“Əhməd Şəfəqə siyasət sorulur”

Əhməd Şəfəq: “Bağçalı mənə dedi ki, biz bundan sonra Qarabağda olmalıyıq...”

Yazacam bu görüşü, yazacam...

Yalnız Qurddan yazacam... “abi”mdən...

Əhməd Şəfəq Bakıdadır.

Mən şanslı biriyəm. Çox sevdiyim bir sənətçinin dostu olmaq, onun “kardeşim” kəlməsini qazanmaq çox gözəl bir duyğudur.

Əhməd Şəfəq - haqqında düşünmədən tərif deyə biləcəyim, heyranlığımı açıq-açıq bildirdiyim bəlkə də yeganə adamdır. Yanlış anlamayın, bu fanatlıq deyil, bu, Əhməd Şəfəqin Azərbaycan sevgisinə mənim verdiyim bir qarşılıqdır. Ruhu olan hər bir kəs anlayar ki, onun musiqisində, nəğmələrində ürək var. Baxın, mən Azərbaycan üçün döyünən o ürəyin aşıqiyəm.

Ömrüm boyu unutmayacağım görüşlərin içərisindəyəm. Onunla bərabər yürümək, onunla həmsöhbət olmaq, qollarını açıb qardaşım deyə sarılmaq çox möhtəşəm bir duyğudur. Amma bunların içərisində elə bir an vardı ki, o an Nigarın dəliliyinin başına hava gəldiyi andı. Əhməd Şəfəq sevdalıları “Olsun” u bilir, yəqin. O “Olsun”u ki, Əhməd Şəfəqin Türkiyənin Yalova ilçəsində verdiyi konertdə bir gecə boyu dinlətmişdilər mənə. Türkiyədən Bakıya zəng edib danışan “abi”m mənə bu xoşbəxtliyi də yaşatmışdı. (Bu imkanı yaradanlara təşəkkür edirəm).

Bax, həmin o “Olsun”u balaca bacısının gözlərinin içinə baxa-baxa oxudu Əhməd abim. Hər kəsin həsədlə baxdığı bir məqamda o mahnı onun ifasında mənim üçün oxunurdu və o an mənim ruhum Allahın yanındaydı (məni elə bu ruhum öldürməyəcəkmi...?) olsun bə abim, olsun!!!

Ola bilsin ki, Əhməd Şəfəqin musiqiləri, nəğmələri hansısa ölçü-biçidə deyil. Mənim gözümdə onun sevilməyinin səbəbi də məhz budur. Əhməd Şəfəqin musiqiləri yazılmamış qanunlara, biçilməmiş sərhəddlərə dayanır. Milləti millət edən də elə bu qanunlar deyilmi?

“Abi”m...

Nə yaxşı varsan...

Nə yaxşı bizimsən...

Saat gecənin üçü, “Olsun”u dinləyirəm və sənə səndən yazıram. Ruhumuzun başına köz kimi basıb dağladığımız yaralarımıza su səpən ruhun, səsin, ürəyin, Azərbaycan adlı sevdan var olsun!

Müsahibim Əhməd Şəfəqdir. Ruhuyla, varlığıyla Azərbaycan qoxuyan Əhməd Şəfəq...

Onunla bu dəfə fərqli mövzulardan danışacağıq. Amma yenə də sevdamızdan yayınmadan əksinə bir az daha ağrılı şəkildə bizi narahat edən məqamlardan söhbət edəcəyik. Mən bilmirəm, necə alınacaq amma bu dəfə Əhməd bəyə siyasətdən soruşacam:

- Əhməd bəy, bəlkə bir az “Fərqimiz olsun”?...

- Hə, Nigar, bu, mənim bir ay yarım bundan əvvəl buraxılan yeni albomumun adıdır. “Fərqimiz olsun” mənim musiqi həyatımda sayca onuncu albomumdur. Allaha şükürlər edirəm ki, bu albomu da hazırlamaq üçün lazımi istedadı və cəsarəti mənə verdi. Elə onun yardımıyla da yeni mahnılarla, yepyeni əsərlərlə bu diski də hazırlayıb çatdırdım.

