Toxunuşun səsi
Məcid Məcidinin
“İlahi rəng” filmi
barədə
Məcid Məcidi İran
kinematoqrafiyasının əvəzedilməz sütunudur.
Elə sütun ki, onu kiminləsə əvəzləsən, həmin
yükü saxlaya bilməyəcək.
M.Məcidinin filmləri dünyəvidir, amma milli-mental dəyərlərin
realizə olunması da öz
yerində. Məsələn, “İlahi rəng”
filmində çay qırağında üzünü qırxan qəhrəman, əlindən
düşüb sınmış güzgünü özündə saxlamır,
çaya atır. Bildiyimiz
kimi, sınmış güzgünü
çaya atmaq müsəlman
adətidir, həm də inancdır.
Sınmış güzgüdə əks bölünür. İnsanın əksinin
bölünməsi isə onun
simasının, həyatının parçalanmasına
işarədir ki, filmdə belə də olur. Bir dəyər sistemini digər
ölkələrin dəyər sisteminə çevirmək müasir dünyada çox görünən bir
haldır. İran bütün
sahələrdə olduğu kimi, film sahəsində də
özünəməxsusluğu saxlamaq məsələsində
həssasdır. Ən yaxşısı da
odur ki, İran siyasəti filmlərə çox da yol
tapa bilmir. Bu amilin müxtəlif səbəbləri
olduğu məlumdur, amma
həmin səbəbin sənət tərəfi bizi daha çox
maraqlandırır və məmnun edir. M.Məcidinin
korların həyatından bəhs edən “İlahi
rəng” filmi də onun
digər ekran işləri kimi
əsl sənət nümunəsi, şedevrdir.
Kor uşağın həyatından bəhs
edən bu film
insanı həm kövrəldir, həm də şükr
etməyə məcbur edir. Filmdə baş rolları Hüseyn
Məcruh, Mövsüm Rəmazani, Somer Feyzi, İlham
Şərifi və Rəhnaz Şəfani oynayır. Filmin ssenari müəllifi
və rejissoru M.Məcididir.
Süjet
Məhəmməd
kor uşaqlar oxuyan məktəbdə təhsil alır. Orda bütün həyat səs
və toxunuşdan ibarətdir. Hər biri həyatı görmürlər deyə, həmin
məktəbdə intriqalar da yoxdur. Deməli, görmək
insanda tamah, tamahsa intriqa yaradır. Rejissor bu sistemlə korlar və görən insanlar
arasındakı fərqdə korlara üstünlük verir,
onların İlahiyə daha yaxın olduğunu göstərir.
Tətil
zamanı uşaqlarını götürməyə gələn
valideynlər arasında Məhəmmədin valideyni yoxdur, gəlməyib.
Məhəmməd özünü tənha
hiss edir. Bağçada təkcə oturub
atasını gözləyən Məhəmməd axır ki, arzusuna çatır,
atası gəlir. Onu kəndə
aparır. Məhəmmədin anası yoxdur,
atası isə evlənmək eşqinə düşüb.
Ona görə də Məhəmmədi kor dülgərin yanına qoymaq
istəyir. Amma Məhəmmədin nənəsi
qəti etiraz edir, oğluna başa salır ki, sən Məhəmmədi yox,
özünü düşünürsən.
Lakin heç bir xeyri olmur.
Atası məcburən Məhəmmədi nənəsindən
ayırıb həmin dülgərə köməkçi verir, özü isə
mürəxxəs olur. Dülgər Məhəmmədə
kiçik bir otaq verir. Məhəmməd
əvvəl-əvvəl ağlayır. Özünü
tənha hiss edən Məhəmməd
dülgərlik sənətini öyrənməyə
başlayır, qabığından tanıyır ki, yonacağı taxta
hansı ağacdandır. Onun səsi kosmik, İlahi səsdir
deyə, göyləri də əli ilə hiss
edir. Onun ahı da nəfəslə deyil, toxunuşla çatır Tanrıya. Məhəmmədin
nənəsi az vaxtdan
sonra vəfat edir.
