“Mənim
gözümdə Cavid Əfəndi...” mövzusunda
düşüncələr...
“Dünyanın əsl qiymətini
verə biləcək əxlaqda olmadığı DAHİ -
Hüseyn Cavid”
Bu dəfə
də belə xatırlayaq Cavid Əfəndini.
Üzümüzü onu sevərlərə tutub hər kəsin
öz dünyasındakı Cavidə baş vuraq. Elə
mövzumuzun adı da niyyətimizi əks etdirir. Görəsən
bizim gözümüzdəki sevgi ruhumuzdakı iblisi məhv
etməyə yetəcəkmi?!
Yazıçı-publisist
Əkbər QOŞALI: “Onun şeirlərinin hər sətrində
sözdən qabaq ruh “görünür” - Turan ruhu!”
-Cavid
Əfəndi! Şair demiş, nə gözəl səslənir
bu söz! – Vətən kimi, Turan kimi, Sənət kimi...
Hüseyn Cavid özündən öncəki və hələlik
həm də sonrakı ədiblərimizdən heç birinə
nəsib olmayan bir titul daşıyır – ƏFƏNDİ!..
Atatürk təbirincə desək, o, sənətin əfəndisi
olmaq istəmirdi, sənətə qulluq edirdi və sənətkarlar,
aydınlar və nəhayət xalq onu əfəndi
çağırdı. Dövlət təltifləri
içində “Əfəndi” titulu, fəxri adı yoxdu; xalq
içində də adətən övliyalar, ruhanilər bu
“titu”la layiq görülürdülər; Hüseyn Cavid
şair, ədəbiyyatçı olaraq əfəndi
çağrıldı. Çünki insan olaraq, xarakter,
şəxsiyyət olaraq əfəndi idi.
Mənim
üçün Cavid Əfəndi ortaq türk ədəbi
abidəsidir, özündən öncəki intellektual ədəbiyyatın
ən yaxşı özəlliklərini öz
yaradıcılığında toplayıb gələcək
türk (və ümumən bəşər) ədəbi gəncliyi
(nəsilləri) üçün model qoymuş bir azman
söz ustasıdır. Ülkü ilə şeiriyyətin,
milliliklə bəşəriliyin bir arada tutula bilməsinin
örnəklərini vermiş ədəbiyyat xadimidir Cafid Əfəndi...
Onun şeirlərinin az qala hər sətrində sözdən
qabaq ruh “görünür” elə bil: türk (Turan) ruhu! Bundan
böyük bəxtiyarlıq varmı?
Yazar
Elçin Mirzəbəyli: “Və günlərin birində
dünyanın ən böyük teatrlarında Cavid Əfəndinin
əsərləri oynanılacaq!”
-Hüseyn
Cavid nəinki Azərbaycanın, Türk və İslam
dünyasının və bütün bəşəriyyətin
dəyəri, haqqı verilməyən ən böyük
şairidir.
Cavidin
təkcə:
“Kəssə
hər kim tökülən qan izini,
Qurtaran
dahi odur Yer üzünü”
beyti onun
dünya ədəbiyyatı tarixindəki yerini müəyyənləşdirmək
üçün yetərlidir. Cavid misilsiz fəlsəfi
dünyagörüşünə və istedada malik bir
dramaturqdur. Mən dünya dramaturgiya tarixində Hüseyn
Cavidlə yanaşı dayana biləcək ikinci bir dramaturq
tanımıram. Hətta Şeksprin əsərləri belə
Cavid dühasının, “Peyğəmbər”in, “İblis”in,
“Şeyx Sənan”ın yanında çox sönük
görünür. Bunu bütün məsuliyyətimlə
deyirəm. Bir hadisə danışım sizə: Sank-Peterburq
Teatr, Musiqi və Kinomatoqrafiya İnstitutunda təhsil
aldığım illərdə “İblis”dən bir hissəni
dostların köməyi ilə tərcümə edib səhnələşdirmişdim.
