Məntiqi seçim

Prezident İlham Əliyevin növbəti dəfə Azərbaycan jurnalistlərinin dostu seçilməsi üçün məntiqi əsaslar var

Prezident İlham Əliyevin növbəti dəfə Azərbaycan jurnalistlərinin dostu seçilməsi heç də təsadüfü deyil. Dövlət başçısı 3 il əvvəl - 2010-cu ildə də ölkədəki qələm sahibləri tərəfindən «Jurnalistlərin dostu» seçilmişdi. 2010-cu il dekabrın 1-dən 20-dək “RUH” Azərbaycan Jurnalistlərinin müdafiə komitəsi “Jurnalistlərin dostu” mükafatının qalibini müəyyənləşdirmək üçün KİV və Jurnalist təşkilatları arasında sorğu keçirib, sorğuda 30 gündəlik, 19 həftəlik qəzet, 11 informasiya agentliyi, 13 jurnalist təşkilatı, 8 xəbər portalı, 7 televiziya və 3 radio kanalı, ümumilikdə 93 KİV iştirak etmişdi. Sorğuda iştirak edən Kütləvi İnformasiya vasitələrinin 81 faizi Prezident İlham Əliyevi “Jurnalistlərin dostu” mükafatına ən layiqli namizəd hesab etmişdi.

Üstündən 3 il keçəndən sonra Azərbaycan mətbuatının Prezident İlham Əliyevə dost münasibətinin dəyişmədiyi, yenə də əvvəlki kimi qaldığı məlum oldu. İlham Əliyev yenidən “Jurnalistlərin dostu” seçildi.

Biz jurnalistlər İlham Əliyevin prezident kimi qayğısını hər addımbaşı hiss etməkdəyik. Özü də bu qayğı ildən-ilə artan templə davam etməkdədir. Mütəmadi olaraq aradıcı fəaliyyəti ilə fərqlənən jurnalistlərə fəxri adların verilməsi, onların mənzil-məişət şəraitinin yaxşılaşdırılması ilə bağlı atılan addımlar, jurnalistlər xüsusi binanın təmənnasız olaraq, tikilib istifadəyə verilməsi, yeni binanı təməlinin qoyulması, obyektiv və qərəzsiz prinsiplər əsasında fəaliyyət göstərən media qurumlarının cəmiyyətin ictimai institutu kimi fəaliyyətinin təqdir edilməsi Prezident İlham Əliyevin gerçəkdən mətbuatın, medianın yaxın dostu olduğunu bir daha əyani şəkildə sübut edir. Prezident İlham Əliyevin 3 il əvvəl - 2010-cu ildə media mənsubları arasında keçirilən sorğuda "Jurnalistlərin dostu" seçilməsi onu göstərir ki, Azərbaycan mediası dövlət başçısının səmərəli, uğurlu, bütün digər fəaliyyət sahələri ilə yanaşı mətbuatın davamlı inkişafına yönələn addımlarını, fəaliyyəti yüksək obyektivlik prizmasından qiymətləndirməyi bacarır, prinsipial məqamlarda tərəfsiz, qərəzsiz, tam obyektiv olduğunu hər zaman isbatlayır. Baş verənlər onu göstərir ki, Azərbaycan medianın demokratik inkişafı, azad mətbuatın təsisatlaşması böyük, əhəmiyyətli uğurlara nail ola bilib.

Prezidentin bu nominasiyada növbəti dəfə qalib gəlməsi təsadüfi sayılmamalıdır. Bunu şərtləndirən ciddi arqumentlər var.

Həm 2010-cu ilə qədər olan dövrdə, həm də ondan sonrakı dövrdə medianın inkişafı, jurnalistlərin sosial vəziyyətinin yaxşılaşdırılması istiqamətində görülən sistemli işlər artıq konkret nəticələr verməkdədir.