- Hansı mahnılar yer almaqdadır bu diskdə?

- On bir əsərlik bu albomda da ənənəmə sadiq qaldım. Öz mahnılarımla yanaşı mənə göndərilən və mənim çox sevdiyim şeirlərə də musiqi bəstələyib oxudum. Bir də, deyəsən, Azərbaycanın zəngin musiqi xəzinəsindən o gözəlim parçaları öz albomuma daxil etmək məndə bir adət şəklini alıb. Türkiyədə də çox sevilən bir mahnı “Əziz dostum” u səsləndirmişəm. Bir də mənim gənc sevənlərimə tarixi hadisələri bir obraz kimi, bir məzmun kimi, bir fəlsəfə nöqtəsində axtarmaq üçün üzərində çalışdığım əsərlər olmuşdur. Bunlardan biri də 1926-cı ildə Qarsda Mustafa Kamalın üzünə qarşı azərbaycanlı soydaşlarımızın oxuduğu “Hoş gəlişlər ola, Mustafa Kemal paşa” adlı əsəridir. Bu albomda məhz bu mahnını səsləndirmək də mənim üçün çox sevindiricidir. Bu, çox gözəl bir hissdir. Albomun digər mahnıları içərisində, mənim musiqi arxivimdə klassik olan bir Sabir Rüstəmxanlı şeirinə musiqi bəstələdim. Eyni zamanda Anar Yusifoğlu imzalı bir şeirə musiqi (“yar insafına karmı yağdı”. red.) bəstələdim və yenə Azərbaycanın tanınan, sevilən millət vəkili Qənirə xanım Paşayevanın bir sevgi şeirini bəstələdim (“bana elveda deme”. red.) ki, o da bu albomda yer aldı. Dolayısı ilə bu albom həm öz musiqilərimin yer aldığı, həm də kənardan aldığım, bəyənib seçdiyim şeirlərə bəstələdiyim musiqilərdən ibarətdir. Və bu gün Azərbaycanda olmağımın da səbəbi bu albomdakı bir neçə mahnılara klip çəkməkdir.

- Əhməd bəy, sizin tele layihələriniz də var, deyəsən...

- Bəli, Türkiyədə həftədə bir gün “Şafak söhbətləri”verilişim efirə gedir. Həftənin başqa bir günü də “Sözü-musiqisi Əhməd Şəfəqin” televiziya verilişim var.

-Yeniliklər bununla bitirmi? Bəs “Küsena”?

- Yeni bir yayın evi açdım. İsmi “Küsena”. Əslində, bu, mənim çoxdankı arzum idi. İllərdən bəri arzuladığım, illərdən bəri istədiyim bir işdi. Çünki cocuqluğumdan, gənciliyimdən üzübəri kitaba çox yaxındım. Yazmaq mənim həyatımın çox önəmli bir parçasıydı. Oxumaq məni bütövləşdirən həyatı əhəmiyyətli bir əyləmdi. Dolayısı ilə bir iş görəcək olsam, bir biznes quracaq olsam ancaq bu cür, çox sevdiyim bir işin biznesini edə bilərəm deyə düşündüm və “Küsena”nı qurdum. Hələlik yeni yaranıb. İlk olaraq öz kitablarımı çap etdirdim. Yeni yazdığım kitabların da hazırlıqlarını aparıram. Başda Sabir Rüstəmxanlının əsərləri olmaqla Azərbaycanın sayılıb-seçilən ədəbiyyat adamlarının kitablarını çap etdirəcəyik. Çox yaxında hazırlıqlar tamamlanacaq. Niyyətim Azərbaycanda yeni nəsil ədəbiyyat nümayəndələrinin də əsərlərini çap etdirib onları Türk dünyasına tanıtmaqdır. “Küsena” yayınlarının belə bir missiyası olacaqdır.

-Nə deməkdir Küsena?

-Küsmüş Asena.

