“Uğurlarımız ildən-ilə artır”

«Kaspi» Təhsil Mərkəzi ilin yekunları ilə bağlı hesabat verdi

“Hər bir tədris ili öz məsuliyyəti, ağırlığı ilə bizi daha da mübariz, daha da çalışqan və daha da məsuliyyətli olmağa sövq edir. İnanırıq ki, bizim nailiyyətlərimiz, işlərimiz və mübarizəmiz həmçinin sizin də mübarizənizdir. Təhsil sahəsi olduğundan bu, hər birimizin çalışaraq irəli aparmaq istədiyimiz işdir».

Bu fikirlər «Kaspi» Təhsil Mərkəzinin 2011-2012-ci tədris ilinin yekunları ilə bağlı hesabat tədbirində səslənib. «Kaspi» TM-nin direktoru Elnur Əliyev tədbirin ənənəvi olaraq hər il keçirildiyini diqqətə çatdırıb.

«Kaspi» TM-nin 2011-2012-ci illərdə həyata keçirdiyi işlər, layihələrlə bağlı filmin nümayişindən sonra «Kaspi» Təhsil Şurasının sədri və TM-nin təsisçisi Sona Vəliyeva çıxış edərək tədbirin keçirilməsində əsas məqsədin yeni dərs ili qarşısında görülən və görüləcək işlər, yeni planlar barədə məlumat vermək olduğunu bildirib.

Artıq 4 ildir yaranan «Kaspi» TM-nin Abituriyent şöbəsinin yeni nailiyyətlərindən danışan şura sədri şöbəni TM-nin ən ağır və gərgin qrafiklə çalışan və daha böyük müəllim kollektivinə malik bölmələrindən biri adlandırıb: «Demək olar ki, sentyabrın əvvəlində toplanan uşaqların hazırlıq prosesi başlayandan biz bu məsuliyyəti dərk etdiyimiz üçün hamımız səfərbər oluruq. Nəticədə bu nailiyyəti bu gün sizin qarşınızda nümayiş etdiririk». S.Vəliyeva qeyd edib ki, Abituriyent şöbəsi 9-10-11-ci siniflər arasında rus və Azərbaycan dilində təhsil alan şagirdlərin respublikamızın daxilində fəaliyyət göstərən ali təhsil ocaqlarına hazırlıq prosesini həyata keçirir: «Hazırlıq prosesi 9 ay müddətində, bəzən qəbul prosesi yubananda daha artıq müddətdə həyata keçirildiyi üçün onun iş prinsipi başqa şöbələrin iş prinsipindən tamamilə fərqlənir. Proqram sırf Dövlət Təhsil Proqramına uyğun olaraq aparılır. Digər tərəfdən, bu proqramı mükəmməl şəkildə həyata keçirən daha bacarıqlı və peşəkar müəllim kollektivi yığılır və onların iş metodunun operativ olması və daha dərin biliklər verməsi nəzərə alınır. Bunu əsas prinsip götürdüyümüzə görə, bu gün mərkəzdə çalışan təxminən 12-13 fəlsəfə və və elmlər doktoru var. Onlar, həmçinin şagirdlərin taleyini həll edən dərsliklərin, test banklarının yazılmasında iştirak edirlər. Bu müəllimlər, həmçinin TQDK-nın ekspert qrupunda çalışırlar. Bizi qane edən kollektivlə çalışırıq”.

S.Vəliyeva 2008-ci ildən başlayaraq 2011-2012 tədris ilinə qədər TM tərəfindən ali məktəblərə qəbul olan abituriyentlərin göstəricisinin 87 faizdən 97 faizə yüksəldiyini diqqətə çatdırıb və bu ilə kimi 1000-dən artıq abituriyentin hazırlıq keçərək həm bakalavr, həm də magistr pilləsi üzrə Azərbaycanın və xarici ölkələrin nüfuzlu ali təhsil müəssisələrinin tələbəsi adını qazandığını qeyd edib: “Bu nailiyyət 97 faizə çatıb. Abituriyent adını qazananların içərisində Kamil Oruczadə adlı tələbəmiz 690 bal toplayıb. Halbuku keçən il ən yüksək balla ali məktəbə daxil olan abituriyentlərimizin göstəricisi 670 bal olub. Bu faktlar onu göstərir ki, uğurlarımız çox sevindiricidir».

