“Ömrümü
“Tənha ana” mahnıma bənzədirəm”
Şəfiqə Axundova: “İndiki
mahnılar atasız-anasız, “bic” dünyaya gələn
uşaqlara bənzəyir”
XXI əsrdə
Üzeyir Hacıbəylinin yeganə yadigarı və
davamçısı “Şöhrət” ordenli Xalq artisti Şəfiqə
Axundovadır. 88 yaşlı bəstəkar Şəkidə
anadan olub. O, Asəf Zeynallı adına Bakı Musiqi Məktəbində
oxuyarkən Üzeyir Hacıbəylidən dərs alıb. Azərbaycan
Dövlət Konservatoriyasını bəstəkarlıq
ixtisası üzrə bitirən Şəfiqə xanım
"Gəlin qayası" operası ilə Şərqin ilk
opera yazan qadın bəstəkarı kimi adını tarixə
həkk edib. Bir çox operetta, süita, xor üçün
silsilə əsərlər müəllifi olan sənətkar
"Leyla", "Bəxtiyar ellər", “Nədən
oldu”, “Gözlərimin işığı sənsən”,
“Neyçün gəlməz”, “Bağışla” kimi 600-dən
çox mahnı və romans, eləcə də 60-dan çox
tamaşanın musiqi müəllifidir. Məşhur bəstəkar
ustadı Üzeyir Hacıbəyli, eləcə də Azərbaycan
musiqisi haqqında fikirlərini “Azadinform”la
bölüşüb.
-
Üzeyir Hacıbəylini necə
xatırlayırsınız?
-
Üzüyumşaq, mərhəmətli, istiqanlı bir
gözəl insan idi. Onun nurani siması heç vaxt mənim
yadımdan çıxmaz. İnsanlara münasibətdə
çox mehriban idi. Hər kəsə həm dahi insan, həm
də sənətkar olmaq nəsib olmur, Üzeyir bəy
seçilənlərdən idi. Onun ilk
tanışlığımız günü mənə elə
gəldi ki, sanki imam nəvəsini görürəm, çox
işıqlı, parlaq gözləri vardı. Onun
qarşısında ilk dəfə öz yazdığım
“Bala” mahnısını ifa etdim. Çox bəyəndi.
-
Üzeyir bəy tələbələri ilə münasibətdə
necə idi?
-
Heç vaxt onda sərtlik görmədim. Üzeyir bəy tələbələrinə
çörək yedirirdi. Müharibə vaxtı idi,
çörək tapılmırdı, dəfələrlə
cibinin pulunu tələbələrinə xərcləyib. Bir
gün halsız idim, dərsə gəlib piano arxasına
keçəndə - “Şəfiqə, mənə bax!” – dedi,
baxdım və soruşdu ki, niyə rəngim qaçıb?!
Biz də çox çətin vəziyyətdə
yaşayırdıq, tələbə idik, bir gün tapırdıq,
bir gün tapmırdıq, əlbəttə ki, çətinliyimiz
simamıza da yansımışdı. Üzeyir bəy
bütün tələbələrinə qarşı belə
diqqətcil, həssas, mərhəmətli idi, hamının dərdi
problemi ilə maraqlanır, dərhal onu həll etməyə
çalışırdı.
-
Üzeyir bəy Azərbaycan musiqisinin gələcəyini necə
görürdü?
- O,
daim musiqimizi inkişaf etdirməyə
çalışırdı. Bütün musiqi janrlarında
milli köklərimizi əsas tutmağına baxmayaraq, hər
zaman tələbələrinə dünya musiqisi ilə də
maraqlanmağı məsləhət görürdü. Təsadüfü
deyil ki, Üzeyir bəy Konservatoriyaya bir çox xarici ölkədən
məşhur musiqiçiləri dəvət edirdi.
-
Onun sizə dediyi hansı söz qulaqlarınızda
sırğadır?
- Hər zaman deyərdi ki, insan olmaq lazımdır.
Hər şeydən əvvəl insanlıqdır, sənətkar
olmaq asandır, amma insanlıq çox vacibdir.
- İlk bəstənizin dinləyicisi kim
olub?
- Elə Üzeyir
bəyin qarşısında
ifa etdiyim “Bala” mahnısı ilk əsərimdir, 17 yaşımda
yazmışam. Bu mahnı
Azərbaycanda və Rusiyada çap edildi. İkinci Dünya müharibəsində
öz balasını müharibəyə yola salan anaya həsr
edilib. Bala həsrəti, onun
geri dönməməsi
ananı yaralayır və ana mənən
bu dünyadan köçür. Böyük bacım
Zümrüdün həyat
yoldaşı yaradıcı
insan idi, hər zaman onların evlərinə tanınmış mədəniyyət
xadimləri, şair və yazıçılar
yığışardı. İlk əsərlərimin dinləyiciləri
də elə onlar olub. Sonralarsa Üzeyir Hacıbəyli və digər müəllimlərim oldu.
- Sonuncu əsərinizi nə zaman bəstələmisiniz?
- 2009-cu ildə Xalq şairi Bəxtiyar Vahabzadənin “Sevgi ölmür” şerinə
mahnı bəstələmişəm.
Müğənni Eldar Ələkbərov
çox gözəl ifa edib. Hətta Bəxtiyar Vahabzadə də dinləmişdi və çox kövrəlib “Şəfiqədir
də......” demişdi.
Bəxtiyar Vahabzadə mənim
yaradıcılığımı çox yüksək qiymətləndirirdi. Mahnılarımın yarısından çoxu onun şeirlərinə bəstələnib. Qəlbən bir-birimizə çox yaxın idik, sanki mənim ürəyimdən keçən
sözləri o qələmə
alırdı. Biz həm də Şəkidə qonşu idik, sonralar dostluq münasibətlərimiz
yarandı və bu bizim birgə
yaradıcılığa başlamağımıza
səbəb oldu.