-Əhməd Şəfəqə siyasət soruşmaq olarmı?

- Əhməd Şəfəqə siyasət soruşmaq əlbəttə olar. Bilirsizmi, siyasət mənim üçün sadəcə peşəkar politikaçıların məşğul olduğu bir iş deyil, siyasət eyni zamanda bir vətəndaşlıq davranışıdır. Bütün vətəndaşları hər zaman bir sual düşündürməlidir, mən necə idarə olunuram? Məni idarə edənlər uğurludurlarmı? Bunu görə bilən insanların mütləq siyasətlə maraqlanmaları lazımdır. Çünki siyasət ilk növbədə necə idarə olunduğu ilə maraqlanmaqla başlar. Bu, bu ifadənin özündə vardır.

Siyasət , söz kökü etibarilə “seyis” sözündən gəlir,

“seyis”- hər hansı bir şeyə baxmaq və onunla maraqlanmaq, diqqət göstərmək deməkdir. Diqqət göstərdiyin hər nə isə onu inkişaf etdirmək, böyütməklə əlaqədardır. Bu, Şərqdə belədir amma Qərbdə siyasət “poli etika” sözündən götürülüb və bir cəmiyyəti idarə etmə sənəti olaraq qəbul olunur.

Fəqət, günümüzdə siyasət sadəcə cəmiyyəti idarə edənlərin deyil, idarə edilənlərin də cəmiyyətdə baş verənləri və dünyadakı prosesləri sorğuladığı bir sahədir. Bu səbəblə Əhməd Şəfəq necə idarə olunduğu ilə maraqlanır, çünki Əhməd Şəfəqin ilk növbədə maraqlandığı əsas problem vətəndaş olma problemidir. Yaxşı bir vətəndaş olmağa çalışır, yaxşı vətəndaşların da siyasətlə maraqlanmaq kimi bir məcburiyyətləri vardır. Bəzilərini, bu, maraqlandırmaya bilər, kimiləri siyasətlə ünsiyyət içərisində olmaya bilərlər. Onların da qəbul etməsi gərəkdir ki, siyasət insanların günlük məişətləri ilə ilgilidir- bir ölkədə, bir məmləkətdə çörəyin qiyməti də siyasətdən asılıdır, təhsilin, maarifin, təhsil imkanlarının necə olmağı da siyasətdən asılıdır. Bir vətəndaş bunlarla maraqlanırsa məhz o əsl vətəndaşdır. Bir də biz hər kəsi layiq olduğu şəkildə idarə edərik düşüncəsi də bizim çiynimizə bir məsuliyyət yüklər. Bu baxımdan, təbii ki, Əhməd Şəfəqdən siyasət sorulur.

- Əhməd bəy, madam ki, siyasətdən danışırıq, gəlin o zaman Milliyyətçi Hərəkat Partiyasının indiki durumunu da soruşaq sizdən. MHP-dəki son olaylara sizin münasibətiniz necədir?