Şura sədri Azərbaycanın müstəqil təhsil məkanında ilk dəfə olaraq «Kaspi» TM-nin “Kaspi abituriyent təqaüd paketi”ni təsis etdiyini diqqətə çatdırıb: «Biz sınaq imtahanlarında 675 balı keçən ilk 3 ən yaxşı şagirdə aylıq 250 manat, 650 balı keçən ilk 3 ən yaxşı şagirdə 200 manat, 600 balı keçən ilk 3 ən yaxşı şagirdə aylıq 150 manat təqaüd paketi təsis etmişik. Onu da qeyd edim ki, iki ildir, yüksək balla ali məktəblərə qəbul olan tələbələrimizin əksəriyyəti bizim bu təqaüd paketindən yararlanıb». S.Vəliyeva Abituriyent şöbəsinin dərs vəsaitlərinin yazılması yükünü də öz üzərinə götürdüyünü qeyd edib: «Bu dərsliklər yazılandan sonra Təhsil Nazirliyinin komissiyasına təqdim olunur. Belə ki, «Kimya» və «Tarix» vəsaiti və onların test bankı nazirliyin xeyir-duası ilə çıxıb. Növbəti tədris vəsaitlərimiz – «Kimya», «Fizika», «Riyaziyyat», «Azərbaycan dili», «Ədəbiyyat» və onların test bankı bu yaxınlarda işıq üzü görəcək».

«Kaspi Xaricdə Təhsil» şöbəsinin fəaliyyətinə toxunan şura sədrinin sözlərinə görə, TM xaricdə təhsil, peşə artımı, orta məktəblərdə təhsil alma, müxtəlif tələb olunan səviyyədə ali məktəblərə hazırlıq proseslərinin təşkil olunması və sair işləri öz özərinə götürüb. Belə ki, «Kaspi Xaricdə Təhsil» dünyanın 120-dən çox nüfuzlu universitetləri ilə əməkdaşlıq edir.

S.Vəliyeva TM-nin bu dərs ilindən Azərbaycanda ilk dəfə olaraq həyata keçirəcəyi və Mərkəz tərəfindən maliyyələşəcək sosial layihə haqqında da məlumat verib: “Oxu TV” adlanan bu layihə repetitor yanına getməyə imkanı olmayan 1-11-ci sinif şagirdləri üçün nəzərdə tutulub. Şagirdlər istənilən fənni bu proqramda tapacaqlar. Həmin fənlər respublikanın qabaqcıl müəllimləri tərəfindən tədris edilir. Proqram internet vasitəsilə pulsuz olaraq ictimaiyyətin istifadəsinə veriləcək. Bu, repetitor yanına gedə bilməyən imkansız uşaqlar üçün sərfəlidir. Hər bir övladımız yaradacağımız sayta pulsuz olaraq daxil olacaq. Layihə dekabr ayına qədər istifadəyə veriləcək».

Şura sədri «Kaspi» TM-nin bu kimi modern layihələrin hazırlanmasını bundan sonra da davam etdirəcəyini vurğulayıb: «Çünki təhsil məkanında ilk addımlarımızı «Biz müasir təhsilin elçiləriyik» şüarı ilə atmışıq. Ona görə də beynəlxalq aləmdə baş verən bütün müasir təhsil yeniliklərini Kaspi məkanında görə biləcəksiniz».

Tarix elmləri doktoru, «Kaspi» TM-nin şura üzvü Aslan Xəlilov «Kaspi» TM-nin uğurlarından danışaraq mərkəzdə ilk növbədə səmimiyyətin hökm sürdüyünü vurğulayıb: «Tədris sistemində səmimiyyət əsas məsələdir. Əgər müəllimlər öz biliklərini tələbəyə səmimiyyətlə öyrədirlərsə, o zaman uğur əldə etmək olur. Mən bunu həm də bir valideyn kimi hiss etmişəm». Şura üzvü mərkəzdə abituriyent təqaüd paketinin təsis olunmasını təqdirəlayiq hesab edib: «Sevindirici haldır ki, bu ənənənin əsası «Kaspi» TM-də qoyulub. Bu, imkansız uşaqların təhsil alması üçün gözəl ənənədir». A.Xəlilov Mərkəzdə təhsil sahəsində hiss olunan dinamikanın səbəbini burada fəaliyyət göstərən müəllim heyətinin peşəkarlığı ilə əlaqələndirib: «İnsanlar öz övladlarını arxayınlıqla bu təhsil mərkəzinə etibar edə bilərlər». Şura üzvü həmçinin mərkəzin ilk dəfə olaraq imza atdığı «Oxu TV» layihəsini də müstəqil təhsil məkanında yüksək xidmət və xeyriyyəçilik kimi dəyərləndirib.

Tədbirdə ali məktəblərə daxil olan «Kaspi» TM-nin abituriyentlərinin valideynləri adından çıxış edən Təravət xanım övladlarının bu Mərkəzdə təhsil almasından duyduğu qüruru dilə gətirib: «Bir tələbənin sevinci bir ailənin, bir nəslin sevincidir. «Kaspi» Mərkəzi bizə bu sevinci yaşatdı».

Tədbirin sonunda «Kaspi» TM-nin bu il ali məktəblərə qəbul imtahanlarında yüksək bal topalayan abituriyentlərinə hədiyyələr təqdim edilib.

Təranə Məhərrəmova

Kaspi.- 2012.- 15-17 sentyabr.- S.5.