Həmin hissəni izləyən rus-sovet teatrının nəhəngləri
– Lev Dodin, Vladimir Pyotrov, Tamara Abrosimova və digərləri təəccübdən
donub qalmışdılar. Məndən Hüseyn Cavidin nə
üçün tərcümə edilmədiyini, təbliğ
olunmadığını soruşdular. Onun Şekspirdən
daha böyük bir dramaturq olduğunu dedilər.
O zamandan
19 il keçir, amma hələ də Cavid Əfəndini Azərbaycanın
sərhədlərindən kənarda tanıda bilməmişik.
Heç Azərbaycan teatrları da Cavid dramaturgiyasına
müraciət etmirlər. Əslində çağdaş Azərbaycan
teatrı ilə Hüseyn Cavid dramaturgiyasını bir yerdə
təsəvvür etmək mümkün deyil. Təəssüf
ki, teatrlarımız dramaturgiyadan anlayışı olmayan,
teatrı, səhnəni hiss etməyən, ədəbiyyatın
digər janrlarında qazana bilmədikləri uğura səhnənin
imkanları hesabına sahiblənməyə
çalışan yazarların poliqonuna çevrilib.
Bu
reallıqlar nə zamansa dəyişəcək, şübhəsiz.
Və günlərin birində dünyanın ən
böyük teatrlarında Cavid Əfəndinin əsərləri
oynanılacaq!
Rəsul
Mirhəşimli: “Hüseyn Cavid həbsxana divarları
arasında zülmə, zalıma meydan oxumağın fəlsəfəsini
yaratdı”
-Hüseyn
Cavid XX yüzilin amansız repressiyalarına azad ruhunu təslim
etməyən ən böyük dühadır, mənim
üçün. İblislərə meydan oxuyan, şərin
qarşısında əyilməyən bu böyük şəxsiyyət
vücudunu qurban etsə də Azərbaycana sonsuz imtiyazlar bəxş
edən işıqlı bir ziyalımız oldu. Hüseyn Cavid
yaradıcılığında sovetlər adlanan şər
imperiyasını tərənnüm edən bircə misra belə
tapmaq mümkün deyil. Hüseyn Cavidin zülmün
“qızğın, odlu zərbəsinə Hədəf
olmuş vücudu” heç zaman zalımın
qarşısında əyilmədi. Bu böyük insanın həyatından
yola çıxan istənilən Azərbaycan vətəndaşı
ruhunu hürr olmağa qədər yüksəldə bilər.
“Zülmü
fisqin, cinayətin yolunu Sədd üçün həbsxanalar
yapılır” reallığını görən Cavid Əfəndinin
ruhunu bu həbsxanalar divarı arasında heç zaman dustaq edə
bilmədilər. Hüseyn Cavid bu həbsxanalar divarları
arasında zülmə, zalıma meydan oxumağın fəlsəfəsini
yaratdı. “Yüksəliş varsa, səbəb
alçaqlıq” rəzalətini görüb bu rəzalətə
üsyan edən Hüseyn Cavidin nəsibi repressiya oldu. O mənfur
sovetlər rejimi bütün gücü ilə Hüseyn Cavid
şəxsiyyətini hədəf aldı, fəqət tarix
sübut etdi ki, bu savaşdan qalib çıxan məhz bu
böyük şairimizin özü oldu.
Hüseyn
Cavid şəxsiyyəti Azərbaycan durduqca yaşayacaq, gələcək
nəsillərə öz yolunu tapmaqda da bələdçilik
edəcək.