- Milliyyətçi Hərəkat Partiyasının konqresdə bulunması əlbəttə önəmlidir. Baxın, bu, bir həqiqətdir ki, mən Millətçi Hərəkat Partiyasının üzvü deyiləm. Bu partiyaya könlümlə, idrakımla bağlı olan bir insanam amma partiyanın siyasi prosesləri içərisində yer almıram. Çünki, mən bir vətəndaşam və mənim sosial, ictimai fəaliyyətim siyasətdən asılı deyildir. MHP türk millətinin xoşbəxtliyini, güclü olmasını istəyən, Türk dövlətinin daimi olmağı məsələsində çox böyük ideallar, çox böyük məfkurələr daşıyan bir partiya olduğu, məhz bu anlamda mənim maraqlarımı təmin edən bir partiya olduğu üçün Millətçi Hərəkat Partiyası ilə maraqlanıram. Mənim bu bağlılığım tamamilə yaxşı vətəndaş olmağımla əlaqədardır. Bu anlamda Koray Aydının hər kəsin diqqətini özünə cəlb edən bir formada konqresə hazırlaşdığını görürük. Onu da qeyd edim ki, Koray bəy çox dəyərli bir insandır. 1999-da Türk millətinin başına gələn o böyük fəlakətdə Bayandırlıq bakanı olaraq çalışan çox dəyərli bir dövlət adamıdır. Eyni zamanda mənim də şəxsən qiymət verdiyim, görüşdüyüm bir ağabəyimdir. Koray Aydın nazir olaraq Türk millətinə xidmətlərində özünü isbat etmiş bir adamdır. Amma və lakin mən siyasəti sadəcə elementar bir iş olaraq görmürəm. Siyasət eyni zamanda mənim üçün bir fəlsəfədir, məfkurədir. Bu məfkurə biliklə, bilgiylə edilirsə şübhəsiz bir dəyər qazana bilir. Bu amillərin xaricindəki siyasət konjektural bir siyasətdir və bu, mənim əhəmiyyət verdiyim bir siyasət modeli deyildir. Bunu hər kəs edə bilər. Konjektural siyasət belə bir şeydir, mən bu gün varam və müxtəlif hadisələrlə rastlaşıram, bu hadisələrə qarşı mövqe tuturam. Konjektural siyasət bu deməkdir. Hadisələrin öncədən fərqinə varmaq, bunu edərkən də bir metodologiyayla bir məfkurəylə hərəkət etmək - baxın, bu, mənim idealizm siyasətimdir. Ki, bu siyasətin Türkiyədəki ən böyük obrazı da Dövlət Bağçalıdır. Mən məhz bu səbəbdən Dövlət Bağçalı modelini qiymətləndirirəm, dəyər verirəm. Təkcə bir partiyanın böyüyü olaraq deyil, onu eyni zamanda Türk dünyasının bir böyüyü olaraq da qəbul edirəm. Siyasi xəttin sadəcə bir partiya ilə adlandırılması yetərli bir izah olmaz. Türk milliyyətçiliyinin fikir sisteminin, siyasi zəmindəki, həm teorik, həm pratik anlamdakı obrazıdır Dövlət Bağçalı. Bəli, Koray bəyi çox sevirəm, çox hörmət etdiyim bir insandır amma siyasətə gəlincə - “Kutadqu-bilik” əsərində öyüd verilmiş olan siyasət kimlər üçün, hansı üsullarla aparılır? Bilgiylə, ərdəmlə, kültürlə, bütün bunların tərkibi nöqtəsində bir millət, bir millətə xidmət onları necə güclü edər və bir dövlət necə bir güclü dövlət olur, bütün bu elementləri öz aləmində tərkib edən bir siyasət fəlsəfəsinə sahib olduğu üçün Dövlət Bağçalının siyasətini çox önəmsəyirəm.

-Bağçalının Azərbaycana münasibəti. Deyə bilərikmi ki,Türkiyə siyasətində Azərbaycana ən yüksək münasibət Bağçalıdan, MHP-dən gəlir?

-Şübhəsiz ki, MHP-dən gəlir. Çünki MHP-ni digər partiyalardan fərqləndirən Türk dünyası ilə maraqlanmasıdır. MHP-nin Türkiyədəki digər siyasətlərdən fərqi də budur zatən. Türk siyasətini hesabsız, mənfəətsiz, mənafesiz bir formada, sevgiylə təmsil edər. Yəni Türk dünyası siyasəti Türk dünyasının bütövlüyü, xoşbəxtliyi, güclü olmağı MHP-nin təməl siyasətini təşkil edir. Digər partiyaların siyasətinə diqqət etsək, götürək elə AK partini, o siyasət daha çox Orta Doğu mənşəlidir, ərəb ölkələrinə istiqamətləndirilmiş, ərəb ölkələri ilə birlikdə beynəlxalq səviyyədə siyasət aparan bir siyasi fiqur olaraq görürük Ak Partini. Cümhuriyyət Xalq Partiyasının siyasəti isə Qərbi Avropa siyasət modelidir. Amma Türk dünyasına yönəlik, Anadolu ilə Türküstanın tərkibinə dayalı, baxın, bu, çox önəmlidir, siyasət modeli MHP-də təmsil olunur.