Atasının istədiyi qızsa ona
göndərilən hədiyyələri geri
göndədir ki, onların
nişanlanması onun ailəsinə və
həyatına uğursuzluq gətirir. Məhəmmədin
atası tək-tənha qalır və gedir
ki, oğlunu öz yanına gətirsin. Məhəmməd
atasına qoşulub gəlir. Bir xeyli yol
gedirlər. Qalın meşənin ortasındakı
çayın üstündən atla
keçəndə körpü uçur Məhəmməd və ata çaya
düşürlər. Bir müddət olanlara qıraqdan baxan
atası şokdan ayılır və Məhəmmədin
dalınca üzsə də çata bilmir. Bir gün
sonra çayın dənizə qovuşduğu yerdə, dənizin sahilində
huşsuz vəziyyətdə olurlar. Məhəmmədin atası oyanıb ağlamaq istəyəndə, təxminən yüz metr aralıda dənizin
sahilində Məhəmmədi görür
və onun yanına yüyürür.
Məhəmmədsə oyanmır. Atası Məhəmmədi
bağrına basıb öpür və
ağlayır. Elə həmin an Məhəmmədin
həmişə danışdığı, səslərini
anladığı bir dəstə quş onların başının
üstündən oxuya-oxuya keçirlər
və Məhəmmədin əlləri tərpənməyə
başlayır. O, quşların səsinə oyanır. Burada rejissorun qayəsi
yekunlaşır, film bu
səhnəylə bitir. Rejissor
göstərmək istəyir ki:
A) İnsan təbiətin ayrılmaz hissəsidir.
B) Ətrafımızdakı səslər
nələrisə ifadə
edir, amma biz o səslərə qoşulmaq
istəmədiyimizə görə
onları anlaya bilmirik. Tanrı insanı ən
kamil varlıq yaradıbsa, insan təbiəti dərk eləməlidi, ona (heyvana, ağaca) yuxarıdan aşağı
baxmamalıdır.
C)
İslam fəlsəfəsinə xas maraqlı bir ünsür
də filmin açılış tezislərindəndir: “Allah
bir tərəfdən alanda, o biri tərəfdən verir”. Tanrı
xeyirxah olduğuna
görə bizdən aldığı, əslində bizə
vermədiyidir, onu bizim
əlimizdən almayıb. Bizə verdiyi
isə bizi xeyirə aparandır: Məhəmməd
quşların səsini duya bilməsəydi,
öləcəkdi, çünki o, atasının səsinə
oyanmamışdı.
Filmdə
maraqlı situasiyalar var: məsələn, Məhəmmədin
ağlayaraq Tanrıya üsyan etməsi: “Müəllim deyir
ki, Allah siz korları daha çox sevir, ona görə ki, siz
görmürsünüz. Mən də ona
deyirəm ki, əgər bizi
sevsəydi, bizi kor eləməzdi.
Müəllim dedi ki, Allah gözlə görünən deyil, o hər yerdədir, siz onu hiss
edə, əllərinizlə görə bilərsiniz. Mən hər
yeri gəzirəm ki, bir gün əlim ona çatsın və hər şeyi
ona deyim, hətta
ürəyimdə olan sirləri də”. Rejissor qəhrəmanın dili
ilə də ideyasını əyan edir: İlahi rəng - İlahi
səsdir.
1.
Korların təbiəti hiss etməsi ilə bağlı səhnələr
də çox maraqlıdır: Məsələn, Məhəmməd
torpağın üstünə düşmüş quş
balasını yerdən götürüb köynəyinin
cibinə qoyur və ağaca dırmaşıb quşu öz
yuvasına salır.
2.
Avtobusda gedəndə küləyə əli ilə toxunur. Yəni
özünü təbiətin bir hissəsinə çevirməyi
bacarır.
3.
Ağacdələnlərin səsini anlayır. Dəniz kənarında
qağayıların səsinə qoşula bilir.
4.
Torpağa ayağıyla belə toxunanda bilir ki, getdiyi yol kəndin
yolu deyil.
Fərid Hüseyn
Kaspi.-2012.-14 fevral.-S.16.