- İndiki Azərbaycan
musiqisinə neçə
qiymət verərdiniz?
- Mən milli ruhda yazılan musiqiləri dinləmək
istəyirəm. Amma indi
kökümüzə bağlı
olan mahnılar yoxdur. İndiki mahnılar atasız-anasız,
“bic” dünyaya gələn uşaqlara bənzəyir. Bir gün
oxunur və sonra yaddan çıxır.
“İntizar”, “Gözlərimin
işığı sənsən”,
“Nədən oldu”, “Neyçün gəlməz”i
40-50 il bundan
əvvəl yazmışam,
amma hələ də oxunur. Hər dəfə müğənnilərin ifasında
bu mahnılarımı
eşidəndə özümü
çox xoşbəxt
hiss edirəm.
- Müasir Azərbaycan
musiqi sənətində
nə çatmır?
- Səhərdən-axşamadək televiziyaya baxıram. Tək-tük hallarda xoşuma
gələn mahnıya
rast gəlirəm, ürəyimə yatır.
Amma televiziyaya baxandan sonra da bütün
günü fikir məni götürür ki, Azərbaycan musiqisinin axırı necə olacaq? Niyə Fikrət Əmirovlar, Qara Qarayevlər, Cahangir Cahangirovlar yaranmır? Onlar bir dövr idi, gəldilər və getdilər, bəs sonra, bəs indi? Sadaladığım istedadlı və
hərtərəfli musiqiçilər
kimi ümidverici bəstəkarlar görmürəm.
“Gəlin qayası”
operasını 8 ilə
yazdım. Aylarla balamı
atıb gedib Moskvada qalırdım, bütün günüm arxivlərdə, məşhur
musiqiçilərlə məsləhətləşməklə
keçirdi. Arif Məlikovla
uzun müddət bu opera üzərində çalışdıq. İncəsənət yolunda belə çalışmaq-vuruşmaq yoxdur
indi. Hamı pul, maşın
yaxşı şərait
arxasınca qaçır.
- İfa edilməyən
mahnılarınız varmı?
- Bu yaxınlarda bacım Rəfiqə ilə arxivimi gözdən keçirirdim, çox sayda işıq üzü görməyən
mahnım var. Arxivimə heç baxmaq istəmirəm,
70 ildir yazıram, artıq çox yorulmuşam. Bəzi
mahnılarımsa heç çap olunmayıb, əlyazmada
qalıb. Nailə Mirməmmədli ilə yaxın dostuq, ondan
xahiş etmişdim ki, bu mahnıların aqibəti ilə
maraqlansın, lakin onun da ailəsində faciə oldu,
başı qarışdı, mən də həvəsdən
düşdüm, soyudum. Heç müğənnilər də
mənə oxunmayan mahnılarım üçün müraciət
etmirlər. Çoxları artıq yazmadığımı
düşünür, amma hələ oxunmayan
mahnılarımdan da xəbərləri yoxdur. Yalnız
Gülyaz və Gülyanaq bacıları indiyədək səslənməyən
mahnılarımı oxumaq üçün mənə
müraciət etdilər.
-
Mahnılarınızın demək olar ki, hamısı lirik,
məhəbbət mövzusundadır. Sevgini tapmayanda belə
mahnılar yaranır, yoxsa tapanda?
- Mənim
mahnımda deyildiyi kimi “Sevgi ölmür”. Gözəl sevgi
daim ürəkdə yaşayır. Lakin sevgini tapmayanda o, daha
çox mahnılarda yaşanır (gülür).
-
Peşman olduğunuz əməliniz varmı?
- Xeyr.
Baxmayaraq ki, bir çox qadın kimi geniş ailəm,
övladlarım olmadı, amma çox xoşbəxtəm. Sənəti
hər şeydən üstün tutdum, həyatımı
musiqiyə qurban verdim. Xalqım mənimlə fəxr edir, mən
də onların mənə olan hörməti və sevgisi ilə
fəxr edirəm. Çox şadam ki, bəstəkar oldum və
canımı incəsənətə qurban verdim.
-
Ömrünüzün indiki çağını hansı əsərinizə
bənzədirsiniz?
-
(kövrəlir) “Tənha ana” mahnıma. Baxmayaraq ki, bacım,
onun övladları, nəvələri hər zaman mənim
yanımdadırlar, qayğı göstərirlər, amma hər
zaman özümü tənha hiss edirəm. Oğlum məni tənha
qoydu...
- Sizin mahnıları dinləyib ağlayanlar var.
Maraqlıdır, ağlayaraq bəstələdiniz mahnılar
olubmu?
- Bəli,
“Lay lay” və “Gözlərimin işığı sənsən”
mahnılarımı yazanda da, hər zaman onları dinləyəndə
də ağlayıram. Bu mahnılar ən daşürəkli
insanları belə kövrəldir. Hər zaman övladım
gözlərim qarşısına gəlir (kövrəlir).
- Şerə
baxıb musiqi yazırsınız, yoxsa musiqini
yazırsınız, sonra ona uyğun şeir
tapırsınız?
- Mütləq
birinci şerə baxıram, əgər şeir məni
tutursa, ürəyimə yatırsa, sonra musiqini bəstələmə
başlayıram. Şeir məni dindirməsə, özünə
çəkməsə, musiqi yaza bilmərəm, musiqilərim
şeirdən doğub.
Kaspi.- 2012.- 25 sentyabr.- S.11.