-Bunu şəxslərlə eyniləşdirsək, Koray Aydınmı, Dövlət Bağçalımı?

- Dövlət Bağçalıdır. Mənə şəxsən özünün demiş olduğu bir fikri sizə söyləyim: “Əhməd bəy, biz bundan sonra Qarabağda olmalıyıq”. Onu da qeyd edim ki, mən bu fikri mətbuatda ilk dəfə dilə gətirirəm. Böyük bir ehtimalla önümüzdəki günlərdə Bağçalı Azərbaycanın işğal edilmiş torpaqlarının sərhəddlərinə səfər edəcək. Bilirsiniz, onun Alican sərhəd qapısına gəlib orda etdiyi çıxışı Azərbaycanın işğal edilmiş torpaqlarının geri qaytarılması mövzusundakı qətiyyətini bütün dünya artıq bilir. Türk dünyasının harada bir ağrılı, yanğılı yeri varsa orda Dövlət Bağçalının həssas davranışı vardır və türk dünyasının ağrılı yerləri nöqtəsində hər zaman ürəyinin çiyninə bir məsuliyyət götürən çox qiymətli bir siyasətçidir, Dövlət Bağçalı.

-Bu sferada Koray Aydının şansı nə qədərdir?

- Onu mən deyə bilmərəm. Ona Millətçi Hərəkat Partiyasının Gənəl Kurulu (İdarə Heyəti) qərar verəcəkdir. Mən bir sənətçi olaraq o kurula müdaxilə edə bilmərəm.

- Əhməd bəy, son günlər Azərbaycan gündəmini bir video çarx narahat edir. Baş nazir Ərdoğanın ortaya atmış olduğu və haqlı-haqsız hər kəsi qıcıqlandıran bu görüntülərdə məhz Türkiyənin geriyə göndərdiyi 146 nəfərin elə onların gözü önündə güllələnməsindən bəhs edilir...

- O, sadəcə Ərdoğanın çıxışıydı, təbii, buraya video olaraq gəldi. Ərdoğan məlum olduğu kimi, Suriyə məsələsi ilə əlaqədar Cümhuriyyət Xalq Partiyasının liderinin ona etdiyi təkidə qarşı dediyi”nə edək, biz də İnönünün elədiyi kimi, Azərbaycandan ölkəmizə sığınan insanları gerimi göndərib, rusun qarşısında onların necə güllələndiyinimi seyr edək?” kimi bir çıxış etdi. Təbii ki, bu, bizim ağrılı yerimizdir. 1945-ci ildə 2-ci Dünya Müharibəsinin sonlarında kommunizmin, rus imperiyasının güclü olduğu bir vaxtda sərhəddən 146 nəfərlik bir soydaş tayfası Türkiyəyə sığınmış və Türkiyədə qalmaq istədiklərini bəyan etmişlər. O dönəmdə İsmət İnönü cümhurbaşkanıydı və çox təmkinli siyasəti ilə 2-ci Dünya müharibəsində savaşa qoşulmamış, kənardan müşahidə edərək heç bir tərəfdə olmayaraq Türkiyənin müharibəyə daxil edilməsinin qarşısını almışdır. Bu müddət ərzində kommunizm rejimli rus imperiyasının II Dünya müharibəsindən qələbəylə çıxması İnönünü təmkinli olmağa vadar etmişdir. Əlbəttə, bu soydaşları qorumaq, mühafizə etmək əslində bir Türkiyə dövləti prezidentinin vəzifəsidir. Könül istərdi ki, baş nazir Ərdoğan bu sferadan deyil, başqa bir tərəfdən yanaşaydı bu məsələyə.

Söhbətləşdi: Nigar İsfəndiyarqızı

Kaspi.- 2012.- 15-17 sentyabr.- S.12.