Bir müddət öncə dünyadakı dəyişikliklər internet mediasının inkişafı ilə əlaqədar çətin duruma düşən yazılı mətbuat dövlətin ciddi himayəsini hiss etməkdədir. Prezident yanında KİV-in İnkişafına Dövlət Dəstəyi Fondu vasitəsilə gündəlik nəşr olunan, ictimai rəyə təsir imkanı olan qəzetlərə təxminən 100 min manatlıq yardım edilir. Sirr deyil ki, qanunların liberallaşdırılması və beynəlxalq standartlara uyğunlaşdırılmasına, davamlı dövlət dəstəyinə baxmayaraq, milli mətbuatın problemlərini tam həll etmək mümkün olmamışdı. Qəzet və jurnalların maddi-texniki bazasının zəifliyi, jurnalist peşəkarlığının aşağı səviyyədə olması, yeni informasiya-kommunikasiya texnologiyalarının imkanlarından yetərincə istifadə edilməməsi, cəmiyyətlə, dövlət orqanları ilə kütləvi informasiya vasitələri arasında əməkdaşlığın zəif olması, jurnalistlərin sosial müdafiəsi sahəsində problemlər, habelə dövlət və cəmiyyət üçün prioritet təşkil edən məsələlərin həllində kütləvi informasiya vasitələrinin potensialından səmərəli istifadə olunmaması problemləri açıq şəkildə özünü büruzə verirdi. Bu problemləri görən Prezident İlham Əliyev Azərbaycan mediasının inkişafı məsələlərinə konseptual yanaşma təşəbbüsü ilə çıxış etdi və müvafiq tapşırıqlar verdi. Nəticə etibarilə 2008-ci ildə kütləvi informasiya vasitələrinin inkişafına dövlət dəstəyi Konsepsiyası hazırlandı və təsdiq edildi, 2009-cu ildə isə KİV-lərə dövlət dəstəyinin həyata keçirilməsi məqsədilə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu təsis olundu. Bu fondu yaratmaqda məqsəd milli mətbuatımız sürətlə inkişaf edən, zənginləşən, müasirləşən cəmiyyətimizin tələblərinə cavab verməsini, vətəndaş cəmiyyəti quruculuğunun fəal iştirakçısına çevrilməsini, ümummilli problemlərimizin həllində Azərbaycan dövlətinə, ictimaiyyətimizə yardımçı olmasını təmin etməkdir. Digər tərəfdən, Fond fəaliyyətə başladıqdan sonra müxtəlif dövlət orqanları ilə birgə layihələr həyata keçirib və təbii olaraq jurnalistlərimiz bu layihələrdən bəhrələniblər.

Təbii olaraq, mətbuat orqanlarına ayrılan vəsait jurnalistlərin sosial müdafiəsinin gücləndirilməsinə, medianın maddi-texniki bazasının möhkəmləndirilməsinə, KİV-lərin informasiya-kommunikasiya texnologiyalarından bəhrələnməsinə, dövlət orqanları ilə mətbuat arasında əlaqələrin güclənməsinə xidmət edir.

Fondun ayırdığı vəsaitlər hesabına Azərbaycanın media bazarı tədqiq edilir, mövcud problemlər müəyyənləşdirilir, onların həlli ilə bağlı səmərəli təkliflər irəli sürülür. Ölkənin aparıcı jurnalist təşkilatları bu prosesdə fəal iştirak edirlər.

Ötən illər ərzində Azərbaycanda jurnalistlərin orta aylıq gəlirləri də artmaqdadır. Fondun mütəmadi olaraq keçirdiyi fərdi jurnalist müsabiqələri də bu mənada qələm sahiblərinin əlindən tutmaqdadır. Məhz Fondun dəstək verdiyi layihələr jurnalistlərin innovativ ideyalarını təqdim etməsində, peşəkar jurnalist prinsiplərinin möhkəmlənməsində, həm də yeni ideyaların mediaya ötürülməsində vacib rol oynayır. Fondun Təhsil, Rabitə və İnformasiya Texnologiyaları, Ekologiya və Təbii Sərvətlər və digər nazirliklərlə, dövlət orqanları ilə keçirdiyi müsabiqələrin qalibləri olmuş jurnalistlər yüksək məbləğdə mükafat alıblar.

Bu il 156 jurnalist dövlət vəsaiti hesabına tikilən binada mənzil alıb. Bu il iyulun 22-də bununla bağlı keçirilən mərasimdə yeni binanın da təməli atılıb. Budəfəki binada mənzillərin sayının daha çox olması planlaşdırılır. Bu o deməkdir ki, artıq bundan sonra Azərbaycan jurnalistlərinin ciddi mənzil problemi olmayacaq. Yetərli iş stajı və, bu sahədə xidmətləri olan media nümayəndələri bilirlər ki, pulsuz mənzil almaq imkanları var.

Ötən illərdəki fəaliyyəti ilə prezident İlham Əliyev Azərbaycan mətbuatını pərakəndəlik girdabından qurtardı, jurnalistləri peşələrinin perspektivi ilə bağlı düşdükləri qeyri-müəyyənlikdən çıxarmağa bacardı. Dünənə qədər yalnız müəyyən siyasi qüvvələrin və baş redaktorların mərhəmətindən asılıb qalmış böyük jurnalist ordusu prezidentin simasında dövləti özünə dəstək kimi gördü.

Azərbaycanda fəaliyyət göstərən kütləvi informasiya vasitələrinin nümayəndələri də "RUH" Azərbaycan Jurnalistləri Müdafiə Komitəsinin (AJMK) keçirdiyi sorğuda Prezident İlham Əliyevin jurnalistlərin dostu seçilməsini məntiqi nəticə hesab edirlər.