“Hüseyn
Cavidin təsvir etdiyi Atatürk” kitabının müəllifi,
araşdırmaçı—yazar Güntay Gəncalp: “XIX-XX əsrdə
nə Mərkəzi Asiyada, nə İranda, nə də
Anadoluda Cavid əfəndi kimi ədib yetişməmişdir”
-Cavid əfəndi
mənim gözümdə azad düşüncənin və
azad ədəbiyyatın öndəridir. Çünkü
Cavid sonrası ədəbiyyatımız sosializm-realizm
ideologiyanın əsiri durumuna gəlmişdi. Cavid
yaradıcılığı indiki zamanda keçmiş və
gələcəklə dialoqa girmişdir. Bu üzdən də
tarixdən örnək aldığı “Şeyx Sənan”,
“Siyavuş, “Xəyyam”, “Topal Teymur” kimi əsərlərində
tarixi şəxsiyətlərin
dünyagörüşünü indiki zamanda dartışmaya
açaraq gələcəyə doğru yönəlmişlik
düşüncəsini ortaya qoyar. Cavid
yaradıcılığında Şərq və Qərb mədəniyəti
dialoqa girmişdir. Özəlliklə Cavid məzmun olaraq
Şərqin dərin düşüncəsinə əsaslanmaqda
ikən metod olaraq Qərb yöntəmini mənimsəmişdir.
Bu baxımdan Cavid əfəndinin
yaradıcılığı cahanşümuldur, bütün
bəşərə xitab edər. Cavid
yaradıcılığının surətləri Türk
dilində bəşərin tarixi ağrı və
acılarını, sevincini dilə gətirməkdədir.
Örnəyin “İblis” əsərindəki faciələr bəşərin
ortaq faciəsidir.
Cavid,
ayrıca hər növ mühafizəkarlığa
qarşı çıxar. Çünki, varlıq sürəkli
dəyişim halında ikən bəşərin bir pillədə
durub dəyişməməsi böyük xətadır.
Çünki, bir yerdə durmaq və dəyişməmənin
adı Cavid əfəndiyə görə cəhalətdir. Cəhalətə
qarşı savaşın adı isə dəyişməkdir.
Bu baxımdan Cavid yaradıcılığı bir tür dəyişim
dialektikasını açıqlar:
“Lazımsa
cəhalətlə güləşmək,
Bir
çarə var ancaq: yeniləşmək”
Yeniləşmək
Cavid əsərlərində düşüncə inqilabı
kimi ortaya çıxar. İnsan nə qədər dəyişməyə
çalışsa da, onun dəyişməsini əngəlləyəcək
əski dəyərlər var, ona görə də dəyişimdən
çəkinməmək lazımdır.
“Bizlər
yeniləşsək bilə daim,
Bir əskilik
az-çox bizə hakim.”
Cavid Əfəndi
irfan ədəbiyyatının modern dilimizdəki zirvəsidir.
Mən İran Anadolu, Azərbaycan və Mərkəzi Asiya ədəbiyyatını
yaxşı oxumuş bir oxucu kimi deyə bilərəm ki,
XIX-XX əsrdə nə Mərkəzi Asiyada, nə İranda,
nə də Anadoluda Cavid əfəndi kimi ədib yetişməmişdir.
İrfan və təsəvvüf veriləri Cavid
yaradıcılığında modern ifadə şəklini
bulmuşdur.
Gənc
yazar Könül Səid: “Cavid Əfəndi qəlbimin dərin
qatlarında özünə gizli məskən salmış
“iblisi” mənə tanıtdırdı!”
-Mən
bu sorğunu cavablamazdan öncə diqqətimi çəkən
və məni dəqiqələrcə düşünməyə,
dörd sözə diqqət kəsilməyə vadar edən
bir məqamı diqqətə çatdırmaq istəyirəm.
Bu məqam sorğunun ismi ilə bağlıdır. Deyəcəksiniz
ki, axı sorğunun isminə necə diqqət kəsilmək
olar ? Axı o yazılıb… sadəcə…
“Mənim
gözümdə Cavid əfəndi” ismi və bu isimdə cəm
olub yan-yana düzülən sözlərinin bir arada səslənməsi
sanki həzin bir musiqi kimi ilk başda insanı salamlayır.
