə vətəndaşlara xidmət göstərilməlidir.

- Ümumiyyətlə, bu gün dövlət orqanlarının internet resurslarının durumu qənaətbəxşdirmi?

- Mənim rəhbərlik etdiyim «Multimedia» təşkilatı son beş ildə dövlət orqanlarının saytlarının monitorinqini həyata keçirir. Yəni, biz araşdırmalar aparırıq ki, dövlət orqanlarının internet resurslarında hansı məlumatlar yer alır. Başqa sözlə, qanunda nəzərdə tutulan informasiyaların saytlarda yer alıb-almamasını yoxlayırıq. Eyni zamanda, dövlət orqanlarının internet resurslarının reytinq cədvəllərini düzəldirik. Araşdırmalar zamanı hansı dövlət orqanının saytında daha çox məlumatın yerləşdirildiyi, hansı saytda vətəndaşların suallarına daha operativ reaksiya verildiyi müəyyənləşdirilir. Təxminən 10 gündən sonra 2010-cu ilin yekunları ilə bağlı dövlət orqanlarının saytları barədə hesabatımızı açıqlayacağıq. Bununla bağlı böyük bir konfrans təşkil etməyi planlaşdırırıq. Əvvəlcədən deyim ki, keçən il 50-yə qədər dövlət orqanının saytının monitorinqini həyata keçirmişik. Hesabatımızı açıqlayarkən monitorinqini apardığımız saytlarda təkmilləşməsinə ehtiyac duyulan məqamları da vurğulayacağıq.

- Dövlət orqanlarının saytları qanunun tələblərinə cavab verirmi?

- Mən hesab edirəm ki, bu sahədə ciddi problemlər var. Amma son 5 ilin nəticələrini ümumiləşdirsək, tendensiya müsbət istiqamətdədir. İldən-ilə dövlət orqanlarının saytlarının vəziyyəti yaxşılaşır. Müsbət tendensiyaya baxmayaraq, az sayda dövlət qurumu var ki, onların saytların günün tələblərinə cavab verir.

- Bu dövlət qurumları hansılardır?

- Mən ilk növbədə Vergilər Nazirliyinin saytını qeyd edirdim. Bu sayt informasiyalarla kifayət qədər zəngindir və mütəmadi olaraq yenilənir. Digər dövlət orqanlarından Daxili İşlər Nazirliyinin saytı da çox normal fəaliyyət göstərir. Prezident yanında Dövlət Qulluğu Məsələləri üzrə Komissiyanın, Dövlət Sosial Müdafiə Fondunun və Rabitə və İnformasiya Texnologiyaları Nazirliyinin bu sahədəki işi də təqdirəlayiqdir. Ekologiya və Təbii Sərvətlər Nazirliyi də mütəmadi olaraq öz saytını yeniləyir. Yəni müqayisəli şəkildə baxsaq, adını çəkdiyim dövlət qurumlarının internet resursları digərlərinə nümunə göstərilə bilər. Son vaxtlar ölkə prezidentinin saytı da ən müasir texnologiyalardan istifadə etməyə başlayıb. Bu yeganə saytdır ki, sosial şəbəkələrə inteqrasiya olunub. Məsələn, istənilən şəxs twitter və facebook şəbəkələrindən prezidentin saytına girə bilir.

- Bəs saytları günün tələblərinə cavab verməyən dövlət orqanları hansılardır?

- Mən ilk növbədə Nazirlər Kabinetinin saytını qeyd edərdim. Uzun illər bu qurumun saytı ümumiyyətlə olmayıb. Sayt yaradılandan sonra da biabırçı gündə fəaliyyət göstərir. Vətəndaş bu saytdan özünə lazım olan heç nə tapa bilmir. Saytları bu durumda olan digər dövlət qurumları da var. Hesab edirəm ki, həmin qurumlar qısa müddət ərzində bu boşluğu aradan qaldırmalıdırlar.

- Bəs saytı ümumiyyətlə olmayan dövlət qurumları varmı?

- Ən son məlumatları deyə bilmərəm. Amma bir müddət bundan öncəyə qədər nə Müdafiə, nə də Əmək və Əhalinin Sosial Müdafiəsi nazirliklərinin saytı yox idi. Əslində dövlət orqanının saytının olmaması ciddi qanun pozuntusudur. Qanuna görə, hər bir dövlət orqanının saytı olmalıdır və mütəmadi yenilənməlidir. Saytları fəaliyyət göstərməyən dövlət orqanları bir növ qanuna üz çevirirlər.

İlham QULİYEV

Kaspi.- 2011. – 26 may.- S. 5.