"Bakı-Xəbər" qəzetinin baş redaktoru Aydın Quliyev Trend-ə bildirib ki, sorğu başlayanda elə bu nəticənin əldə olunacağı məlum idi: "Çünki Azərbaycan jurnalistikasının həyatında 2013-cü ildə ən əlamətdar addımlar məhz cənab İlham Əliyevin qərarı ilə atılıb. Bunlar, jurnalistlər üçün tarixdə olmayan hadisələrdir, yəni jurnalistlər üçün çoxmənzilli binanın istifadəyə verilməsi, mətduat üçün dövlət maliyyə dəstəyinin artırılması və s. bu kimi hadisələr sözsüz ki, jurnalistlərin həyatında çox böyük rol oynayıb".

A.Quliyevin sözlərinə görə, bundan əlavə bir neçə jurnalistin sosial vəziyyətinin yaxşılaşdırılması üçün Prezidentin şəxsən göstəriş verməsi, o cümlədən jurnalist Nicad Dağların müalicəyə göndərilməsi, bəzi jurnalistlərlə bağlı atılan fərdi addımlar Prezidentin mətbuat üçün etdiyi böyük işlərin 2013-cü ilə təsadüf edən müəyyən bir qismi idi: "Bütün bunların qarşısında Azərbaycan jurnalistlərinin də keçirilən sorğuya görə İlham Əliyevi mətbuatın dostu seçməsi tamamilə məntiqli və təbii nəticədir. Mən hesab edirəm ki, jurnalistlərin bu seçimi obyektivdir və İlham Əliyevin şəxsən media üçün, jurnalistlər üçün 2013-cü ildə gördüyü işlərin məntiqi nəticəsidir. Mən inanıram ki, 2014-cü ildə də belə sorğu keçirilsə, İlham Əliyev yenə jurnalistlərin dostu seçiləcək".

Trend İnformasiya Agentliyinin Azərbaycan Redaksiyasının rəhbəri Emil Hüseynli isə bildirib ki, Prezident İlham Əliyevin yenidən jurnalistlərin dostu seçilməsinin əsas səbəblərindən biri Azərbaycan iqtidarı tərəfindən ölkədə söz və mətbuat azadlığının təmin edilməsidir: "Bu gün istənilən jurnalist açıq şəkildə öz fikrini ifadə edə bilir, istənilən hadisə ilə bağlı, dövlət quruculuğu prosesləri, ayrı-ayrı məmurların fəaliyyəti, bu və digər sahələrin fəaliyyəti ilə bağlı sərbəst informasiya toplamaq, onu sərbəst təhlil etmək və sərbəst yaymaq imkanına malikdir. Çünki Azərbaycan Prezidenti İlham Əliyev jurnalistlərə böyük qiymət, azad sözə, siyasi plüralizmə dəyər verir".

E.Hüseynli, həmçinin bildirib ki, jurnalistlər üçün yaşayış binasının tikilməsinə dair verilən qərarlar, dövlət tərəfindən KİV-ə maliyyə yardımlarının edilməsi də dövlət qayğısının tərkib hissəsidir: "Təsəvvür edin ki, jurnalistlərə mənzillərin verilməsi təşəbbüsü dünya praktikasında ilk dəfədir reallaşıb. İnanıram ki, dövlət öz tərəfindən jurnalistlərin fəaliyyətinə dəstəyini ötən illərdə olduğu kimi əsirgəməyəcək, azad mətbuatın Azərbaycanda davam etməsində öz səylərini göstərəcək".

E.Hüseynlinin sözlərinə görə, sadaladığı amillər nəticəsində Prezident İlham Əliyev aparılan sorğuda jurnalistlərin dostu seçilib.

Yuxarıda qeyd olunan məqamlar, ictimaiyyətin rəyi, media sahəsi üzrə ixtisaslaşmış şəxslərin fikirləri də göstərir ki, həm 3 il öncə, həm də bu il prezident İlham Əliyevin “Jurnalistlərin dostu” seçilməsi tam obyektiv əsaslara söykənir. Birinci dəfədən keçən müddət ərzində bu dostluq daha da möhkəmlənib və gələcək perspektivi də çox parlaqdır. Media nümayəndələrinin seçimi Prezidentin mətbuatın inkişafı istiqamətində həyata keçirdiyi siyasətə tam adekvatdır. İlham Əliyevin ölkədə fikir plüralizminin, azad mətbuatın gücləndirilməsi sahəsində siyasətini media nümayəndələri görür və düzgün qiymətləndirirlər. Azərbaycan prezidenti həmişə mətbuatın dostu olub, bunu görülən işlər, çoxsaylı faktlar bir daha təsdiqləyir. «Jurnalistlərin dostu» mükafatının 2001-ci ildə ümummilli lider Heydər Əliyevə verilməsini də yada salarıqsa, ümumilikdə Azərbaycan dövlətinin jurnalistlərin yanında olduğunu, qələm əhlinə qayğı ilə bağlı bu siyasətin sistemli xarakter daşıdığını düşünmək olar.

İlham QULİYEV

Kaspi.-2013.-1 oktyabr.-S.6.