Sonra bu insan, bu mütəfəkkir, bu dahi bir filosof haqqında
əfəndicə bir şərh verir. Bilməzdim ki, dörd
sözün daxili gücü və enerjisi bir “filosofu” mənə
bu qədər tanıtdıra və onun əfəndicə təqimatını
verə bilər.
Mən
Hüseyn Cavid haqqında, onun şəxsiyyəti,
yaradıcılığı haqqında məlumatlı olsam
da bu mövzulara toxunmaq və yaxud da nələrisə yazmaq
istəmirəm. Baxmayaraq ki, ədəbiyyat sahəsində təhsilim
var, hətta deyərdim ki, sırf Azərbaycan ədəbiyyatı
ixtisasının magistr dərəcəsini də
almışam. Amma yenə də bunların heç biri mənə
əsas vermir bu insan, bu şəxsiyyət haqqında fikir
yürüdüm, şərh yazım. Çünki buna nə
yaşım, nə də təcrübəm yetərli deyil. Bəlkə
də zamanla bu mütəfəkkir dünyasına bir qapı
tapıb sirlərini kəşf edə bildim…bəlkə də…
Amma indi
“Mənim gözümdə Cavid əfəndi” sorğusuna bir
sözlə cavab yaza bilsəydim əgər, sadəcə deyərdim
ki, bu İnsan mənim qəlbimin dərin qatlarında
özünə gizli məskən salmış “iblisi” mənə
tanıtdıran bir “filosofdur”…
Həbib Ələkbərsoy
– Türk Hərəkatı İctimai Birliyinin sədri:
Hüseyn Cavid dünyanın ona əsl qiymətini verə biləcək
əxlaqda olmadığı bir DAHİDİR!
-Mənim
gözümdə Hüseyn Cavid ilk növbədə
dünyanın ən böyük filosofudur:
Düşünürəm
ki,
“Kəssə
hər kim tökülən qan izini,
Qurtaran
dahi odur, Yer üzünü!”
bəşəriyyətin
ən böyük fəlsəfi ifadəsidir. Göstərin,
bundan daha böyük bir məntiqi mənə...
Cavid Əfəndinin
sonsuza qədər tədqiq olunası dini fəlsəfi
baxışları var:
Mənim
tanrım gözəllikdir, sevgidir.
O, həm
də dünyanın gələcəyini vahid dində
görür:
“Din bir
olsaydı yer üzündə əgər,
Daha məsud
olurdu, cinsi-bəşər!”
Hüseyn
Cavidin “İblis”-i tədqiq olunduqca mistik fəlsəfənin
zirvəsinə qalxır.
O, ən
böyük bəşəri və mənəvi dəyərləri
təqdim edirdi.
Əslində
dünya filosoflarının özlərini təsdiq
yollarından biri də Hüseyn Cavid
yaradıcılığının
araşdırılmasından keçəcək.
Yəni
Hüseyn Cavid fəlsəfənin fövqündə bir
dühadır.
Mənim
gözümdə Hüseyn Cavid böyük ideoloq, türkoloq
və Türan sevdalısıdır:
“Turana
qılıncdan daha kəskin, ulu bir qüvvət,
Yalnız,
mədəniyyət, mədəniyyət, mədəniyyət!”
Hüseyn
Cavid Sovet İmperiyasının xüsusi xidmət orqanları
tərəfindən təqib olunsa da ilk dəfə məhz bu
iki misraya görə sorğuya çağrıldı. Və
bu da Hüseyn Cavid kimliyinin fiziki məhvinin
başlanğıcına gətirib çıxardı.
O, sovet
imperiyasının tükünü ürpədən ideoloq
idi!
Mənim
gözümdə Hüseyn Cavid böyük dramaturq,
yazıçı və şairdir.
Mənim
gözümdə Hüseyn Cavid əsl bir Türk kişisidir.
Və mənim
gözümdə Hüseyn Cavid dünyanın ona əsl qiymətini
verə biləcək əxlaqda olmadığı bir
DAHİDİR!
Nigar İsfəndiyarqızı
Kaspi.-2012.-13 noyabr.-S.12.