SOCAR dünya brendinə çevrilir

ARDNŞ birgə müəssisələrin sayını artırır. Şirkət strateji fəaliyyətini gələcəkdə də davam etdirəcək

Dünyanın ən böyük neft şirkətlərindən biri olan Dövlət Neft Şirkəti (ARDNŞ) respublikanın neft sərvətlərindən istifadəni vahid dövlət siyasəti əsasında həyata keçirmək, neft sənayesinin idarəetmə strukturunu təkmilləşdirmək, yanacaq-enerji kompleksinin inkişafını təmin etmək məqsədi ilə beynəlxalq əməkdaşlığı davam etdirir. Ötən gün isə ARDNŞ bu sahədə daha bir əməkdaşlığa imza atıb.

Belə ki, noyabrın 16-da Sürixdə ARDNŞ ilə “Exxon Mobil Central Europe Holding GmbH” şirkəti arasında “Exxon Mobil”in İsveçrə filialı olan “Esso Schweiz GmbH” şirkəti səhmlərinin alqı-satqısı üzrə müqavilə imzalanıb. ARDNŞ bu yaxınlarda İsveçrədə təsis etdiyi emal və satış üzrə törəmə müəssisəsi olan “SOCAR Energy Switzerland” şirkəti vasitəsilə “Esso Switzerland”ın yüksək səviyyəli xidmətlər göstərilməsini əhatə edən kommersiya fəaliyyətini davam etdirmək niyyətindədir. Avropada kommersiya fəaliyyətinin genişləndirilməsi üçün daha bir addım atan şirkətin fəaliyyəti bununla məhdudlaşmır. Digər birgə müəssisələrə gəlincə, 1993-cü ilin aprelində ARDNŞ Dənizneftqazlayihə DETLİ ilə Böyük Britaniyanın Con Braun Hidrokarbons Limited şirkəti arasında saziş imzalanıb. Bu sazişə görə Azərbaycan Con Braun QSC üzrə iştirak payı tərəflər arasında 50 faiz olmaqla bölünüb. Fəaliyyət müddəti qeyri-müəyyən müddətə qədər davam edəcək birgə müəssisənin əsas fəaliyyət növü emal qurğularının, dəniz stasionar və üzən platformaların, sualtı neft mədən qurğularının, boru kəmərlərinin və onlarla bağlı dəniz və quru tikililərinin inşası, quraşdırılması, hidrotexniki qurğuların tədqiqi ilə dəniz dibinin dərinləşdirmə işləri ilə əlaqəli mühəndis –texniki və layihə işlərinin həyata keçirilməsidir. Bundan başqa, məqsəd dənizdə və quruda neft-qazçıxarma obyektlərinin inşası üçün avtomatlaşdırılmış idarəetmə sistemi yaratmaqdır.

SARMATİA MMC üzrə isə 2008-ci ildə Azərbaycan, Gürcüstan, Ukrayna, Litva və Polşa arasında müqavilə bağlanıb. İştirak payı ARDNŞ üzrə 24.75, Ukrtransnafta üzrə 24.75, Przyjazn üzrə 24.75, Gürcüstan Neft və Qaz Şirkəti üzrə 24.75, AB Klaipedos Nafta üzrə isə 1.00 faiz təşkil edir. Bu birgə müəssisənin də fəaliyyət müddəti qeyri-müəyyən müddətə qədər davam edəcək. SARMATİA MMC-nin əsas fəaliyyət növü Odessa-Brodi boru kəmərinin uzadılması vasitəsilə Xəzər dənizindən neftin Gürcüstan, Ukrayna, Polşa və Azərbaycan respublikasından keçməklə Avropaya çıxarılması məqsədilə yeni dəhlizin çəkilişi layihəsinin texniki-iqtisadi əsaslandırmasının hazırlanmasıdır. Bundan başqa, müəssisə yeni neft və qaz yataqlarının tədqiqatı və işlənməsi, quruda və suda müxtəlif obyektlərin tikintisi boru kəmərinin çəkilişi funksiyasını da daşıyır.

SUPRA Holdinq MMC birgə müəssisənin yaradılmasında isə əsas tərəflər ARDNŞ-lə yanaşı, Birləşmiş Ərəb Əmirliklərinin Heritage General Tradinq FZE və Böyük Britaniyanın Renfrel Holdinq Limited şirkətidir. Müəssisədə iştirak payı ARDNŞ üzrə 50.00, Heritage General Trading FZE üzrə 40.00, Renfrel Holding Limited üzrə isə 10.00 faiz təşkil edir. SUPRA Holdinq MMC-nin əsas fəaliyyət istiqaməti neft və neft məhsullarının ticarəti müxtəlif növ əmlakın, qiymətli kağızların, aktivlərin dövriyyəsi və alqı-satqısıdır.

Heritage General Trading FZE ilə ARDNŞ arasında daha bir saziş SOCAR Gas Supply Ltd. MMC-nin yaradılması üçün bağlanıb. Müəssisənin əsas fəaliyyətinə təbii qazın idxalı və ixracı, təbii qazın paylanması, təbii qazla ticarəti (alqı-satqı) daxildir. Kaspiyan Geofizikal Kompani birgə müəssisəsi üzrə isə Soks Company Ltd 55.00, ARDNŞ isə 45.00 faizlik iştirakçı payına məxsusdur. AzGerneft MM üzrə iştirak payı Grand Enerci PTE. Ltd. Üzrə 60.00, ARDNŞ üzrə 40.00 faizdir. Əməkdaşlıq 25 il davam edəcək və bu əməkdaşlığa əsasən, “Kontrakt Sahəsi”ndə “Karbohidrogen”in kəşfi, işlənməsi və hasilatı, istifadə edilən materialların nəqli və satışı ilə məşğuldur. Azəri-Fuqro MMC birgə müəssisəsində də ARDNŞ 60.00, Fuqro N.V. 40.00 faizlə iştirak edir. Fəaliyyət müddəti 15 il nəzərdə tutulan bu əməkdaşlıq çərçivəsində dənizdə mühəndis-geoloji tədqiqat, geokimyəvi və stratiqrafiq axtarış, naviqasiya və mövqeləndirmə təminatı işlərinin yerinə yetirilməsini həyata keçirir. Bundan başqa, müəssisə laboratoriya tədqiqatları, analiz və hidrotexniki qurğulara nəzarət, geofiziki tədqiqatların nəticələrinin emalı və interpretasiyası məqsədini də daşıyır.

AzTurqaz BM birgə müəssisində ARDNŞ və Heritage General Trading FZE bərabər iştirakçı payına məxsusdurlar. Müəssisənin əsas fəaliyyət istiqaməti maye qazın hasilatı və emalı, qaz emalı zavodunun tikintisi, maye qaz məhsulunun topdan və pərakəndə satışı, avtosisternlərin, qaz balonlarının təmiri və satışıdır. Azfen BM birgə müəssisəsinin yaradılmasında isə ARDNŞ-in yeganə tərəfdaşı Tekfen 40.00 faizlə iştirak edir. Bu müəssisə ARDNŞ və ABƏŞ ilə əlaqədar neft sənayesi sahəsində hər növ inşaat, təchizat, emal, tədqiqat, nəqliyə, paylama, mühəndislik və layihə idarəçiliyi fəaliyyəti və müxtəlif növ inşaat materiallarının alqı-satqısını həyata keçirir. Müəssisənin məqsədləri ilə əlaqədar olan müxtəlif obyektlərin təmiri, tikintisi və layihələşdirilməsi də onun funksiyalarına daxildir. Kaspiyan Drillinq Kompani üzrə ARDNŞ 92.44, Heritage General Trading FZE isə 7.56 faiz iştirakçı payına məxsusdur. Bu müəssisə üzən dəniz qazma qurğularının təmiri, modernləşdirilməsi, onlara nəzarət və texniki xidmətlərin göstərilməsi ilə məşğuldur.

Şirkət dəniz neft-qaz quyularının qazılması və təmiri işlərinin bütün mərhələlərində iştirak etmək, “İstiqlal və Dədə Qorqud” yarımbatan qazma qurğularından istifadə edərək neft və qaz quyularının qazılması və onların təmiri işlərinin həyata keçirilməsi məqsədini də daşıyır. OYL and Qas Pro Servis MMC birgə müəssisəsinin yaradılmasında isə əsas məqsəd neft və qaz sənayesini avadanlıqlar, işlər və xidmətlərlə təmin etmək, neft və qaz sənayesini texniki təcrübə və dəstəklə təmin etmək, ən qabaqcıl metodlar tətbiq etməklə təchiz edəcəyi məhsulların diaqnostika məqsədilə baxışlarını təşkil etmək, eləcə də xidmətlərin keyfiyyətini və səmərəliliyini yüksəltmək üçün heyətə təlim keçməkdir. OYL and Qas Pro Servis MMC-də iştirak payı Target Petrolium Azərbaycan üzrə 45.10, ARDNŞ üzrə 29.90, Simens Turbomashineri International Holding üzrə isə 25.00 faizdir. Kros Kaspian Oyl and Qaz Lojistiks MMC-nin yaradılmasında iştirak payı ARDNŞ üzrə 34.00, Az Trans Reil üzrə 33.00, Qafqaz Trans Servis üzrə 33.00 faizdir. Bu müəssisə boru kəmərləri və terminallar vasitəsilə neft və qaz əməliyyatlarının aparılması, neft, qaz və neft məhsullarının alqı-satqısı, neft və qaz sənayesi üçün boru kəmər daşımaları ilə əlaqəli mal, iş və xidmətlərin göstərilməsi, texniki təcrübə və dəstəyin təqdimini reallaşdırmağı üzərinə götürür.

Fəaliyyəti 30 il müddətinə nəzərdə tutulan SOCAR-Petroleum QSC üzrə isə əsas tərəflər olaraq, SOCAR 51.00, A.P. İnternational LLC 49.00 faizlə iştirak edir. SOCAR-Petroleum QSC-nin yaradılmasında məqsəd karbohidrogenlərin Avropa standartlarının tələblərinə uyğun olaraq emalını təşkil etmək və texniki tələblərə cavab verən yanacaq növlərini (markalarını) istehsal etmək, neft və qaz məhsullarının qəbulu, daşınması, saxlanılması və satışını təşkil etmək, yanacaq bazası və yanacaq daşıyan yük maşınları parkının təşkili, avtomobillərə texniki xidmətin göstərilməsi, yanacaqdoldurma məntəqələrinin yanında motel, restoran və kiçik marketləri təşkil etməkdir. SOCAR-Cape MMC-nin də fəaliyyəti isə qeyri-müəyyən müddətə əsaslanır. ARDNŞ üzrə 51.00, Cape İndastrial Servisez ltd. üzrə isə 49.00 faiz iştirak payı olan müəssisə taxtabənd konstruksiyaların montaj-demontajı və icarəyə verilməsi, bütün növ izolyasiya işlərinin görülməsi, boya və qumla cilovlama işlərinin görülməsi, odadavamlı örtük sistemlərinin suvanması işlərini həyata keçirir. Şirkətdən verilən məlumata görə, ARDNŞ bu istiqamətdə strateji fəaliyyətini gələcəkdə də davam etdirmək niyyətindədir.

Həqiqət İSABALAYEVA

Kaspi.-2011.-18 noyabr.-S.8.